गलाति 3 - Dhimal NT

खाङधुरि माकुनु व्यवस्था केम्लि

¹ नेलाइ गलातिको खान्धुराइगेलाइ, हाइ नेलाइ ताइको बुद्दि राम्पासुन्हा, हासु नेलाइहेङ थोगिहि? येसु ख्रिस्ट हेसा क्रुस्टता सिहि, का नेलाइहेङ इङको गोताङ काथा झालाफालापा दोअ्काङ हिघाखा।

² कासेहेङ एनोङ काथा दोअ्पि, नेलाइ पबित्तरो आत्मा हेसा निङसुन्हा? हाइ व्यवस्था केम्नाङ पबित्तरो आत्मा निङसुन्हा? माको, नेलाइ पबित्तरो आत्मा निङसुन्हा हाइपालिपानु नेलाइ सुसमाचार हिङसुन्हा कालाउ खाङधुरि पासुन्हा।

³ हाइ नेलाइ ताइको बुद्दि मोअ्पासुन्हा? नेलाइ ताइको खाङधुरि जिबन पबित्तरो आत्माको कामसो सुरु पासुन्हा। एला हाइ ताइको जिबन ताइकोङ बलसो ओतापालि खाङखेना?

⁴ हाइ नेलाइको ल्होकापा गोताङ दुख खेर हानिहि? का आस पाखा, कि या खेर मान्हिहि।

⁵ नेलाइहेङ परमेस्वर दोङ पबित्तरो आत्मा पिखे, कालाउ परमेस्वर नेलाइको माझाता भारबुसाइका कामगेलाइ पाखे। हाइ या गोताङ नेलाइ मोसाको व्यवस्था मानिनाङ जेङका हि, कि सुसमाचार हिङतेङ खाङधुरि पानाङ जेङका हि?

⁶ आब्राहामहेङ दोङ खानाइने, “वा परमेस्वरता खाङधुरि पाहि, ओदोङ भाअ्सिङ परमेस्वर वासेहेङ धर्मि बानाइहि।”

⁷ ओदोङ भाअ्सिङ नेलाइ या गिलि गोइस्वाना, कि जाइ बुङ आब्राहाम भाइपा परमेस्वरता खाङधुरि पाखे, इम्बालाइ दोङ जातिङकोङ आब्राहामको हारागुटियागेलाइ हि।

⁸ लाम्फाङ दोङ धर्मसास्तरता गैर-यहुदिगेलाइहेङ बुङ खाङधुरिसोङ परमेस्वर धर्मि बानाइयाङ दोअ्का काथा लेखेका हिघाहि। ओदोङ भाअ्सिङ इदोइ रेम्का सुसमाचार लाम्फाङ दोङ परमेस्वर आब्राहामहेङ दोअ्का हिघाहि, “नाअ् पाहासोङ सुमिङको गोताङ द्‍याङगेलाइहेङ का आसिस प्याङका।”

⁹ परमेस्वर आब्राहामहेङ वाको खाङधुरि पाहासोङ आसिस पिहि, एन्साङ दोङ हासु बुङ येसु ख्रिस्टता खाङधुरि पाखे पानु परमेस्वर इम्बालाइहेङ आब्राहाम भाइपाङ आसिस प्याङ।

¹⁰ कालाउ मोसाको व्यवस्थाता लेखेका हि, कि जाइ मोसाको व्यवस्थाको गोताङ नियमगेलाइ पालि माकेम्खे, परमेस्वरको साराप वाको ह्रुता हुनाङ। ओदोङ भाअ्सिङ व्यवस्था मानितेङ परमेस्वरको आगाता धर्मि जेङलि कोसिस पाका झाराङ ह्रुता स्राप परिका हि। हाइपालिपानु हासु बुङ इङको कानुनगेलाइ जेलाउ बुङ पुरा रितिहोइ केम्लि मादोखे।

