साल्न्हाका चात्या 20 - Dhimal NT

पावल म्यासिडोनिया सहरता कालाउ ग्रिसता

¹ जेलाउ हुल्दुङगागेलाइ थामिन्हातेङ, पावल चात्यागेलाइहेङ काइहि। कालाउ इम्बालाइहेङ हाउसाइ पाहि, कालाउ इम्बालाइसो बिदा ह्रुतेङ म्यासिडोनिया प्रदेसता हानिहि।

² इन्ताको मौउजागेलाइता हानिलाउ इम्बालाइहेङ हेन्जा हाउसाइ पातेङ वा ग्रिस प्रदेसता हानिहि।

³ वा इन्ता सुम माइना थेकापा हि, कालाउ समुन्द्र पाहासो सिरिया प्रदेसता हानिलि बिचार पाका हिघाखे, कालाउ आधे यहुदि आगुवागेलाइ वासेहेङ दामाता सेअ्लि रेसिदोङघाहि दोअ्का पावल थाहा गितेङ वा समुन्द्रको दामा मापासिङ वा म्यासिडोनिया प्रदेस पातेङ सिरिया प्रदेस हानिलि निर्नय पाहि।

⁴ इदोइ पाक पाकाता बेरिया सहरता हिका पुरुसको चान सोपातोरोस, थेसलोनिकि सहरसो आरिस्ताखर्स कालाउ सिकन्दस, डर्बि सहरसो गायस, कालाउ लुस्तारा सहरसो तिमोथि कालाउ एसिया प्रदेससो तुखिकस कालाउ तोरोफिमस केलाइको दोफाङ हिघाहि।

⁵ इम्बालाइ केलाइ खान्तेङ लाङ हानिहि कालाउ केलाइहेङ तरोआस सहरता ह्रुम्तेङ हिघाहि।

⁶ कालाउ केलाइ न्हेमि चाहि फिलिप्पि सहरको मिलिङको दामा पाहासो हानिन्हाहि। कालाउ आखिमिरि तोलेको पार्बा न्हुसो फिलिप्पि सहरसो समुन्द्रको दामा पातेङ हानिन्हाहि कालाउ ना दिना न्हुसो इम्बालाइहेङ तरोआस सहरता निङन्हाहि, कालाउ केलाइ न्हि दिना थेकापा इन्ताङ दोङ हिनाहि।

युटिकसहेङ सिन्चाल पाका

⁷ आथारको लाङ दिना केलाइ झाराङ तोले पोङलि ए दोफाङ जोम्का हिघान्हाहि, कालाउ पावल न्हु दिना हानिलि मन पानाङ पावल इम्बालाइ दोफा आधा न्हिसिन्ता थेकापा काथा पातेङ हि।

⁸ केलाइ जोम्का ह्रुताको कोठाता हेन्जा गेसागेलाइ जोल्तेङ हिघाहि।

⁹ युटिकस मिङको एमि धाना वाजान झ्यालता योम्तेङ हिघाहि, पावल हेन्जा बेर थेकापा काथा पालाउ उङको वाजान हेन्जा निन्धाता परिहि कालाउ निन्धा धुलाइतेङ वा सुम तालासो भोनोइता फेन्हाहि, जेलाउ द्‍याङगेलाइ वासेहेङ ल्होपालि हानिहि कालाउ वा सिलि दोका हिघाखे।

¹⁰ कालाउ पावल लेता खुअ्तेङ लोहि, कालाउ वासेहेङ खोम्हि, कालाउ पावल आरु द्‍याङगेलाइहेङ दोअ्हि, “सुरता मापासु, वा सिन्हुकाङ हि।”

¹¹ कालाउ पावल आरोङ ह्रुताको तालाता हानिहि कालाउ झाराङ दोफा मिलितेङ तोले पोङतेङ चाहि। कालाउ पावल इम्बालाइ दोफा माझेम्पा भरि काथा पाहि कालाउ न्हुसो बिदा ह्रुतेङ हानिहि।

¹² द्‍याङगेलाइ उङको वाजानहेङ वाको साअ्ता पिपुहि, कालाउ वासेङ सिन्हुका तिङतेङ झाराङ हेन्जा लेङचाहि।

