साल्न्हाका चात्या 21 - Dhimal NT

यरुसेलेमता पाक-पाका

¹ कालाउ केलाइ इम्बालाइ दोफा बिदा ह्रुतेङ जाहाज धोल्तेङ सिधाङ कोस टापुता थुकालि लोन्हाहि, कालाउ न्हु दिना रोडसको टापुता लोन्हाहि कालाउ इन्तासो पटारा टापुता थुकान्हाहि।

² कालाउ फोनिके प्रदेसता हानिका एनोङ जाहाज निङतेङ केलाइ इङकोता धोल्तेङ हानिन्हाहि।

³ जेलाउ केलाइ साइप्रस टापुको भेरपा थुकान्हाहि, कालाउ केलाइ इङको को केपाहा ओदोइ पार सिरिया प्रदेस भारि हानितेङ टुरोसता खुअ्नाहि। हाइपालिपानु जाहाजको आनेमानेगेलाइ इन्ता खुपालि गोइका हिघाहि।

⁴ इन्ता केलाइ चात्यागेलाइहेङ भोन्हाहि कालाउ भेतिन्हाहि, कालाउ ओबालाइ दोफा केलाइ ए आथार थेकापा हिनाहि। कालाउ इम्बालाइ पबित्तरो आत्माको आगुवाइ निङतेङ पावलहेङ यरुसेलेम सहर मान्हे दोअ्तेङ बिन्ति पाहि।

⁵ कालाउ ए आथार दिना न्हुसो जेलाउ इन्तासो केलाइको हानिका सोमोइ लोहि, कालाउ केलाइ ओबालाइसो बिदा जेङतेङ हानिन्हाहि। कालाउ चात्यागेलाइ ताइको जामाललाइ सुधाङ केलाइहेङ झाराङ बिदा पिलि सहर बाहार थेकापा लोहि। कालाउ केलाइ झाराङ समुन्द्रको काम्भेता तिरु थोन्हाहि कालाउ प्रार्थाना पान्हाहि। कालाउ केलाइ एमिसो भेनेङ दोफाङ बिदा ह्रुन्हाहि।

⁶ कालाउ न्हुसो केलाइ बिदा ह्रुतेङ जाहाजता ताङन्हाहि, कालाउ इम्बालाइ चाहि ताइको साअ् घुरिहि।

⁷ केलाइ टुरोस नगरसो जाहाजता धोल्तेङ टोलेमाइस सहरता हानिन्हाहि। इन्ता केलाइ खान्धुराइ ओनेगेलाइहेङ सेउपान्हाहि कालाउ ओबालाइ दोफाङ एनि हिनाहि।

⁸ न्हु दिना केलाइ बिदा जेङतेङ कैसरिया सहरता लोन्हाहि, कालाउ प्रचारक फिलिपको साअ्ता हानिन्हाहि कालाउ केलाइ इम्बालाइ दोफा हिनाहि। वा चाहि यरुसेलेम सहरता साल्का चात्यागेलाइ न्हिमि मध्ये एमि हिघाहि, जाइहेङ के सिका बेबालाइको सेवा पालिको भाअ्सिङ साल्का हिघाहि।

⁹ वाको द्‍यामि बिहु माजेङका चामिन्दिगेलाइ हिघाहि, कालाउ इम्बालाइ आगमबानि पाका बरदान निङका हिघाहि।

¹⁰ इन्ता आले दिना थेकापा हितेङ न्हुसो, एमि आगाबास मिङ हिका परमेस्वरको बक्ता यहुदिया जिल्लासो लोहि।

¹¹ वा केलाइकोता लोतेङ पावलको पेति ह्रेतेङ ताइको खुर खोकोइ जिङहि, कालाउ दोअ्हि, पबित्तरो आत्मा एसा दोअ्खे, इदोइ पेति जाइको हि वासेहेङ एसापा यरुसेलेमता यहुदिगेलाइ धेवावा। कालाउ इम्बालाइ वासेहेङ गैर-यहुदि द्‍याङगेलाइकोता सुमप्यावा।

¹² केलाइ झाराङ इदोइ काथागेलाइ हिङन्हाहि, ओदोङ भाअ्सिङ केलाइ कालाउ इन्ताको द्‍याङगेलाइ मिलितेङ पावलहेङ यरुसेलेम मान्हे दोअ्तेङ बिन्ति पान्हाहि।

¹³ कालाउ पावल दोअ्हि, “नेलाइ हाइ पालि एसापा खारतेङ काङको मनहेङ तुपापिसुखेना? हाइपालिपानु का यरुसेलेमता जिङन्हालि खिनिङ माको, कालाउ प्रभु येसुको भाअ्सिङ सिलि तियार हिघा।”

¹⁴ पावलहेङ रोकिलि मादोअ्नाङ “प्रभुको इच्छा पुरा जेनाको” दोअ्तेङ केलाइ सिकापा हिनाहि।

