साल्न्हाका चात्या 4 - Dhimal NT

माहासभाको आगाता पतरुस कालाउ युहान्‍ना

¹ जेलाउ पतरुस कालाउ युहान्‍ना द्‍याङगेलाइ दोफा काथा पाकाताङ हिघाहि, पुजारिगेलाइ कालाउ मुन्दिरको पालेगेलाइको कप्तान कालाउ सदुकिगेलाइ इम्बालाइकोता लोहि।

² इम्बालाइ पतरुस कालाउ युहान्नासो चेर ताम्पाका हिघाहि, हाइपालिपानु इम्बालाइ द्‍याङगेलाइहेङ परमेस्वर सिकागेलाइहेङ सिन्हुपाखे दोअ्तेङ धिरपाघाखे। जेसाङ वा दोङ येसुहेङ सिकासो सिन्हु पाहि।

³ कालाउ इम्बालाइ पतरुस कालाउ युहान्नाहेङ रिम्हि, कालाउ झेम्पाङ इम्बालाइहेङ झ्यालखानाता ह्वाहि। हाइपालिपानु एन्सालाउ दिलिमा जेङका हिघाहि।

⁴ पतरुस कालाउ युहान्नाको सन्‍देस हिङतेङ हेन्जाङ द्‍याङगेलाइ येसु ह्रुता खाङधुरि पाहि, कालाउ इन्ता लगभग ना हाजार वाबालाइ हिघाहि, जाइ येसु ह्रुता खाङधुरि पाहि।

⁵ न्हु दिना यहुदि सासकगेलाइ, यहुदि आगुवागेलाइ कालाउ व्यवस्था धिरपाका द्‍याङगेलाइ यरुसेलेमको ए थामे जोम्हि।

⁶ इङको सभाता प्राधान पुजारि हन्नास हिघाहि कालाउ वाको दोफा कैयाफा, युहान्‍ना, आलेक्जेन्डर कालाउ वाको आरु ताइकोगेलाइ बुङ जोम्का हिघाहि।

⁷ इम्बालाइ पतरुस कालाउ युहान्नाहेङ झाराङको आगाता जाअ्पातेङ हिअ्हि, “इदोइ द्‍याङहेङ एल्पाका सरबुङ कालाउ खाबारा हासु नेलाइहेङ पिहि?”

⁸ कालाउ पतरुस पबित्तरो आत्माहोइ पोङघातेङ इम्बालाइहेङ दोअ्हि, “ओइ द्‍याङगेलाइको सासकगेलाइ कालाउ यहुदि आगुवागेलाइ,

⁹ नानि केलाइ एमि लेङग्रा द्‍याङहेङ एनोङ आसल काम पाकाको बिसोइता इङको हेसा एल्हि दोअ्तेङ केलाइहेङ प्रस्न पासुखेना पानुते,

¹⁰ नेलाइ झाराङ कालाउ इस्राएलको गोताङ द्‍याङगेलाइहेङ थाहा जेनाको, कि इदोइ लेङग्रा द्‍याङ नासरतको येसु ख्रिस्टको मिङता एल्का बानाइका हि। जाइहेङ नेलाइ क्रुस्टा तोइका हिघासुन्हा कालाउ परमेस्वर वासेहेङ सिकासो सिन्हु पाहि। नानि या द्‍याङ वाकोङ मिङसो नेलाइको आगाता एल्तेङ जाअ्का हि।

¹¹ भजन सङग्रहता ख्रिस्टको बारेता या लेखेका हि कि, येसु ख्रिस्ट इङकोङ उन्ठुइ हि, जाइहेङ नाअ् मिस्तिरिगेलाइ इन्कार पाका हिघासुन्हा, इङकोङ उन्ठुइ एला कुन्हाको मुलि उन्ठुइ जेङहि।

¹² येसु बाहेक आरु हासुता बुङ मुक्ति मान्थु, हाइपालिपानु केलाइहेङ मुक्ति निङलि स्वर्ग लेता द्‍याङगेलाइकोता भेनेङ हिदोइ बुङ मिङ पिका मान्थु।”