¹¹ इदोइसो या झालाफालापा जेङखे, कि व्यवस्थासो हासु बुङ परमेस्वरको आगाता धर्मि जेङलि मादोखे, हाइपालिपानु धर्मसास्तरता लेखेका हि, “जाइ परमेस्वरता खाङधुरि पाखे, वा दोङ वाकोसो धर्मि जेङखे, कालाउ उङको द्‍याङ दोङ जेलाउ बुङ बान्चितेङ ह्यावा।”

¹² कालाउ मोसाको व्यवस्था पालन पालिको भाअ्सिङ, परमेस्वरता खाङधुरिता पालि जरुरि मान्थु, जेसाङ धर्मसास्तरता लेखेका हि, “इम्बालाइ मोसाको गोताङ व्यवस्था केम्कासो दोङ जियाइयावा।”

¹³ कालाउ व्यवस्था मामानिनाङ लोका सारापसो ख्रिस्ट केलाइहेङ लाअ्पाहि। जेलाउ येसु ख्रिस्ट क्रुस्टता सिहि, कालाउ वा केलाइको पापगेलाइको स्राप ताइमि ह्रुता ह्रुहि। हाइपालिपानु धर्मसास्तरता लेखेका हि, “जेदोङ द्‍याङ क्रुस्टता सिखे उङको स्रापित दोङ हि।”

¹⁴ येसु ख्रिस्ट इसिका पाहि, कालाउकि परमेस्वर आब्राहामहेङ पिका आसिस येसु ख्रिस्ट पाहासो गैर-यहुदिगेलाइ बुङ निनाको, कालाउ केलाइको खाङधुरिसो परमेस्वर पाका बाचासो पबित्तरो आत्मा निङलि द्वाको।

¹⁵ खान्धुराइ ओनेगेलाइ, का दिनाङको जिबनसो एनोङ उधाहरन द्वाङका, जेलाउ न्हेमि द्‍याङगेलाइ मिलितेङ पाका हिदोइ बुङ काथाता छाप दागाइखे पानु, हासु बुङ इङकोता आधे ना ते थोपिलि दोखे ना ते घातिपालि दोखे।

¹⁶ इन्सिकाङ दोङ परमेस्वर आब्राहाम दोफा कालाउ वाको चानचुगेलाइ दोफा बाचा पाहि, “नाङको एमि हारागुयाटियासो गोताङ द्‍याङगेलाइ आसिस निनावा।” धर्मसास्तर हारागुटियागेलाइहेङ खिनिङ मादोअ्खे, भरु हेन्जा द्‍याङगेलाइहेङ दोअ्खे। कालाउ “हारागुटियागेलाइहेङ” दोअ्लाउ एमि द्‍याङको बिसोइता दोअ्खे, जाइ चाहि येसु ख्रिस्ट हि।

¹⁷ काङको दोअ्का को मतलब इदोइ दोङ हि, कि परमेस्वर आब्राहाम दोफा बाचा पाका द्‍यासाइ ए-कुरि ते बासार न्हुसो खिनिङ मोसासो व्यवस्था पिहि। कालाउ केलाइ इदोइ दोअ्लि माद्वाङ, कि एला परमेस्वरको बाचाको हिदोइ बुङ महत्व मान्थु, हाइपालिपानु एलाते केलाइ दोफा व्यवस्था हि। कालाउ परमेस्वरको बाचा आझाइ बुङ पाक्का हि कालाउ पुरा जेङलि गोइका हि।

¹⁸ हाइपालिपानु द्‍याङगेलाइ मोसाको व्यवस्था मानिनाङ परमेस्वर आसिस पिकानुते, बाचासो लोका आसिस मानिङधाङ। भरु परमेस्वर ताइको बार्का आनुग्रहसो आब्राहामहेङ आसिस पिहि, हाइपालिपानु परमेस्वर एसा पालि बाचा हेन्जाङ लाम्फासोङ पाका हिघाहि।

