साल्न्हाका चात्या 9 - Dhimal NT

साउलको जिबन परिबर्तन

¹ एन्सालाउ दोङ साउल बारामबार प्रभु येसुको चात्यागेलाइहेङ सेअ्लि धोम्कि पिकाताङ हिगिल्घाहि। कालाउ वा प्राधान पुजारिकोता हानिहि।

² कालाउ साउल दमस्कस सहरको यहुदिगेलाइको चाउघारा साअ्गेलाइको मिङता पात्तारा पिसु दोअ्तेङ आनुरोध पाहि। कालाउकि दमस्कस देराता हानितेङ मुक्ति निङखे दोअ्का येसु ख्रिस्टको दामाता लागिका खान्धुराइ वाबाल कालाउ बेबाल झाराङहेङ रिम्तेङ यरुसेलेम सहरता चुमालि द्वाको।

³ जेलाउ साउल कालाउ वाको द्‍याङगेलाइ पाकपाताङ दमस्कस सहरको भेरपा थुकाहि, आचानक आकाससो एनोङ फाइसालाम्का वाको कोरपाहाङ चिल्का हि।

⁴ कालाउ साउल भोनोइता थुन्हाहि, कालाउ वा प्रभुको इसिका गाला हिङहि, “साउल, साउल नाअ् हाइ पालि कासेहेङ साताइतेङ हिना?”

⁵ साउल दोअ्हि, “हे प्रभु नाअ् हासु हिना?” कालाउ वा दोअ्हि, “का येसु हिघा, जाइहेङ नाअ् साताइतेङ हिना।

⁶ ल्हो कालाउ सहर भारि हाने, इन्ता हासु बुङ नासेहेङ हाइ पालि गोइका हि दोअ्पियावा।”

⁷ साउल दोफाङ हानिकाताङ पाका द्‍याङगेलाइ इन्ता थिङगापा जाअ्तेङ हिघाहि, हाइपालिपानु उङको द्‍याङगेलाइ गाला हिङहि कालाउ बुङ हासुहेङ बुङ मातिङहि।

⁸ कालाउ साउल भोनोइसो ल्होहि कालाउ वाको मिसियाँ हेअ्लाउ हाइ दोङ तिङलि मादोहि। ओदोङ भाअ्सिङ साउल दोफा लोका द्‍याङगेलाइ वाको खुर चातेङ वासेहेङ दमस्कस सहरता चुमाहि।

⁹ सुम्नि थेकापा साउल ना ते खाङलि दोअ्हि, ना ते चाहि ना ते आम्हि।

साउलको बप्तिस्ता

¹⁰ दमस्कस सहरता येसुको एमि चात्या हिघाहि, वाको मिङ हननिया हिघाहि, वासेहेङ प्रभु येसु दर्सनता दोअ्हि, “ओइ हननिया” वा दोअ्हि, “हाइ प्रभु का इता हिघा।”

¹¹ कालाउ प्रभु हननियाहेङ दोअ्हि, “ल्हो कालाउ सोझाका मिङको गल्लिभारि हाने, कालाउ इन्ता यहुदाको साअ्ता साउल मिङ हिका टार्सस नगरको द्‍याङहेङ भोसु, हाइपालिपानु वा प्रार्थाना पातेङ हि।

¹² साउल दर्सनता हननिया मिङ हिका एमि द्‍याङहेङ लिता लोतेङ वा आरोङ तिङलि द्वाको दोअ्तेङ ताइमि ह्रुता वाको खुर ताअ्पिका तिङका हि।”

¹³ कालाउ हननिया जोबाफ पिहि, “हे प्रभु, इङको द्‍याङ यरुसेलेम सहरता जेङका नाङको पबित्तरो द्‍याङगेलाइहेङ हेन्जा साताइका काथा का हेन्जा द्‍याङगेलाइसो हिङका हिघा।

¹⁴ एला वा इता दमस्कस देराता बुङ नाङकोता खाङधुरि पाका द्‍याङगेलाइ झाराङहेङ रिम्तेङ यरुसेलेम सहर चुम्पुलि खाबारा मुलि पुजारिगेलाइसो निङका हि।”

¹⁵ कालाउ प्रभु हननियाहेङ दोअ्हि, “हाने, हाइपालिपानु का दोङ साउलहेङ कासेहेङ सेवा पालि कालाउ काङको बिसोइता गैर-यहुदिगेलाइहेङ, राजागेलाइहेङ कालाउ इस्राएललिगेलाइको माझाता प्राचार पालिको भाअ्सिङ वासेहेङ साल्का हिघा।

¹⁶ हाइपालिपानु द्‍याङगेलाइहेङ काङको बिसोइता दोअ्काता वा हेथे कस्ट भोगिलि गोयाङ, इङको का वासेहेङ तिङपाङका।”

