साल्न्हाका चात्या 12 - Dhimal NT

पतरुस झ्यालखानाता

¹ इङको दिनागेलाइता राजा हेरोद मन्डलिको आधिमि द्‍याङगेलाइहेङ बन्दि बानाइलि कालाउ साताइलि तेङहि।

² राजा हेरोद युहान्नाको दादा याकुबहेङ तरवारहोइ सेअ्हि।

³ इदोइ कामहोइ यहुदिगेलाइ लेङचाका तिङतेङ पतरुसहेङ बुङ रिम्हि। या घाटाना यहुदिगेलाइको आखिमिरे तोलेको पार्बाको सोमोइता घातेका हिघाहि।

⁴ राजा हेरोद पतरुसहेङ रिम्तेङ झ्यालखानाता ह्वाहि, कालाउ तेतु झना सिपालाइको थाङका नजरता पतरुसहेङ ताअ्हि, कालाउ राजा हेरोद पतरुसहेङ निस्तार पार्बाको न्हुसो द्‍याङगेलाइको माझाता चुमालि बिचार पाहि।

⁵ एसापा पतरुसहेङ हेन्जा दिना थेकापा झ्यालखानाता ताअ्हि, कालाउ मन्डलि वाको भाअ्सिङ परमेस्वर दोफा लागातार प्रार्थाना पाकाताङ हिघाहि।

⁶ राजा हेरोद पतरुसहेङ न्यायको भाअ्सिङ द्‍याङगेलाइको आगाता चुमालि खाङका दिनाको लाङति दिलिमा, पतरुसहेङ न्हेनोङ झिन्झिरिहोइ धेउतेङ हिघाहि कालाउ वा न्हेमि सिपाइको माझाता जिम्तेङ हिघाहि। कालाउ सिपालाइ झ्यालखानाको फिनुता रेसितेङ हिघाहि।

⁷ आचानक प्रभुको एमि स्वर्गदुत इन्ता देखाल परिहि कालाउ कोठाता फाइसालामहि। कालाउ स्वर्गदुत पतरुसको भेरपा लोतेङ केङखेनेता साइतेङ “मार्फा ल्हो” दोअ्तेङ वासेहेङ नाङघा पाहि। कालाउ झिन्झिरिगेलाइ पतरुसको खुरसो खाइन्हातेङ हुल्हि।

⁸ स्वर्गदुत पतरुसहेङ दोअ्हि, “लोखोन होङ, कालाउ जुत्ता सुङ।” कालाउ पतरुस एन्साङ पाहि, कालाउ स्वर्गदुत वासेहेङ आरोङ दोअ्हि, “नाङको बाहारको लोखोन होङतेङ काङको न्हु लौउ।”

⁹ कालाउ स्वर्गदुत झ्यालखानासो ओल्लेहि कालाउ पतरुस बुङ वाकोङ न्हु-न्हु हानिहि। पतरुस थाहा मागिहि कि या जातिङकोङ स्वर्गदुत पादोङखे। कालाउ वा सोचिहि, कि का दर्सन तिङदोङखा।

¹⁰ कालाउ पतरुस कालाउ स्वर्गदुत पालेगेलाइको पहरा पाअ्तेङ लाङतेङ कालाउ न्हेतेङ फिनु जेङतेङ हानिहि, कालाउ न्हुसो इम्बालाइ चिरको मुलि फिनुता थुकाहि। कालाउ इङको फिनु ताइमिङ इम्बालाइको भाअ्सिङ हेअ्न्हाहि, कालाउ इम्बालाइ बाहार ओल्लेतेङ एनोङ दामा पातेङ हानिहि, कालाउ एन्सालाउ दोङ स्वर्गदुत वासेहेङ लाअ्तेङ हानेहि।

¹¹ जेलाउ पतरुस हाइ जेङका हिघाहि दोअ्का थाहा निङहि, कालाउ वा दोअ्हि, “एला कासेहेङ जातिङकोङ थाहा जेङहि, कि प्रभु ताइको स्वर्गदुत दिङगिल्तेङ राजा हेरोदको खाबारासो, कालाउ यहुदि आगुवागेलाइ जेदोङ पालि चाहिखे इङको गोताङसो कासेहेङ लाअ्पाहि।”

¹² परमेस्वर ताइमिहेङ बान्चिपाका थाहा गितेङ, पतरुस, मर्कुस दोअ्न्हाका युहान्नाको आमाइ मरियमको साअ्ता हानिहि। इन्ता हेन्जा खान्धुराइगेलाइ जोम्तेङ प्रार्थाना पातेङ हिघाहि।

