एफिसि 6 - Dhimal NT

चान-चामिन्दि कालाउ आमाइ-आबा सम्बन्धि आर्ति

^1-3 धर्मसास्तरता इसिका लेखेका हि, ताइको आमाइ-आबाको आदार पासु, कालाउ गोताङ काथा नेलाइको भाअ्सिङ रेम्का जेनावा कालाउ प्रिथिबिता नाङको ह्रिङका आयु जेनावा। इदोइ लाङ आग्या दोङ हि, जेदोङ परमेस्वर प्रतिग्या दोफाङ पिहि। ओदोङ भाअ्सिङ नेलाइको ख्रिस्ट दोफाको सम्बन्धको कारन, नाअ् चान-चामिन्दिगेलाइ ताइको आमाइ-आबाको आग्याकारि जेङलि गोइखे।

⁴ आबागेलाइ, ताइको चान-चामिन्दिगेलाइहेङ चेर माताम्पापि, भरु इम्बालाइहेङ प्रभुको इच्छा आन्सार धिरपासु कालाउ तालिम पितेङ हुर्कि पासु।

⁵ ओइ बान्धाइतिगेलाइ, थितेङ कालाउ इमान्दारहोइ ख्रिस्टको सेवा पाका भाइपा नेलाइको सुमिङको ग्रिहिको आग्या बुङ केम्सु।

⁶ नेलाइको ग्रिहिहेङ खुसि बानाइलिको भाअ्सिङ माकुनु इम्बालाइ तिङका बेला खिनिङ आग्या माकेम्सु, भरु ख्रिस्टको दास भाइपा परमेस्वर जेदोङ चाहिखे इङकोङ काम ताइको पुरा ह्रदयहोइ पासु।

⁷ द्‍याङगेलाइहेङ पाका भाइपा माको, भरु प्रभुको सेवा पाका भाइपाङ खुसिसो ताइको गिह्रिको सेवा पासु।

⁸ हाइपालिपानु नेलाइहेङ थाहा हि, कि बान्धाइतिलाउबुङ, माकोलाउ बुङ रेम्का काम पाका झाराङहेङ प्रभु इनाम प्याङ।

⁹ एन्साङ पातेङ गिह्रिगेलाइ, नेलाइ बुङ ताइको बान्धाइतिगेलाइहेङ धम्कि मापिसु भरु रेम्का ब्यभार पासु, या गितेङ कि नेलाइ न्हेमिकोङ एनोङ दोङ गिह्रि स्वर्गता हि, वा झाराङ द्‍याङगेलाइ दोफा ए-सामान ब्यभार पाखे।

आत्मिकि धुम

¹⁰ आम्तिमता नेलाइ प्रभुता कालाउ वाको बार्का सरबुङसो आत्माता बल्लियाका जेङसु।

¹¹ जेसाङ एमि सिपाइ धुमता हानिलाउ गोताङ धुमको आमेनेगेलाइ फुतेङ चुम्पुखे, एन्साङ पातेङ साइतानको चालको बिरोधता जाअ्लि परमेस्वरको पिका गोताङ आमेनेगेलाइ चालाइलि गोइखे।

¹² हाइपालिपानु केलाइको धुम द्‍याङगेलाइको बिरोधता माको, भरु आगुवागेलाइ, सासकगेलाइ, सुमिङको कितिकितिकाको सरबुङ कालाउ स्वर्गियता हिका दुस्ट सरबुङगेलाइ दोफा हि।

¹³ ओदोङ भाअ्सिङ नेलाइहेङ परमेस्वर पिका गोताङ आमेनेगेलाइ ल्होपासु कालाउकि जेलाउ खाराबको दिना ल्वाङ, कालाउ इङको गोताङ काथाको सामाना पातेङ नेलाइ बल्लियाका जेङतेङ जाअ्लि दोसु।