¹³ जेलाउ इम्बालाइ पतरुस कालाउ युहान्नाको साहास तिङहि कालाउ इम्बालाइ आन्पद कालाउ साधारन द्‍याङगेलाइ हि दोअ्तेङ थाहा निङहि, कालाउ इम्बालाइ भारभुसाइहि कालाउ एबालाइ बुङ येसु दोफा हिघाहि दोअ्तेङ इम्बालाइ थाहा निङहि।

¹⁴ कालाउ इम्बालाइ एल्का द्‍याङहेङ पतरुस कालाउ युहान्‍ना दोफा जाअ्तेङ हिका तिङतेङ इम्बालाइ हाइ दोङ दोअ्लि मादोअ्हि।

¹⁵ कालाउ पतरुस कालाउ युहान्नाहेङ माहासभासो बाहार हानिका आग्या पिहि कालाउ इम्बालाइ ता-ताइमिता एसापा साल्हा पालि तेङहि,

¹⁶ “इदोइ द्‍याङगेलाइहेङ केलाइ एला हाइ पालि?” “हाइपालिपानु यरुसेलेम सहरको गोताङ द्‍याङगेलाइ इम्बालाइको पाका भारबुसाइका काम थाहा निङका हि। एला यासेहेङ केलाइ इन्कार पालि माद्वाङ।

¹⁷ कालाउ या बानाल द्‍याङगेलाइता हेन्जा माचार-चाराइयाको दोअ्तेङ आरोङ येसुको मिङता हिदोइ बुङ द्‍याङगेलाइ दोफा नेलाइ हाइ दोङ मादोअ्सु दोअ्तेङ केलाइ इम्बालाइहेङ थाङका आग्या पिलि गोयाङ।”

¹⁸ कालाउ आगुवागेलाइ पतरुस कालाउ युहान्नाहेङ आरोङ लिता काइतेङ “एलासो उसो येसुको मिङता हाइ दोङ मादोअ्सु कालाउ सिक्स्या बुङ मापिसु” दोअ्तेङ थाङका आग्या पिहि।

¹⁹ कालाउ पतरुस कालाउ युहान्‍ना इम्बालाइहेङ उत्तारा पिहि, “नेलाइको दोअ्का काथा किलि, कि परमेस्वर दोअ्का काथा किलि, परमेस्वरको आगाता हिदोइ चाहि ठिक हि? नेलाइ ताइमिङ दोङ बिचार पासु।

²⁰ हाइपालिपानु केलाइते ताइमिङ हिङका कालाउ तिङका काथा मादोअ्सिङ सिकापा हिलि माद्वाङ।”

²¹ इम्बालाइ साजाइ पिका हिदोइ बुङ उपाय मान्थुतेङ ओबालाइहेङ झन हेन्जा धम्कि पितेङ लाअ्पिहि। हाइपालिपानु जेदोङ घाटाना जेङका हिघाहि इङको को भाअ्सिङ झाराङ द्‍याङगेलाइ परमेस्वरको बाखिन पातेङ हिघाखे।

²² हाइपालिपानु जेदोङ द्‍याङ सरबुङहोइ एल्पाका हिघाखे, वाको उमेर न्हे कुरि बासार खाङतेङ हेन्जा हिघाहि।

खान्धुराइगेलाइको प्रार्थाना

²³ पतरुस कालाउ युहान्नाहेङ माहासभा लाअ्पितेङ न्हुसो ओबालाइ ताइको सानाइतिगेलाइ कोता हानिहि। कालाउ मुलि पुजारिगेलाइ कालाउ यहुदि आगुवागेलाइ दोअ्का गोताङ काथागेलाइ ताइको सानाइतिगेलाइहेङ दोअ्पिहि।

²⁴ जेलाउ इम्बालाइ या हिङहि, कालाउ इम्बालाइ ए दोफाङ बार्का गालाहोइ परमेस्वरहेङ दोअ्हि, “हे सरबुङसाइका प्रभु, नाअ् दोङ स्वर्ग, प्रिथिबि समुन्द्र कालाउ इङकोता हिका गोताङ आनेमाने बानाइन्हा,

²⁵ नाअ् दोङ पबित्तरो आत्मा पाहासो ताइको सेवक केलाइको पुर्खा राजा दाउदसो दोअ्न्हा, ‘बो जातिगेलाइ हाइ पालि चेर ताम्पाखे? द्‍याङगेलाइ माजेङका काथागेलाइ हाइ पालि फोम पाहि?

