साल्न्हाका चात्या 14 - Dhimal NT

आइकोनियमता पावल कालाउ बार्नाबास

¹ आइकोनियम सहरता बुङ पावल कालाउ बार्नाबास जेलाउ बुङ भाइपा यहुदिगेलाइको चाउघारा साअ्ता हानिहि। इम्बालाइ यहुदिगेलाइको चाउघारा साअ्ता एसापा नुइ धुइहि, इन्ता हिका हेन्जा यहुदि कालाउ ग्रिकगेलाइ बुङ ख्रिस्टता खाङधुरि पाहि।

² कालाउ आधेमि ख्रिस्टता खाङधुरि मापाका यहुदिगेलाइ चाहि गैर-यहुदिगेलाइहेङ तोङपातेङ खान्धुराइ ओनेगेलाइको बिरोधता इम्बालाइको मन खाका बानाइ पिहि।

³ प्रभुको भाअ्सिङ साहाससोङ नुइ धुइकाताङ हेन्जा सोमोइ थेकापा पावल कालाउ बार्नाबास आइकोनियम सहरता हिघाहि। प्रभु इम्बालाइसो चिन्हा कालाउ भारभुसाइका कामगेलाइ पापाहि, कालाउ इम्बालाइ प्रमानित पाहि कि या आनुग्रहको बारेता सन्‍देस सत्ये हिघाहि।

⁴ कालाउ सहरको द्‍याङगेलाइता फाटो जेङलि हानिहि, कालाउ आधिमि यहुदिगेलाइको पक्स्य भरि कालाउ हेथेते साल्न्हाका चात्यागेलाइको पक्स्य भारि हानिहि। एसापा दोङ सहरको द्‍याङगेलाइ न्हे दलता खेङन्हाहि।

⁵ गैर-यहुदिगेलाइ कालाउ यहुदिगेलाइ न्हेमि दोङ इम्बालाइको आगुवागेलाइ दोफा मिलितेङ पावल कालाउ बार्नाबासहेङ साताइहि कालाउ उन्ठुइहोइ तोअ्तेङ सेअ्लि कोसिस पाहि।

⁶ जेलाउ पावल कालाउ बार्नाबास इदोइ काथा हिङहि कालाउ इम्बालाइ खाअ्तेङ लुकोनिया इलाकाता परिका लुस्तारा सहर कालाउ डर्बि सहरको भेरपा हानिहि।

⁷ कालाउ इम्बालाइ इन्ता दोङ प्राचार पालि तेङहि।

लुस्तारा कालाउ डर्बिता

⁸ लुस्तारा सहरता खोकोइ चालाइलि मादोका एमि द्‍याङ योम्तेङ हिघाहि, उङको जोलोम सोङ लेङग्रा हिघाहि, कालाउ हेलाउ बुङ तेअ्का मान्थुघाखे।

⁹ पावलको नुइ धुइकाताङ पाका वा हिङदोङघाहि, पावल वासेहेङ सोझाङ खाङहि, कालाउ एलाङका दोअ्का वाको खाङधुरि हि दोअ्का थाहा गिहि।

¹⁰ कालाउ बार्का गालाहोइ ह्रिकाइतेङ दोअ्हि, “नाङको खोकोइको भरता जाअ्!” कालाउ उङको द्‍याङ हाकाधुकु ल्होहि कालाउ तेलि तेङहि।

¹¹ जेलाउ पावलको पाका इदोइ काम द्‍याङगेलाइको जेर तिङहि, कालाउ इम्बालाइ लुकोनिया भासाता तिराराइका गालाहोइ दोअ्हि, “देवगेलाइ द्‍याङको रुपता केलाइकोता खुतेङ लोका हि।”

¹² कालाउ इम्बालाइ बार्नाबासहेङ ग्रिक दिरको मिङ जिउस ताअ्हि, कालाउ पावलहेङ चाहि हरमेस दिरको मिङ ताअ्हि, हाइपालिपानु वा चाहि प्रमुख बक्ता हिघाहि।

¹³ जिउस दिरको मुन्दिर सहरको भेरपा हिघाहि, इङको मुन्दिरको पुजारि ल्हेको माला कालाउ पियागेलाइ सहरको मुख्य फिनुता चुमाहि, इन्ता द्‍याङगेलाइ दोफा मिलितेङ भोग चढाइलि इच्छा पाहि।

¹⁴ कालाउ जेलाउ साल्न्हाका चात्यागेलाइ पावल कालाउ बार्नाबास इदोइ काथा हिङहि, कालाउ इम्बालाइ मेनाङ दुखि जेङहि, कालाउ ताइको लोखोन धाबागेलाइ थेअ्हि, कालाउ द्‍याङगेलाइको माझाता धाअ्काताङ कालाउ ह्रिकाइतेङ दोअ्हि,

