2 तिमोथि 3 - Dhimal NT

आखिरि दिनागेलाइ

¹ का दोअ्लि खाङका काथाता ध्यान पि, कि सुमिङको आखिरि दिनागेलाइता दुखको सोमोइ ल्वाङ।

² हाइपालिपानु द्‍याङगेलाइ ताइमिहेङ खिनिङ माया पाका, धनको लोभ पाका, आहाङकारि, घमन्डि, ताइमिहेङ बार्का फोम पाका, आरु द्‍याङगेलाइहेङ निन्दा पाका, ताइको आमाइ-आबाको आग्या माकेम्का, आरुको गुन मातिङका कालाउ आपबित्तरो हिखे।

³ हिदोइ बुङ द्‍याङगेलाइ दाया मापाका हासुहेङ बुङ स्यामा मापिका, आरुको मारेम्का काथा दोअ्का, ताइको इच्छागेलाइ काबुता ताअ्लि मादोअ्का, थाङका कालाउ रेम्का काथागेलाइ मन मापरिका जेनावा।

⁴ बो द्‍याङगेलाइहेङ धोका पिकालाइ, ताइमिहेङ बो खान्तेङ हेन्जा महत्व्यको थानिकालाइ, कालाउ परमेस्वरहेङ खान्तेङ मोजमस्तिहेङ हेन्जा मन परिका हिखे।

⁵ इम्बालाइ परमेस्वरको आदार पाका कोनिङ तिङपाखे कालाउ परमेस्वरको सरबुङहेङ ताइको मारेम्का जिबनसो परिबतन पालि आनुमति मापिखे। इसिका द्‍याङगेलाइको सङगतसो फारापा हिसु।

⁶ हाइपालिपानु इम्बालाइ मध्येसो हेथेते द्‍याङगेलाइ साअ्-साअ्गेलाइता हानिखे कालाउ आनाइ बेबालाइहेङ ताइको आधिनता पाखे, जाइको ह्रदयगेलाइ पापहोइ लादाइका हिखे कालाउ गोताङ खाल्को इच्सागेलाइसो काबुता परिका हिखे।

⁷ उङको बेबालाइ जेलाउ बुङ भेनेङ-भेनेङ काथागेलाइ धिरखे, कालाउ ख्रिस्टको सत्ये सिक्स्याको बारेता हेलाउ बुङ बुझिलि मादोअ्खे।

⁸ इदोइ धाताइका सिक्स्यकगेलाइ ख्रिस्टको सत्ये सन्देसहेङ घोसाना पालिसो रोकिलि कोसिस पाखे, जेसाङ यान्नेस कालाउ याम्ब्रेस मोसाको बिरोध पाका हिघाहि। इदोइ द्‍याङगेलाइको बुद्दि बिगिरका हि इङको द्‍याङगेलाइ ख्रिस्टको खाङधुरिता आसफल जेङका हि।

⁹ कालाउ इम्बालाइ हेन्जा सोमोइ थेकापा द्‍याङगेलाइहेङ आनाइ बानाइलि माद्वाङ, हाइपालिपानु जेसाङ द्‍याङगेलाइ यान्नेस कालाउ याम्ब्रेसको आनाइता थाहा निङका हिघाहि, इन्सिका द्‍याङगेलाइ आनाइ हि दोअ्तेङ झाराङ थाहा निनावा।

तिमोथिहेङ पावलको आदेस

¹⁰ कालाउ तिमोथि नाअ् गि, कि का हाइ धिरपाखा, कालाउ का हेसा जिबन जियाइखा, काङको योजाना हाइ हि, कालाउ का हाइ खाङधुरि पाखा। कालाउ नासेहेङ थाहा दोङ हि, का गोताङ खालको द्‍याङगेलाइ दोफा धर्यता कालाउ मायारु ब्यभार पाका हिघा, कालाउ कस्टगेलाइ बुङ सहिका हिघा।

¹¹ कालाउ नासेहेङ या बुङ थाहा हि, कि एन्तिओक सहर, आइकोनियम सहर कालाउ लुस्तारा सहरको द्‍याङगेलाइ कासेहेङ हेन्जा कस्ट कालाउ साताइका नासेहेङ थाहा दोङ हि। हेसा का कस्ट कालाउ साताइकागेलाइ सहिघा। कालाउ प्रभु दोङ कासेहेङ इङको गोताङ बिपतिसो बान्चिपाहि।

¹² परमेस्वरहेङ खुसि बानाइलि भोका कालाउ येसु ख्रिस्टता खाङधुरि पाका झाराङहेङ साताइयाङ।

¹³ कालाउ दुस्ट द्‍याङगेलाइ कालाउ ठगिकागेलाइ आझाइ झन मारेम्का काम पावा। इम्बालाइ द्‍याङगेलाइहेङ ठगियावा कालाउ इम्बालाइ ताइमिङ बुङ आरुगेलाइसो ठगिन्हावा।

¹⁴ कालाउ नाअ् केलाइसो निङका सिक्स्याहेङ लागातार खाङधुरि पाअ्सु कालाउ निसित जेङसु, कि इदोइ सत्ये हि हाइपालिपानु नासेहेङ थाहा हि, कि इङको हासुसो धिर्ना।

¹⁵ नाअ् जामालसोङ पबित्तरो धर्मसास्तरको काथागेलाइ धिरका हिना। इदोइ धर्मसास्तर दोङ नासेहेङ इदोइ बुझिलि साघाइयाङ कि येसु ख्रिस्टता खाङधुरि पानाङ परमेस्वर नासेहेङ बान्चि पावा।

¹⁶ गोताङ धर्मसास्तरगेलाइ परमेस्वर पाहासो दोङ लोका हि, कालाउ इङको द्‍याङगेलाइ सत्ये धिरपालि, कालाउ द्‍याङगेलाइहेङ गल्ति पाका महसुस पापालि कालाउ सहि काथा धिरपालिको भाअ्सिङ उपयोगि जेङखे।

¹⁷ कालाउकि परमेस्वरको जनगेलाइ गोताङ खाल्को आसल काम पालि तियार कालाउ सक्स्यम जेङलि द्वाको दोअ्तेङ इदोइ धर्मसास्तर पिका हि।