साल्न्हाका चात्या 13 - Dhimal NT

पावलको लाङ प्राचारको पाक-पाका

¹ एन्तिओक सहरको मन्डलिता हेन्जा परमेस्वरको बक्तागेलाइ कालाउ सिक्स्यकगेलाइ हिघाहि, माकुनु बार्नाबास, सिमोन जाइको भनेङ मिङ निगर हिघाहि, कुरेनि सहरको लुकिएस, सारभिको द्‍यातेङ भागको राजा हेरोद दोफा हुर्किका मनेन कालाउ साउल हिघाहि।

² इम्बालाइ प्रभुको आराधाना पातेङ हिका कालाउ बारितेङ हिका बेला पबित्तरो आत्मा दोअ्हि, “काङको सेवा पालिको भाअ्सिङ बार्नाबास कालाउ साउलहेङ खेङसु, जेदोङ कामको भाअ्सिङ का इम्बालाइहेङ काइका हिघा।”

³ कालाउ बारिका को कालाउ प्रार्थाना पातेङ इम्बालाइ ओबालाइ ह्रुता ता-ताइको खुर ताअ्तेङ ओबालाइहेङ परमेस्वरको काम पालिको भाअ्सिङ दिङगिल्हि।

⁴ कालाउ पबित्तरो आत्मासो दिङगिल्कानाङ साउल कालाउ बार्नाबास एन्टिओक सहरसो सिलुकिया सहरता हानेहि कालाउ इन्तासो जाहाजता धोल्तेङ साइप्रस टापुता हानिहि।

⁵ सलामिस देराता थुकालि दोतेङ न्हुसो इम्बालाइ यहुदिगेलाइको चाउघारा साअ्गेलाइता परमेस्वरको बचन प्राचार पाहि। इम्बालाइहेङ साघाइलि मर्कुस दोअ्का युहान्‍ना बुङ इम्बालाइ दोफा हिघाहि।

⁶ कालाउ न्हुसो इम्बालाइ देरा-देरा पाक पाकाताङ गोताङ टापुगेलाइ पाराहि, कालाउ इम्बालाइ पाफोस सहरता थुकाहि। इन्ता थुकातेङ इम्बालाइ एमि यहुदि धातुवा आगमबक्ता बार-येसु दोअ्का एमि जादुगरहेङ दुसुहि।

⁷ उङको जादुगर एनोङ राइजिको हाकिम सर्गियस पौलुस सानाइति हिघाहि। सर्गियस पौलुस बुद्दिमान द्‍याङ हिघाहि। हाकिम साउल कालाउ बार्नाबासहेङ काइतेङ परमेस्वरको बचन हिङलि इच्छा पाहि।

⁸ कालाउ एलुमास जादुगर हाइपालिपानु ग्रिक भासाता वाको मिङको माने इदोइ दोङ, सर्गियस पौलुसहेङ येसु ख्रिस्टको खाङधुरिसो घुरिपालि इम्बालाइको सामाना पाहि।

⁹ कालाउ साउल, जाइहेङ पावल बुङ दोअ्खे, पबित्तरो आत्मा पोङघातेङ एलुमास जादुगरहेङ मिङ सुइ-सुइ पातेङ खाङतेङ दोअ्हि,

¹⁰ “नाअ् साइतानको चान, सारा धार्मिकताको सतरु गोताङ छलि कालाउ दुस्टहोइ पोङघाका! हाइ नाअ् प्रभुको सिधाका दामाहेङ केउपालि मालाताना?

¹¹ एला खाङ, प्रभु नाङको बिरोधता हि, कालाउ नाअ् एला आसा सोमोइ थेकापा सान्हेको फाइसालामका मातिङका जेङतेङ कान्हाँ जेनाना।” कालाउ ओदोङ घुरि कुकुवा कालाउ कितिकितिकाहोइ वासेहेङ थुम्हि, कालाउ हासु बुङ वाको खुर चातेङ थोनावाबे दोअ्तेङ वा इसो उसो साहारा भोअ्लि तेङहि।

¹² कालाउ राइजिको हाकिम इन्सिका जेङका तिङतेङ प्रभु येसु ह्रुता खाङधुरि पाहि, हाइपालिपानु प्रभुको सिक्स्याता वा भाङभाङतेङ हिघाहि।

पिसिदियाको एन्तिओकता

¹³ पावल कालाउ वाको सानाइतिगेलाइ पाफोस सहरसो जाहाज ताङतेङ प्यामफिलिया जिल्लाको पर्गा सहरता थुकाहि, कालाउ मर्कुस दोअ्का युहान्‍ना चाहि पावल कालाउ बार्नाबासहेङ लाअ्तेङ यरुसेलेम भारि घुरिहि।