¹⁵ कालाउ आले दिना न्हुसो केलाइ तियार जेङन्हाहि, कालाउ यरुसेलेम भारि हानिन्हाहि।

¹⁶ केलाइ दोफा कैसरिया सहरको आधिमि चात्यागेलाइ बुङ हिघाहि। कालाउ इम्बालाइ केलाइहेङ साइप्रस टापुको एमि द्‍याङ मनासोनको साअ्ता चुम्पुहि। मनासोन येसुको पुर्ना चात्यागेलाइ मध्ये एमि हिघाहि। कालाउ केलाइ वाको साअ्ता हिलि गोइका हिघाहि।

पावल यरुसेलेम थुकाहि

¹⁷ जेलाउ केलाइ यरुसेलेम सहरता लोन्हाहि, कालाउ इन्ताको खान्धुराइ ओनेगेलाइ केलाइहेङ खुसिसोङ स्‍वागत पाहि।

¹⁸ न्हु दिना पावल केलाइ दोफा याकुबकोता हानिहि, कालाउ इन्ता झाराङ मन्डलिको आगुवागेलाइ जोम्तेङ हिघाहि।

¹⁹ पावल झाराङहेङ सेउपाहि, कालाउ परमेस्वर गैर-यहुदिगेलाइको माझाता वाको सेवाकाइसो पाका कामगेलाइ इम्बालाइहेङ गोताङ सारिपा दोअ्पिहि।

²⁰ जेलाउ आगुवागेलाइ इदोइ काथागेलाइ हिङहि, इम्बालाइ परमेस्वरको बाखानाइ पाहि। कालाउ न्हुसो इम्बालाइ पावलहेङ दोअ्हि, “ओइ ओने नाअ् गिखेना, यहुदिगेलाइको माझाता खाङधुरि पाकालाइ हाजारौ हि, कालाउ इम्बालाइ मोसाको व्यवस्थाहेङ खाङधुरि योग्य जेङतेङ आग्या केम्खे।

²¹ कालाउ इङको यहुदि खान्धुराइगेलाइ नाङको बारेता हाइ दोङ काथा हिङका हि, कि नाअ् गैर-यहुदिगेलाइको माझाता हिका यहुदिगेलाइहेङ मोसाको व्यवस्थाहेङ लाअ्लि कालाउ इम्बालाइको जामालाइको खाताना मापालि कालाउ यहुदि मुन्धुम माकेम्लि दोअ्का काथा धिरपाका हिना रे।

²² एला हाइ पालि गोइका हि? नाअ् इता लोका हिना दोअ्तेङ यहुदि खान्धुराइगेलाइ निसित थाहा ग्यावा।

²³ ओदोङ भाअ्सिङ जेदोङ केलाइ दोअ्न्हाखे, इङकोङ पासु। द्‍यामि बाचा पाकालाइ केलाइ दोफा हि, इम्बालाइ परमेस्वर दोफा पाका बाचा पुरा पालि गोइखे।

²⁴ इम्बालाइहेङ चुम्पुतेङ नाअ् बुङ इम्बालाइकोता हाने कालाउ नेलाइ दोअ्फाङ ताइमि बुङ चोखाइसु, कालाउ एबालाइहेङ गोइका खार्चा नाअ् पि, कालाउकि एबालाइ पुरिङ मुन्डाइयाको। एसापा नाअ् व्यवस्था केम्का तिङतेङ नाङको बिसोइता हिङका हिदोइ बुङ काथा सत्ये मान्थु दोअ्तेङ झाराङ ग्यावा।

²⁵ कालाउ गैर-यहुदि जाइ खाङधुरि पाका हि, इम्बालाइ मुर्तिगेलाइहेङ चाढाइका भोग कालाउ निर्घा मेतेङ सेअ्का गपुसको बिहा कालाउ हिति माचासु कालाउ कासिबिरिसो दुरे हिलि गोइखे दोअ्का केलाइ निर्नय गितेङ केलाइ या पात्तारा लेखेतेङ पिगिल्का हिनाहि।”

²⁶ न्हु दिना पावल उङको द्‍यामि द्‍याङगेलाइहेङ ताइको दोफाङ चुम्पुतेङ हानिहि, कालाउ इम्बालाइ दोफाङ ताइमिहेङ बुङ चोखाइहि। कालाउ न्हुसो पावल मुन्दिर लिता दुल्हि। कालाउ पुजारिहेङ चोखाइका दिना हेलाउ पुरा जेनाङ दोअ्का इङको सुचना पिहि। कालाउ इम्बालाइ झाराङको भाअ्सिङ भेति चढाइ पियाङ।

पावलहेङ रिम्का

²⁷ जेलाउ न्हि दिना दोलि तोम्का हिघाहि, हेथेते एसिया प्रदेसको यहुदिगेलाइ पावलहेङ मुन्दिरको सालेङता तिङहि। इम्बालाइ गोताङ द्‍याङगेलाइहेङ तोङपाहि कालाउ पावलहेङ रिम्हि।

