साल्न्हाका चात्या 27 - Dhimal NT

पावलको रोमता पाक-पाका

¹ जेलाउ हाकिम फेस्तस पाहासो या निस्चय जेङहि, कि केलाइ जाहाजसो इटालि सारभि हानिलि गोयाङ, कालाउ इम्बालाइ पावल कालाउ आरु कैदिगेलाइ बुङ साम्रात आगसतसको सेनाको कप्तान युलियसको जिम्माता लाअ्पिधिहि।

² केलाइ जाहाजता धोल्न्हाहि कालाउ एड्रामिटेनोस सहरसो एसिया प्रदेसको भेनेङ-भेनेङ बन्दरगाहगेलाइ पाअ्तेङ पाक पानाहि। कालाउ केलाइ दोफा आरिस्ताखर्स बुङ हिघाहि वा म्यासिडोनिया प्रदेसको थेसलोनिकि सहरको हिघाहि।

³ न्हु दिना केलाइ सिदोन सहरता थुकान्हाहि। कालाउ युलियस पावलहेङ रेम्फा ब्यभाहार पाहि कालाउ ताइको सानाइतिगेलाइ दोफा बुङ भेतिलि पिहि, कालाउकि वा इम्बालाइसो ताइको आवस्यक्ता पुरा पाको।

⁴ इन्तासो केलाइ आरोङ जाहाजसो पाक पालि तेङन्हाहि, कालाउ भेरमा केलाइको भेरपासो लोघाहि। ओदोङ भाअ्सिङ केलाइ साइप्रस टापुको आलि-आलि पाहासो जाहाज चालाइहि। कालाउ इन्तासो नेलाइ जेता भेरमा हेन्जा मान्थुघाहि इन्ता हानिहि।

⁵ जेलाउ केलाइ किलिकिया कालाउ प्यामफिलिया जिल्लागेलाइको भेर्पाको समुन्द्र पार पान्हाहि, इन्तासो केलाइ लाइसिया प्रदेसको एनोङ माइरा सहरता थुकालि लोन्हाहि।

⁶ इन्ता आलेकजेन्द्रिया सहरसो इटालि सारभि हानिका जाहाज निङतेङ कप्तान केलाइहेङ इङकोता धोल्पाहि।

⁷ केलाइ हेन्जा दिनासोङ आलो-ओलोपा दोअ् मादोअ्पा किनिडस नगरको भेर्पा थुकान्हाहि। कालाउ आझाइ भेरमाहोइ केलाइहेङ आगा साराइलि मापिकानाङ केलाइ क्रेट टापुको आगा चुमातेङ आलि-आलि जेङतेङ सालमोने दोअ्का बाल्हाको रासको थामेको भेर्पा जेङतेङ हानिन्हाहि।

⁸ एकदम मुस्किलसो केलाइ टापुको काम्भे-काम्भे पातेङ सुन्दर बन्दरगाह दोअ्का थामेता हानिन्हाहि, जेदोङ चाहि लासिया दोअ्का सहरको भेरपाङ हिघाहि।

⁹ कालाउ सोमोइ हेन्जा बितिलि दोअ्का हिघाहि, कालाउ समुन्द्रको पाक एकदम खातारानाक हिघाहि, हाइपालिपानु प्रायस्चितको दिना दोलि दोका हिघाहि कालाउ इङको सोमोइता समुन्द्रता धुम भेरमा लोका दिनागेलाइ हिघाहि। ओदोङ भाअ्सिङ पावल इम्बालाइहेङ चेताउनि पितेङ दोअ्हि,

¹⁰ “ओइ सानाइतिगेलाइ, का तिङदोङखा, कि केलाइ एला इतासो जाहाजता हानिनु जाहाज कालाउ आमेनेको खिनिङ माको, कालाउ केलाइको ज्यान बुङ हानिलि द्वाङ।”

¹¹ कालाउ कप्तान पावलको काथा खान्तेङ जाहाज चालाइका कालाउ जाहाजको ग्रिहि दोअ्का काथा हेन्जा साहि।

¹² कालाउ सुन्दर बन्दरगाहाता चुङ दिनागेलाइ बितिपालि भाअ्सिङ रेम्का थामे मान्थुघाहि। ओदोङ भाअ्सिङ हेन्जा जोसो द्‍याङगेलाइ हेसा पालाउ बुङ इन्तासो फोनिक्स बन्दरगाहाता हानितेङ चुङ दिना बितिपालि साल्लाहा पिहि। फोनिक्स चाहि क्रेट टापुको काम्भेता परिका बन्दरगाहा हि, जेदोङ माहे, दिहे कालाउ दाहे, दिहे भारि घुरेका हि। कालाउ इङको थामे चुङ दिना बितिपालि रेम्का हिघाहि।