तरोआससो मिलेटस थेकापा

¹³ तरोआससो पावल बाहेक केलाइ झाराङ जाहाजता धोल्तेङ आस्सोस नगरता हानिन्हाहि। पावल चाहि आस्सोस नगर थेकापा तेतेङ हानिका इच्छा हिनाङ वा ताइमिहेङ आस्सोस नगरता खिनिङ नाउता धोल्लि ब्यबस्था पाका हिघाहि।

¹⁴ न्हुसो पावलहेङ केलाइ आस्सोस नगरता भेतिन्हाहि। कालाउ वा केलाइ दोफा जाहाजता लोहि। कालाउ केलाइ झाराङ मितिलेने नगरता हानिन्हाहि।

¹⁵ कालाउ इन्तासो केलाइ जाहाजसो दोङ हानिन्हाहि कालाउ भेनेङ दिना खिओस नगरता थुकान्हाहि, निकोर्सि केलाइ सामोस नगरता थुकान्हाहि, कालाउ इन्तासो न्हु दिना केलाइ मिलेटस सहरता थुकान्हाहि।

¹⁶ पावल एसिया प्रदेसता आरु सोमोइ बितिपालि माचाहिनाङ वा एफिसस सहरता मादुल्का निर्नय पाहि। हाइपालिपानु वा जेङलि दोअ्नु पेन्तिकोस पार्बाको दिना यरुसेलेम सहरता थुकालि हातार पाका हिघाखे।

एफिससको एल्डरगेलाइ दोफा बिदाइ

¹⁷ जेलाउ केलाइ मिलेटस सहरता थुकान्हाहि, पावल एफिसस सहरको मन्डलिको आगुवागेलाइहेङ काइलि दिङगिल्हि।

¹⁸ जेलाउ एल्डरगेलाइ लोहि, पावल इम्बालाइहेङ दोअ्हि, का एसिया प्रदेसता लाङ चोति लोका दिनासोङ नानिको दिना थेकापा का नेलाइको माझाता हिदोइ किसिमहोइ सोमोइ बितिपाघा इङको नेलाइहेङ थाहा दोङ हि।

¹⁹ कालाउ यहुदिगेलाइ काङको बिरोधता हेन्जा सद्यन्तरगेलाइ पाहि, कालाउ बुङ कस्ट सहितेङ का मोनोइ जेङजेङ मिति ह्यापातेङ प्रभुको सेवा पाघा।

²⁰ कालाउ नेलाइ गिसुखेना, कि नेलाइको भाअ्सिङ भलाइ जेङका काथा नेलाइ झाराङको आगाता घोसाना पाकासो कालाउ साअ् साअ्ता दुल्तेङ सिक्स्या पिलिसो का पासा मासारिघा।

²¹ का झाराङ यहुदिगेलाइहेङ कालाउ ग्रिकगेलाइहेङ पाप पालि लाअ्तेङ परमेस्वर भारि घुरिसु, कालाउ केलाइको प्रभु येसुता खाङधुरि पासु दोअ्का काथाको प्राचार पाका हिघा।

²² कालाउ एला का पबित्तरो आत्माको आग्या केम्तेङ यरुसेलेम सहर हानिदोङखा, इन्ता कासेहेङ हाइ जेनाङ का हाइ दोङ मागियाङका।

²³ का इदोइ झोको गिखा, कि गोताङ सहरता कैद कालाउ कस्ट का ह्रुता ल्वाङ दोअ्का पबित्तरो आत्मा कासेहेङ साक्सि पिखे।

²⁴ कालाउ का ताइको जिबनहेङ हिदोइ बुङ मोलको कालाउ ताइको भाअ्सिङ पिलि माथानिखा, इदोइ झोको खिनिङ चाहिखा, कि परमेस्वरको आनुग्रहको सुसमाचारको साक्सि पिलि काङको धाअ्का प्रभु येसुसो मिलिका काङको सेवाकाइ का पुरा पालि द्वाको।

