साल्न्हाका चात्या 2 - Dhimal NT

पेन्तिकोसको दिनाता पबित्तरो आत्मा लोका

¹ जेलाउ यहुदिगेलाइको पेन्तिकोस पार्बाको दिना लोहि, खान्धुराइगेलाइ झाराङ ए दोफाङ जोम्का हिघाहि।

² कालाउ आकाससो आचानक बार्का दुम भेरमा भाइका एनोङ गाला लोहि, कालाउ इम्बालाइ योम्तेङ हिका गोताङ साअ् गालाहोइ भरिहि।

³ कालाउ इम्बालाइको आगाता मेको झिल्का भाइका देखाल जेङहि, जाइको बनावट देतोङ भाइका हिघाहि कालाउ इङको झिल्का खेङन्हातेङ भाग-भाग जेङतेङ इम्बालाइ झाराङ ह्रुता हानितेङ हि।

⁴ कालाउ इम्बालाइ झाराङ पबित्तरो आत्माहोइ पोङघाहि, कालाउ पबित्तरो आत्मा इम्बालाइहेङ पिका बरदान आन्सार इम्बालाइ भनेङ-भेनेङ भासागेलाइता नुइ धुइलि तेङहि।

⁵ ओदोङ सोमोइता परमेस्वरहेङ थिका हेन्जा जोसो यहुदिगेलाइ सुमिङको गोताङ सारभिसो पार्बा मानिलि यरुसेलेम सहरता जोम्का हिघाहि।

⁶ कालाउ इङको भेर्माको भाइका गाला हिङतेङ जेर जोम्हि। इम्बालाइ भारभुसाइहि, हाइपालिपानु इन्ता जोम्का झाराङ ता-ताइको भासाता धुइतेङ हिका इम्बालाइ हिङहि।

⁷ इम्बालाइ झाराङ भारभुसाइहि, कालाउ आचाम्मा मानितेङ एमिसो भेनेङहेङ दोअ्हि, “इदोइ द्‍याङगेलाइ जाइ केलाइको भाअ्सा धुइतेङ हि इम्बालाइ गालिलिगेलाइ दोङ हि।

⁸ इदोइ हाइ जेङतेङ हि केलाइ झाराङ इम्बालाइको धुइका काथागेलाइ केलाइकोङ ताइकोङ मात्तुरु भासाता धुइका हिङन्हाखे?

⁹ केलाइ मध्ये आधिमि इता पारथि इलाकासो, मादि इलाकासो कालाउ एलामि इलाकासो, कालाउ मेसोपोटामिया इलाकासो, यहुदिया जिल्लासो, कापाडोकिया प्रदेससो, पोनट्स राइजि कालाउ एसिया प्रदेससो हिनाहि।

¹⁰ कालाउ केलाइ मध्ये आधिमि फ्रिगिया जिल्ला, प्यामफिलिया जिल्ला, मिस्रो सारभि कालाउ कुरेनि सहरको भेरपा परिका लिबिया सारभिको हिनाहि। कालाउ हेथेते केलाइ मध्ये रोम सहरसो दोङ लोका परयटकगेलाइ, यहुदि कालाउ यहुदि धर्म ग्रहन पाका गैर-यहुदि न्हेमि दोङ हिनाहि,

¹¹ क्रेट टापुको द्‍याङगेलाइ कालाउ आरेबिया सारभिको द्‍याङगेलाइ बुङ हिनाहि, कालाउ केलाइ ता-ताइकोङ भासाता परमेस्वरको माहान कामगेलाइको चार्चा इम्बालाइ पाका हिङतेङ हिनाहि।”

¹² इम्बालाइ झाराङ भारभुसाइहि कालाउ आवाइतुहि एमिसो-भेनेङहेङ इसिका दोअ्लि तेङहि, “याको माने हाइ वाला?”

¹³ कालाउ आरुगेलाइहेङ खुजालाइतेङ दोअ्हि, “इम्बालाइ नावा दाखरस आम्तेङ म्हाका हि।”

जेरहेङ पतरुसको उपदेस

¹⁴ कालाउ पतरुस तेए झना साल्का चात्यागेलाइ दोफा जाअ्तेङ बार्का गालाहोइ इम्बालाइहेङ दोअ्हि, ओइ यहुदिया जिल्लाको द्‍याङगेलाइ कालाउ ओइ यरुसेलेम सहरको द्‍याङगेलाइ नेलाइहेङ इदोइ काथा थाहा जेनाको, कालाउ काङको काथा हिङसु।

¹⁵ नेलाइ सोचेका भाइपा इम्बालाइ म्हाका मान्थु, हाइपालिपानु एला ह्रिमाको क्वाहा खिनिङ बजेका हि।

¹⁶ केलाइ दोफा जेदोङ काथा जेङहि ओदोङ काथा परमेस्वरको बक्ता योएल धर्मसास्तरता दोअ्का हिघाहि:

