गलाति 2 - Dhimal NT

छाल्न्हाका चात्यागेलाइसो पावलहेङ स्‍वागत

¹ तेद्‍या बासार न्हुसो बार्नाबास दोफा का आरोङ यरुसेलेम सहरता हानिघा कालाउ तितसहेङ बुङ दोफाङ चुम्पुघा।

² परमेस्वर कासेहेङ इन्ता हाने दोअ्कानाङ का इन्ता हानिघा। जेलाउ का इन्ता हिघाखा का आधिमि मन्डलिको आगुवागेलाइ दोफा सिकापा भेतिघा, कालाउ जेलाउ इम्बालाइहेङ सुसमाचारको ब्याख्या पाघा जेदोङ का गैर-यहुदिगेलाइको माझाता बुङ प्राचार पाका हिघाखा, कालाउकि काङको लाम्फा पाका कामगेलाइ कालाउ एला पाका कामगेलाइ खेर मान्हाको।

³ कालाउ का दोफा हिका तितस एमि ग्रिक हिघाहि कालाउ वाको खाताना जेङका मान्थुघाहि। कालाउ बुङ यरुसेलेम मन्डलिको आगुवागेलाइ वासेहेङ सुइकार पाहि, कालाउ वासेहेङ खाताना पालि गोयाङ दोअ्तेङ कर मापाहि।

⁴ इदोइ तितसको खाताना माजेङका काथा बाराहि, जेलाउ आधिमि धातुवा ओनेगेलाइ केलाइको दल लिता सिकापा दुल्तेङ केलाइको येसु ख्रिस्टता हिका स्वतन्तरोताहेङ नासा पालि भोघाखे, कालाउकि इम्बालाइ केलाइहेङ आरोङ यहुदि व्यवस्थाको बान्धाइति बानाइलि द्वाको।

⁵ कालाउ सुसमाचारको सत्ये नेलाइ दोफा हितेङ ह्याको दोअ्तेङ केलाइको इम्बालाइ दोफा सहमति माजेङहि।

⁶ कालाउ इङको यरुसेलेम मन्डलिको आगुवागेलाइ काङको धिरपाका सन्देसहेङ फेरिलि बाध्ये मापाहि। इम्बालाइ जिसिकाङ हिलाउ बुङ कासेहेङ हिदोइ बुङ फरक माजेनाङ, हाइपालिपानु परमेस्वर द्‍याङगेलाइको बाहारको रुप खाङतेङ खिनिङ न्याय मापाखे।

⁷ कालाउ उङको आगुवागेलाइ तिङहि, कि परमेस्वर पतरुसहेङ जेसाङ यहुदिगेलाइहेङ सुसमाचार प्राचार पालि खाताइहि, एन्साङ दोङ परमेस्वर कासेहेङ गैर-यहुदिगेलाइको माझाता सुसमाचार प्राचार पालि खाताइहि।

⁸ हाइपालिपानु जेसाङ परमेस्वर पतरुसहेङ यहुदिगेलाइको माझाता छाल्न्हाका चात्या जेङतेङ काम पालि लागाइहि, कालाउ वा दोङ कासेहेङ गैर-यहुदिगेलाइको माझाता छाल्न्हाका चात्या जेङतेङ काम पालि लागाइहि।

⁹ याकुब, पतरुस, कालाउ युहान्‍ना जाइ मन्डलिको आगुवागेलाइ भाइपा मानिका हि, इम्बालाइ बुझिहि, कि परमेस्वर कासेहेङ बिसेस बरदान पिका हि। ओदोङ भाअ्सिङ इम्बालाइ बार्नाबास कालाउ कासेहेङ सुइकार पाहि। इम्बालाइ दोअ्हि, केलाइ गैर-यहुदिगेलाइकोता सुसमाचार प्राचार पासु, कालाउ केलाइ चाहि यहुदिगेलाइकोता दोङ प्राचार पाङ।

¹⁰ इम्बालाइ केलाइ दोफा एनोङ खिनिङ काथाको बिन्ति पाहि, कि यरुसेलेमता हिका गरिब खान्धुराइगेलाइहेङ साघाइसु। कालाउ एन्सा पालि कासेहेङ बुङ बार्का इच्छा हि।

पावल कालाउ पतरुसको मन-मुटाब

¹¹ एनि जेलाउ पतरुस एन्तिओक सहरता लोहि, का झाराङको आगाता वाको बिरोध पाघा। हाइपालिपानु जेदोङ वा पातेङ हिघाहि इङको गलत हिघाहि।

