साल्न्हाका चात्या 15 - Dhimal NT

यरुसेलेमको सभा

¹ कालाउ आधिमि यहुदि खान्धुराइगेलाइ यहुदिया जिल्लासो एन्टिओक सहरता लोहि, कालाउ इम्बालाइ खाङधुराइगेलाइहेङ सिक्स्या पिलि तेङहि, जेसापा नेलाइ मोसाको व्यवस्था आन्सार खाताना माजेङनुते नेलाइको मुक्ति माजेनाङ।

² जेलाउ पावल कालाउ बार्नाबास इम्बालाइ दोफा मामिलिसुका कालाउ गालाबाजि जेङतेङ न्हुसो, इन्ताको खान्धुराइ ओनेगेलाइ पावल कालाउ बार्नाबास कालाउ आधिमि द्‍याङगेलाइहेङ इदोइ प्रस्नको फैसाला पालिको भाअ्सिङ साल्न्हाका चात्यागेलाइ कालाउ मन्डलिको आगुवागेलाइकोता यरुसेलेम सहर हानिलि नियुक्ति पाहि।

³ खान्धुराइगेलाइको सदस्यगेलाइ इम्बालाइहेङ पाक पालाउ दामा खार्चाको भाअ्सिङ साघाइ पिगिल्तेङ दिङगिल्हि। इम्बालाइ फोनिके प्रदेस कालाउ सामारिया जिल्ला पातेङ हानिहि। एसापा हानिकाताङ पालाउ गैर-यहुदिगेलाइ सुसमाचार हिङतेङ हेसा ख्रिस्टता खाङधुरि जेङका हि दोअ्का काथा इम्बालाइहेङ हिङपाहि, इसिका बानालहोइ इन्ताको खान्धुराइ ओनेगेलाइ मेनाङ ओसारापाङ आनान्द जेङहि।

⁴ जेलाउ पावल कालाउ बार्नाबास यरुसेलेम सहरता थुकालि लोहि, कालाउ इम्बालाइहेङ मन्डलिको, आगुवागेलाइ कालाउ साल्न्हाका चात्यागेलाइ स्‍वागत पाहि। कालाउ पावल कालाउ बार्नाबास इन्ता जोम्का झाराङहेङ परमेस्वर इम्बालाइ पाहासो पाका गोताङ कामगेलाइको बारेता दोअ्हि।

⁵ कालाउ फारिसि दलसो हेथेते खाङधुरि पाकालाइ जाअ्तेङ दोअ्हि, “गैर-यहुदिगेलाइको खाताना हिलि कालाउ इम्बालाइहेङ मोसाको व्यवस्था केम्लि आग्या पिलि जरुरि हि।”

⁶ कालाउ इङको बिसोइता बिचार पालि साल्न्हाका चात्यागेलाइ कालाउ मन्डलिको आगुवागेलाइ जोम्हि।

⁷ कालाउ निकोङ बेलोम्पा थेकापा बहस जेङतेङ न्हुसो पतरुस जाअ्तेङ इम्बालाइहेङ दोअ्हि, “ओइ खान्धुराइ ओनेगेलाइ नेलाइहेङ थाहा दोङ हि, कि हेन्जा सोमोइ लाम्फा हेसा परमेस्वर काङकोसो गैर-यहुदिगेलाइ सुसमाचारको बचन हिङतेङ खाङधुरि पाको दोअ्तेङ नेलाइको माझासो कासेहेङ साल्हि।

⁸ गोताङ द्‍याङको मन गिका परमेस्वर ओबालाइहेङ बुङ केलाइहेङ भाइपाङ पबित्तरो आत्मा पिहि। कालाउ वा तिङपाहि, कि वा ओबालाइहेङ ताइकोङ द्‍याङ रुपता सुइकार पाका हि।

⁹ कालाउ खाङधुरिसो ओबालाइको मन सुद्द पातेङ परमेस्वर केलाइको कालाउ ओबालाइको माझाता हिदोइ बुङ खाल्को भेदभाव माअ्ताहि।

¹⁰ एला एन्सा जेङनु नेलाइ हाइ पालि गैर-यहुदि खान्धुराइगेलाइ ह्रुता केलाइको यहुदि व्यवस्था कालाउ नियम केम्लि आप्थ्यारो ल्हिका चुम्पुतेङ परमेस्वरहेङ गिलि कोसिस पान्हाखे? जेदोङ ना ते केलाइ ना ते केलाइको पुर्खागेलाइ दोङ फुलि दोअ्हि।

¹¹ एसा पालि ठिक माको केलाइ खाङधुरि पान्हाखे, कि ओबालाइ भाइपाङ केलाइ बुङ प्रभु येसुको आनुग्रहसो मुक्ति निङका हिनाहि, मोसाको व्यवस्था आग्या केम्नाङ माको।”