²⁶ प्रिथिबिको राजागेलाइ कालाउ सासकगेलाइ जोम्हि, कालाउ प्रभु कालाउ वाको आबिसेक द्‍याङगेलाइको बिरोधता ए दोफाङ जाअ्हि।’

²⁷ हाइपालिपानु नाङको परमेस्वरको सेवक, जाइहेङ नाअ् आबिसेक पान्हा ओदोङ येसुको बिरोधता राजा हेरोद कालाउ पन्तियास पिलातस उधिन्हेमि, गैर-यहुदि कालाउ इस्राएलगेलाइ दोफाङ इदोइ दोङ सहरता जोम्का हिघाहि।

²⁸ इम्बालाइ ओदोङ पाहि जेदोङ नाङको सरबुङ कालाउ इस्साहोइ लाम्फा दोङ योजाना बानाइका हिघाहि कि इदोइ दोङ हिलि गोयाङ।

²⁹ एला हे प्रभु, इम्बालाइको धम्कि हिङपि, कालाउ नाङको बान्धाइतिगेलाइहेङ पुरा साहास दोफाङ नाङको बचन धुइलि पि।

³⁰ कालाउ एल्पालि नाङको ताइको खुर फेन्हापा, कालाउ ताइको परमेस्वरको सेवक येसुको मिङ पाहा चिन्ह कालाउ भारभुसाइका कामगेलाइ जेनाको।”

³¹ जेलाउ इम्बालाइ प्रार्थाना पालि दोतेङ इम्बालाइ जोम्का थामेता हेङगालाइन्हाहि, कालाउ इम्बालाइ झाराङ पबित्तरो आत्मासो पोङघाहि, कालाउ इम्बालाइ साहास पातेङ परमेस्वरको बचन हिङपालि तेङहि।

खान्धुराइगेलाइको साझा सम्पति

³² खाङधुरि पाकालाइको समुह झाराङ एनोङ दोङ ह्रदय कालाउ एनोङ दोङ आत्माता हिका हिघाहि, कालाउ इम्बालाइ मध्येसो एमि बुङ ताइको धन-सम्पतिको हिदोइ बुङ आमेने इदोइ काङको केलाइको दोअ्तेङ माअ्दोघाखे। कालाउ इम्बालाइको गोताङ आमेने साझा हिघाहि।

³³ प्रभु येसुको सिकासो सिन्हुका जेङका को बारेता छाल्न्हाका चात्यागेलाइ सरबुङ दोफाङ साक्सि पिघाखे। कालाउ इम्बालाइ झाराङ ह्रुता बार्का आनुग्रह हिघाहि।

³⁴ इम्बालाइ मध्ये हासुहेङ बुङ हिदोइ बुङ आमेनेको खाचो मापरिघाखे, हाइपालिपानु जाइ-जाइको ताइको मिलिङ कालाउ साअ्गेलाइ हिघाखे इम्बालाइ इङको पिइतेङ ताका चुमाघाखे कालाउ छाल्न्हाका चात्यागेलाइहेङ पिघाहि।

³⁵ कालाउ जाइ-जाइहेङ जेदोङ-जेदोङ आमेनेगेलाइ गोइका आन्सार छाल्न्हाका चात्यागेलाइ इङको झाराङहेङ बाखाराइ पिघाखे।

³⁶ इन्ता एमि युसुफ मिङ हिका द्‍याङ हिघाहि। वा लेबि कुलको हिघाहि कालाउ साइप्रस टापुसो लोका हिघाहि। छाल्न्हाका चात्यागेलाइ वासेहेङ बार्नाबास दोअ्घाहि (जाइको आर्था आरुहेङ हाउसाइपाका द्‍याङ)।

³⁷ वा ताइको मिलिङ पिइहि कालाउ इङको ताका छाल्न्हाका चात्यागेलाइहेङ पिहि।