¹⁴ ओदोङ भाअ्सिङ जेसाङ सिपाइ धुम पालि तियार जेङलाउ ताइको केङखेनेता पेति तेअ्खे, एन्साङ दोङ साइतानको बिरोधता धुम पालि ताइमिहेङ तियार जेङलि परमेस्वरको सत्येको आनुसरन पासु। कालाउ जेसाङ छात्ति पाताहोइ सिपालाइहेङ धुमता बान्चिपाखे, एन्साङ पातेङ नेलाइको धार्मिकताहोइ नासेहेङ बान्चि पावा, जेलाउ साइतान नासेहेङ झाअ्मिरियावा।

¹⁵ जेसाङ सिपालाइ धुमता हानिलि लाम्फा जुत्ता सुङखे, एन्साङ दोङ नेलाइ साइतान दोफा धुम पालि परमेस्वरको सान्तिको सुसमाचारता भर परिलि गोइखे।

¹⁶ कालाउ जेसाङ सिपाइ सतुरुको बानसो बान्चिलि ताइमि दोफा ढाल चुम्खे, एन्साङ दोङ ताइमिहेङ साइतानको हान्तिसो बान्चिलि ख्रिस्टता बल्लियाका खाङधुरि पातेङ हिसु।

¹⁷ जेसाङ धुमता सिपाइ ताइको पुरिङ बान्चिपालि तोप तुखे, एन्साङ दोङ परमेस्वर नेलाइहेङ साइतानसो बान्चि पावा। कालाउ सिपाइ ताइमिहेङ बान्चिपालिको भाअ्सिङ तरवार चुम्का भाइपा ताइमिहेङ बान्चिपालि परमेस्वरको बचन प्रयोग पासु। जाइ पबित्तरो आत्मा पिखे।

¹⁸ कालाउ जेलाउ बुङ गोताङ प्रार्थाना कालाउ बिन्ति पबित्तरो आत्माता पासु। कालाउ इदोइ गोताङ काथागेलाइ मनता ताअ्तेङ गोताङ जनगेलाइको भाअ्सिङ जेलाउ बुङ प्रार्थाना पासु।

¹⁹ कालाउ काङको भाअ्सिङ बुङ प्रार्थाना पापिसु, कि जेलाउ का नुइ धुइलि तोम्लाउ परमेस्वर कासेहेङ बचनगेलाइ प्याको कालाउ का माअ्थिसिङ परमेस्वरको सुसमाचारको म्होनाका सत्येहेङ गोताङ द्‍याङगेलाइहेङ दोअ्लि द्वाको।

²⁰ हाइपालिपानु कासेहेङ इदोङ सुसमाचार प्राचार पालि दिङगिल्का हि, कालाउ का एला इता झ्यालखानाता इङको सुसमाचार एमि परमेस्वरको राजदुत भाइपा पादोङखा। प्रार्थाना पापिसु, कि जेसाङ का धुइलि गोइका हि, एन्साङ दोङ का माअ्थिसिङ सुसमाचार प्राचार पालि द्वाको।

आम्तिम आभिबादन

²¹ प्रभुता केलाइको आनाउ खान्धुराइ ओने कालाउ खाङधुरि योग्य सेवक तुखिकुस काङको बारेता गोताङ काथा नेलाइहेङ दोअ्प्याङ, कालाउकि नेलाइ बुङ थाहा निङलि दोसु कि का हिसिका हिघा, हाइ पादोङखा।

²² केलाइ हेसा पाका हिनाहि, इङको हिङतेङ नेलाइहेङ हाउसाइ मिलियाको दोअ्तेङ का वासेहेङ नाङकोता दिङगिल्का हिघा।

²³ का प्रार्थाना पाखा, कि केलाइको आबा परमेस्वर कालाउ प्रभु येसु ख्रिस्ट नाअ् झाराङ खान्धुराइगेलाइहेङ सान्ति प्याको। कालाउ इम्बालाइ नेलाइहेङ ख्रिस्टता लागातार खाङधुरि पालि कालाउ एमिसो भेनेङ दोफा प्रेम पालि साघाइयाको।

²⁴ केलाइको प्रभु येसु ख्रिस्टहेङ माओताका प्रेम पाका झाराङ दोफा परमेस्वरको आनुग्रह ह्याको।