साल्न्हाका चात्या 17 - Dhimal NT

थेसलोनिकिता

¹ पावल कालाउ सिलास ओम्फिपोनिस कालाउ ओपोल्लोनिया नगरको दामा पातेङ थेसलोनिकि सहरता थुकालि लोहि। इन्ता यहुदिगेलाइको एनोङ चाउघारा साअ् हिघाहि।

² पावल ताइको मुन्धुम आन्सार चाउघारा साअ् लिता हानिहि। कालाउ सुम आथार थेकापा परमेस्वरको पबित्तरो दिनाता धर्मसास्तरसो ओबालाइ दोफा बहस पाहि।

³ पावल इम्बालाइहेङ एसापा प्रमानित पातेङ बुझि पाहि, ख्रिस्ट दुख भोगिलि कालाउ सिकासो सिन्हुलि गोयाङ, “कालाउ का दोङ प्राचार पाका येसुको दोङ ओदोङ मुक्ति पिका ख्रिस्ट दोङ हि।”

⁴ इम्बालाइ मध्ये हेथे झना यहुदिगेलाइ वाको काथाता खाङधुरि पातेङ पावल कालाउ सिलास दोफा लागिहि। कालाउ बार्का सङख्याता परमेस्वरको भक्ति पाका ग्रिकगेलाइ कालाउ हेन्जा मुख्य बेबालाइ बुङ खाङधुरि पाहि।

⁵ कालाउ आरु यहुदिगेलाइ डाहाहोइ भोरितेङ, बाजारको फाताहा द्‍याङगेलाइहेङ जोम्पातेङ इम्बालाइ सहरता जोग्रेलि तेङहि। कालाउ इम्बालाइ जेसनको साअ्ता हामाला पातेङ पावल कालाउ सिलासहेङ द्‍याङगेलाइको आगाता चुमालि खाङघाखे।

⁶ पावल कालाउ सिलासहेङ निङलि मादोनाङ, इम्बालाइ जेसन कालाउ आधिमि खान्धुराइ ओनेगेलाइहेङ सहरको सासकगेलाइकोता एसा दोअ्तेङ चेरकाताङ थेअ्चाराइकाताङ चुमाहि, गोताङ थामेगेलाइता समस्या चारचाराइ पाका इदोइ द्‍याङगेलाइ इता बुङ लोका हि।

⁷ जेसन ताइको साअ्ता इम्बालाइहेङ स्‍वागत पाहि, कालाउ इम्बालाइ झाराङ येसु दोअ्का एमि भेनेङ राजा हि, दोअ्तेङ रोमि साम्रातको हुकुमको बिरोध काम पाखे।

⁸ इदोइ काथा हिङतेङ द्‍याङगेलाइ कालाउ सहरको हाकिमगेलाइ दिगदार जेङहि।

⁹ ओबालाइ जेसन कालाउ वाको दोफा हिका बाकि द्‍याङगेलाइ दोफा धरौटि ताअ्तेङ इम्बागेलाइहेङ लाअ्पिहि।

बेरियाता

¹⁰ बेल्हाका बितिकानाङ खान्धुराइ ओनेगेलाइ पावल कालाउ सिलासहेङ बिरिया नगरता दिङगिल्हि। इन्ता थुकातेङ इम्बालाइ यहुदिगेलाइको चाउघारा साअ्ता हानिहि।

¹¹ इताको यहुदिगेलाइ थेसलोनिकि सहरको द्‍याङगेलाइ खान्तेङ हेन्जा आसल हिघाहि। हाइपालिपानु इम्बालाइ मेनाङ चासो पातेङ पावल कालाउ सिलासको दोअ्का बचन हिङतेङ हिघाहि। कालाउ इङको काथागेलाइ ठिक हि कि मान्थु दोअ्तेङ दिनाङ-दिनाङ धर्मसास्तर पढेतेङ जाचिघाखे।

¹² ओदोङ भाअ्सिङ हेन्जाङ यहुदिगेलाइ प्रभुहेङ खाङधुरि पाहि, कालाउ हेन्जा मुख्य ग्रिक बेबालाइ कालाउ वाबालाइ बुङ प्रभुहेङ खाङधुरि पाहि।

