कलस्सि 2 - Dhimal NT

¹ का नेलाइहेङ साघाइलि दो-मादोपा कोसिस पादोङखा दोअ्का काथा नेलाइ गिसु दोअ्का का खाङखा, कालाउ आरुको भाअ्सिङ बुङ जाइ लाउडिकिया सहरता हि कालाउ जाइ द्‍याङगेलाइहेङ का तिङका मान्थुघा।

² का थाङका परिस्रोम पाखा हाइपालिपानु का इम्बालाइहेङ खाङधुरिता बल्लियाका बानाइलि भोखा, कालाउ इम्बालाइ ता-ताइमिको प्रेमहोइ इम्बालाइता एकता ता चुमावा। का चाहिखा कि इम्बालाइता पुर्न समझ ह्याको कालाउ परमेस्वरको रहस्यमय योजानाको पुरा जानकारि ह्याको, जाइ ख्रिस्ट ताइमिङ दोङ हि।

³ परमेस्वरको बुद्दि कालाउ ग्यान म्होका सम्पति भाइकाङ हि। इङको चाहि ख्रिस्ट खिनिङ गिखे कालाउ गोताङ द्‍याङहेङ तिङपा पिखे।

⁴ का नेलाइहेङ इदोइ काथागेलाइ दोअ्दोङखा, कालाउकि हासु बुङ नेलाइहेङ धाताइका काथागेलाइ दोअ्तेङ धोका माप्याको।

⁵ हाइपालिपानु का नेलाइसो दुरे जेङलाउ बुङ का नेलाइको बारेता सोचितेङ हिघा। कालाउ ख्रिस्टता नेलाइको खाङधुरि बल्लियाका तिङतेङ कासेहेङ हेन्जा खुसि जेङका हि।

⁶ जेसाङ नेलाइ ख्रिस्ट येसुहेङ प्रभु दोअ्तेङ खाङधुरि पासुना एन्साङ वासेहेङ लागातार पिताइसु।

⁷ धन्यबाद पिकाताङ ख्रिस्टता ताइको खाङधुरिता बल्लियाका जेङतेङ हिसु, जेसाङ सिङको जारि भोनोइहेङ जोतेङ ताअ्खे। कालाउ लागातार ख्रिस्ट ह्रुता ताइको खाङधुरिहेङ बाढेपातेङ हानेसु कालाउ जेलाउ बुङ परमेस्वरहेङ धन्यबाद पिसु।

⁸ नेलाइ चङको जेङतेङ हिसु, माकुनुते द्‍याङगेलाइको ब्यर्थको ग्यान कालाउ बिबेकहोइ नेलाइहेङ माधाताइयाको, इन्सिका बिचारगेलाइ द्‍याङको मुन्धुम कालाउ सुमिङको सिद्धान्‍तगेलाइसो लोखे कालाउ ख्रिस्टसो माको।

⁹ हाइपालिपानु ख्रिस्ट द्‍याङ जेङतेङ लोलाउ बुङ, वा पुराङ रुपता परमेस्वर हिघाहि।

¹⁰ कालाउ वा गोताङ खाबारा कालाउ सरबुङगेलाइ ह्रुता प्रभु हि। ओदोङ भाअ्सिङ जेसापा नेलाइ ख्रिस्टता हितेङ हिसुना पानु नेलाइहेङ आत्मिकता ता हाइ दोङ बुङ आमेनेको खाचो माजेनाङ।

¹¹ जेलाउ नेलाइ ख्रिस्टता लोसुन्हा, नेलाइको खाताना जिउको तरिकासो माको कालाउ आत्मिक तरिकासो जेङका हिघाहि कालाउ इदोइ नेलाइको पापमय स्वभाबहेङ लाअ्का भाइका हि।

¹² बप्तिस्ता पाहासो नेलाइ ताइको पापमय स्वभाबता लिका दोङ जेसाङ ख्रिस्ट लिन्हाहि। कालाउ नावा स्वभाबता ल्होका हिनाहि जेसाङ ख्रिस्ट सितेङ सिन्चाल्हि। इदोइ गोताङ जेङहि हाइपालिपानु नेलाइ खाङधुरि पासु, कि परमेस्वर ताइको सरबुङ पाहासो ख्रिस्टहेङ आरोङ सिकासो सिन्चाल पाहि।