समुद्रता दुर भेरमा लोका

¹³ जेलाउ माहेसो सिरि-सिरिका भेरमा लोहि, इम्बालाइ सोचिहि कि ओबालाइको योजाना पुरा पालि सोमोइ लोका हि दोअ्तेङ कालाउ इम्बालाइ लङगुर ओल्लापाहि कालाउ जाहाजहेङ क्रेट टापुको आलि-आलि पातेङ पाक पालि तेङहि।

¹⁴ कालाउ आतुइसा सोमोइ न्हुसो इङको टापुसो बार्का दुर भेरमा लोहि, जेदोङ चाहि दाहे-नुहे दोअ्का दुर भेरमा हिघाहि।

¹⁵ जेलाउ जाहाजहेङ भेरमा ताइको दामा भारि चुम्पुलि, कालाउ जाहाज भेरमाको सामाना पालि मादोहि, ओदोङ भाअ्सिङ केलाइ जाहाजहेङ दुम भेरमा जेता चुम्पुखे ओसोङ हानाको दोअ्तेङ लाअ्पिहि।

¹⁶ कालाउ केलाइ क्‍लौडा दोअ्का म्हुइका टापुता हानेन्हाहि, कालाउ केलाइ एकदम मुस्किलसो जाहाजको न्हेपाहाङ धेउका म्हुइका नाउहेङ जोगिपालि दोन्हाहि।

¹⁷ इङको म्हुइका नाउहेङ जाहाजता चुमाका न्हुसो इम्बालाइ जाहाजको कोरपाहाङ ए दोफाङ ताअ्लि द्‍याहामहोइ जिङहि, कालाउ जाहाज सिरितिसको दाल्दालिता भास्याङबे दोअ्तेङ द्‍याङगेलाइ थिहि। ओदोङ भाअ्सिङ इम्बालाइ चिरको ल्हिका हुक समुन्द्रता लेता खुअ्पाहि, कालाउ जाहाजहेङ भेरमा दोफाङ झोलि पिहि।

¹⁸ कालाउ केलाइहेङ दुर भेरमा तोलिकाताङ कालाउ फेन्हापालि तेङहि, कालाउ न्हु दिना इम्बालाइ आनेमानेगेलाइ जाहाजसो थाल्लि तेङहि।

¹⁹ कालाउ सुम्निको दिना इम्बालाइ जाहाजको आरु गोइका आमेनेगेलाइ बुङ थाल्पिहि।

²⁰ हेन्जा दिना थेकापा केलाइ ना ते सान्हे ना ते फुरुगेलाइ तिङन्हाहि। दुम भेरमा लागातार लोनाङ केलाइ आम्तिमता बान्चिका आस दोङ लाअ्न्हाहि।

²¹ हेन्जा दिना थेकापा केलाइ हासु बुङ हाइ दोङ माचासिङ हिनाहि, कालाउ पावल इम्बालाइको आगाता जाअ्तेङ दोअ्हि, “ओइ सानाइतिगेलाइ, नेलाइहेङ का क्रेट टापु मालाअ्सु दोअ्घाखा। कालाउ नेलाइ काङको काथा माहिङसुन्हा, ओदोङ भाअ्सिङ इसिका दुख कालाउ आमेनेगेलाइ हान्ति जेङहि।

²² कालाउ एला का दोअ्दोङखा साहास पासु, नेलाइ मध्येसो हासुको बुङ ज्यान मान्हाङ भरु जाहाज चाहि नासातावा।

²³ आन्जि न्हिसिन्ता परमेस्वरको स्वर्गदुत काङको भेरपा लोहि, कालाउ का ओदोङ परमेस्वरको द्‍याङ हिघा, जाइको का आराधाना पाखा।

²⁴ वा दोअ्हि, पावल नाअ् माअ्थि, नाअ् रोमि साम्रातको आगाता जाअ्लिङ गोयाना। कालाउ परमेस्वर ताइको आनुग्रह पाहासो नाङको दोफा जाहाजता हिका झाराङको जिबन बान्चि पावा।

²⁵ ओदोङ भाअ्सिङ ओइ सानाइतिगेलाइ, साहास पासु, का परमेस्वरता खाङधुरि पाखा, वाको दुत कासेहेङ दोअ्का भाइपाङ जेनावा।

²⁶ कालाउ बुङ केलाइको जाहाज हिदोइ बुङ एनोङ टापुता दुरघाटाना जेनाङ।”

जाहाज नासा हि

²⁷ तेद्‍याको न्हिसिन थेकापा बुङ केलाइ एडरिया समुन्द्रको कोरपाङ आउलि गिल्का हिघान्हाहि। कालाउ आधा न्हिसिन्ता जाहाज चालाइकागेलाइ केलाइ हिदोइ बुङ काम्भेता थुकान्हाहि दोअ्का आनुमान लागाइहि।

²⁸ कालाउ इम्बालाइ चि हेथे लिता हि दोअ्तेङ दोङलाउ चि सैइतिस मिटर लेता हिघाहि। कालाउ आसा ओसो हानितेङ आरोङ चिको दुब्बा आठाइस मिटर पाट्ता लागाइहि।