²⁵ कालाउ एला का गिखा, कि नेलाइ झाराङको माझाता का परमेस्वरको सासनको प्राचार पाकाताङ लोका हिघा, एला नेलाइ कासेहेङ आरोङ हेलाउ बुङ मातिङस्वाना।

²⁶ ओदोङ भाअ्सिङ नानिको दिना का नेलाइहेङ साक्सि पितेङ दोअ्दोङखा, कि जेसापा नेलाइ मध्ये हासु बुङ येसुहेङ खाङधुरि मापासिङ सिहि पानु इङको काङको गोल्ति माको।

²⁷ हाइपालिपानु का दोङ नेलाइहेङ गोताङ काथागेलाइ दोअ्का हिघा जेदोङ परमेस्वर चाहिखे, कि नेलाइ गिसु। का नेलाइसो हाइ दोङ काथा म्होका मान्थुघा।

²⁸ नेलाइ ताइको कालाउ ताइको गोताङ हुलको भाअ्सिङ चङख हिसु, पबित्तरो आत्मा नेलाइहेङ मन्डलिको आगुवा बानाइकानाङ हि। वा ताइकोङ हितिहोइ चोल्का परमेस्वरको मन्डलिहेङ नेलाइ सामाराइसु।

²⁹ हाइपालिपानु कासेहेङ थाहा हि, कि का हानिलि दोतेङ न्हुसो धातुवा सिक्स्यकगेलाइ नेलाइको माझाता ल्वावा कालाउ खान्धुराइगेलाइहेङ बार्का हान्ति पावा। कालाउ इम्बालाइको भेडागेलाइहेङ सेअ्का थिलि गोइका स्याइलेगेलाइ भाइका जेनावा।

³⁰ इता थेकापा कि नेलाइको ताइकोङ खान्धुराइ समुहसो धाताइका सिक्स्या पिका द्‍याङगेलाइ ल्वावा, कालाउ इम्बालाइ चात्यागेलाइहेङ मारेम्का दामाता चुम्पावा।

³¹ ओदोङ भाअ्सिङ इदोइ सम्झितेङ चङखे हिसु, कि का सुम बासार थेकापा झेम्पाङ लिपाङ मिति होपातेङ गोताङ द्‍याङगेलाइहेङ चेतान पितेङ हिघा।

³² एला का नेलाइहेङ परमेस्वरता कालाउ वाको आनुग्रहको बचनता सुम्पिप्याङका, जाइ नेलाइहेङ खाङधुरिता बल्लियाका बानाइयावा, कालाउ जाइहेङ परमेस्वर पबित्तरो बानाइका हि, इम्बालाइ झाराङहेङ वा प्रतिग्या पाका आन्सार उत्तराधिकारि बानाइयाङ।

³³ का हिदोइ बुङ द्‍याङको सोना, चान्दि माकुनु लोखोन धाबागेलाइ लोभ मापाघा।

³⁴ नेलाइ ताइमिङ गिसुखेना कि का ताइमिङ काम पातेङ कासेहेङ कालाउ काङको भायागेलाइको खाचो पुरा पाघा।

³⁵ का गोताङ कामगेलाइता नेलाइहेङ उधाहरन पिका हिघा, कि इम्बालाइ बुङ एसापा दोङ थाङका मेहेनत पातेङ कोमजोर द्‍याङगेलाइहेङ साघाइलि गोइखे। प्रभु येसुको बचन फोम पासु, “कि हेसा वा ताइमिहेङ दोअ्का हि, ह्रुलि खान्तेङ भरु पिलि दोङ धन्य हि।”

³⁶ जेलाउ पावल इङको काथागेलाइ दोअ्लि दोअ्तेङ, वा तिरु थोतेङ कालाउ झाराङ दोफा मिलितेङ प्रार्थाना पाहि।

³⁷ इम्बालाइ झाराङ खार्हि कालाउ पावलहेङ खोमतेङ चुमाइ चाहि।

³⁸ इम्बालाइ आरोङ वासेहेङ हेलाउ बुङ मातिङस्वाना दोअ्तेङ पावल दोअ्का काथाता इम्बालाइ हेन्जाङ सोक पाहि। कालाउ इम्बालाइ वासेहेङ जाहाजता सिरपुहि।