¹⁴ कालाउ इम्बालाइ पर्गा सहरसो ओल्लेतेङ गलाति जिल्लाता हिका पिसिदिया जिल्लाको भेरपाङ एन्तिओक सहरता लोहि, कालाउ परमेस्वरको पबित्तरो दिनाता यहुदिगेलाइको चाउघारा साअ्ता हानितेङ योम्हि।

¹⁵ कालाउ मोसाको व्यवस्था कालाउ परमेस्वरको बक्ताको किताप पढेलि दोतेङ न्हुसो यहुदिगेलाइको चाउघारा साअ्को सासकगेलाइ ओबालाइकोता एसा दोअ्तेङ दिङगिल्हि, “ओइ ओनेगेलाइ, नेलाइ दोफा द्‍याङगेलाइको भाअ्सिङ आर्तिको बचन हाइ दोङ हिनु दोअ्सु।”

¹⁶ कालाउ पावल इम्बालाइहेङ सिकापा हिपालिको भाअ्सिङ जाअ्तेङ खुरको इसाराहोइ दोअ्हि, ओइ इस्राएल सारभिको द्‍याङगेलाइ कालाउ परमेस्वरसो थिकालाइ गैर-यहुदि द्‍याङगेलाइ हिङसु,

¹⁷ इस्राएल जातिको परमेस्वर केलाइको पुर्खागेलाइहेङ चुनितेङ मिस्रो सारभिता हिलाउ ओबालाइहेङ माहान बानाइहि, कालाउ वाको सरबुङसाइका बलहोइ ओबालाइहेङ इङको सारभिसो ओल्लेपातेङ चुमाहि।

¹⁸ चाका-मान्दा थामेता माकुलाउ बुङ न्हे कुरि बासार थेकापा वा ओबालाइहेङ सामाराइहि। कालाउ बुङ ओबालाइ बाराम्बार वाको आग्या माकेम्हि।

¹⁹ कालाउ परमेस्वर कानान सारभिता न्हि लोङ जातिहेङ नासा पातेङ इम्बालाइको सारभिको खाबारा माकुलाउ बुङ द्‍यासाइ न्हे कुरि ते बासार थेकापा केलाइको पुर्खागेलाइहेङ पिहि।

²⁰ इदोइ काथा न्हुसो सामुएल परमेस्वरको बक्ताको पाला थेकापा परमेस्वर आगुवागेलाइहेङ इस्राएल सारभिको द्‍याङगेलाइहेङ सासन पालि नियुक्त पाहि।

²¹ सामुएल इम्बालाइको आगुवा हिलाउ इम्बालाइ राजाको माग पाहि, कालाउ परमेस्वर बेन्यामिन कुलको किसका चान साउलहेङ राजा बानाइहि। कालाउ साउल न्हे कुरि बासार थेकापा इस्राएल सारभिको द्‍याङगेलाइ ह्रुता राज्य पाहि।

²² कालाउ न्हुसो परमेस्वर साउलहेङ वाको पदसो हताइतेङ दाउदहेङ वाको थामेता राजा बानाइहि। वाको बिसोइता परमेस्वर साक्सि पितेङ दोअ्हि, का यिसैको चान राजा दाउदहेङ काङको हृदयसोङ मन परिका द्‍याङ निङघा, जाइ काङको गोताङ इच्छा पुरा पावा।

²³ परमेस्वर ताइको बाचा आन्सार राजा दाउदको हारागुटियासो दोङ इस्राएलगेलाइको भाअ्सिङ एमि मुक्ति दाता दिङगिल्हि, जाइ येसु दोङ हि।

²⁴ येसु लोलि लाम्फाङ युहान्‍ना प्राचार पाका हिघाहि, कि इस्राएल सारभिको द्‍याङगेलाइ ताइको पापको भाअ्सिङ पास्ताइतेङ परमेस्वर भारि घुरिलि कालाउ बप्तिस्ता ह्रुलि आवस्यक हि।

²⁵ युहान्‍ना ताइको काम दोपालि तोम्लाउ दोअ्हि, “का हासु दोअ्तेङ नेलाइ सोचिसुखेना? का ख्रिस्ट माको। भरु का न्हुसो एमि ल्वाङ, वा इदोइ झोको माहान हि, कि का वाको जुत्ताको तुना बुङ खाइलि थेकापा सोबाइका मान्थुघा।”

