साल्न्हाका चात्या 28 - Dhimal NT

पावल माल्टाता

¹ जेलाउ केलाइ रेम्फाङ जाहाजसो काम्भेता खुअ्नाहि, कालाउ केलाइहेङ थाहा जेङहि, कि इङको टापुको मिङ माल्टा हिघाहि।

² इन्ताको द्‍याङगेलाइ केलाइहेङ रेम्फासो सामाराइहि। हाइपालिपानु इन्ता वाइ लोतेङ चुङनाङ इम्बालाइ मे धोपिहि, कालाउ केलाइ झाराङहेङ स्‍वागत पाहि।

³ पावल ए बोझा मिसिङ जाराइतेङ मेता जुहि। मे धाङकानाङ एनोङ बिस हिका पुय्याँ बाहार लोहि कालाउ पावलको खुरता लुन्धाइन्हाहि।

⁴ इन्ता योम्कालाइ पावलको खुरता पुय्याँ तोइनातेङ हिका तिङतेङ इम्बालाइ ता-ताइमि दोअ्लि तेङहि, इदोइ द्‍याङते हासुहेङ सेअ्का हिलि गोयाङ। वा समुन्द्रसो बान्चितेङ ते ओल्लेहि, कालाउ केलाइको “देबि न्याय” वासेहेङ बान्चिलि पिका मान्थु।

⁵ कालाउ पावल खुर हेङगालाइतेङ पुय्याँहेङ मेता ह्वापिहि, “कालाउ पावलहेङ हाइ दोङ हान्ति माजेङहि।”

⁶ उङको द्‍याङगेलाइ सोचिहि, कि पावल एला इमावा, माकुनु एधामासिङ लोङतेङ स्यावा दोअ्तेङ निकोङ बेर थेकापा पावलहेङ खाङतेङ हि। कालाउ स्यावा दोअ्तेङ ह्रुम्तेङ हिका द्‍याङगेलाइ पावलहेङ हाइ दोङ माजेङका तिङतेङ इम्बालाइ ताइको बिचार बदलेतेङ दोअ्लि तेङहि, “वाते देउता कि हिघाहि।”

⁷ इङको टापुता पब्लियस मिङ हिका एमि प्रमुख द्‍याङ हिघाहि वाको मिलिङगेलाइ इङको थामेको भेरपा हिघाहि। वा केलाइहेङ वाको साअ्ता लोलि दोअ्तेङ काइहि, कालाउ वा केलाइ दोफा रेम्का ब्यभाहार पाहि, केलाइ वाको साअ्ता सुम दिना थेकापा बासा हिनाहि।

⁸ पब्लियसको आबाहेङ मिसा लोका कालाउ लिसि राइनाङ मासाधिका हिघाहि। कालाउ पावल वासेहेङ खाङलि साअ् लिता हानिहि कालाउ वाको भाअ्सिङ प्रार्थाना पाहि, कालाउ ताइको खुर वाको ह्रुता ताअ्तेङ वा एल्पाहि।

⁹ इसिका घाटाना थाहा गितेङ इङको टापुको गोताङ मासाधिकागेलाइ पावलकोता लोहि। कालाउ पावल इम्बालाइहेङ बुङ एल्पा पिहि।

¹⁰ इङको टापुको द्‍याङगेलाइ केलाइहेङ हेन्जाङ साम्मान पाहि, कालाउ केलाइ इन्ता सुम माइना थेकापा हिनाहि। कालाउ न्हुसो केलाइ जाहाजता धोल्न्हाहि कालाउ इम्बालाइ केलाइहेङ गोइका झोको आमेनेगेलाइ बुङ जाहाजता ताअ्पिहि।

पावल रोमता

¹¹ सुम माइना न्हुसो केलाइ आलेकजेन्द्रिया सहरसो लोका जाहाजता धोल्नाहि। इङको जाहाज चुङकाता इदोङ टापुता हिघाहि। कालाउ इदोइ जाहाजको आगाभारि जाउथ्या दिरगेलाइको चित्तरो खोपाइका हिघाहि।

¹² केलाइ सिराक्युस सहरता थुकान्हाहि, कालाउ इन्ता केलाइ सुम दिना थेकापा हिनाहि।

¹³ इन्तासो केलाइ रेगियास सहरता थुकालि लोन्हाहि। एनि न्हुसो माहेसो भेरमा दलाइलि तेङहि, कालाउ केलाइ न्हु दिना पतिओलि सहरता थुकालि लोन्हाहि।

¹⁴ इन्ता केलाइ आधिमि खान्धुराइ ओनेगेलाइहेङ दुसुन्हाहि, इम्बालाइ केलाइहेङ इन्ता ए आथार थेकापा हिलि दोअ्तेङ सेउपाहि। कालाउ न्हुसो केलाइ रोम सहर भारि हानिका दामा हानिन्हाहि।

¹⁵ रोम सहरको आधिमि खान्धुराइगेलाइ केलाइ लोदोङनाखे दोअ्का हिङहि, कालाउ इम्बालाइ केलाइहेङ भेतिलि कालाउ रोम सहरता चुम्पुलि आप्पियसको हाते कालाउ सुम पाति दोअ्का थामेता लोहि। जेलाउ पावल इम्बालाइहेङ तिङहि, वा परमेस्वरहेङ धन्यबाद पिहि कालाउ वा साहास निङहि।

¹⁶ जेलाउ केलाइ रोम सहरता थुकान्हाहि, कालाउ पावलहेङ एमि सिपाइको खाङसुलि ताइकोङ देरा ह्रुतेङ हिलि आनुमति मिलिहि।

