एफिसि 4 - Dhimal NT

ख्रिस्टको जिउता एनोङ दोङ

¹ प्रभुको सेवा पानाङ का एमि कैदि जेङका हिघा, कालाउ का नेलाइहेङ बिन्ति पाखा, परमेस्वर ताइको सान्तान जेङलि काइका को योग्यता आन्सार ताइको जिबन जियाइसु।

² जेलाउ बुङ दुखिता, मोनोइता कालाउ धर्यता एमिसो-भेनेङहेङ प्रेम तिङपासु।

³ इसिका पालि मेनाङ कोसिस पासु, कालाउकि नेलाइ जेलाउ बुङ मिलितेङ हिलि दोसु, हाइपालिपानु नेलाइ पबित्तरो आत्मा पाहासो ए-जेङका हिसुन्हा।

⁴ केलाइ झाराङ खान्धुराइगेलाइ एनोङ दोङ जिउको आङगगेलाइ भाइका हिनाहि, कालाउ केलाइ ओदोङ पबित्तरो आत्मा बुङ निङका हिनाहि, आस बुङ एनोङ दोङ हि, जाइको भाअ्सिङ परमेस्वर नेलाइहेङ ताइको द्‍याङगेलाइ जेङलि काइहि।

⁵ केलाइ झाराङको एनोङ दोङ प्रभु हि, जाइता केलाइ झाराङ खाङधुरि पानाखे, कालाउ केलाइ झाराङ एनोङ दोङ बप्तिस्ता ह्रुनाहि।

⁶ कालाउ केलाइ झाराङको एनोङ दोङ परमेस्वर हि, जाइ झाराङको आबा हि। वा झाराङको प्रभु हि कालाउ वा केलाइ झाराङता हि।

⁷ कालाउ ख्रिस्ट केलाइ झाराङहेङ वाको काम पालिको भाअ्सिङ बिसेस योग्यतागेलाइ पिका हि।

⁸ ओदोङ भाअ्सिङ धर्मसास्तरता इसिका दोअ्का हि, “वा ह्रुता स्वर्ग हानिलाउ, हेन्जा कैदिहेङ ताइमि दोफा चुम्पुहि, कालाउ द्‍याङगेलाइहेङ बरदानगेलाइ पिहि।”

⁹ जेलाउ धर्मसास्तर दोअ्खे, “वा ह्रुता हानिहि” याको माने हाइ हि? इदोइ झोको खिनिङ हि, कि वा प्रिथिबिको लिताको भाग थेकापा लेता खुहि।

¹⁰ येसु ख्रिस्ट प्रिथिबिको लिताको भाग थेकापा लेता खुहि, वा दोङ आकास थेकापा हानिहि कालाउकि वा गोताङ थामेता हिलि द्वाको।

¹¹ कालाउ ख्रिस्ट दोङ मन्डलिहेङ इदोइ योग्यतागेलाइ पिहि: वा आधिमिहेङ छाल्न्हाका चात्यागेलाइ, आधिमिहेङ परमेस्वरको बक्तागेलाइ, आधिमिहेङ सुसमाचार प्राचार पालि, आधिमिहेङ मन्डलिको आगुवागेलाइ कालाउ आधिमिहेङ सिक्स्यकगेलाइ नियुक्ति पाहि।

¹² ख्रिस्ट द्‍याङगेलाइहेङ इदोइ योग्यतागेलाइ पिहि, कालाउकि इम्बालाइ परमेस्वरको पबित्तरो जनगेलाइहेङ वाको सेवा पालि तियार बानाइलि द्वाको कालाउ ख्रिस्टता इम्बालाइको खाङधुरि बल्लियाका जेनाको।

¹³ केलाइ ताइको खाङधुरि पाहासो कालाउ परमेस्वरको चानको बारेता केलाइको फोम पाका पाहासो ए माजेङपा थेकापा इदोइ हितेङ ह्याङ। कालाउ केलाइ परिपक्क जेनाङ, कालाउ केलाइ वाको भाइपाङ जेनाङ, जेसाङ ख्रिस्ट हि।

¹⁴ ओदोङ भाअ्सिङ केलाइ जामाललाइ भाइपा माभायाङ, एला केलाइ नाउ भाइपा माजेनाङ जाइहेङ भेरमाहोइ कालाउ चिको उलाउ उलाउको छाल्काहोइ जेसो ओसोङ थुगिल्खे। जाइको माने या कि एला चङख, कालाउ कपटि द्‍याङगेलाइ ताइको धाताइका सिक्स्याहोइ केलाइहेङ दोका मापियाङ।

¹⁵ भरु प्रेमहोइ सत्ये नुइ धुइकाताङ, कालाउ केलाइ ख्रिस्ट भाइपा गोताङ काथाता परिपक्क जेनाइने, जाइ चाहि ताइको जिउ मन्डलिको पुरिङ हि।