¹⁹ एन्सा पानु व्यवस्था हाइ पालि आवस्यक परेहि? परमेस्वर व्यवस्था पिहि, कालाउकि द्‍याङगेलाइ ग्याको केलाइ हेथे पापि हिनाहि। कालाउ मोसाको व्यवस्था आब्राहामको सान्तान माजेम्पा थेकापा इङको व्यवस्था चोलितेङ हि, जाइको बारेता परमेस्वर बाचा पाका हिघाहि। कालाउ परमेस्वर स्वर्गदुतसो मोसाहेङ व्यवस्था पिहि, जाइ चाहि परमेस्वर कालाउ द्‍याङगेलाइको माझाको मध्यस्थ कर्ता हि।

²⁰ एमि खान्तेङ हेन्जा द्‍याङगेलाइ दोफा बाचा पालाउ एमि मध्यस्थ कर्ता हिलि गोइखे। कालाउ परमेस्वर आब्राहाम दोफा बाचा पालाउ मध्यस्थ कर्ता मागोइहि।

व्यवस्थाको काम

²¹ एन्सा पानु, हाइ व्यवस्था परमेस्वर पाका बाचाको बिरोधता हि? मिधुलाउ बुङ मान्थु। हाइपालिपानु जेसापा व्यवस्था केलाइहेङ आनान्त जिबन पिलि दोनुते, केलाइ व्यवस्था केम्तेङ परमेस्वर दोफा धर्मि जेङलि द्वाङ।

²² कालाउ धर्मसास्तर तिङपाखे, कि केलाइ झाराङ पापि हिन्हाहि, कालाउकि परमेस्वर पि दोअ्का बाचा येसु ख्रिस्टता खाङधुरि पाकालाइ निनाको।

²³ कालाउ येसु ख्रिस्ट लोका खान्तेङ लाम्फा कालाउ केलाइ वासेहेङ खाङधुरि पाका खान्तेङ लाम्फा केलाइ मोसाको व्यवस्थाको आधिनता हिघानाखे, कालाउ परमेस्वर ख्रिस्टहेङ मातिङपाका धाउ केलाइ व्यवस्थाको आधिनता कैदि कोनिङ हिघानाखे।

²⁴ ओदोङ भाअ्सिङ ख्रिस्ट मालोपा भरि केलाइहेङ आगुवाइ पालि व्यवस्था पिहि, कालाउकि केलाइ ख्रिस्टसो परमेस्वरको आगाता धर्मि जेङलि द्वाको।

²⁵ कालाउ एला केलाइ ख्रिस्टता खाङधुरि पाकानाङ, एलासो केलाइहेङ मोसाको व्यवस्थाको आगुवाको खाचो मान्थु।

परमेस्वरको सान्तान

²⁶ ओदोङ भाअ्सिङ नेलाइ झाराङ झना येसु ख्रिस्टता खाङधुरि पानाङ परमेस्वरको सान्तान जेङसुन्हा।

²⁷ हाइपालिपानु नेलाइ मध्ये जेथे येसु ख्रिस्टता बप्तिस्ता ह्रुसुन्हा, नेलाइ झाराङ ख्रिस्टको स्वभाबहेङ होङका हिसुन्हा, जेसाङ हासु बुङ नावा लोखोन होङखे।

²⁸ ओदोङ भाअ्सिङ एला येसु ख्रिस्टता यहुदि कालाउ गैर-यहुदि, बान्धाइति कालाउ लाअ्न्हाका द्‍याङको माझाता हिदोइ बुङ फरक मान्थु। कालाउ वाबाल कालाउ बेबालता बुङ हिदोइ बुङ फरक मान्थु। हाइपालिपानु येसु ख्रिस्टता केलाइ झाराङ ए-सामान हिनाहि।

²⁹ जेसापा नेलाइ ख्रिस्टता हिसुना पानुते नेलाइ जातिङकोङ आब्राहामको सान्तान हिसुन्हा, कालाउ वाको होक वाला हिसुन्हा कालाउ परमेस्वर आब्राहामहेङ प्याङका दोअ्का बाचा नेलाइ बुङ निङस्वाना।