रोमता पावलको प्राचार

¹⁷ सुम्नि न्हुसो पावल यहुदिगेलाइको आगुवागेलाइहेङ काइलि दिङगिल्हि, जेलाउ इम्बालाइ जोम्हि कालाउ पावल दोअ्हि, “काङको ओनेगेलाइ, का ताइको सारभिको द्‍याङगेलाइ माकुनु पुर्खागेलाइको मुन्धुमको बिरोधता हाइ दोङ काम पाका मान्थुघा। कालाउ बुङ कासेहेङ यरुसेलेम सहरसो रिम्तेङ रोमि सारकारको खुरता सुम्पि पिका हि।

¹⁸ रोमिगेलाइ कासेहेङ हेन्जाङ प्रस्नगेलाइ पाहि, कालाउ बुङ इम्बालाइ कासेहेङ सेअ्का दन्ड पिका कारन हिदोइ बुङ मानिङहि। कालाउ इम्बालाइ कासेहेङ लाअ्पिलि खाङहि।

¹⁹ कालाउ यहुदि आगुवागेलाइ बिरोध पाकानाङ रोमि साम्रातहेङ आनुरोध पालि कासेहेङ कर लागिहि। कालाउ का काङको ताइको द्‍याङगेलाइको बिरोधता दुसिलि गोइका हाइ दोङ काथा मान्थु।

²⁰ ओदोङ भाअ्सिङ नेलाइ दोफा भेतिलि कालाउ काथा पालि नेलाइहेङ इता काइका हिघा। का एसापा झिन्झिरिहोइ जिङन्हाका हिघा, हाइपालिपानु इस्राएलगेलाइको आस माकुनु ख्रिस्ट लाम्फाङ दोङ लोलि दोका हि दोतेङ का खाङधुरि पाखा।”

²¹ यहुदि आगुवागेलाइ पावलहेङ दोअ्हि, “केलाइ नाङको बिसोइता यहुदिया जिल्लाता हिका द्‍याङगेलाइसो हिदोइ बुङ पात्तारागेलाइ निङका मान्थुन्हाहि। कालाउ ना ते हासु बुङ खान्धुराइगेलाइ लोतेङ नाङको बिरोधता हिदोइ बुङ मारेम्का काथा दोअ्का माकुनु हिङपाका हि।

²² कालाउ केलाइ नाङको बिचारगेलाइ हिङलि भोअ्नाखे। हाइपालिपानु केलाइहेङ थाहा हि कि इदोङ प्रभुको दामाको बिरोधता द्‍याङगेलाइ द्‍यापाहाङ मारेम्का खिनिङ दोअ्तेङ हि।”

²³ उङको यहुदिगेलाइ पावलको भाअ्सिङ एनोङ दिना साल्हि, इङको दिना हेन्जा द्‍याङगेलाइ पावलहेङ देराता भेतिहि। कालाउ पावल इम्बालाइहेङ ह्रिमासो बेलापा थेकापा परमेस्वरको सासनको बिसोइता कालाउ मोसाको व्यवस्था कालाउ परमेस्वरको बक्तागेलाइ लेखेका कितापगेलाइसो बुझि पाहि। कालाउ इम्बालाइहेङ येसुको खाङधुरिता चुमालि कोसिस पाहि।

²⁴ हेथेते पावलको काथागेलाइता खाङधुरि पाहि, कालाउ हेथेते मापाहि।

²⁵ इम्बालाइ ता-ताइमिता सहमति माजेङहि कालाउ पावल या आम्तिम काथा दोअ्तेङ इम्बालाइहेङ बिदा पिहि, “पबित्तरो आत्मा यासाइया परमेस्वरको बक्ताको माध्यामसो नाङको पुर्खागेलाइहेङ दोअ्का काथा सत्ये हिघाहि:

²⁶ उङको द्‍याङगेलाइ हिका भारि हाने, कालाउ इम्बालाइहेङ दोअ्, हिङनुते नेलाइ हिङसुखेना, कालाउ बुङ नेलाइ मागिसुखेना, खाङनुते खाङसुखेना कालाउ बुङ मातिङसुखेना।

²⁷ हाइपालिपानु इदोइ द्‍याङगेलाइको हृदय थाङका जेङका हि, कालाउ इम्बालाइको न्हातोङगेलाइ बैरा जेङका हि, कालाउ इम्बालाइ ताइको मिसियाँ चिम्का हि, माकुनुते इम्बालाइ मिसियाँहोइ तिङधावा, कालाउ न्हातोङहोइ हिङधावा, ह्रदयहोइ बुझिधावा कालाउ का भारि घुरिधावा कालाउ का इम्बालाइहेङ एल्पाधाङका।”

²⁸ ओदोङ भाअ्सिङ का चाहिखा कि नेलाइहेङ थाहा जेनाको, कि परमेस्वरको मुक्तिको सुसमाचार गैर-यहुदिगेलाइको भाअ्सिङ पिगिल्का हि, कालाउ इम्बालाइ सुइकार पावा।

²⁹ कालाउ पावल इदोइ काथा दोअ्लि दोअ्तेङ, यहुदिगेलाइ ता-ताइमिता हेन्जा काथा पोसु काताङ बिदा जेङहि।

³⁰ पावल न्हुसो पुरा न्हे बासार थेकापा इन्ता ताइकोङ भाराको साअ्ता हि, वा झाराङ द्‍याङगेलाइहेङ स्‍वागत पाहि, जाइ वासेहेङ भेतिलि लोहि।

³¹ पावल साहासि जेङतेङ बिना रोकतोक परमेस्वरको सासनको बिसोइता प्राचार पाघाहि, कालाउ प्रभु येसु ख्रिस्टको बिसोइता सिक्स्या पिघाहि।