साल्न्हाका चात्या 25 - Dhimal NT

फेस्तसको आगाता पावलको मुद्दा

¹ फेस्तस हाकिम यहुदिया जिल्लाता लोहि कालाउ सुम दिना न्हुसो, वा कैसरिया सहरसो यरुसेलेम सहर हानिहि।

² मुलि पुजारिगेलाइ कालाउ यहुदि आगुवागेलाइ फेस्तस हाकिम दोफा भेतिहि कालाउ पावलको बिरोधता मुद्दा पेस पाहि।

³ कालाउ इम्बालाइ फेस्तस हाकिम दोफा बिन्ति पाहि कि वा पावलहेङ यरुसेलेम सहरता पिगिल्तेङ इम्बालाइहेङ लेङचापालि, हाइपालिपानु इम्बालाइ पावलहेङ दामाताङ सेअ्लि दाउ पातेङ हिघाहि।

⁴ कालाउ फेस्तस हाकिम जोबाफ पिहि, “पावलहेङ कैसरिया सहरता दोङ झ्याल्खानाता ताअ्का हि, कालाउ का बुङ ताइमिङ कैसरियाता धेमाङ हानाङका।”

⁵ वा दोअ्हि, “नेलाइको आधिमि आगुवागेलाइ बुङ का दोफा कैसरिया सरता लोसु, जेसापा पावल हाइ दोङ गल्ति जातिङको पाका हिहे पानु, इम्बालाइ वासेहेङ दुसिलि द्वावा।”

⁶ फेस्तस यरुसेलेम सहरता येए-ते दिना थेकापा हितेङ कालाउ न्हुसो वा कैसरिया सहरता घुरितेङ हानिहि। कालाउ न्हु दिना फेस्तस न्याय आसानता योम्तेङ सिपालाइहेङ पावलहेङ चुमालि हुकुम पिहि।

⁷ पावल लोतेङ न्हुसो यरुसेलेमसो लोका यहुदि आगुवागेलाइ वाको कोरपाहाङ जाअ्हि, कालाउ पावलको बिरोधता निकोङ दुसिहि, जाइको इम्बालाइ प्रमान पिलि मादोअ्हि।

⁸ कालाउ पावल ताइको पक्स्यता दोअ्हि, “का यहुदिगेलाइको व्यवस्थाको बिरोधता ना ते मुन्दिरको बिरोधता कालाउ ना ते रोमि साम्रातको बिरोधता हिदोइ बुङ आपाराध पाका मान्थुघा।”

⁹ कालाउ बुङ फेस्तस हाकिम यहुदि आगुवागेलाइहेङ खुसि बानाइलिको भाअ्सिङ पावलहेङ हिअ्हि, “हाइ नाङको ह्रुता लादाइका आरोपगेलाइता काङको आगा न्याय निङलि यरुसेलेम हानिलि खाङखेना?”

¹⁰ कालाउ पावल दोअ्हि, “का रोमि साम्रातको न्याय आसनको आगाता जाअ्का हिघा, कालाउ जेता काङको न्याय निङलि गोयाङका। का यहुदिगेलाइको बिरोधता हाइ दोङ गल्ति काम पाका मान्थुघा या काथा नासेहेङ रेम्फा थाहा हि।

¹¹ जेसापा का हिदोइ बुङ आपाराधको दुसिका हिघा, कालाउ का सिलि गोइका योग्यको काम पाका हिघा पानु, का सिलि बुङ इन्कार मापाङका। कालाउ जेसापा का ह्रुता लादाइका आरोपगेलाइता हिदोइ बुङ सत्ये मान्थुनु कासेहेङ यहुदि आगुवागेलाइको खुरता सुम्पिलि हासुको बुङ खाबारा मान्थु। का आनुरोध पाखा, कि काङको न्याय रोमि साम्रात दोङ पाको।”

¹² कालाउ फेस्तस हाकिम ताइको साल्लाहाकारगेलाइ दोफा साल्लाहा पातेङ दोअ्हि, “नाअ् रोमि साम्रात दोफा आनुरोध पान्हा, ओदोङ भाअ्सिङ नाअ् रोमि साम्रातकोता दोङ हानाना।”

राजा आग्रिप्पाको आगाता पावल

¹³ आले दिना न्हुसो राजा आग्रिप्पा कालाउ वाको बेजान ओने बर्निकि फेस्तस हाकिमहेङ सेउपालि कैसरिया सहरता लोहि।

¹⁴ इम्बालाइ इन्ता हेन्जा दिना थेकापा हितेङ, फेस्तस हाकिम राजाहेङ पावलको मुद्दाको बारेता दोअ्हि, “इता एमि कैदि हि जाइहेङ फेलिक्स इता लाअ्तेङ हानिका हि।