¹³ कालाउ जेलाउ थेसलोनिकि सहरता हिका यहुदिगेलाइ बिरिया नगरता बुङ पावल परमेस्वरको बचन प्राचार पादोङखे दोअ्का काथा हिङहि। कालाउ इम्बालाइ इन्ता बुङ द्‍याङगेलाइहेङ तोङपालि कालाउ उसकाइलि लोहि।

¹⁴ ओदोङ भाअ्सिङ एन्सालाउ दोङ खान्धुराइ ओनेलाइ पावलहेङ समुन्द्रको काम्भे भारि दिङगिल्हि। कालाउ सिलास कालाउ तिमोथि चाहि बिरिया नगरताङ हि।

¹⁵ पावलहेङ सिरपुका खान्धुराइ ओनेगेलाइ वा दोफा एथेन्स सहर थेकापा हानिहि। कालाउ इन्ता थुकातेङ पावल ताइमिहेङ सिरपुका खान्धुराइ ओनेगेलाइहेङ सिलास कालाउ तिमोथिहेङ हेथे दोअ्खेना धेमा लोसु दोअ्तेङ बानाल पिगिल्हि।

एथेन्स सहरता पावल

¹⁶ जेलाउ पावल एथेन्स सहरता तिमोथि कालाउ सिलासहेङ ह्रुम्तेङ हिघाहि, इङको सहरता मुर्तिगेलाइहोइ भरिका तिङतेङ वाको मन हेन्जा तुहि।

¹⁷ ओदोङ भाअ्सिङ पावल यहुदिगेलाइको चाउघारा साअ्ता हानितेङ यहुदिगेलाइ कालाउ परमेस्वरको भक्ति पाका ग्रिक द्‍याङगेलाइ दोफा बाजारता लोका हानेका द्‍याङगेलाइ दोफा दिनाङ गालाबाजि पाघाखे।

¹⁸ इन्ता आधिमि इपिक्युरिया कालाउ स्तोइक दोअ्का सिक्स्यकगेलाइ मध्ये बुङ हेथेते दोफा निक्कोङ बिचार बिमर्स जेङहि। इम्बालाइ मध्येसो हेथेते दोअ्हि, “या काथा बाचक हाइ दोअ्लि भोतेङ हि?” कालाउ आरुगेलाइ दोअ्हि, “वा भेनेङ दिरगेलाइको बिसोइता प्राचार पाका भाइका तिङखे।” हाइपालिपानु पावल येसुको कालाउ वाको सिकासो सिन्हुकाको सुसमाचार पाघाखे।

¹⁹ कालाउ ओबालाइ पावलहेङ आरियापागस दोअ्न्हाका माहासभाता चुम्पुहि कालाउ दोअ्हि, “नाअ् प्राचार पाका या नावा सिक्स्या हाइ हि, हाइ केलाइ गिलि द्वाङ?

²⁰ हाइ पानु नाअ् आचाम्माको काथागेलाइ हिङपादोङखेना, ओदोङ भाअ्सिङ केलाइ इदोइ नावा सिक्स्याको माने बुझिलि खाङनाखे।”

²¹ एथेन्स सहरको गोताङ द्‍याङगेलाइ कालाउ इन्ता हिका बिदेसिगेलाइ नावा-नावा काथागेलाइ दोअ्लि माकुनु हिङलि बाहेक ताइको सोमोइ आरु हिदोइ बुङ काथाता माबितिपाघाखे।

²² कालाउ न्हुसो पावल आरियापागस दोअ्न्हाका माहासभाको आगाता जाअ्हि कालाउ दोअ्हि, एथेन्स सहरको द्‍याङगेलाइ, का नेलाइहेङ गोताङ काथाता हेन्जा धर्मि तिङखा।

²³ हाइपालिपानु का नेलाइको सहरता घुराइगिल्तेङ हानिलाउ नेलाइको पुजिका आमेनेगेलाइ बुङ तिङघा, का इन्ता एनोङ बेदि बुङ तिङघा जेता लेखेका हिघाहि, “आग्यात दिरगेलाइको भाअ्सिङ” ओदोङ भाअसिङ जाइहेङ नेलाइ मानाल्सिङ आराधाना पासुखेना, का वाकोङ बारेता दोअ्तेङ हिघा।

