साल्न्हाका चात्या 24 - Dhimal NT

पावल फेलिक्सको आगाता

¹ ना दिना न्हुसो प्राधान पुजारि हननिया कालाउ आधिमि यहुदि आगुवागेलाइ, कालाउ तर्तुल्लस मिङ हिका वकिलहेङ ताइको दोफा चुमातेङ कैसरिया सहरता लोहि। कालाउ इम्बालाइ हाकिमकोता पावलको बिरोध मुद्दा चालाइहि।

² पावलहेङ हाकिमको आगाता चुमालि दोअ्तेङ तर्तुल्लस वाको बिरोधता एसा दोअ्काताङ मुद्दा पेस पालि तेङहि, “मानेनिय फेलिक्स, नाङको सासनता केलाइ सान्ति निङका हिनाहि, कालाउ नाअ् इदोइ सारभिको भाअ्सिङ सुधारगेलाइ सुरु पाका हिना।”

³ इदोइ काथा गोताङ प्रकारहोइ गोताङ थामेता धन्यबाद दोफाङ सुइकार पान्हाखे।

⁴ कालाउ का नाङको हेन्जा सोमोइ ह्रुलि माचाहिखा, का नासेहेङ बिन्ति पाखा कि आतुइसाता केलाइको बिन्ति दाया पातेङ हिङपि।

⁵ “केलाइ गिनाखे कि इदोइ द्‍याङ समस्या चुमाका द्‍याङ हि, कालाउ या जोसो-ओसोङ सुमिङ भारि यहुदिगेलाइको माझाता फेसुपाका हि, कालाउ या नासिरिको आगुवा बुङ हि।

⁶ या मुन्दिरहेङ आसुद्द बानाइलि भोघाखे, कालाउ वासेहेङ केलाइ रिम्न्हाहि। कालाउ केलाइको यहुदि व्यवस्था आन्सार वासेहेङ दन्ड बुङ पिलि चाहिनाखे,

⁷ कालाउ सेनापति लुसियस केलाइकोता लोतेङ जबरजस्ति वासेहेङ केलाइको खुरसो घिङतेङ चुम्पुहि, कालाउ वाको बिरोधता आभियोग लागाइकालाइहेङ नाङकोता लोलि आदेस पिहि।

⁸ एला नाअ् ताइमिङ दोङ इदोइ द्‍याङहेङ जाचिनु केलाइ वाको ह्रुता लागाइका गोताङ दुसिकागेलाइ सत्ये हि दोअ्तेङ ताइमिङ बुझियाना।”

⁹ आरु यहुदिगेलाइ बुङ सहमति जेङहि कालाउ दोअ्हि, “इङको काथागेलाइ सत्ये दोङ हि।”

¹⁰ हाकिम पावलहेङ नुइ धुइलि साङकेत पातेङ न्हुसो पावल जोबाफ पिहि, “का गिखा, कि नाअ् हेन्जा बासारसोङ इदोइ सारभिको द्‍याङको न्याय कर्ता हिना। ओदोङ भाअ्सिङ का ताइको पक्स्यता खुसिसोङ बयान प्याङका।”

¹¹ का यरुसेलेम मुन्दिरता आराधाना पालि तेन्हे दिना खान्तेङ हेन्जा लाम्फा जेङका मान्थु। नाअ् ताइमिङ इदोइ सत्ये हि दोअ्तेङ जाचिलि द्वाना।

¹² इदोइ द्‍याङगेलाइ ना ते कासेहेङ हिदोइ बुङ द्‍याङगेलाइ दोफा मुन्दिरता काथा पोसुका पाका तिङहि, ना ते यहुदिगेलाइको चाउघारा साअ्गेलाइको जेरता ना ते सहरको हिदोइ बुङ थामेगेलाइता तोङपाका तिङहि।

¹³ नाअ् ते एबालाइ एला कासेहेङ दुसितेङ हिका काथागेलाइको प्रमान पिलि द्वावा।

¹⁴ कालाउ या का नाङको आगाता सुइकार पाखा, कि उङको यहुदिगेलाइ सोचिहि कि का ख्रिस्टको दामाहेङ आनुसरन पाखा, जाइहेङ इम्बालाइ धाताइका सिक्स्या धिरपाका गुट दोअ्खे, व्यवस्थाता जेङका काथा कालाउ परमेस्वरको बक्तागेलाइको कितापता लेखेका गोताङ काथा खाङधुरि पातेङ काङको पुर्खागेलाइको परमेस्वरको आराधाना का पाखा।