¹² कालाउ सभाता झाराङ सिकापा हि, कालाउ पावल कालाउ बार्नाबासको काथागेलाइ ध्यान पितेङ हिङहि, कि परमेस्वर पावल कालाउ बार्नाबाससो गैर-यहुदिगेलाइता हिसिका-हिसिका बार्का चिन्हागेलाइ कालाउ भारभुसाइका कामगेलाइ तिङपाहि।

¹³ कालाउ इम्बालाइ काथा दोअ्लि दोअ्तेङ, याकुब ल्होतेङ दोअ्लि तेङहि, ओइ खान्धुराइ ओनेगेलाइ काङको काथा हिङसु,

¹⁴ सिमोन पतरुस ब्याख्या पाहि, कि परमेस्वर लाम्फा दोङ गैर-यहुदिगेलाइहेङ इसिका कृपा पाहि, कि आधे द्‍याङगेलाइहेङ ताइको प्रजा जेङलि साल्हि।

¹⁵ कालाउ यहुदिगेलाइ दोफाको या काथा परमेस्वरको बक्तागेलाइ हेन्जा लाम्फा धर्मसास्तरता लेखेका काथा दोफा सहमति हि। इदोइहोइ दोअ्खे:

¹⁶ कालाउ इदोइ काथा न्हुसो का घुरितेङ ल्वाङका, कालाउ राजा दाउदको राइजि आरोङ बानाइ याङका, जेदोङ वाको सतुरुसो हान्ति पाका हि, का इङकोहेङ आरोङ बानाइ याङका, कालाउ वासेहेङ सरबुङसाइका बानाइ याङका।

¹⁷ कालाउकि आरु गोताङ द्‍याङगेलाइ प्रभुहेङ भोलि द्वाको, कालाउ गोताङ गैर-यहुदिगेलाइ बुङ, जाइहेङ का काङको प्रजा जेङलि काइका हिघा।

¹⁸ इदोइ काथागेलाइ प्रभु लाम्फासोङ गिका हिघाहि, जेलाउसो सुमिङ सिरजाइन्हाहि।

¹⁹ ओदोङ भाअ्सिङ केलाइ गैर-यहुदिगेलाइहेङ यहुदि मुन्धुम केम्लि कर मापाइने, जाइ परमेस्वर भारि घुरितेङ लोका हि।

²⁰ भरु केलाइ ओबालाइहेङ इदोइ काथागेलाइ दोअ्काताङ एनोङ चिट्ठि लेखेतेङ पिगिल्लि गोयाङ: मुर्तिगेलाइहेङ चढाइका आमेने माचासु, कासिबिरिसो दुरे हिलि, निर्घा मेतेङ सेका गपुस कालाउ हिति माआम्लि।

²¹ हाइपालिपानु लाम्फाको पुस्ता सोङ दोङ गोताङ सहरता या मोसाको व्यवस्थाको प्राचार जेङतेङ हि, हाइ पानु इदोइ गोताङ यहुदिगेलाइको चाउघारा साअ्ता गोताङ परमेस्वरको पबित्तरो दिनाता पढेदोङखे।

सभाको पाका निर्नय

²² कालाउ छाल्न्हाका चात्यागेलाइ, मन्डलिको आगुवागेलाइ कालाउ यरुसेलेमको गोताङ मन्डलि मिलितेङ ताइको माझासो निर्नय आधिमि द्‍याङगेलाइहेङ चुनितेङ पावल कालाउ बार्नाबास दोफा एन्तिओक सहरको मन्डलिता दिङगिल्लि उचित थानिहि। कालाउ खान्धुराइ ओनेगेलाइ मध्ये आगुवागेलाइ, यहुदा दोन्हाका बार्नाबास कालाउ सिलासहेङ चुनिहि जाइहेङ चाहि खान्धुराइगेलाइ हेन्जा आदार पाघाखे।

²³ कालाउ मन्डलि ओबालाइ दोफा पात्तारा पिगिल्हि: “एन्तिओक सहरता, सिरिया प्रदेस कालाउ किलिकिया प्रदेसगेलाइता हिका गैर-यहुदि खान्धुराइ ओनेगेलाइहेङ, छाल्न्हाका चात्यागेलाइ कालाउ मन्डलिको आगुवागेलाइहेङ सेउपाखा हि।

²⁴ केलाइ हिङका हिनाहि, कि केलाइको माझाता हेथेते आधेमि केलाइको आदेस माकोसिङ नेलाइको मन आउलि पापितेङ नेलाइहेङ इस्तुङ काथाहोइ दुख पिका हि।

²⁵ ओदोङ भाअ्सिङ केलाइ झाराङ एमत जेङतेङ आधिमि द्‍याङगेलाइहेङ चुनिका निर्नय पानाहि। कालाउ इम्बालाइहेङ केलाइको आनाउ ओने पावल कालाउ बार्नाबास दोफा नेलाइकोता दिङगिल्लि केलाइहेङ उचित लागिहि।

