2 तिमोथि 2 - Dhimal NT

येसु ख्रिस्टको भाअ्सिङ दुख भोगिलि

¹ ओदोङ भाअ्सिङ तिमोथि जाइ नाअ् काङको ताइकोङ चान भाइका हिना, लागातार ताइमिहेङ बल्लियाका बानाइ इदोइ गितेङ, कि परमेस्वर नासेहेङ आनुग्रह पिका हि जेदोङ चाहि येसु ख्रिस्ट पाहासो खिनिङ लोखे।

² का हेन्जा साक्सिगेलाइको आगाता ख्रिस्टको बारेता दोअ्का सन्‍देस नाअ् हिङका हिघाखेना। एला का चाहिखा कि नाअ् बुङ ओदोङ सन्‍देस आरु खान्धुराइगेलाइहेङ हिङपा जाइहेङ नाअ् खाङधुरि योग्य थानिखेना, कालाउकि इम्बालाइ बुङ ओदोङ सन्‍देस आरु द्‍याङगेलाइहेङ हिङपालि द्वाको।

³ येसु ख्रिस्ट आसल सिपालाइ कोनिङ दुखगेलाइता का दोफा झ्वाइ।

⁴ सेनाता भर्ना जेङका सिपाइ आरु हाइ दोङ काम मापाखे, हाइपालिपानु वा ताइको नाइकेहेङ खुसि बानाइलि भोखे।

⁵ एन्साङ दोङ हिदोइ बुङ खेलाडि खेलता भाग ह्रुखे पानु, वा खेलको नियम आन्सार माघापा धाउ इनाम निङलि मादोखे।

⁶ परिस्रोम पाका किसान दोङ लाङ द्‍याङ हि, जाइ बालिको लाङ भाग निङलि गोइखे।

⁷ इदोइ गोताङ उधारनगेलाइहोइ हाइ धिरपाखे सोचिसु, कालाउ प्रभु नासेहेङ काङको दोअ्का इदोइ गोताङ काथागेलाइ बुझिलि साघाइयाङ।

⁸ येसु ख्रिस्ट हासु हि दोअ्तेङ लागातार फोम पातेङ ताअ्सु, वा राजा दाउदको हारागुटियासो हि। कालाउ परमेस्वर येसुहेङ सिकासो न्हुसो सिन्हु पाका हिघाहि, कालाउ का द्‍याङगेलाइको माझाता प्राचार पाका सुसमाचार या दोङ हि।

⁹ कालाउ ओदोङ सुसमाचार हिङपाकानाङ का आपाराधि कोनिङ कस्ट भोगितेङ हिघा। इङको झोको खिनिङ माको आपाराधि कोनिङ झिन्झिरिहोइ धेउनातेङ झ्यालखानाता परिका हिघा। कालाउ द्‍याङगेलाइहेङ परमेस्वरको बचन प्राचार पालि हिदोइ बुङ काथाहोइ रोकिलि माद्वावा।

¹⁰ ओदोङ भाअ्सिङ परमेस्वर चुनिका इङको झाराङ द्‍याङगेलाइको भालाइको भाअ्सिङ का एसापा गोताङ दुख सहियाङका, कालाउकि इम्बालाइ येसु ख्रिस्टता खाङधुरि पातेङ मुक्ति कालाउ आनान्त आदार निनाको।

¹¹ इदोइ भनाइ सत्ये हि, कालाउ यासेहेङ खाङधुरि पालि द्वाङ, जेसापा केलाइ ख्रिस्ट दोफा सिकानु, केलाइ बुङ वाको दोफाङ बान्चियाङ।

¹² जेसापा केलाइ वाको भाअ्सिङ दुख सहिन्हाखे पानु, केलाइ बुङ वाको दोफाङ राजा भाइपाङ सासन पाङ, कालाउ केलाइ वासेहेङ इन्कार मापानु, वा बुङ केलाइहेङ इन्कार मापावा।

¹³ जेसापा केलाइ खाङधुरि योग्य मान्थुलाउ बुङ, वा खाङधुरि योग्य ह्यावा, हाइपालिपानु वा ताइको बिरोधता हिलि माद्वावा।

परमेस्वर पाहासो चुनिका काम पाकालाइ

¹⁴ नाङको द्‍याङगेलाइ इदोइ काथागेलाइ मानिलाको जेदोङ काथा का नासेहेङ दोअ्का हिघा, कालाउ प्रभुको साक्सिको रुपता इम्बालाइहेङ सब्दगेलाइको आर्थाता काथा मापोसुसु दोअ्तेङ चेताउनि पिसु। हाइपालिपानु इन्सिका काथा पोसुकाहोइ हासुहेङ बुङ फाइदा मापाखे, कालाउ हिङका द्‍याङगेलाको खाङधुरिहेङ बुङ बार्का हान्ति पाखे।