¹² हाइपालिपानु वा लाम्फा गैर-यहुदिगेलाइ दोफा उम चाघाखे, कालाउ जेलाउ याकुबको दिङगिल्का आधे खान्धुराइगेलाइ पतरुसकोता लोहि, वा गैर-यहुदिगेलाइ दोफा चालि कालाउ आम्लि लाअ्हि। हाइपालिपानु वा उङको यहुदिगेलाइ दोफा थिघाहि।

¹³ कालाउ पतरुस दोफा एन्टिओक सहरको भेनेङ यहुदि खान्धुराइगेलाइ बुङ कपटि जेङहि। इता थेकापा कि बार्नाबास बुङ एन्साङ पाहि।

¹⁴ कालाउ जेलाउ सुसमाचारको सत्ये आन्सार इम्बालाइ मापिताइका का तिङघा, का इम्बालाइ झाराङको आगाता पतरुसहेङ दोअ्घा, “नाअ् यहुदि जेङतेङ बुङ यहुदिगेलाइ भाइपा ब्यभार मापाखेना, कालाउ हाइ पालि गैर-यहुदिगेलाइहेङ यहुदिगेलाइको मुन्धुम मानिलि बाध्ये बानाइसुन्हा?”

¹⁵ केलाइ जोलोम सोङ यहुदिगेलाइ दोङ हिनाहि, कालाउ गैर-यहुदिगेलाइ कोनिङ पापि माको, जेसाङ केलाइ इम्बालाइहेङ दोअ्न्हाखे।

¹⁶ केलाइ गिनाखे, कि मोसाको व्यवस्था मानिकाता खिनिङ हासु बुङ परमेस्वरको आगाता धर्मि माजेङखे। भरु येसु ख्रिस्टता खाङधुरि पाहे पानु खिनिङ द्‍याङ परमेस्वरसो धर्मि जेङलि द्वावा। ओदोङ भाअ्सिङ केलाइ बुङ येसु ख्रिस्टता खाङधुरि पानाखे। कालाउकि केलाइ मोसाको व्यवस्था मानितेङ माको, भरु येसु ख्रिस्टता खाङधुरि पानाङ धर्मि जेङलि द्वाइने, हाइपालिपानु मोसाको व्यवस्था मानितेङ हासु बुङ धर्मि जेङलि माद्वाङ।

¹⁷ हाइपालिपानु केलाइ मोसाको व्यवस्था मानितेङ माको, भरु येसु ख्रिस्टता खाङधुरि पानाङ परमेस्वर केलाइहेङ धर्मि बानाइहि, ओदोङ भाअ्सिङ आधिमि यहुदिगेलाइ केलाइहेङ पापि जेङका थानिखे। एन्सा पानु हाइ ख्रिस्ट केलाइहेङ पाप पालि लागाइहि? मिधुलाउ बुङ माको।

¹⁸ कालाउ जेसापा का मोसाको व्यवस्था पालि केम्तेङ परमेस्वर पाहासो धर्मि जेनाङका दोअ्तेङ सुइकार पाखा पानु का जातिङको पाप पाखा।

¹⁹ हाइपालिपानु कासेहेङ थाहा हि, कि मोसाको व्यवस्था पालि केम्नाङ का धर्मि जेङलि मादाङका, ओदोङ भाअ्सिङ का परमेस्वरको भाअ्सिङ बान्चिलि द्वाको दोअ्तेङ व्यवस्थाको भाअ्सिङ का सिका हिघा।

²⁰ या इसिका हि, कि का बुङ येसु ख्रिस्ट दोफाङ क्रुस्टता सिघा, एला उसो का जियाइका माको भरु येसु ख्रिस्ट का लिता जियाइखे। जेदोङ जिबन जिउता एला जियाइखा, इङको परमेस्वरको चान ह्रुता खाङधुरि पातेङ जियाइखा, जाइ कासेहेङ हेन्जा प्रेम पाखे कालाउ काङको भाअ्सिङ ताइको जिबन बुङ आरपन पाहि।

²¹ परमेस्वर केलाइहेङ ताइको आनुग्रहसो धर्मिको रुपता सुइकार पाहि। का इङको काथा हेलाउ बुङ मानिल्लाङका। हाइपालिपानु जेसापा द्‍याङगेलाइ मोसाको व्यवस्था पालि केम्तेङ धर्मि जेङखे पानुते, ख्रिस्ट सिलि मागोइधाङ।