¹⁵ “ओइ द्‍याङगेलाइ, नेलाइ हाइ पालि इसिका कामगेलाइ पासुखेना? केलाइ बुङते नेलाइ भाइकाङ दुख-सुख भोगेका द्‍याङगेलाइ खिनिङ हिनाहि, कालाउ केलाइ नेलाइहेङ प्राचार पालि लोन्हाहि कालाउकि नेलाइ इदोइ ब्यर्थको काथागेलाइ लाअ्तेङ सिन्हुका परमेस्वर भारि जेदोङ परमेस्वर स्वर्ग, प्रिथिबि, समुन्द्र कालाउ इङकोता हिका गोताङ आमेने बानाइहि।

¹⁶ हानेका सोमोइगेलाइता परमेस्वर गोताङ जातिगेलाइहेङ ता-ताइकोङ मुन्धुम आन्सार चलिलि पिहि।

¹⁷ कालाउ बुङ परमेस्वर जेलाउ बुङ ताइमिङ पाका आसल काम पाहासो ताइमि हिका प्रमान पिहि। इङको दोअ्का वा नेलाइहेङ आकाससो वाइको झारकिनि कालाउ ठिक सोमोइता उब्जाइ पापिहि, नेलाइहेङ नुगामारि उम जुराइ पापिहि कालाउ नेलाइको मनहेङ आनान्दहोइ पोङघा पापिखे।”

¹⁸ इदोइ काथा दोअ्तेङ इम्बालाइहेङ मुस्किलसो ओबालाइहेङ भोग चढाइलिसो द्‍याङगेलाइहेङ रोकिहि।

¹⁹ जेलाउ आधिमि यहुदिगेलाइ एन्तिओक सहर कालाउ आइकोनियम सहरसो इन्ता लोहि, जेरहेङ मानिपातेङ पावलहेङ उन्ठुइ तोअ्हि, कालाउ वा सिहि वाला दोअ्तेङ सहरसो बाहार घोघाराइतेङ चुम्पुहि।

²⁰ कालाउ चात्यागेलाइ पावलको कोरपाहाङ जोम्हि, कालाउ पावल ल्होहि कालाउ सहर लिता दुल्हि कालाउ न्हु दिना वा बार्नाबास दोफा डर्बि सहरता हानिहि।

सिरियाको एन्तिओक

²¹ पावल कालाउ बार्नाबास डर्बि सहरता सुसमाचार प्राचार पातेङ हेन्जाङ द्‍याङगेलाइ येसुको चात्या जेङहि। कालाउ न्हुसो पावल कालाउ बार्नाबास आरोङ लुस्तारा सहरता हानिहि। कालाउ इम्बालाइ इन्तासो आइकोनियम सहर जेङतेङ पिसिदिया इलाकाको एन्तिओक सहर भारि हानिहि

²² कालाउ गोताङ नगरता जेङका चात्यागेलाइको आत्माहेङ बल्लियाका बानाइकाताङ ओबालाइहेङ खाङधुरिता हितेङ हिलि आर्ति पिहि, कालाउ हेन्जा कस्ट सहितेङ केलाइ परमेस्वरको सासनता दुल्लि गोयाङ दोअ्तेङ ओबालाइहेङ दोअ्हि।

²³ कालाउ पावल कालाउ बार्नाबास गोताङ खान्धुराइगेलाइको समुहसो आगुवागेलाइ नियुक्त पाहि, कालाउ इम्बालाइ उङको मन्डलिको आगुवागेलाइहेङ ताइमि खाङधुरि पाका प्रभु येसुता प्रार्थाना पालि सुम्पिहि।

²⁴ कालाउ न्हुसो पावल कालाउ बार्नाबास पिसिदिया इलाका पाहासो प्यामफिलिया जिल्लाता लोहि।

²⁵ कालाउ इम्बालाइ प्यामफिलिया जिल्लाता जेङका पर्गा सहरता परमेस्वरको बचन प्राचार पाहि, कालाउ न्हुसो आटालिया नगरता हानिहि।

²⁶ कालाउ इन्तासो इम्बालाइ समुन्द्रको दामा पाहासो पाक पातेङ एन्तिओक सहरता घुरिहि, जेतासो इम्बालाइ परमेस्वरको आनुग्रहता जिम्मा पितेङ इङको कामको भाअ्सिङ पिगिल्का हिघाहि, जेदोङ काम इम्बालाइ पुरा पातेङ घुरिहि।

²⁷ जेलाउ इम्बालाइ एन्टिओक सहरता थुकालि लोहि, कालाउ खान्धुराइगेलाइहेङ जोम्पाहि, कालाउ परमेस्वर इम्बालाइ दोफा पाका गोताङ कामगेलाइको बयान पाहि, कालाउ हेसा परमेस्वर गैर-यहुदिगेलाइहेङ येसु ख्रिस्टता खाङधुरि पालि सक्स्यम बानाइहि।

²⁸ पावल कालाउ बार्नाबास चात्यागेलाइ दोफा हेन्जा दिना थेकापा एन्टिओक सहरता हि।