²⁹ कालाउ इम्बालाइ जाहाज उन्ठुइता थुन्हालि द्वाङ वाला दोअ्तेङ थितेङ हिघाखे। ओदोङ भाअ्सिङ इम्बालाइ जाहाजको लेसारापाहासो द्‍यालोङ लङगुर हुल्पाहि कालाउ इम्बालाइ ह्रिमा जेनाको दोअ्तेङ प्रार्थाना पालि तेङहि।

³⁰ जेलाउ हेथेते जाहाज चालाइकागेलाइ जाहाज लाअ्तेङ खाअ्लि भोघाखे, कालाउ इम्बालाइ आगाभारि ल्हिका चिरको हुक हुल्पाका बाहानाहोइ म्हुइका नाउगेलाइ समुन्द्रता खुअ्पाहि।

³¹ कालाउ पावल कप्तान कालाउ सिपालाइहेङ दोअ्हि, “जेसापा उङको द्‍याङगेलाइ जाहाजता माधोल्हेपानु नेलाइ बान्चिलि मादोस्वाना।”

³² कालाउ सिपालाइ इङको ज्यान बान्चेपाका नाउ चि लिताङ हानाको दोअ्तेङ दिहाम पोपिहि।

³³ जेलाउ झेङफुरुफुरु जेङलि तोम्का हिघाहि, पावल द्‍याङगेलाइहेङ हाउसाइ पातेङ दोअ्हि, “हाइ दोङ चाका आमेने चाअ्लि गोयाङ। हाइपालिपानु नेलाइहेङ चिन्ताहोइ माचाका नानि चौध दिना जेङहोइ।

³⁴ ओदोङ भाअ्सिङ हाइ दोङ चाअ्सु दोअ्तेङ का नेलाइहेङ आनुरोध पाखा कालाउकि नेलाइ बान्चिसु दोसु, नेलाइ हासुको बुङ पुरिङको एनोङ पुसुङ बुङ मानासातावा।”

³⁵ पावल दोङ एसा दोअ्लि दोअ्तेङ वा तोले ह्रुहि कालाउ झाराङको आगाता परमेस्वरहेङ धन्यबाद पितेङ तोले पोङतेङ चालि तेङहि।

³⁶ कालाउ न्हुसो इम्बालाइ झाराङ साहास निङतेङ हाइ दोङ चाका आमेने चाअ्लि तेङहि।

³⁷ केलाइ जाम्मा न्हे साइ सुम कुरि तेन्हि झना द्‍याङगेलाइ जाहाजता हिघानाहि।

³⁸ इम्बालाइ हामु भेल्पाङ चातेङ, जाहाजहेङ होम्का बानाइलि समुन्द्रता गहम थाइगिल्हि।

³⁹ जेलाउ झेङहि इम्बालाइ इङको नाल्लि मादोहि, कालाउ इम्बालाइ एनोङ पोखोरि तिङहि। इङको बालाको काम्भे हिघाहि। दोका जोति इम्बालाइ जाहाजहेङ काम्भेता चुमालि योजाना बानाइहि।

⁴⁰ कालाउ इम्बालाइ ल्हिका चिरको हुकगेलाइको दियाम खाइपिहि कालाउ इङकोहेङ समुन्द्रताङ हिलि पिहि। इङको बेला इम्बालाइ जाहाज चलाइका बाहानाता धेउतेङ ताअ्का दियामगेलाइ खाइपिहि। कालाउ जाहाजको आगापाहाको पाल हेङ ह्रुता ल्होपातेङ ताअ्हि कालाउकि भेरमाहोइ जाहाजहेङ आगाता चुम्पुहि कालाउ केलाइ काम्भे भारि हानिहि।

⁴¹ कालाउ जाहाज बालाको भासता परिहि, कालाउ जाहाजको आगापाहाको भाग इन्ताङ खेअ्हि कालाउ जाहाज हानिलि मादोहि। कालाउ लेसारापाहाको भाग चिको साल्काहोइ पेङन्हालि तेङहि।

⁴² कैदिगेलाइ पाउरितेङ खाअ्ताङबे दोअ्तेङ सिपालाइ इम्बालाइहेङ सेअ्लि मतो पाहि।

⁴³ कालाउ कप्तान पावलहेङ बान्चिपालि खाङघाखे, ओदोङ भाअ्सिङ कैदिगेलाइहेङ सेअ्लि आनुमति मापिहि। वा कैदिगेलाइहेङ जाइ पाउरिलि दोघाखे लाम्फा धाअ्सिलि कालाउ पाउरिलि काम्भेता हानिलि आग्या पिहि।

⁴⁴ कालाउ बाकि हिका द्‍याङगेलाइ चाहि, फालागेलाइता कालाउ जाहाजको पोङनाका टुक्रागेलाइता खोम्तेङ हानिलि आग्या पिहि। एसापा केलाइ झाराङ रेम्फासो काम्भेता थुकान्हाहि।