साल्न्हाका चात्या 8 - Dhimal NTमन्डलिहेङ साताइका 1 स्तिफेनहेङ सेअ्काता साउल बुङ पुर्न रुपसो सहमति हिघाहि। कोकोङ दिना यरुसेलेम सहरता जेङका मन्डलिको बिरोधता ओसारापाङ साताइलि तेङहि, कालाउ छाल्न्हाका चात्यागेलाइ बाहेक खान्धुराइगेलाइ झाराङ यहुदिया जिल्ला कालाउ सामारिया जिल्ला भारि आउलिगिल्हि। 2 परमेस्वरको आदार पाका आधिमि द्याङगेलाइ स्तिफनहेङ सेअ्काता हेन्जा बिलाप पाकाताङ वाको सिका जिउहेङ चुम्पुतेङ तोमता लिहि। 3 कालाउ साउल चाहि साअ्-साअ्ता दुल्तेङ खान्धुराइगेलाइहेङ साताइदोङघाहि। कालाउ वा खान्धुराइ वाबाल कालाउ बेबालाइहेङ घोघाराइतेङ चुम्पुतेङ झ्यालखानाता थुनिपिघाहि। सामारियाता फिलिप 4 कालाउ आउलिगिल्तेङ हिका खान्धुराइगेलाइ द्यापाहाङ हानितेङ प्रभुको बचन द्याङगेलाइहेङ हिङपाहि। 5 कालाउ फिलिप चाहि सामारिया जिल्लाको एनोङ सहरता हानितेङ द्याङगेलाइहेङ ख्रिस्टको बारेता हिङपाहि। 6 द्याङगेलाइ इन्ता फिलिपको दोअ्का हिङहि कालाउ वाको पाका भारबुसाइका कामगेलाइ तिङतेङ द्याङगेलाइको जेर ध्यान पितेङ वासेहेङ हिङहि। 7 हाइपालिपानु जेलाउ फिलिप आग्या पिहि हेन्जा द्याङगेलाइसो भुत-आत्मागेलाइ बार्का गालाहोइ आहुतेङ ह्रिकाइतेङ ओल्लेतेङ हानेहि। कालाउ गाइल्हि खोकालाइ कालाउ लेङग्रा द्याङगेलाइ बुङ एल्हि। 8 ओदोङ भाअ्सिङ इङको सहरको हेन्जा द्याङगेलाइ मेनाङ आनान्द जेङहि। सिमोनको जादु 9 इङको सहरता सिमोन मिङ हिका एमि द्याङ हिघाहि। वा लाम्फासोङ जादु पातेङ सामारिया जिल्लाको द्याङगेलाइहेङ भारभुसाइका बानाइका हिघाहि, कालाउ वा ताइमिङ हेन्जा बार्का हिघा दोअ्तेङ दाबि पाघाखे। 10 उङको द्याङहेङ म्हुइका तहसो बार्का तह थेकापा द्याङगेलाइ एसा दोअ्घाखे, “इदोइ द्याङता परमेस्वरको सरबुङ हि, जाइहेङ माहा सरबुङ दोअ्खे!” 11 सिमोन ताइको जादु-टुनामुना पाहासो द्याङगेलाइहेङ हेन्जा सोमोइसोङ भारभुसाइका बानाइका हिघाखे, हाइपालिपानु वा द्याङगेलाइहेङ ताइको सरबुङको कामगेलाइ तिङपाघाखे। 12 कालाउ जेलाउ द्याङगेलाइहेङ परमेस्वरको सासन कालाउ येसु ख्रिस्टको मिङता प्राचार पाका फिलिपको काथाता खाङधुरि पाहि, कालाउ वाबाल कालाउ बेबालगेलाइ बप्तिस्ता ह्रुहि। 13 सिमोन ताइमिङ फिलिपको सन्देसता खाङधुरि पाहि कालाउ बप्तिस्ता ह्रुहि, कालाउ वा फिलिप दोफाङ हिलि तेङहि, कालाउ फिलिपको पाका चिन्हागेलाइ कालाउ बा-बार्का सरबुङगेलाइको कामगेलाइ पाका तिङतेङ, सिमोन भारभुसाइहि। सामारिगेलाइ पबित्तरो आत्मा निङका 14 सामारिया जिल्लाको द्याङगेलाइ परमेस्वरको बचनहेङ सुइकार पाहि दोअ्का काथा हिङतेङ यरुसेलेम सहरता हिका छाल्न्हाका चात्यागेलाइ पतरुस कालाउ युहान्नाहेङ इम्बालाइकोता दिङगिल्हि। 