¹⁷ न्हुसोको दिनागेलाइता इसिका जेनाङ दोअ्तेङ परमेस्वर दोअ्हि, का झाराङ द्‍याङगेलाइहेङ काङको आत्मा प्याङका, कालाउ नेलाइको चानगेलाइ, कालाउ नेलाइको चामिन्दिगेलाइ आगमबानि दोअ्तावा, कालाउ नेलाइको धाना वाजानगेलाइ दर्सन तिनावा, कालाउ नेलाइको वाराङगेलाइ सोप्पन तिनावा।

¹⁸ इङको दिनागेलाइता, का ताइको बान्धाइतिगेलाइ न्हेमि दोङ ह्रुता वाबाल कालाउ बेबालता काङको आत्मा हुप्याङका, कालाउ इम्बालाइ आगमबानि धुइयावा।

¹⁹ आकास ह्रुता का आचाम्‍मका काम कालाउ लेता प्रिथिबिता चिन्हागेलाइ तिङपाङका। इन्ता हिति, मे, कालाउ धुवाको बादेल तिङपाङका।

²⁰ प्रभुको दिना लोलि खान्तेङ लाम्फा सान्हे कितिकितिका कालाउ तालि हिति भाइपा इ:का जेनावा। इङको दिना माहान कालाउ महिमामय दिना जेनावा।

²¹ कालाउ जाइ-जाइ प्रभुको मिङ ल्होकावा वा मुक्ति निनावा।

²² ओइ इस्राएलको द्‍याङगेलाइ, इदोइ काथा हिङपिसु, जेलाउ नासरत देराको येसु नेलाइ दोफा हिघाहि, परमेस्वर नेलाइहेङ येसु वाकोसो दोङ दिङगिल्का हि दोअ्तेङ प्रमानित पाहि, जाइसो परमेस्वर सरबुङसाइका कामगेलाइ, कालाउ भारभुसाइका कामगेलाइ पाहि। नेलाइहेङ थाहा दोङ हि, कि इदोइ सत्ये हि।

²³ परमेस्वर ताइको निस्चित योजाना कालाउ लाम्फाको ग्यान आन्सार वासेहेङ रिम्तेङ नेलाइहेङ सुम्पिका हिघाहि। कालाउ नेलाइ वासेहेङ दुस्ट द्‍याङगेलाइको साघाइ ह्रुतेङ नेलाइ येसुहेङ क्रुस्टता तोइतेङ सेअ्सुन्हा।

²⁴ जेलाउ येसु सिहि, वा हेन्जा दुख निङचाहि कालाउ परमेस्वर वासेहेङ आरोङ सिन्हु पाहि। परमेस्वरले वासेहेङ सितेङ हिलि मापिहि, हाइपालिपानु वा सिकाको आधिनता हिलि आसम्भब हिघाहि।

²⁵ हाइपालिपानु राजा दाउद येसुको बिसोइता इसिका दोअ्का हिघाखे: दिनाङ का प्रभुहेङ ताइको आगाता तिङघाखा, हाइपालिपानु वा का दोफा हि, ओदोङ भाअ्सिङ कासेहेङ चोट पापाका द्‍याङगेलाइ दोफा का माथियाङका।

²⁶ ओदोङ भाअ्सिङ काङको ह्रदय आनन्दहोइ भरिका हि, कालाउ का खुसिहोइ नाङको बाखानाइ पाङका काङको जिउ बुङ आसता जियाइयावा।

²⁷ हाइपालिपानु नाअ् कासेहेङ सितेङ हिलि माप्याना, ना ते ताइको पबित्तरो जनको जिउ तोम्ता आइलि प्याना।

²⁸ नाअ् कासेहेङ जिबनको दामागेलाइ दोअ्पिना, नाअ् कासेहेङ ताइको लोकासो आनन्दहोइ भरिना।

²⁹ “ओइ खान्धुराइ ओनेगेलाइ, का नेलाइहेङ जातिङको दोअ्लि द्वाङका केलाइको पुर्खा राजा दाउदको बिसोइता वा सिहि कालाउ वासेहेङ लिहि वाको तोम एला थेकापा बुङ हिदोङ हि।

³⁰ राजा दाउद एमि परमेस्वरको बक्ता हिघाहि, कालाउ परमेस्वर वाको दोफा केरा चाका काथा वा गिघाखे। परमेस्वर राजा दाउदहेङ बाचा पिका हिघाखे, कि वाकोङ हारागुटियासो एमिहेङ सिङहासनता राजाको कोनिङ योम्पाङ।

³¹ परमेस्वर आगमबक्ता हाइपाङ दोअ्का गितेङ राजा दाउद ख्रिस्टको सिन्चालकाको बिसोइता दोअ्हि, कि ख्रिस्ट ना ते पातालता हिन्दिहि, ना ते वाको जिउ दोङ तोम्ता आइहि।

³² इदोङ येसुहेङ परमेस्वर सिन्हु पाहि। इङको काथाको भाअ्सिङ केलाइ झाराङ साक्सि हिनाहि।

³³ ओदोङ भाअ्सिङ वा स्वर्गता परमेस्वरको दाम्पाहा खुरता तोलिन्हाहि। कालाउ परमेस्वर वासेहेङ पबित्तरो आत्मा कालाउ आबासो जेदोङ वा प्याङका दोअ्तेङ बाचा पाका हिघाखे। कालाउ वा इङको पबित्तरो आत्मा हुपिहि, जेदोङ नेलाइ एला तिङस्वाना कालाउ हिङस्वाना।

³⁴ हाइपालिपानु राजा दाउद स्वर्गता मान्हेहि कालाउ वा ताइमिङ दोअ्खे: परमेस्वर काङको प्रभुहेङ दोअ्हि: काङको दाम्पाहा खुर भारि योम।

³⁵ जेलाउ थेकापा का नाङको सतुरुगेलाहेङ नाङको आधिनता माअ्ता ताङका।

³⁶ ओदोङ भाअ्सिङ इस्राएलको झाराङ द्‍याङगेलाइ इङको काथा गिलि गोइखे: परमेस्वर येसुहेङ प्रभु कालाउ ख्रिस्ट बानाइहि। वा ओदोङ द्‍याङ हिघाहि जाइहेङ नेलाइ क्रुस्टा तोइसुन्हा।”

³⁷ जेलाउ द्‍याङगेलाइ इङको काथा हिङहि इम्बालाइको ह्रदय मेनाङ आउलिहि। इम्बालाइ पतरुस कालाउ आरु साल्न्हाका चात्यागेलाइहेङ दोअ्हि, ओइ ओनेगेलाइ केलाइ हाइ पालि गोयाङ?

³⁸ पतरुस इम्बालाइहेङ दोअ्हि, पाप पालि लाअ्सु, कालाउ नेलाइ पाप स्यामाको भाअ्सिङ झाराङ येसु ख्रिस्टको मिङता बप्तिस्ता ह्रुसु। कालाउ नेलाइ पबित्तरो आत्माको बरदान निङस्वाना।

³⁹ हाइपालिपानु इदोइ बाचा नेलाइको भाअ्सिङ कालाउ नेलाइको जामाललाइको भाअ्सिङ कालाउ उङको गोताङ द्‍याङको भाअ्सिङ जाइ दुरे हि, कालाउ झाराङ जाइहेङ प्रभु केलाइको परमेस्वर काइखे।

⁴⁰ पतरुस इम्बालाइहेङ आरु हेन्जा काथागेलाइसो साक्सि पिहि, कालाउ एसा दोअ्तेङ आर्ति पिहि, ताइमिहेङ नेलाइ इदोइ दुस्ट पुस्तासो बान्चिपासु।

⁴¹ कालाउ जाइ-जाइ पतरुसको काथा साअ्हि कालाउ इम्बालाइ झाराङ बप्तिस्ता ह्रुहि, कालाउ कोकोङ दिना माकुलाउ बुङ सुम हाजार खान्धुराइगेलाइ ओबालाइको सङख्याता थोपिन्हाहि।

खान्धुराइगेलाइको सङगति

⁴² इम्बालाइ साल्न्हाका चात्यागेलाइको सिक्स्या, सङगति कालाउ तोले पोङखे कालाउ ए दोफाङ चाघाखे-आम्घाखे कालाउ प्रार्थानाता भक्ति दोफाङ दिनाङ सोमोइ पिघाखे।

⁴³ साल्न्हाका चात्यागेलाइ हेन्जाङ भारभुसाइका काम कालाउ चिन्हागेलाइ पाहि। कालाउ झाराङ द्‍याङगेलाइ हेन्जा थिहि।

⁴⁴ खाङधुरि पाकालाइ झाराङ ए दोफाङ हिघाहि, कालाउ इम्बालाइ ताइको दोफा हिका गोताङ आनेमाने ता-ताइमिता बाखाराइघाखे।

⁴⁵ इम्बालाइ ताइको सम्पति कालाउ आनेमाने पितेङ जाइ-जाइहेङ जेदोङ आमेनेगेलाइको गोइका हिघाहि ओदोङ आमेने झाराङहेङ बाखाराइ पिघाखे।

⁴⁶ इम्बालाइ एनोङ दोङ मन जेङतेङ परमेस्वरको मुन्दिरता ए दोफाङ जोम्घाखे, कालाउ साअ्-साअ्ता तोले पोङघाखे कालाउ इम्बालाइ खुसि कालाउ सुद्द हृदयसो मिलितेङ चाघाखे,

⁴⁷ कालाउ परमेस्वरको बाखानाइ पाकाताङ, कालाउ झाराङ द्‍याङगेलाइसो आसिरबाद निङतेङ हिघाहि। मुक्ति निङकालाइ प्रभु ओबालाइको सङख्याता दिनाङ-दिनाङ हेन्जा थोपिपिघाखे।