¹⁵ ताइमिहेङ लेदेरपालि मागोइका कालाउ सत्येको सन्देसहेङ ठिक तरिकासो धिरपालि दोका काम पाकालाइ भाइपाङ नाअ् बुङ थाङका परिस्रोम पालि गोइखे कालाउकि परमेस्वर नासेहेङ पुर्न रुपता सुइकार पाको।

¹⁶ इन्सिका आनाइ कालाउ फाल्तु काथागेलाइ दोअ्कालाइसो फारापा हिसु। हाइपालिपानु इन्सिका काथाहोइ द्‍याङगेलाइहेङ परमेस्वरसो झन दुरे बानाइखे।

¹⁷ इम्बालाइको सन्देसगेलाइ फाइलाइयावा कालाउ जाइ इम्बालाइको सन्‍देस हिनावा इम्बालाइको खाङधुरि नासातावा। उङको न्हेमि मध्ये हुमेनियस कालाउ फिलितोस इन्सिकाङ सिक्स्या पिका द्‍याङगेलाइ दोङ हि।

¹⁸ उङको न्हेमि द्‍याङगेलाइ सत्ये सिक्स्याहेङ लाअ्का हि, इम्बालाइ धिरपाखे कि, परमेस्वर सिका खान्धुराइगेलाइहेङ आनान्त जिबनको भाअ्सिङ लाम्फाङ दोङ सिन्चाल पाका हि। कालाउ परिनाम स्वरुप इम्बालाइ आधिमि खान्धुराइगेलाइको खाङधुरिसो खेङका हि।

¹⁹ कालाउ परमेस्वरको द्‍याङगेलाइ बल्लियाका जग भाइका दोङ हि, जेदोङ माहेङगालाइनाखे। कालाउ इदोइ जगता इसिका सब्दगेलाइ लेखेका हि: “प्रभु ताइको द्‍याङगेलाइहेङ नाल्खे” कालाउ जाइ प्रभुको हि वा मारेम्का काम पालि लाअ्लि गोइखे।

²⁰ हिदोइ बुङ बार्का साअ्ता सोना कालाउ चान्दिहोइ बानाइका भान्डा-कुन्डा खिनिङ माहिखे, कालाउ फाला कालाउ भनोइहोइ बानाइका भान्डा-कुन्डा बुङ हिखे। आधे भान्डा-कुन्डागेलाइ बिसेस कामको भाअ्सिङ चालाइखे कालाउ आधे चाहि साधारन कामको भाअ्सिङ चालाइखे।

²¹ एन्साङ पातेङ जेदोङ खान्धुराइ ताइमिहेङ मारेम्का कामगेलाइसो खेङखे, इङको एनोङ जाङका भान्डा भाइका जेनावा जेदोङ बिसेस कामको भाअ्सिङ चालाइखे। कालाउ जाइको जिबन सुद्द जेनावा वाको गिह्रि वासेहेङ आसल कामता लागाइलि द्वावा।

²² तिमोथि नाअ् धाना द्‍याङगेलाइ पालि इच्छा पाका मारेम्का कामगेलाइसो दुरे हिसु, कालाउ सुद्द ह्रदयसो प्रभुको आराधाना पाकालाइ दोफा आसल काम, खाङधुरि, प्रेम, कालाउ सान्तिहेङ पिताइसु।

²³ कालाउ हाइ दोङ मागिका आनाइ काथा जालबाजिगेलाइसो दुरे हिसु, हाइपालिपानु नासेहेङ थाहा दोङ हि, कि इसिका मारेम्का काथागेलाइसो चेरसुखे खिनिङ।

²⁴ कालाउ प्रभुको बान्धाइति चेरसुलि माएल, कालाउ वा झाराङहेङ दायाका हिलि गोइखे, कालाउ परमेस्वरको बचन रेम्फासो धिरपालि दोका कालाउ बिरोधि द्‍याङगेलाइ दोफा गोताङ काथा सहिलि दोका हिलि गोइखे।

²⁵ कालाउ ताइमि दोफा सहमत माजेङका द्‍याङगेलाइहेङ वा मोनोइ जेङतेङ सुधार्लि दोका हिलि गोइखे। जेङलि दोनु परमेस्वर ओबालाइहेङ पाप पालि लाअ्पातेङ कालाउ येसु ख्रिस्टको बारेता सत्ये गिलि साघाइयाङ।

²⁶ कालाउ ओबालाइ चेताना निङतेङ साइतानको जालेसो खाअ्तावा, कालाउ साइतान ओबालाइहेङ ताइको इच्छा आन्सार चलिलि बन्दि बानाइका हि।