15 जेलाउ इम्बालाइ सामारियाता थुकाहि, पतरुस कालाउ युहान्ना सामारियाको खान्धुराइगेलाइ पबित्तरो आत्मा निनाको दोअ्तेङ प्रार्थाना पाअ्हि। 16 हाइपालिपानु उङको द्याङगेलाइ प्रभु येसुको मिङता बप्तिस्ता ह्रुका हिघाहि, कालाउ बुङ पबित्तरो आत्मा इम्बालाइ ह्रुता एन्सालाउ थेकापा लोका मान्थुघाखे। 17 कालाउ पतरुस कालाउ युहान्ना ताइको खुर द्याङगेलाइ ह्रुता ताअ्हि कालाउ ओबालाइ पबित्तरो आत्मा निङहि। सिमोनको पाप 18 जेलाउ छाल्न्हाका चात्यागेलाइ द्याङगेलाइ ह्रुता खुर ताअ्पिलाउ पबित्तरो आत्मा निङखे दोअ्का तिङतेङ सिमोन एसा दोअ्काताङ इम्बालाइहेङ ताका पिलि तेङहि, 19 “कासेहेङ बुङ इङको सरबुङ पि, कालाउकि का जाइको बुङ ह्रुता खुर ताअ्लाउ वा पबित्तरो आत्मा निनाको।” 20 कालाउ पतरुस वासेहेङ दोअ्हि, “नाअ् कालाउ नाङको ताका सुधाङ नासातेङ हानाको! हाइपालिपानु परमेस्वरको बरदान ताकाहोइ चोल्लि द्वाङ दोअ्तेङ नाअ् बिचार पान्हा। 21 कालाउ नाङको इदोइता ना ते भाग हि, ना ते इदोइ सेवा पालि खाबारा हि, हाइपालिपानु नाङको मन परमेस्वरको आगाता रेम्का मान्थु। 22 ओदोङ भाअ्सिङ नाङको ताइको दुस्ट बिचारको भाअ्सिङ पाप पालि लाअ् कालाउ प्रभु दोफा प्रार्थाना पाअ्, कालाउ सायद नाङको मनको इन्सिका बिचार वा स्यामा पाप्याङ। 23 पाप पालि लाअ्, हाइपालिपानु का गिखा कि नाङको मन इर्साको खाअ्काहोइ पोङघाका कालाउ पापको बन्धनता परिका हिना।” 24 कालाउ सिमोन जोबाफ पिहि, “नेलाइ काङको भाअ्सिङ प्रभुता प्रार्थाना पाअ्पिसु, कि नेलाइको दोअ्का हिदोइ बुङ काथा का ह्रुता आइ मापरियाको।” 25 जेलाउ पतरुस कालाउ युहान्ना साक्सि कालाउ प्रभु येसुको बचन दोअ्लि दोतेङ सामारियाको हेन्जा देरागेलाइता सुसमाचार प्राचार पाकाताङ इम्बालाइ यरुसेलेम सहरता घुरिहि। इथियोपियाको बार्का आधिकारि 26 कालाउ न्हुसो प्रभुको एमि स्वर्गदुत फिलिपहेङ दोअ्हि, “ल्होतेङ माहेपाहा यरुसेलेम सहरसो गाजा सहर भारि हानिका दामाता हाने। इन्ता चाका-मान्दाको दामा हि।” 27 कालाउ फिलिप ल्होतेङ हानिहि, कालाउ आचानाक दामाता एमि एथियोपिया सारभिको नपुङसकहेङ दुसुहि, जाइ एथियोपिया सारभिको माहारानि कन्दाकिको बार्का आधिकारि कालाउ गोताङ सम्पतिको कोस आध्यक्स्य हिघाहि। कालाउ वा यरुसेलेम मुन्दिरता आराधाना पालि हानिका हिघाहि। 28 कालाउ वा ताइको रथता योमतेङ वाको सारभि भारि घुरितेङ हानिघाखे, कालाउ वा यासाइया परमेस्वरको बक्ताको किताप बार्का गालाहोइ पढेतेङ हिघाहि। 