²⁴ वा उङकोङ परमेस्वर हि, जाइ सारा सुमिङ बानाइहि, कालाउ सुमिङको गोताङ आनेमाने बानाइहि। वा स्वर्ग कालाउ प्रिथिबिको प्रभु हिकानाङ वा द्‍याङगेलाइको बानाइका मुन्दिरता माहिखे।

²⁵ वासेहेङ गोइका गोताङ आमेनेगेलाइ वाको दोफाङ हि। भरु वाआङ दोङ जिबन, हुसि कालाउ गोताङ आनेमाने द्‍याङगेलाइहेङ पिखे।

²⁶ परमेस्वर एमि खिनिङ द्‍याङसो गोताङ जातिको द्‍याङगेलाइहेङ बानाइहि, कालाउ परमेस्वर इम्बालाइहेङ सुमिङको गोताङ थामेता हिलि पिहि। इम्बालाइ बान्चिलि गोइका सोमोइ कालाउ हिलि गोइका थामे परमेस्वर लाम्फासोङ तोकि पिका हि।

²⁷ परमेस्वर इसिका पाहि कालाउकि द्‍याङगेलाइ वासेहेङ भोअ्काको कालाउ सायद इम्बालाइ तितेङ वासेहेङ निनाको, कालाउ बुङ परमेस्वर केलाइ झाराङसो दुरे मान्थु।

²⁸ जेसाङ कि हासु बुङ लेखेका हि: “वा केलाइ दोफा कालाउकि केलाइ बान्चिलि, हिगिल्लि तेगिल्लि, कालाउ केलाइ हासु दोअ्तेङ गिलि द्वाको।” जेसाङ नेलाइको कबिगेलाइ बुङ दोअ्का हि, “केलाइ निसित दोङ वाकोङ सान्तानगेलाइ हिनाहि।”

²⁹ हाइपालिपानु केलाइ परमेस्वरको सान्तान जेङनाङ परमेस्वर सोना, चान्दि कालाउ उन्ठुइ भाइका हि दोअ्तेङ केलाइ सोचिलि माएल, एबालाइते द्‍याङगेलाइको कला कालाउ कल्पना पातेङ बानाइका मुर्ति खिनिङ हि।

³⁰ ओदोङ भाअ्सिङ लाम्फा द्‍याङगेलाइ मागिसिङ पाका कामहेङ परमेस्वर वास्ता मापापिहि। कालाउ एला परमेस्वर गोताङ थामेता हिका झाराङ द्‍याङगेलाइहेङ पाप पालि लाअ्लि आग्या पिका हि।

³¹ हाइपालिपानु परमेस्वर सुमिङको सारा द्‍याङगेलाइहेङ ठिक दोफा न्याय पाका दिना तोकि पिका हि। याको भाअ्सिङ वा एमि द्‍याङहेङ चुनिका हि। जाइसो सुमिङको न्याय जेनाङ। वासेहेङ सिकासो सिन्हु पातेङ परमेस्वर गोताङ द्‍याङगेलाइहेङ इङको को प्रमान पिका हि।

³² जेलाउ इम्बालाइ सिकासो सिन्हुहि दोअ्का बारेता हिङहि, कालाउ हेथेते खुजालाइहि। कालाउ आरुगेलाइ चाहि दोअ्हि, “केलाइ आरोङ या काथाको बिसोइता दोअ्लाउ नेलाइ इम्बालाइको काथा हिङस्वाना।”

³³ कालाउ न्हुसो पावल इम्बालाइको माझासो हानिहि।

³⁴ कालाउ हेथेते द्‍याङगेलाइ पावल दोफा मिलिहि कालाउ प्रभुता खाङधुरि पाहि। इम्बालाइ मध्ये आरियोपेगस दोअ्का माहासभाता डियनुसियस दोअ्का सदस्य कालाउ एमि डामारिस मिङ हिका बेबाल बुङ हिघाहि, कालाउ इम्बालाइ बाहेक आधिमि द्‍याङगेलाइ बुङ प्रभुता खाङधुरि पाहि।