¹⁷ कालाउ हननिया हानितेङ इङको साअ् लिता दुल्हि जेता साउल हिघाहि, वा ताइको खुर साउलकोता ताअ्हि कालाउ दोअ्हि, “ओने साउल, जेदोङ प्रभु येसु नाअ् लोलाउ दामाता नाङकोता देखाल जेङका हिघाहि, वा दोङ कासेहेङ नाङकोता दिङगिल्का हि, कालाउकि नाअ् आरोङ मिसियाँ तिङलि द्वाको कालाउ पबित्तरो आत्माता पोङघातेङ हि।”

¹⁸ ओदोङ घुरि, वाको मिसियाँसो से भाइका हुल्नाङ भाइहि कालाउ साउल आरोङ मिसियाँ तिङलि दोअ्का जेङहि कालाउ वा ल्होहि कालाउ बप्तिस्ता ह्रुहि।

¹⁹ कालाउ न्हुसो उम चातेङ जिउता आरोङ बल निङहि, कालाउ साउल येसुको चात्यागेलाइ दोफा दमस्कस सहरता आले दिना थेकापा इन्ताङ हि।

साउल दमस्कस कालाउ यरुसेलेमता

²⁰ धेमाङ वा दमस्कस देराको यहुदिगेलाइको चाउघारा साअ्गेलाइता येसुको बारेता सुसमाचार प्रचार पालि तेङहि, कि येसु दोङ परमेस्वरको चान हि।

²¹ कालाउ झाराङ द्‍याङगेलाइ साउलको इन्सिका काथा हिङतेङ भाङभाङ हि कालाउ दोअ्हि, “उङको ओदोङ द्‍याङ माको जाइ यरुसेलेम सहरता हिघाहि, कालाउ हाइ वा जाइ येसु ख्रिस्टता खाङधुरि पाका द्‍याङगेलाइहेङ नासा पालि भोघाखे? हाइ वा इता बुङ येसुता खाङधुरि पाकालाइहेङ रिम्लि कालाउ इम्बालाइहेङ मुलि पुजारिगेलाइकोता चुम्पुलि लोका माको रो?”

²² कालाउ साउल झन प्रभाबकारि जेङतेङ प्राचार पालि तेङहि, कालाउ येसु दोङ ख्रिस्ट हि दोअ्का प्रमान पितेङ दमस्कस सहरता हिका यहुदिगेलाइहेङ आवाइतुअ्पाहि।

²³ कालाउ हेन्जा दिना थेकापा साउल दमस्कस देराता हितेङ न्हुसो यहुदिगेलाइ साउलहेङ सेअ्लि योजनागेलाइ बानाइहि।

²⁴ कालाउ इम्बालाइको योजाना साउलहेङ थाहा जेङहि। यहुदिगेलाइ वासेहेङ सेअ्लिको भाअ्सिङ झेउपाङ लिपाङ सहरको फिनुगेलाइता म्होतेङ हिघाखे।

²⁵ कालाउ एनि न्हिसिन्ता वाको आधिमि चात्यागेलाइ साउलहेङ एनोङ डालोता ह्वातेङ बेरेमको खिर्किसो सहरता खुअ्पातेङ खाअ्पाहि।

साउल यरुसेलेम सहरता

²⁶ साउल यरुसेलेम सहर भारि हानिहि, वा चात्यागेलाइ दोफा मिलिलि खाङघाखे। कालाउ साउल जातिङको येसुको चात्या दोअ्तेङ खाङधुरि मापानाङ झाराङ वाको दोफा थिअ्हि।

²⁷ कालाउ बार्नाबास साउलहेङ दोफाङ चुम्पुतेङ साल्न्हाका चात्यागेलाइकोता चुम्पुहि। कालाउ साउल प्रभुहेङ दमस्कस सहरता हानिका दामाता प्रभु येसुहेङ तिङका कालाउ प्रभु दोफा नुइ धुइका कालाउ न्हुसो दमस्कसता साहास पातेङ येसुको बारेता प्राचार पाका काथा बार्नाबास इम्बालाइहेङ दोअ्पिहि।

²⁸ कालाउ छाल्न्हाका चात्यागेलाइ बार्नाबासको काथाहेङ खाङधुरि पाहि, ओदोङ भाअ्सिङ साउल यरुसेलेम सहर भरि इम्बालाइ दोफाङ साहास पातेङ प्रभुको मिङता प्राचार पालि तेङहि।

²⁹ कालाउ वा ग्रिक भासाता धुइका यहुदिगेलाइ दोफा येसुको बिसोइता काथा पोसुघाखे, कालाउ ओबालाइ वासेहेङ सेअ्लि खाङघाखे।