29 कालाउ पबित्तरो आत्माहोइ फिलिपहेङ दोअ्हि, “इङको रथको भेरपा हाने।” 30 कालाउ फिलिप रथको भेरपा धाअ्तेसाङ वाकोता थुकाहि, कालाउ उङकोहेङ यासाइया परमेस्वरको बक्ताको पुस्तक पढेतेङ हिका हिङतेङ हिअ्हि, “हाइ नाअ् पढेका काथा बुझिखेना?” 31 उङको द्याङ दोअ्हि, “हासु बुङ कासेहेङ माबुझाइसिङ का या बुझिलि माद्वाङका।” कालाउ वा फिलिपहेङ रथता धोल्पातेङ ताइमि दोफा लोतेङ योम्लि आनुरोध पाहि। 32 वाको पढेकाताङ पाका धर्मसास्तरको आध्यायता इसिका लेखेका हिघाहि: “जेसाङ भेडाहेङ सेअ्लि चुम्पुखे, माकुनु भेडा मुइसा पोका बेला सिकापा हिखे, एन्साङ पातेङ जेलाउ द्याङगेलाइ वासेहेङ साताइहि वा ताइको नुइ माखोलिहि। 33 खुजालाइका आबास्थाता न्याय वा मानिङहि, कालाउ वाको हारागुटियाको बिसोइता हासु बाख्या पावा? हाइपालिपानु प्रिथिबिता वाको हारागुटिया हिलि खाङतेङ लाम्फाङ द्याङगेलाइ वासेहेङ सेअ्हि।” 34 कालाउ उङको नपुङसक फिलिपहेङ दोअ्हि, “दाया पातेङ कासेहेङ दोअ्पि परमेस्वरको बक्ता इदोइ काथा हासुको बिसोइता दोअ्का हि? वा ताइमिकोङ बारेता कि बो भेनेङ द्याङको बिसोइता दोअ्का?” 35 कालाउ फिलिप दोअ्पिलि तेङहि, कालाउ धर्मसास्तरको इदोङ आध्यायसो वासेहेङ येसुको बिसोइता प्राचार पाहि। कालाउ वा इङको बुझिहि कालाउ येसु ह्रुता खाङधुरि पाहि। 36 कालाउ ओबालाइ दामाता हानिकाताङ पालाउ आधे चि हिका एनोङ पोखोरि तिङहि। कालाउ उङको नपुङसक दोअ्हि, “खाङसु, इता पोखोरि हि, एला कासेहेङ हाइहोइ बप्तिस्ता ह्रुकासो रोकिलि द्वावा रो?” 37 फिलिप दोअ्हि, “जेसापा गोताङ हृदयसो दोङ खाङधुरि पाना पानु नाअ् बप्तिस्ता ह्रुलि द्वाना।” कालाउ वा जोबाफ पिहि, “येसु ख्रिस्ट दोङ परमेस्वरको चान हि दोअ्तेङ का खाङधुरि पाङका।” 38 कालाउ नपुङसक रथ रोकिलि आग्या पिहि, कालाउ फिलिप कालाउ नपुङसक न्हेमि दोङ पोखोरिता खुअ्हि कालाउ फिलिप वासेहेङ बप्तिस्ता पिहि। 39 जेलाउ ओबालाइ पोखोरिसो बाहार ओल्लेतेङ लोहि, कालाउ प्रभुको आत्मा फिलिपहेङ चुम्पुहि, कालाउ उङको नपुङसक वासेहेङ आरोङ हेलाउ बुङ मातिङहि, कालाउ वा मेनाङ लेङचाकाताङ परमेस्वर कासेहेङ बान्चिपाहि दोअ्तेङ ताइको सारभिता घुरितेङ हानिहि। 40 कालाउ फिलिप ताइमिङ आस्दोदको सहरता निङहि, कालाउ कैसरिया सहर माथुकापा थेकापा फिलिप एनोङ थामेसो भेनेङ थामेता पाक पाकाताङ गोताङ देरागेलाइता प्राचार पाकाताङ हानिहि। |
Dhimal New Testament, by The Love Fellowship is licensed under Creative Commons Attribution-ShareAlike 4.0 License.
Beyond Translation