²⁶ ओइ खान्धुराइ ओनेगेलाइ, चाहे नेलाइ आब्राहामको हारागुटियाको सान्तान हिसुन्हा, चाहे नेलाइ परमेस्वरहेङ थितेङ गैर-यहुदि द्‍याङगेलाइ दोङ याते हाइ दोङ माजेङसु, परमेस्वर इदोइ मुक्तिको सन्‍देस केलाइकोता पिगिल्का हि।

²⁷ यरुसेलेम सहरको द्‍याङगेलाइ कालाउ इम्बालाइको आगुवागेलाइ येसु ख्रिस्टहेङ नाल्लि मादोहि। कालाउ जेलाउ बुङ परमेस्वरको पबित्तरो दिनाता पढेका परमेस्वरको बक्तागेलाइको बचनगेलाइ इम्बालाइ माबुझिहि। ओदोङ भाअ्सिङ इम्बालाइ येसुहेङ दुसिहि कालाउ एसापा परमेस्वरको बक्तागेलाइको बचन पुरा जेङहि।

²⁸ इम्बालाइ येसुहेङ सेअ्लि हिदोइ बुङ कारन मानिङहि, कालाउ बुङ इम्बालाइ येसुहेङ सेअ्लि गोयाङ दोअ्तेङ हाकिम पिलातस दोफा बिन्ति पाहि।

²⁹ कालाउ येसुको बिसोइता धर्मसास्तरता लेखेका गोताङ काथा इम्बालाइ पुरा पालि दोअ्तेङ इम्बालाइ येसुहेङ क्रुसता काटि ताअ्तेङ सेअ्हि कालाउ न्हुसो क्रुससो लेता खुपातेङ तोम्ता ताअ्हि।

³⁰ कालाउ परमेस्वर वासेहेङ सिकासो सिन्चाल पाहि।

³¹ ताइमि दोफा गालिल जिल्लासो यरुसेलेम सहरता लोका ताइको चात्यागेलाइ दोफा येसु हेन्जा दिना थेकापा देखाल जेङहि, कालाउ वासेहेङ तिङकालाइ एला केलाइको द्‍याङगेलाइको भाअ्सिङ साक्सि हि।

³² परमेस्वर पुर्खागेलाइहेङ पाका इङको बाचाको प्राचार केलाइ नेलाइकोता दोअ्लि लोका हिनाहि।

³³ कि हेसा परमेस्वर येसुहेङ सिकासो सिन्चाल पातेङ इङको काथा केलाइ, इम्बालाइको सान्तानको भाअ्सिङ पुरा पापिहि, जेसाङ भजन सङग्रहता परमेस्वर ख्रिस्टको बारेता दोअ्का हि, नाअ् काङको चान हिना, कालाउ नानिको दिनासोङ का नाङको आबा जेङका हिघा।

³⁴ परमेस्वर हेलाउ बुङ माआइपातेङ सिकासो सिन्चाल पाकाको बिसोइता एसा दोअ्का हि, का नेलाइहेङ राजा दाउद पिका पबित्तरो कालाउ निसित आसिस प्याङका।

³⁵ राजा दाउद भेनेङ भजन सङग्रहता एसा दोअ्का हि, “नाअ् ताइको पबित्तरो जनको जिउहेङ आइलि माप्याना।”

³⁶ हाइपालिपानु राजा दाउद ताइको पुस्ता परमेस्वरको उदेस्य आन्सार सेवा पातेङ सितेङ न्हुसो वाको पुर्खागेलाइ दोफा राजा दाउद लिन्हाहि, कालाउ वाको जिउ आइतेङ हानिहि। ओदोङ भाअ्सिङ केलाइ थाहा ग्याङ कि राजा दाउद ताइको बारेता दोअ्का माको।

³⁷ कालाउ राजा दाउद चाहि येसुको बिसोइता दोअ्हि जाइहेङ परमेस्वर सिकासो सिन्हु पाहि कालाउ वाको जिउ माआइहि।

³⁸ ओदोङ भाअ्सिङ खान्धुराइ ओनेगेलाइ, नेलाइहेङ थाहा जेनाको, कि इदोङ येसुसो पाप स्यामा जेनाङ दोअ्तेङ घोसाना नेलाइहेङ पाका हि।

³⁹ कालाउ खाङधुरि पाकालाइ झाराङ येसु पाहासो दोङ गोताङ काथागेलाइसो निरदुसि थाराइहि, जेदोङ मोसाको व्यवस्थाता पाहासो नेलाइको भाअ्सिङ सम्भब मान्थुघाहि।

⁴⁰ ओदोङ भाअ्सिङ चङख हिसु, माकुनुते परमेस्वरको बक्तागेलाइको कितापता लेखेका इदोइ काथा नेलाइ ह्रुता आइ लागियाङ:

⁴¹ “ओइ मन्दा माताकालाइ, खाङसु कालाउ भारबुसाइसु, कालाउ नासातेङ हानेसु, हाइपालिपानु नेलाइको सोमोइता का एनोङ काम पाङका, इसिका काम जाइको बारेता हासु बुङ, नेलाइहेङ दोअ्लाउ बुङ, नेलाइ हेलाउ बुङ खाङधुरि मापास्वाना।”

एन्टिओक सहरता पावल कालाउ बार्नाबास

⁴² पावल कालाउ बार्नाबास चाउघारा साअ् लाअ्तेङ हानिकाताङ पालाउ द्‍याङगेलाइ आरोङ भेनेङ परमेस्वरको पबित्तरो दिनाता लोतेङ इदोइ काथागेलाइको बिसोइता केलाइहेङ आझाइ हिङपापि दोअ्तेङ सेउपाहि।

⁴³ सभा दोलि दोतेङ हेन्जा यहुदिगेलाइ कालाउ यहुदि धर्म मानिका भक्तगेलाइ पावल कालाउ बार्नाबासहेङ पिताइहि, पावल कालाउ बार्नाबास इम्बालाइ दोफा नुइ धुइकाताङ इम्बालाइहेङ परमेस्वरको आनुग्रहता हितेङ हिसु दोअ्तेङ सेउपाहि।

⁴⁴ भेनेङ परमेस्वरको पबित्तरो दिनाता, सहरको हेन्जा जसो झाराङ द्‍याङगेलाइ परमेस्वरको बचन हिङलि जोम्हि।

⁴⁵ कालाउ जेलाउ यहुदि आगुवागेलाइ इङको द्‍याङको जेरहेङ तिङतेङ मेनाङ डाहाहोइ भरिहि कालाउ पावलको दोअ्का काथाको बिरोध पालि तेङहि।

⁴⁶ पावल कालाउ बार्नाबास साहास पातेङ दोअ्हि, “परमेस्वरको बचन लाम्फा नेलाइहेङ हिङपालि आवस्यक हिघाहि। कालाउ बुङ नेलाइ हिङलि माकिसुन्हा। कालाउ नेलाइ ताइमिहेङ दोङ आनान्त जिबनको भाअ्सिङ योग्यको माठानिसुन्हा, ओदोङ भाअ्सिङ केलाइ एला गैर-यहुदिगेलाइकोता हानाङ।

⁴⁷ हाइपालिपानु प्रभु केलाइहेङ पालि दोअ्तेङ इसिका आग्या पाका हि, नेलाइ सुमिङको गोताङ थामेको द्‍याङगेलाइहेङ मुक्ति दाताको बारेता दोअ्सु, का नेलाइहेङ गैर-यहुदिगेलाइको भाअ्सिङ फाइसालामका बानाइका हिघा। नेलाइ सुमिङको गोताङ थामेको द्‍याङगेलाइकोता हानेसु कालाउ हेसा परमेस्वर नेलाइहेङ बान्चिपालि भोखे इङको काथा इम्बालाइहेङ दोअ्सु।”

⁴⁸ जेलाउ गैर-यहुदिगेलाइ इन्सिका दोअ्का काथा हिङहि, इम्बालाइ लेङचाहि, कालाउ परमेस्वरको बचनको बाखिन पाहि। कालाउ आनान्त जिबनको भाअ्सिङ चुनिकालाइ येसु ख्रिस्ट ह्रुता खाङधुरि पाहि।

⁴⁹ कालाउ प्रभुको बचन गोताङ सारभि भारि चार-चाराइहि।

⁵⁰ कालाउ यहुदि आगुवागेलाइ पावल कालाउ बार्नाबासको बिरोधता बार्का इस्तरको भक्त बेबालाइ कालाउ सहरको मुलि-मुलि वाबालाइहेङ उस्काइहि, कालाउ इम्बालाइ पावल कालाउ बार्नाबासहेङ ताइको सिमानासो बाहार ओल्लापाहि।

⁵¹ जेलाउ पावल कालाउ बार्नाबास ताइको खोकोइको धुला या तिङपालिको भाअ्सिङ ह्रिहि कि परमेस्वर इम्बालाइहेङ इन्कार पाका हि कालाउ इम्बालाइहेङ दन्ड पिका हि, कालाउ न्हुसो इम्बालाइ आइकोनियम सहर भारि हानिहि।

⁵² कालाउ एन्टिओक सहरता हिका चात्यागेलाइ आनान्द कालाउ पबित्तरो आत्माहोइ पोङघाहि।