²⁸ इम्बालाइ एसा दोअ्काताङ मार्फाङ आहुलि तेङहि, “ओइ इस्राएलको द्‍याङगेलाइ, केलाइहेङ साघाइ! या दोङ द्‍याङ हि, जाइ मोसाको व्यवस्था कालाउ केलाइको जातिको कालाउ इदोइ थामेको बिरोधता द्‍याङगेलाइहेङ द्‍यापाहाङ हानितेङ धिरपाखे। इदोइ झोको खिनिङ माको, याते ग्रिकगेलाइहेङ बुङ मुन्दिर लिता चुमातेङ इदोइ पबित्तरो थामेहेङ आसुद्द बानाइका हि।”

²⁹ इम्बालाइ एसा दोअ्हि हाइपालिपानु यहुदिगेलाइ एफिसस सहरको तोरोफिमस दोअ्का एमिहेङ पावल दोफा तिङहि, कालाउ सोचिहि कि वासेहेङ पावल मुन्दिर लिता चुमाका हि।

³⁰ कालाउ यरुसेलेम सहर भरि खलबल मचिहि, द्‍याङगेलाइ गोताङ पाहासो धाअ्तेसाङ लोहि। कालाउ ओबालाइ पावलहेङ रिम्तेङ मुन्दिरसो बाहार थेचाराइपातेङ ओल्लापाहि। कालाउ एन्सालाउ दोङ मुन्दिरको फिनुगेलाइ गि:पिहि।

³¹ जेलाउ द्‍याङगेलाइ पावलहेङ सेअ्लि तरखर पादोङघाखे, कालाउ यरुसेलेम सहरको हेन्जा जोसो द्‍याङगेलाइ जोग्ग्रेका बानाल हि, दोअ्का बानाल रोमि सेनापतिकोता थुकाहि।

³² कालाउ रोमि सेनापति ओदोङ घुरि इङको थामेता आधे सिपालाइ कालाउ कप्तानगेलाइ चुम्पुतेङ थुकाहि। द्‍याङगेलाइ जेरगेलाइको रोमि सेनापति कालाउ सिपालाइहेङ लोका तिङहि, कालाउ इम्बालाइ पावलहेङ दानाइलि लाअ्हि।

³³ कालाउ रोमि सेनापति पावलको भेरपा हानितेङ रिम्हि, कालाउ न्हेनोङ झिन्झिरिहोइ वासेहेङ धेउलि दोअ्तेङ हुकुम पाहि। कालाउ सेनापति हिअ्हि, “इदोइ द्‍याङ हासु कालाउ वा हाइ गल्ति पाका हि?”

³⁴ कालाउ इङको जेरगेलाइ मध्ये आधिमि ए खाल्को काथा कालाउ आधिमि भेनेङ खालको काथा दोअ्तेङ ह्रिकाइहि, कालाउ सेनापति इङको जोग्रेकानाङ घाटाना हाइ हि वाला थाहा निङलि मानिङनाङ पावलहेङ ब्यारेकता चुम्पुलि दोअ्तेङ आग्या पिहि।

³⁵ जेलाउ पावल पाइरोता थुकाहि, कालाउ द्‍याङगेलाइको जेरको हिन्साहोइ सिपालाइ वासेहेङ तोल्हेतेङ चुम्पुहि।

³⁶ हाइपालिपानु द्‍याङगेलाइको जेर वासेहेङ सेअ्सु, दोअ्तेङ ह्रिकाइकाताङ लेसारा पिताइका हिघाहि।

जेरहेङ पावलको सम्बोधन

³⁷ सिपालाइ पावलहेङ ब्यारेक लिता चुम्पुलि खाङलाउ पावल ग्रिक भासाता रोमि सेनापतिहेङ दोअ्हि, नेउ आनुमति निङनु का हाइ दोङ दोअ्लि चाहिखा। वा दोअ्हि, “हाइ नाअ् ग्रिक भाअ्सा धुइखेना?”

³⁸ हाइ नाअ् मिस्रो सारभिसो माको रो, जाइ एनाङ खिनिङ रोमि सारकारको बिरोधता बिद्रोह मच्चि पातेङ द्‍या हाजार बिद्रोहिगेलाइहेङ एकोन्हा चुम्पुका हिघाखेना?

³⁹ पावल दोअ्हि, “का ते किलिकिया प्रदेसको टार्सस नगरको एमि यहुदि द्‍याङ हिघा, म्हुइका-म्हुइका सहरको नागरिक माको। बिन्ति हि कि कासेहेङ इदोइ द्‍याङगेलाइ दोफा काथा पालि पि।”

⁴⁰ जेलाउ रोमि सेनापति पावलहेङ आग्या पिहि, कालाउ पाइरोता जाअ्तेङ द्‍याङगेलाइहेङ सिकापा हिलि खुरहोइ इसारा पाहि। कालाउ द्‍याङगेलाइहेङ सान्त जेङतेङ न्हुसो, पावल इम्बालाइहेङ हिब्रु भासाता एसापा दोअ्हि: