साल्न्हाका चात्या 19 - Dhimal NT

पावल एफिसस सहरता

¹ आपुल्लोस कोरिन्थि सहरता हिका बेला, पावल प्रदेसगेलाइको दामा पातेङ एफिसस सहरता थुकाहि। इन्ता पावल आधिमि चात्यागेलाइहेङ दुसुहि।

² पावल ओबालाइहेङ हिअ्हि, “हाइ नेलाइ खाङधुरि पालाउ पबित्तरो आत्मा निङसुन्हा?” ओबालाइ दोअ्हि, “केलाइ पबित्तरो आत्मा हि दोअ्का हेलाउ बुङ हिङका मान्थुन्हाहि।”

³ कालाउ पावल इम्बालाइहेङ हिअ्हि, “कालाउ नेलाइ हिसिका खालको बप्तिस्ता ह्रुसुना?” ओबालाइ दोअ्हि, “केलाइ युहान्नाको पिका बप्तिस्ता ह्रुनाहि।”

⁴ कालाउ पावल दोअ्हि, “युहान्‍ना पाप पालि लाअ्तेङ कालाउ परमेस्वर भारि घुरिका द्‍याङगेलाइहेङ बप्तिस्ता पिघाखे। कालाउ युहान्‍ना इस्राएलको द्‍याङगेलाइहेङ दोअ्हि वाको ह्रुता खाङधुरि पासु जाइ का न्हुसो लोदोङखे, वा दोङ येसु हि।”

⁵ जेलाउ ओबालाइ इङको काथा हिङहि, कालाउ ओबालाइ प्रभु येसुको मिङता बप्तिस्ता ह्रुहि।

⁶ कालाउ न्हुसो पावल ओबालाइ ह्रुता खुर ताअ्हि कालाउ पबित्तरो आत्मा ओबालाइकोता लोहि, कालाउ ओबालाइ भनेङ-भेनेङ भासागेलाइता धुइलि तेङहि, कालाउ आगमबानिगेलाइ पालि तेङहि।

⁷ ओबालाइ माकुलाउ बुङ तेन्हे झना वाबालाइ हिघाहि।

⁸ कालाउ पावल यहुदिगेलाइको चाउघारा साअ्ता हानितेङ सुम माइना थेकापा परमेस्वरको सासनको बिसोइता ओबालाइ दोफा साहासहोइ काथा पोसु घाहि कालाउ द्‍याङगेलाइहेङ बुझाइतेङ हिघाहि।

⁹ कालाउ हेथेते राङतेङ खाङधुरि पालि माकिहि, कालाउ ओबालाइ प्रभुको दामाको बिसोइता हेन्जाङ आखेका निन्दनिय काथागेलाइ द्‍याङगेलाइको आगाता पाहि। पावल इम्बालाइसो खेङन्हाहि, कालाउ चात्यागेलाइहेङ दोफाङ चुम्तेङ हानिहि, कालाउ गोताङ दिनाङ-दिनाङ टुरान्नसको पाठसालाता धिरपालि तेङहि।

¹⁰ पावल इसिका काम न्हे बासार थेकापा पाहि, इता थेकापा कि, एसिया प्रदेसता हिकालाइ, यहुदि कालाउ ग्रिकगेलाइ न्हेमिङ दोङ प्रभुको बचन हिङहि।

¹¹ परमेस्वर पावल पाहासो भारबुसाइका कामगेलाइ पाहि।

¹² इता थेकापा कि द्‍याङगेलाइ पावलको जिउता रुमाल कालाउ ताउलि साइपातेङ कालाउ मिसा लोकालाइकोता चुम्पुघाखे कालाउ इम्बालाइको मिसा लोतेङ मासाधिकालाइ एल्घाहि, कालाउ भुत-आत्मागेलाइ बुङ इम्बालाइसो बाहार ओल्लेघाखे।

¹³ कालाउ आधिमि यहुदि द्‍याङगेलाइ थामे-थामेता घुराइगिल्तेङ भुत-आत्मा धेल्का द्‍याङगेलाइ प्रभु येसुको मिङ ह्रुतेङ एसापा दोअ्हि, “पावलको प्राचार पाका येसुको मिङता का नेलाइहेङ बाहार ओल्लेका आग्या पिखा।”

¹⁴ इन्ता एमि स्केवा मिङ हिका यहुदि मुलि पुजारिको न्हिमि चानगेलाइ इसिका काम पाघाखे।

¹⁵ कालाउ ए दिना भुत-आत्मा इम्बालाइहेङ जोबाफ पिहि, “का येसुहेङ नाल्खा, कालाउ पावलहेङ नाल्खा, कालाउ नेलाइ चाहि हासु?”

¹⁶ कालाउ भुत-आत्मा धेल्का द्‍याङ इम्बालाइ ह्रुता तोङतेङ झामिरिहि, कालाउ इम्बालाइ झाराङहेङ काबुता पातेङ फेअ्हि। कालाउ इम्बालाइ इङको साअ्सो नाङघाङ कालाउ आधामारातेङ खाअ्हि।

¹⁷ जेलाउ इदोइ काथा एफिसस सहरता हिका यहुदि द्‍याङगेलाइ कालाउ ग्रिकगेलाइहेङ थाहा जेङहि, कालाउ इम्बालाइ झाराङ थिहि, कालाउ प्रभु येसुको मिङको आदार पाहि।

¹⁸ खाङधुरि पाकालाइ हेन्जा द्‍याङगेलाइ लोहि कालाउ इम्बालाइ लोतेङ ताइको मारेम्का कामगेलाइ झाराङको आगाता सुइकार पाहि।

¹⁹ ओबालाइ मध्येसो आधिमि टुनामुना पाका ता-ताइको कितापगेलाइ चुमातेङ झाराङको आगाता ओअ्पाहि। ओअ्पाका इङको कितापगेलाइको दाम झान्डाइ न्हे कुरि ते हाजार चान्दिको थुरिगेलाइ हिघाहि।

²⁰ एसापा प्रभुको बचन सरबुङसाइका रुपता फाइलाइकाताङ कालाउ बाढेकाताङ हानिहि।

²¹ कालाउ न्हुसो पावल म्यासिडोनिया प्रदेस कालाउ आखैया प्रदेसको खान्धुराइगेलाइहेङ भेतितेङ यरुसेलेम सहर हानिका योजाना बानाइहि। पावल दोअ्हि, “यरुसेलेम थुकातेङ का रोम सहर बुङ हानिलि गोयाङ।”

²² कालाउ न्हुसो पावल ताइको साघाइका सानाइति तिमोथि कालाउ इरासतसहेङ म्यासिडोनिया प्रदेसता ताइमि हानिलि खान्तेङ लाम्फाङ दिङगिल्हि, कालाउ ताइमि चाहि आले सोमोइ थेकापा एसिया प्रदेसको एफिस सहरता हि।

एफिसस सहरता दङगा

²³ कालाउ ओदोङ सोमोइता एफिसस सहरता प्रभुको दामाको बिसोइता बार्का हलचल मच्चिहि।

²⁴ हाइपालिपानु डेमेतिरियस मिङ हिका एमि द्‍याङ हिघाहि, वा ग्रिक आर्तेमिस देबिको चान्दिको म्हुइ-म्हुइ मुन्दिरगेलाइको आक्रितिगेलाइ बानाइघाखे, कालाउ इसिका काम पाहासो वा ताइको काम पालि ताअ्का द्‍याङगेलाइहेङ हेन्जा ताका पिघाखे।

²⁵ डेमेतिरियस ताइको कारिगदगेलाइहेङ कालाउ इम्बालाइ भाइपाङ काम पाका गोताङ द्‍याङगेलाइहेङ जोम्पातेङ दोअ्हि, “ओइ ओनेगेलाइ, नेलाइहेङ थाहा दोङ हि, कि इदोङ कामहोइ केलाइ निकोङ ताका कामाइन्हाखे।

²⁶ कालाउ नेलाइ तिङतेङ कालाउ खाङतेङ हिसुना, कि एफिसस सहरता खिनिङ माको कालाउ एसिया प्रदेसको गोताङ थामेगेलाइता पावल द्‍याङको बानाइका दिरगेलाइ चाहि हाइ दोङ माको दोअ्तेङ हेन्जा द्‍याङगेलाइहेङ सम्झाइहि कालाउ तोङपाहि बुङ।

²⁷ एसाते केलाइको कामको हान्ति खिनिङ माको, कालाउ माहान देबि आर्तेमिसको मुन्दिरको बुङ हेला जेनाङ, कालाउ एसिया प्रदेस कालाउ सुमिङको गोताङ थामेगेलाइको द्‍याङगेलाइ मानितेङ लोका माहान देबि आर्तेमिसको पुजा बन्द जेनावा।”

²⁸ इन्सिका काथा हिङतेङ गोताङ कारिगदगेलाइ चेरहोइ चेरचुङ जेङतेङ ह्रिकाइतेङ दोअ्लि तेङहि, “एफिसिगेलाइको आर्तेमिस देबि माहान हि।”

²⁹ कालाउ सहरता जोग्ग्रेकागेलाइ मच्चिहि कालाउ इम्बालाइ ए जुट जेङतेङ म्यासिडोनिया प्रदेससो लोका पावलको सानाइति गायस कालाउ आरिस्ताखर्सहेङ रिम्तेङ रङगसाला लिता लेथाराइतेङ चुम्पुहि।

³⁰ पावल बुङ रङगसालाता हानितेङ द्‍याङगेलाइ दोफा नुइ धुइलि भोघाखे, कालाउ चात्यागेलाइ वासेहेङ हानिलि मापिहि।

³¹ एसिया प्रदेसको आधिमि मुलि द्‍याङगेलाइ पावलको भाया हिघाहि। इम्बालाइ पावलहेङ रङगसालाता हानितेङ ताइको जिबन खात्तारा माअ्ता दोअ्तेङ बिन्ति पातेङ दिङगिल्हि।

³² इङको रङगसाला लिता द्‍याङगेलाइको बार्का जोग्ग्रेका गालागेलाइ मचितेङ हिघाहि। आधिमि एनोङ थरिको काथा दोअ्तेङ ह्रिकाइखे, आधिमि भेनेङ थरिको काथा दोअ्तेङ ह्रिकाइघाखे, गोताङ काथा आवाइ-बावाइका हिघाहि। कालाउ हेन्जा द्‍याङगेलाइहेङते इम्बालाइ हाइ पालि जोम्का हि दोअ्तेङ थाहा दोङ मान्थुघाहि।

³³ जेरको आधे यहुदि द्‍याङगेलाइ जेरसो आलेकज्यानडरहेङ आगा साराइतेङ जाअ्पाहि। आलेकज्यानडर ताइको खुरको इसाराहोइ झाराङहेङ सान्त पातेङ द्‍याङगेलाइको आगाता बान्चिलिको भाअ्सिङ हाइ दोङ दोअ्लि भोहि।

³⁴ कालाउ जेलाउ द्‍याङगेलाइ थाहा गिहि, कि आलेकज्यानडर बुङ खान्धुराइ भाइपाङ मुर्ति पुजा मापाका एमि यहुदि हिघाहि। इम्बालाइ एनोङ दोङ काथाता एन्साङ न्हे घान्टा थेकापा ह्रिकाइतेङ हि, “एफिसिगेलाइको आर्तेमिस देबि माहान हि।”

³⁵ कालाउ न्हुसो सहरको हाकिम इम्बालाइहेङ सिकापा पातेङ दोअ्हि, “एफिसिगेलाइ! गोताङ सुमिङता द्‍याङगेलाइ गिखे, कि एफिसस सहरको द्‍याङगेलाइ चाहि माहान देबि आर्तेमिस मुन्दिर पाहासो रक्स्या पाखे, कालाउ वाको मुर्ति आकाससो हुल्का दोङ।

³⁶ नेलाइ गिसुखेना इदोइ काथा इन्कार पालि मादोअ्का हि, ओदोङ भाअ्सिङ नेलाइ सिकापा हिसु कालाउ बिचार मापासिङ हिदोइ बुङ काम मापासु।

³⁷ हाइपालिपानु नेलाइ रिम्तेङ चुमाका द्‍याङगेलाइ ना ते केलाइको मुन्दिरहेङ खुअ्का हि, ना ते इम्बालाइ केलाइको देबिको आपामान पाका हि।

³⁸ ओदोङ भाअ्सिङ जेसापा डेमेतिरियस कालाउ वाको दोफा हिका कारिगरगेलाइको हासुको बुङ बिरोधता हाइ दोङ काथा हिनु नेलाइ आदालत हानिलि दोस्वाना, कालाउ इम्बालाइको उजिरिको पाका न्याय पाका न्याधिसगेलाइ बुङ हिदोङ हि। आदालता हानितेङ इम्बालाइ एमिसो भेनेङको बिरोधता मुद्दा पालि द्वावा।

³⁹ कालाउ इदोइ बाहेक आरु दोङ बिसोइ ल्होपालि चाहिसुखेना पानु इङको को फाइसाला इथानिय सभाता जेनावा।

⁴⁰ हाइपालिपानु का थिका हिघा कि सासकगेलाइ इदोइ गोताङ हुल्दुङगाको बारेता हिनावा कालाउ रोमि सारकारको बिरोधता बिद्रोहो पालि कोसिस पातेङ हिनाहि। हाइपालिपानु केलाइ इदोइ हुल्दुङगाको बारेता हाइ दोङ बयान पालि माद्वाङ। हाइपालिपानु याको हिदोइ बुङ कारन मान्थु।”

⁴¹ इङको झोको दोअ्तेङ वा सभाहेङ थेङहि।