¹³ नेलाइ खाङधुरि पाका खान्तेङ लाम्फा आत्माता सिका हिघासुन्हा, हाइपालिपानु नेलाइ ताइको आपाराध कालाउ ताइको पापमय स्वभाबसो स्वतन्तरो जेङका मान्थु घासुन्हा, कालाउ परमेस्वर केलाइको गोताङ आपाराध स्यामा पापिहि कालाउ ख्रिस्ट दोफाङ सिन्हु पाहि।

¹⁴ या इसिका हिघाहि, जेसाङ परमेस्वर केलाइको पापको लेखा कातिपिहि, जेदोङता केलाइको बिरोधता आरोप लेखेका हिघाहि। जेलाउ ख्रिस्टहेङ क्रुस्टा तोइहि कालाउ वा इङको गोताङ लेखा पुराङ रुपहोइ मोअ्पापिहि।

¹⁵ एसापा वा दुस्ट सरबुङ कालाउ खाबारागेलाइ भोइतेङ इङको गोताङ ह्रुता क्रुसता बिजोइ जेङहि। कालाउ सार्बाजानिक रुपता इङको गोताङ सरबुङ कालाउ खाबारागेलाइहेङ लेदेर पाहि।

¹⁶ ओदोङ भाअ्सिङ चाअ्का कालाउ आम्काता, माकुनु पार्बा दिना, माकुनु औसिको उत्सब मानिका माकुनु परमेस्वरको पबित्तरो दिना मानिका बिसोइता हिदोइ बुङ द्‍याङ नेलाइहेङ मादुसियाको। कालाउ हासु बुङ नेलाइको न्याय मापाको।

¹⁷ हाइपालिपानु इङको गोताङ व्यवस्थागेलाइ परमेस्वर बाचा पाका कालाउ लोलि खाङका काथाको स्याइरे भाइका हि, कालाउ बास्ताबिक चाहि ख्रिस्ट दोङ हि।

^18-19 ख्रिस्ट जिउको पुरिङ हि। वाकोसोङ दोङ जिउको गोताङ आङगगेलाइ तेअ्खे कालाउ गोताङ आङगगेलाइको स्याहार जेङखे। ओदोङ भाअ्सिङ इदोङ परमेस्वरको इच्छा आन्सार बाढेखे। ताइमिहेङ आपामान पातेङ कालाउ स्वर्गदुतगेलाइको आराधाना पातेङ हासुहेङ बुङ आयोग्य बानाइलि जोर मापिसु। इसिका द्‍याङगेलाइ दर्सन तिङखे कालाउ द्‍याङको बिचार आन्सार इङको दर्सन पाहासो ओबालाइता घमन्ड लोखे। कालाउ ओबालाइ ख्रिस्टहेङ लाअ्का हि।

ख्रिस्ट दोफाङ बान्चियाङ कालाउ सियाङ

²⁰ नेलाइको पापि स्वभाव ख्रिस्ट दोफाङ सिकानाङ, नेलाइ या सुमिङको नियमगेलाइ केम्लि मागोयाङ। ओदोङ भाअ्सिङ नेलाइहेङ इदोङ सुमिङ काबुता ताअ्का भाइकाङ हाइ पालि इदोइ सुमिङको नियमगेलाइ किसुखेना?

²¹ इदोइ नियमगेलाइ दोअ्खे कि इसिका आमेनेगेलाइ ह्रुलि माएल, इसिका उम चालि माएल, कालाउ इता थेकापा कि नेलाइ इसिका काथागेलाइ खुरबुङ लागाइलि माएल।

²² इदोइ गोताङ नियमगेलाइ बेक्कारको हि कालाउ नासातावा, हाइपालिपानु इदोइ काथागेलाइ द्‍याङगेलाइको आदेस कालाउ सिक्स्यागेलाइता आधारित हि।

²³ इसिका लागिखे, कि इदोइ नियमगेलाइ बुद्दिमानिसो तिङपाखे जेदोङ ठिक हि, कालाउ इम्बालाइ ताइमिहेङ परमेस्वर भारि समरपित जेङलि, इम्बालाइ धतुवा, मोनोइ तिङपाखे कालाउ ताइको जिउहेङ राङका व्यवभार पालि बाध्ये लागाइखे। कालाउ बास्ताबता इदोइ नियमगेलाइ द्‍याङगेलाइहेङ इम्बालाइको मारेम्का इच्साहेङ काबुता ताअ्लि मासाघाइखे।