कलस्सि 4 - Dhimal NT

¹ गिह्रिगेलाइ, नेलाइ ताइको बान्धाइतिगेलाइहेङ ए साम्मान ब्यभार पासु, या गितेङ कि नेलाइको बुङ स्वर्गता एमि ग्रिहि हि।

² नेलाइ लागातार प्रार्थाना पातेङ हिसु, जेलाउ नेलाइ प्रार्थाना पासुखेना चङख जेङसु कालाउ जेलाउ बुङ परमेस्वरहेङ धन्यबाद पि।

³ केलाइको भाअ्सिङ बुङ प्रार्थाना पासु, कालाउकि ख्रिस्टको इङको रहस्यको सुसमाचार प्राचार पालि परमेस्वर केलाइहेङ दामा खोलि पाप्याको, जाइको भाअ्सिङ का झ्याल्खानाता हिघा।

⁴ पार्थाना पासु कि का ख्रिस्टको रहस्य बुझिपा माथिसिङ झाराङ द्‍याङगेलाइको आगाता खुल्ला रुपता दोअ्लि द्वाको।

⁵ नेलाइ खान्धुराइगेलाइ दोङ हिसुना दोअ्तेङ तिङपालिको भाअ्सिङ गोताङ आबसर रेम्फा प्रयोग पासु, येसुता खाङधुरि मापाकालाइ दोफा बुद्दिमानि दोफा ब्यभाहार पासु।

⁶ देसे चाअ्का आमेनेहेङ ताअ्का बानाइका भाइपा नेलाइको काथा जेलाउ बुङ ताअ्का ह्याको, जेसापा नेलाइ एसा पासुना पानु गिस्वाना कि हेसा नेलाइको खाङधुरिको बिसोइता प्रस्न पाकालाइहेङ जबाफ पिलि।

आम्तिम सेउपाखा

⁷ जेलाउ तुखिकस केलाइको आनाउ खान्धुराइ ओने, खाङधुरि योग्य सेवक कालाउ प्रभुता दोफाङको दास तुखिकस नेलाइकोता ल्वाङ वा काङको बिसोइता गोताङ काथा नेलाइहेङ दोअ्प्यावा।

⁸ का वासेहेङ नेलाइकोता दिङगिल्का हिघा, कालाउकि नेलाइ केलाइको बिसोइता थाहा गिसु, कि केलाइ हेसा काम पादोङन्हाखे, कालाउ वा नेलाइहेङ खाङधुरिता बल्लियाका जेङलि साघाइयाको।

⁹ तुखिकस दोफा ओनेसिमस लोदोङखे, कालाउ ओनेसिमस नेलाइको नगरसो लोका दोङ, कालाउ वा केलाइको खाङधुरि योग्य कालाउ आनाउ खान्धुराइ ओने दोङ। इताको गोताङ हालखबर तुखिकस कालाउ ओनेसिमस नेलाइहेङ दोअ्प्यावा।

¹⁰ काङको दोफाङको कैदि, आरिस्ताखर्स नेलाइहेङ सेउपाखा पिगिल्का हि। कालाउ बार्नाबासको भागेना मर्कुसको बुङ सेउपाखा पिगिल्का हि। नेलाइ मर्कुसको बिसोइता लाम्फा दोङ पात्तारा निङलि दोसुहोइना, वा नेलाइकोता लोहे पानु वासेहेङ स्‍वागत पासु।

¹¹ येसु जाइहेङ द्‍याङगेलाइ युस्तस दोअ्खे वा बुङ नेलाइहेङ सेउपाखा पिगिल्का हि। परमेस्वरको सासनको भाअ्सिङ का दोफा काम पाकालाइ मध्ये यहुदि खान्धुराइगेलाइ इदोङ सुमि खिनिङ दोङ हि। एबालाइसो कासेहेङ हाउसाइ मिलिका हि।

¹² नेलाइको नगरसो लोका येसु ख्रिस्टको दास इपाफ्रास बुङ ताइको आभिबादन पिगिल्का हि। वा लगनसिल जेङतेङ प्रार्थानाता परिस्रोम दोफाङ जेलाउ बुङ नेलाइहेङ फोम पातेङ हिखे। कालाउकि नेलाइ परिपक्क जेङसु कालाउ परमेस्वरको गोताङ इच्साता गोताङ रुपहोइ आग्याकारि हिनाङ निर्धक्क हिलि दोसु।

¹³ हाइपालिपानु का वाको भाअ्सिङ साक्सि प्याङका, कि नेलाइ कालाउ लाउडिकिया कालाउ हिरापोलिस सहरको द्‍याङगेलाइको भाअ्सिङ वा लगनसिल जेङतेङ प्रार्थाना पाका हि।

¹⁴ आनाउ बैध लुका कालाउ डेमास बुङ नेलाइहेङ सेउपाखा पिगिल्का हि।

¹⁵ लाउडिकिया सहरको खान्धुराइगेलाइ कालाउ नुम्फास बेजान ओने कालाउ वाको साअ्ता हिका मन्डलिहेङ काङको सेउपाखा पि।

¹⁶ नेलाइको माझाता इदोइ पात्तारा नेलाइ पढेलि दोतेङ लाउडिकिया सहरको मन्डलिता बुङ या पात्तारा पढेलि लागाइ, कालाउ का लाउडिकियाको खान्धुराइगेलाइको भाअ्सिङ लेखेका पात्तारा बुङ नेलाइ पढेलि गोइस्वाना।

¹⁷ नाअ् प्रभुसो निङका सेवाको काम पुरा पालि दोङ गोइयाना दोअ्तेङ आर्खिपसहेङ दोअ्पि।

¹⁸ का पावल, पात्ताराको इङको भाग नेलाइहेङ सेउपालि को भाअ्सिङ लेखेदोङखा। फोम ताअ्सु कि का झ्यालखानाता हिघा कालाउ काङको भाअ्सिङ प्रार्थाना पासु। नेलाइ दोफा परमेस्वरको आनुग्रह ह्याको। आमेन।