¹⁶ केलाइ झाराङ ख्रिस्टता खाङधुरि पाकालाइ वाकोङ जिउको आङगगेलाइ भाइका हिनाहि, जेसाङ एमि द्‍याङको जिउको गोताङ आङगगेलाइ जोर्नि पाहासो तेअ्का हिखे, कालाउ जेलाउ जिउको गोताङ आङग एनोङ दोङ बानाइका आङग ठिकसो काम पाखे। कालाउ जिउ बाराखे कालाउ बल्लियाका जेङखे। एन्सा पातेङ केलाइ झाराङ मिलितेङ ख्रिस्टको काम पानाखे, कालाउ केलाइ बल्लियाका कालाउ परिपक्क जेङन्हाखे कालाउ एमिसो भेनेङहेङ हेन्जा प्रेम पानाखे।

ख्रिस्टता नावा जिबन

¹⁷ ओदोङ भाअ्सिङ प्रभुको पिका खाबारासो का या दोअ्खा, कि परमेस्वरहेङ मानाल्का द्‍याङगेलाइ कोनिङ उदेस्य मान्थुका जिबन माजियाइने।

¹⁸ हाइपालिपानु इम्बालाइ बुझिलि मादोअ्खे, कालाउ इम्बालाइको जिद्दि कालाउ आग्यानताको कारन परमेस्वरको पिका नावा जिबन इम्बालाइता मान्थु।

¹⁹ हाइपालिपानु इम्बालाइ एला मालेदेरखे, इम्बालाइ मारेम्का काम भारि ताइको मन लागाइका हि, इम्बालाइ गोताङ खाल्को मारेम्का काम पाखे कालाउ इम्बालाइ आझाइ हेन्जा पालि भोखे।

²⁰ कालाउ नेलाइते ख्रिस्टको सिक्स्यासो इसिका काथा माधिरसुन्हा।

²¹ नेलाइ येसु ख्रिस्टको बारेता जेदोङ हिङका हिसुना कालाउ इम्बालाइको सिक्स्यकगेलाइ नेलाइहेङ जेदोङ धिर्पाका हि, ख्रिस्टको बारेता हिङका इङको सत्ये सन्‍देस दोङ हि।

²² नेलाइको सिक्स्यकगेलाइ पुर्ना स्वभाव कालाउ पुर्ना चालचलन लाअ्लि गोइखे दोअ्तेङ नेलाइहेङ धिर्पाका हिघाहि, नेलाइको मारेम्का इच्छाहोइ नेलाइहेङ धोका पिहि कालाउ नेलाइको जिबनहेङ बार्बाद पाहि।

²³ कालाउ एला पबित्तरो आत्माहेङ नेलाइको बिचार नावा बानाइलि पिसु।

²⁴ कालाउ परमेस्वर नेलाइहेङ नावा स्वभाव पिका हि, जेदोङ वाको ताइकोङ स्वभाव भाइका हि। ओदोङ भाअ्सिङ इङको नावा स्वभाव भाइपा जियाइसु कालाउ जातिङकोङ धर्मि कालाउ पबित्तरो जेङसु।

²⁵ ओदोङ भाअ्सिङ नेलाइ धाताइका काथा दोअ्लि लाअ्लि गोइस्वाना। कालाउ जेलाउ बुङ खान्धुराइगेलाइ दोफा सत्ये काथा दोअ्सु। हाइपालिपानु केलाइ झाराङ ख्रिस्टको एनोङ दोङ जिउको आङगगेलाइ हिनाहि।

²⁶ नेलाइ चेर ताङ पासुन्हा पानु चेरहोइ पाप चाहि माह्याको। सान्हे दुबिलि खान्तेङ लाम्फा दोङ नेलाइको चेर सियाको।

²⁷ कालाउ साइतानहेङ धोका पिलि माउका मापि।

²⁸ खुकालाइ एला उसो माखुवाको। भरु वा ताइको खुरहोइ इमानदारसो परिस्रोम पाको, कालाउकि गरिब द्‍याङ दोफा बाखाराइलिको भाअ्सिङ वाको दोफा हाइ दोङ ह्याको।

²⁹ नेलाइको नुइसो मारेम्का काथागेलाइ माओल्लेयाको, भरु द्‍याङगेलाइको सुधारको भाअ्सिङ भलाइको काथा पासु, कालाउकि हिङकालाइको आत्मिक फाइदा जेनाको।

³⁰ कालाउ परमेस्वरको पबित्तरो आत्माहेङ नेलाइको पाका कामसो दुखि माबानाइसु, कालाउ नेलाइ दोङ परमेस्वरको हिसुना दोअ्का तिङपालि वा दोङ नेलाइहेङ पबित्तरो आत्माहेङ छाप भाइका दागाइका पिका हि। कालाउ एनि वा नेलाइहेङ पुरन रुपहोइ लाअ्पावा।

³¹ गोताङ मारेम्का बिचारगेलाइ, चेरचुङ, क्रोड, फेसुका, निन्दा कालाउ गोताङ खाल्को आखेका ब्यभार लाअ्पिसु।

³² एमिसो भेनेङहेङ दाया कालाउ क्रिपा पासु कालाउ परमेस्वर ख्रिस्ट पाहासो नेलाइहेङ माफ पिका भाइपाङ नेलाइ बुङ एमिसो-भेनेङहेङ माफ पिसु।