¹⁵ जेलाउ का यरुसेलेम सहरता हिघाखा, इन्ताको मुलि पुजारिगेलाइ कालाउ यहुदि आगुवागेलाइ वाको बिरोधता मुद्दा ह्वाका हिघाहि, कालाउ वासेहेङ दन्ड पिलि गोयाङ दोअ्तेङ आनुरोध पाका बुङ हिघाहि।”

¹⁶ कालाउ का इम्बालाइहेङ दोअ्घा, हिदोइ बुङ द्‍याङहेङ मादुसिपा थेकापा रोमि सारकारको दन्ड पिका चलन मान्थु, दुसिका लादाइका द्‍याङ, दुसिका लादाइकाको आगाता ताइको काथा दोअ्लि आबसर निङलि गोइखे।

¹⁷ ओदोङ भाअ्सिङ जेलाउ यहुदि आगुवागेलाइ का दोफा इता कैसरिया सहरता लोहि, कालाउ का मालेद्रासिङ न्हु दिनाङ का न्याय आसनता योम्तेङ पावलहेङ चुमालि आदेस पिघा।

¹⁸ जेलाउ यहुदि आगुवागेलाइ जाअ्हि कालाउ आरोप लागाइहि, इम्बालाइ हिदोइ बुङ मारेम्का कामको दुसिलि मादोहि, जेसाङ का सोचिका हिघाखा।

¹⁹ कालाउ इम्बालाइको मामिलिसुका चाहि इम्बालाइकोङ धर्मको बिसोइता हिघाहि, कालाउ सिलि दोका येसु मिङ पाका द्‍याङको बिसोइता हिघाहि, कालाउ जाइहेङ पावल आझाइ बुङ सिन्हुकाङ हि दोअ्तेङ दाबि पाघाखे।

²⁰ कासेहेङ इदोइ गोताङ काथागेलाइको बिसोइता हेसा थाहा निङका दोअ्का काथा थाहा मान्थुघाहि, ओदोङ भाअ्सिङ का पावलहेङ हिअ्घा, “हाइ नाअ् या आरोपगेलाइको बिसोइता न्याय निङलि यरुसेलेम सहर हानिलि भोखेना?

²¹ जेलाउ पावल आनुरोध पाहि कि, वाको न्याय रोमि साम्रात दोङ पाको, कालाउ का वासेहेङ रोमि साम्रातकोता मापिगिल्पा भरि पावलहेङ पहराता ताअ्का आदेस पिका हिघा।”

²² कालाउ राजा आग्रिप्पा फेस्तस हाकिमहेङ दोअ्हि, “का इङको द्‍याङको काथा हिङलि खाङखा।” कालाउ फेस्तस दोअ्हि, “जुम्नि नाअ् हिङलि द्वाना।”

²³ न्हु दिना राजा आग्रिप्पा कालाउ वाको बेजान ओने बर्निकि बार्का आदार दोफाङ सेनापतिगेलाइ कालाउ सहरको प्रमुख द्‍याङगेलाइ दोफा सभाता दुल्हि। कालाउ फेस्तस हाकिम सिपालाइहेङ पावलहेङ चुमालि दोअ्तेङ हुकुम पिहि।

²⁴ फेस्तस हाकिम दोअ्हि, “राजा आग्रिप्पा कालाउ इता जोम्का झाराङ सज्जनगेलाइ, नेलाइ इदोइ द्‍याङहेङ तिङसुखेना, इदोइ द्‍याङ एला बान्चिलि योग्यको मान्थु दोअ्तेङ झाराङ यहुदि आगुवागेलाइ यरुसेलेम सहरता कालाउ इता बुङ का दोफा कैसरिया सहरता ह्रिकाइतेङ बिन्ति पाका हि।”

²⁵ काङको बिचारता वा एसापा सेअ्न्हालि गोइका हाइ दोङ भुल वा पाका का मानिङघा, कालाउ वा ताइमिङ साम्रातसो न्याय पालि आनुरोध पाकानाङ का वासेहेङ रोम सहरता पिगिल्का निर्नय पाघा।

²⁶ कालाउ का पावलको बिसोइता रोमि साम्रातहेङ हाइ दोङ बिसेस काथा लेखेलिको भाअ्सिङ मान्थु। ओदोङ भाअ्सिङ का वासेहेङ नेलाइकोङ आगाता कालाउ खास पातेङ ओइ राजा आग्रिप्पा, नाङको आगाता चुमाका हिघा, कालाउ नेलाइ वासेङ जाचितेङ सायद का हाइ दोङ काथा लेखेलि निनाङका।

²⁷ हाइपालिपानु वाको हाइ दोङ बार्का दुसिका मातिङपासिङ वासेहेङ दिङगिल्लि कासेहेङ उचित मालागिहि।