2 तिमोथि 4 - Dhimal NT

सुसमाचार हिङपाका जिम्मा

¹ जेलाउ येसु ख्रिस्ट राजा भाइपाङ सासन पालि ल्वाङ, कालाउ वा सिन्हुका कालाउ सिकालाइको न्याय पावा। ओदोङ भाअ्सिङ परमेस्वर कालाउ ख्रिस्टको साक्सिको रुपता का नासेहेङ थाङका आदेस प्याङका।

² नाअ् जिसिकाङ आबास्थाता बुङ परमेस्वरको बचन प्राचार पालि तियार जेङ, कालाउ द्‍याङगेलाइ गोल्ति पालाउ इम्बालाइहेङ सम्झाइसु कालाउ आसल पालि हाउसाइ पासु। कालाउ इदोइ गोताङ काथागेलाइ धर्य पातेङ रेम्फासो धिरपा।

³ हाइपालिपानु इसिका सोमोइ लोदोङखे जेलाउ द्‍याङगेलाइ सत्ये सिक्स्याहेङ हिङलि माकितावा, कालाउ इम्बालाइ हेन्जा धाताइका सिक्स्यकसो ताइमिहेङ मन्दा ताअ्का काथा खिनिङ हिङलि भोखे।

⁴ इम्बालाइ सत्ये काथा माहिङखे कालाउ दन्त्य काथागेलाइ चाहि हिङलि मन्दा ताअ्खे।

⁵ कालाउ नाअ् कस्ट भोगिलि गोइलाउ बुङ जेलाउ बुङ ताइमिहेङ नियन्तरन पालि गोइखे, कालाउ सुसमाचार प्राचार पालि थाङका मेहेनत पाअ्‌, कालाउ प्रभु नासेहेङ पिका गोताङ काम पुरा पाअ्‌।

⁶ का नासेहेङ या आदेस पिदोङखा, हाइपालिपानु का ते भोगको रुपता आर्पन जेङलि लागिका हिघा कालाउ काङको जिबन कालाउ परमेस्वरको भाअ्सिङ काङको काम दोलि तोम्का हि, हाइपालिपानु का गिखा कि का धेमाङ सियाङका वाला।

⁷ खाङधुरिको रेम्का धुम पासु, जेसाङ एमि आर्मि धुम पालि हार मामानिखे, का बुङ ख्रिस्टको भाअ्सिङ थाङका मेहेनत पाका हिघा। का येसु ख्रिस्टको पिका कामहेङ पुरा पाका हिघा। कालाउ आखिरि दिना थेकापा खाङधुरि योग्य जेङतेङ हिघा।

⁸ एला प्रभु कासेहेङ एनोङ इनाम प्याङ, जेदोङ चाहि काङको आसल पाका कामको इनाम हि। ठिकसो न्याय पाका प्रभु दोङ कासेहेङ इङको इनाम प्याङ जेलाउ वा आरोङ ल्वाङ। कालाउ का खिनिङ माको, कालाउ वाको लोका दामा खाङका झाराङहेङ इङको इनाम प्याङ।

पावलको ताइकोङ काथा

⁹ तिमोथि जेथे धेमा जेङलि दो, कासेहेङ भेतिलि लोलि कोसिस पाअ्‌।

¹⁰ हाइपालिपानु डेमास इदोइ सुमिङको काथागेलाइहेङ मन्दा ताअ्खे कालाउ वा कासेहेङ लाअ्तेङ थेसलोनिकि सहरता हानेका हि। कालाउ खान्धुराइ ओने क्रेसेनस चाहि गलातिया इलाका हानिका हि, कालाउ तितस चाहि दालमितिया प्रदेसता हानिका हि।

¹¹ लुका खिनिङ का दोफा हि, जेलाउ नाअ् ल्वाना मर्कुसहेङ बुङ नाअ् दोफा चुम्तेङ लौउ, हाइपालिपानु वा इता कासेहेङ काङको कामता साघाइलि द्वावा।

¹² का तुखिकसहेङ एफिसस सहरता दिङगिल्का हिघा।

¹³ जेलाउ नाअ् ल्वाना, का तरोआस सहरता हिलाउ इन्ता कार्पसको साअ्ता काङको लाअ्धिघा कोट चुम्तेङ लौउ। कालाउ इन्ता हिका काङको कितापगेलाइ कालाउ बिसेस पातेङ धालेको पात्तारा बुङ चुमापि।

¹⁴ चिरको काम पाका आलेकज्यानडर कासेहेङ हेन्जा पोल्ति चित्ता तुपापिका हि। प्रभु वासेहेङ वाको मारेम्का काम आन्सार बद्ला ह्रुकावा।

¹⁵ नाअ् बुङ उङकोसो चङख हि, हाइपालिपानु वा केलाइको येसु ख्रिस्टको सिक्स्याको बारेता घोर बिरोध पाका हि।

¹⁶ लाङ पोल्ति आदालतता काङको मुद्दा चलिलाउ हासु बुङ काङको पक्स्यता माधुइहि, कालाउ झाराङ कासेहेङ लाअ्तेङ हानिहि। परमेस्वर इङको काथाको दुसिका इम्बालाइहेङ मालाग्याको, भरु का प्रार्थाना पाङका कि इम्बालाइ कासेहेङ लाअ्काता परमेस्वर इम्बालाइहेङ स्यामा प्याको।

¹⁷ कालाउ प्रभु काङको दोफा हिघाखे, कालाउ वा दोङ कासेहेङ सरबुङ पिहि, कालाउकि का गोताङ गैर-यहुदिगेलाइहेङ जाइ इन्ता जोम्का हिघाहि, इम्बालाइहेङ येसु ख्रिस्टको सुसमाचार प्राचार पालि द्वाको कालाउ इम्बालाइ झाराङ हिनाको। कालाउ वा कासेहेङ सिकासो बन्चिपाहि, जेसाङ म्हितुका खुवाँको नुइसो हासु बान्चि पावा।

¹⁸ कालाउ प्रभु कासेहेङ गोताङ खाल्को मारेम्का कामगेलाइसो जोगेपावा, कालाउ वा कासेहेङ जोगाइतेङ ताइको स्वर्गको सासनता चुम्पावा। वाको महिमा जेलाउलाउ बुङ ज्याको। आमेन।

¹⁹ प्रिस्किला कालाउ वाको के आकिलास कालाउ ओन्सिफरसको गोताङ जाहानगेलाइहेङ काङको सेउपाखा हि दोअ्पि।

²⁰ इरासतस कोरिन्थि सहरताङ हि, कालाउ का तोरोफिमसहेङ मिलेटस सहरता लाअ्तेङ लोघा, हाइपालिपानु वा मासाधेका हिघाहि।

²¹ चुङदिनको सोमोइ खाङतेङ लाम्फा दोङ काङकोता लोलि सकभर कोसिस पाअ्‌। युबलस, पुदेनस, लिनस, क्लोडिया कालाउ इता हिका झाराङ खान्धुराइ ओनेगेलाइ नासेहेङ सेउपाखा पिगिल्का हि।

²² का प्रार्थाना पाङका कि प्रभु नाङको दोफा ह्याको कालाउ वाको आनुग्रह बुङ नाङको दोफा ह्याको।