²⁶ इदोइ द्‍याङगेलाइ इन्सिका दोङ हि, जाइ केलाइको प्रभु येसु ख्रिस्टको खातिर ताइको जिबन जोखिमता सुलाइका हि।

²⁷ ओदोङ भाअ्सिङ केलाइ यहुदा कालाउ सिलासहेङ दिङगिल्का हिन्हाहि। इम्बालाइ ताइमिङ दोङ सहि काथागेलाइ दोअ्तावा।

²⁸ हाइपालिपानु पबित्तरो आत्मा कालाउ केलाइहेङ बुङ या उचित लागिहि, कि या आवस्यक काथागेलाइ बाहेक आरु हेन्जा ल्हिका नेलाइहेङ माअ्फुपाङ।

²⁹ मुर्तिगेलाइहेङ चाढाइका भोग माचासु, हिति माआम्सु, निर्धा मेतेङ सेअ्का गपुसगेलाइको बिहा माचासु, कासिबिरिसो दुरे हिसु। जेसापा नेलाइ इसिका काथागेलाइसो दुरे हिसुन्हा पानु, नेलाइहेङ रेम्फा जेनावा। कालाउ एला केलाइ बिदा ह्रेन्हाखे।”

³⁰ बिदा बारि जेङतेङ इम्बालाइ एन्तिओक सहरता लोहि, कालाउ इन्ता मन्डलिको गोताङ खान्धुराइगेलाइहेङ जोम्पातेङ इङको चिट्ठि पिहि।

³¹ खान्धुराइगेलाइ चिट्ठिता लेखेका आर्तिको काथा पढेतेङ मेनाङ लेङचाहि।

³² यहुदा कालाउ सिलास ताइमिङ बुङ परमेस्वरको बक्तागेलाइ हिघाहि। ओदोङ भाअ्सिङ खान्धुराइ ओनेगेलाइहेङ हेन्जाङ बचनगेलाइसो हाउसाइ पातेङ इम्बालाइहेङ खाङधुरिता बल्लियाका बानाइहि।

³³ यहुदा कालाउ सिलास आले दिना इन्ताङ हितेङ इन्ताको खान्धुराइ ओनेगेलाइ एबालाइहेङ यरुसेलेमको मन्डलिता घुरितेङ हानिलिको भाअ्सिङ सान्तिको आसिरबाद दोफा बिदा पाहि।

³⁴ कालाउ सिलास चाहि इन्ताङ एन्तिओक सहरता हिलि निर्नय पाहि। ओदोङ भाअ्सिङ यहुदा एक्लाङ यरुसेलेम घुरिहि।

³⁵ कालाउ पावल कालाउ बार्नाबास चाहि सिक्स्या पिकाताङ कालाउ येसु प्रभुको बचन प्राचार पाकाताङ आरु हेन्जा द्‍याङगेलाइ दोफा एन्तिओक सहरताङ हि।

पावलको प्राचारको पाक-पाका

³⁶ आले दिना न्हुसो पावल बार्नाबासहेङ दोअ्हि, “लोसु जेदोङ-जेदोङ सहरता प्रभुको बचन केलाइ प्राचार पाका हिघान्हाहि इङको सहरगेलाइता घुरितेङ हानितेङ खान्धुराइ ओनेगेलाइहेङ भेतियाइने कालाउ इम्बालाइ हाइ-हिसिका हि खानाइने।”

³⁷ बार्नाबास मर्कुस दोअ्का युहान्नाहेङ बुङ दोफाङ चुम्पुलि इच्छा फ़पाहि।

³⁸ कालाउ पावल मर्कुसहेङ चुम्पुलि ठिक माकिहि, हाइपालिपानु वा प्यामफिलिया जिल्लासो इम्बालाइहेङ लाअ्तेङ हानिका हिघाहि, कालाउ इम्बालाइ ए दोफाङ काम पाका मान्थुघाहि।

³⁹ पावल कालाउ बार्नाबासको माझाता इङको बिसोइता बार्का मि तुपासुका जेङहि, कालाउ इम्बालाइ लाअ्सुहि। बार्नाबास चाहि मर्कुसहेङ चुम्पुतेङ समुन्द्रको दामा पाहासो साइप्रस टापुता हानिहि।

⁴⁰ कालाउ पावल चाहि सिलासहेङ चुनिहि, कालाउ खान्धुराइ ओनेगेलाइसो परमेस्वरको आनुग्रहता आर्पन पातेङ एन्टिओक सहरसो बिदा जेङहि।

⁴¹ कालाउ इम्बालाइ सिरिया प्रदेस कालाउ किलिकिया प्रदेस पाहासो हानिलाउ इन्ताको मन्डलिको खान्धुराइगेलाइहेङ हाउसाइ पातेङ हानिहि।