³⁰ जेलाउ खान्धुराइ ओनेगेलाइ इङको काथा थाहा गिहि, इम्बालाइ साउलहेङ कैसरिया सहरता चुम्पुहि कालाउ इन्तासो इम्बालाइ वासेहेङ जाहाजसो टार्सस सहरता दिङगिल्हि। जाइ वाको ताइको देरा हिघाहि।

³¹ एसापा द्‍यापाहाङ यहुदिया जिल्ला, गालिल जिल्ला कालाउ सामारिया जिल्लाको मन्डलिगेलाइता सान्ति लोहि कालाउ मन्डलि बल्लियाका जेङहि। प्रभुहेङ थितेङ कालाउ पबित्तरो आत्माहोइ हाउसाइतेङ हेन्जा द्‍याङगेलाइ येसु ख्रिस्टता खाङधुरि पाहि।

एनियास कालाउ डोरकास

³² पतरुस इङको गोताङ जिल्लागेलाइता पाक पाकाताङ लिडा नगरता हिका परमेस्वरको जनगेलाइहेङ भेतिलि बुङ हानिहि।

³³ लिडा नगरता पतरुस एमि एनियास मिङ हिका द्‍याङहेङ दुसुहि। जाइ येए बासारसो गाल्हि खोअ्तेङ सिधाउताङ थाला जेङका हिघाहि।

³⁴ पतरुस वासेहेङ दोअ्हि, “ओइ एनियास, येसु ख्रिस्ट नासेहेङ एल्पालि द्वाङ, ल्हो कालाउ नाङको सिधाउ तोअ्।” कालाउ एनियास एन्सालाउ दोङ हाका-धुकु ल्होहि।

³⁵ लिडा कालाउ सारोन देराता हिका झाराङ देराको द्‍याङगेलाइ वासेहेङ तिङहि कालाउ प्रभु येसुता झाराङ खाङधुरि पाहि।

डोरकास सिन्हुका

³⁶ जोप्पा नगरता तबिता दोअ्का एमि खान्धुराइ हिघाहि। वा जेलाउ आरुको भाअ्सिङ आसल काम पाघाखे कालाउ गरिबगेलाइहेङ साघाइघाखे।

³⁷ इङको दिनागेलाइता जेलाउ पतरुस लिडा नगरता हिघाहि, तबिता बिरामि जेङहि कालाउ वा सिहि, कालाउ द्‍याङगेलाइ वाको सिका जिउहेङ चिउपातेङ वासेहेङ ह्रुताको तालाता एनोङ कोठाता ताअ्हि।

³⁸ लिडा नगर जोप्पा नगरको भेरपा हिघाहि, कालाउ चात्यागेलाइ पतरुस लिडा नगरता हि दोअ्का हिङतेङ वाकोता न्हेमि द्‍याङगेलाइहेङ इसिका बिन्ति पालि दिङगिल्हि, “दाया पातेङ केलाइ हिका थामेता मारफा लोपि।”

³⁹ कालाउ पतरुस ल्होतेङ इम्बालाइ दोफा हानिहि। इन्ता थुकातेङ इम्बालाइ पतरुसहेङ ह्रुताको कोठाता चुम्पुहि। गोताङ के सिकालाइ वाको भेरपा जाअ्तेङ खारलि तेङहि। कालाउ तबिता इम्बालाइ दोफा हिलाउ ताइमि जोका कोटगेलाइ कालाउ आरु लोखन-धाबागेलाइ ओबालाइहेङ तिङपाहि।

⁴⁰ कालाउ पतरुस उङको झाराङहेङ कोठा बाहार दिङगिल्हि, कालाउ वा तिरु थोअ्तेङ प्रार्थाना पाहि, कालाउ वा सिका जिउहेङ खाङतेङ दोअ्हि, “तबिता ल्हो!” कालाउ वा मिसियाँ ल्हेहि, कालाउ पतरुसहेङ खाङतेङ वा ल्होतेङ योम्हि।

⁴¹ कालाउ पतरुस वासेहेङ ताइको खुरहोइ चातेङ ल्होलि साघाइहि, कालाउ न्हुसो वा खान्धुराइगेलाइहेङ कालाउ के सिका बेबालाइहेङ कोठा लिता काइहि। कालाउ वा दोङ तबिता सिन्हुका हि दोअ्का ओबालाइहेङ तिङपाहि।

⁴² इदोइ काथा गोताङ जोप्पा नगरता चारचाराइहि, कालाउ हेन्जा द्‍याङगेलाइ येसु प्रभुता खाङधुरि पाहि।

⁴³ कालाउ पतरुस जोप्पा नगरता हेन्जाङ दिना थेकापा सिमोन मिङ हिका धालेको काम पाका दोफा हि।