¹³ पतरुस फिनु ढकढककाइलाउ रोदा मिङ हिका चाकारिया बेजान फिनु हेअ्लि लोहि।

¹⁴ कालाउ रोदा पतरुसको गाला नाल्तेङ वा मेनाङ लेङचातेङ फिनु माहेअ्सिङ साअ्ता धाअ्तेसाङ लिता हानिहि कालाउ दोअ्हि, “पतरुस फिनुता जाअ्तेङ हिका हि।”

¹⁵ ओबालाइ रोदाहेङ दोअ्हि, “नाअ् पागिलि जेङना हाइ।” कालाउ वा जातिङको पतरुस दोङ दोअ्तेङ जोर पाहि। कालाउ इम्बालाइ दोअ्हि, “इङको वाको सामाराइका स्वर्गदुत वाला।”

¹⁶ कालाउ पतरुस चाहि फिनु ढकढककाइतेङ हि, जेलाउ इम्बालाइ फिनु हेअ्हि कालाउ ओबालाइ पतरुसहेङ तिङतेङ भारभुसाइहि।

¹⁷ पतरुस खुरको इसाराहोइ इम्बालाइहेङ सिकापा हिलि दोअ्हि, कालाउ वासेहेङ हेसा प्रभु झ्याल्खानासो लाअ्पाहि दोअ्का काथा इम्बालाइहेङ दोअ्हि। इदोइ काथा याकुब कालाउ आरु ओनेगेलाइहेङ बुङ दोअ्पिसु दोअ्तेङ, पतरुस चाहि भेनेङ थामे हानेहि।

¹⁸ ह्रिमाङ झ्याल्खानाको सिपालाइको माझाता हलचल मचिहि कि पतरुस हिसो हानिहि।

¹⁹ राजा हेरोद सिपालाइहेङ पतरुसहेङ भोअ्लि आदेस पिहि कालाउ बुङ निङलि मादोहि, कालाउ राजा हेरोद सिपालाइहेङ प्रस्न पाहि कालाउ उत्तारा मानिङनाङ सिपालाइहेङ दोङ ज्यान साजाइ पिहि। कालाउ न्हुसो राजा हेरोद यहुदिया जिल्लासो कैसरिया सहरता हानिहि कालाउ आले सोमोइको भाअ्सिङ हानितेङ इन्ताङ हि।

राजा हेरोद सिका

²⁰ राजा हेरोद टुरोस कालाउ सिदोन सहरको द्‍याङगेलाइ दोफा मारफाङ चेर ताम्पाका हिघाहि। ओदोङ भाअ्सिङ इम्बालाइ एनोङ समुह जेङतेङ राजा हेरोदकोता लोहि, इम्बालाइ राजा हेरोदको निजि सेवा पाका बलस्तको साघाइहोइ राजा हेरोद दोफा मिलिलिको भाअ्सिङ बिन्ति पाहि। हाइपालिपानु इम्बालाइको सारभि उमको भाअ्सिङ राजाको सारभिता निर्भर हिघाहि।

²¹ राजा हेरोद इङको सहरको द्‍याङयागेलाइ दोफा एनि भेतिलि निसित पाहि, इङको दिनाता राजा हेरोद मेनाङ राजकिय धाबा लोखोन होङतेङ न्याय सिङहासनता योम्हि, कालाउ द्‍याङगेलाइहेङ सम्बोधन पाहि।

²² द्‍याङगेलाइ ह्रिकाइहि, “इदोइ ते इस्वरको गाला हि, द्‍याङको माको!”

²³ राजा हेरोद इङको परमेस्वरहेङ महिमा मापिनाङ ओदोङ घुरि प्रभुको एमि स्वर्गदुत वासेहेङ दानाइहि, कालाउ वा स्वाङ-स्वाङपा पेसा पेतेङ सिहि।

²⁴ कालाउ परमेस्वरको बचन द्‍यापाहाङ चार-बिराइतेङ हानिहि कालाउ खान्धुराइगेलाइको सङख्यागेलाइ बुङ लागातार बाढेकाताङ हानिहि।

²⁵ जेलाउ बार्नाबास कालाउ साउल यहुदिया जिल्लाको खान्धुराइगेलाइहेङ ताका पिपुका काम पुरा पाहि, कालाउ इम्बालाइ यरुसेलेम सहरसो एन्टिओक सहरता घुरिहि। कालाउ न्हुसो इम्बालाइ दोफा मर्कुस दोअ्न्हाका युहान्‍ना बुङ हानिहि।