¹⁵ का परमेस्वरता इङकोङ आस पाखा, जाइ या यहुदिगेलाइ बुङ पाखे, कि धर्मि कालाउ आधर्मि न्हेमि दोङ सिकासो आरोङ सिन्चालताङ।

¹⁶ ओदोङ भाअ्सिङ का जेलाउ बुङ परमेस्वरको कालाउ द्‍याङगेलाइको आगाता का काङको बिचारहेङ सुद्द पालि कोसिस पाङका।

¹⁷ एला का हेन्जा बासार न्हुसो ताइको गरिब द्‍याङगेलाइको भाअ्सिङ दान कालाउ परमेस्वरहेङ भोग चढाइलि यरुसेलेम सहरता लोका हिघाखा।

¹⁸ इङको बेला इम्बालाइ कासेहेङ मुन्दिरता हिलाउ जेङका बिधिगेलाइ पुरा पातेङ हिका तिङहि। इन्ता ना ते हिदोइ बुङ जेर हिघाहि, ना ते हिदोइ बुङ खाल्को जोग्ग्रेका हिघाहि।

¹⁹ कालाउ इन्ता एसिया प्रदेससो आधे यहुदिगेलाइ हिघाहि, जेसापा का हाइ दोङ गोल्ति पाका हिघा पानु, इम्बालाइ कासेहेङ दुसिलिको भाअ्सिङ इता नाङको आगाता हिलि गोइका हिघाहि।

²⁰ माकुनु इता हिका द्‍याङगेलाइ हिसु, कि इम्बालाइ काङकोता हाइ आपाराध निङका हिघाहि, जेलाउ का माहासभाको आगाता जाअ्तेङ हिघाखा?

²¹ इम्बालाइ कासेहेङ एनोङ खिनिङ काथाको दुसिलि द्वाङ, जेलाउ का इम्बालाइको माझाता ह्रिकाइतेङ दोअ्का हिघाखा, “नानि नेलाइको आगाता काङको मुद्दा चलितेङ हि, हाइपालिपानु कासेहेङ खाङधुरि हि, कि परमेस्वर सिकालाइहेङ आरोङ सिन्चालपाङ।”

²² फेलिक्स प्रभुको दामाको बिसोइता हेन्जा काथागेलाइ गिघाखे। ओदोङ भाअ्सिङ वा इम्बालाइहेङ एसा दोअ्तेङ सभाहेङ बन्द पापिहि, “जेलाउ सेनापति, लुसियस इता ल्वावा, का इदोइ काथागेलाइको बिसोइता फाइसाला पाङका।”

²³ कालाउ फेलिक्स कप्तानहेङ आदेस पिहि, पावलहेङ रेम्फा सुरुक्स्याता ताअ्लि, कालाउ वासेहेङ आधे स्वतन्तर पि कालाउ वा आवस्यकता पुरा पालि वाको सानाइतिगेलाइहेङ मारोके।

²⁴ आले दिना न्हुसो हाकिम फेलिक्स ताइको यहुदि बे दुसिल्लाहेङ दोफाङ चुम्तेङ कैसरिया सहरता लोहि। कालाउ फेलिक्स पावलहेङ काइतेङ ख्रिस्ट येसुहेङ खाङधुरि पाका बारेता वाकोसो हिङहि।

²⁵ जेलाउ पावल परमेस्वरको आगाता ठिक काम पाका कालाउ इच्छाहेङ काबुता ताअ्लि कालाउ परमेस्वर न्याय पाका दिना लोदोङखे दोअ्का काथा हिङपाहि कालाउ फेलिक्स थितेङ दोअ्हि, “एलाङ जेङहोइ हानेसु, सोमोइ निङका बेलाता का नासेहेङ कायाङका।”

²⁶ हाकिम फेलिक्स पावलको दोअ्का इङको काथागेलाइता थिलाउ बुङ, वा पावलहेङ घुरि-घुरि काइतेङ काथा पाघाहि। हाइपालिपानु पावल झ्याल्खानासो बाहार ओल्लेलिको भाअ्सिङ आधे ताका पियाङ दोअ्का वा आस ताअ्का हिघाहि।

²⁷ कालाउ न्हे बासार न्हुसो फेलिक्सको थामेता पोर्सिअस फेस्तस हाकिम जेङहि। कालाउ फेलिक्स यहुदिगेलाइहेङ खुसि ताअ्लिको भाअ्सिङ पावलहेङ झ्यालखानाता ताअ्पिहि।