2 थेस्लोनिकि 3 - Dhimal NT

प्रार्थानाको भाअ्सिङ बिन्ति पाका

¹ खान्धुराइ ओनेगेलाइ, आखिरता केलाइको भाअ्सिङ प्रार्थाना पाअ्पिसु, कालाउ प्रभुको बचन धेमाङ द्‍यापाहाङ फाइलाइयाको कालाउ द्‍याङगेलाइ साम्मान पालि द्वाको जेसाङ नेलाइ बुङ साम्मान पाका हिघासुखेना।

² कालाउ प्रार्थाना पाअ्सु, कि परमेस्वर केलाइहेङ दुस्ट द्‍याङगेलाइसो जेङका हान्तिसो बान्चि पाको, हाइपालिपानु सुसमाचार हिङकालाइ हेन्जा जोसो द्‍याङगेलाइ इदोइ काथाता खाङधुरि मापाखे।

³ कालाउ नेलाइ परमेस्वरता भोरोसा पालि दोस्वाना। कालाउ वा दोङ नेलाइहेङ आत्मिक रुपता बल्लियाका बानाइयावा कालाउ साइतानसो जोगाइतेङ ताअ्ताङ। कालाउकि साइतान नेलाइहेङ हिदोइ बुङ हान्ति मापाको।

⁴ केलाइ जेदोङ काथाको आग्या पिन्हाखे, इङको नेलाइ लागातार पासुखेना बुङ दोअ्का केलाइ नेलाइको बारेता प्रभुता खाङधुरि पानाखे।

⁵ परमेस्वर नेलाइहेङ हेथे प्रेम पाखे ख्रिस्ट नेलाइहेङ देखाल पापियाङ, कालाउ कस्ट सहिलि दोका बानाइलि द्वाको जेसाङ ख्रिस्ट ताइमिङ कस्ट बुङ सहिहि।

कुरियाहेङ चेताउनि

⁶ एला खान्धुराइ ओनेगेलाइ, केलाइको प्रभु येसु ख्रिस्ट पिका खाबारासो केलाइ नेलाइहेङ आग्या पिन्हाखे, कि केलाइसो नेलाइ दोङ निङका सिक्स्याता मालागिका गोताङ कुरिया खान्धुराइ ओनेगेलाइको सङगत मापासु।

⁷ हाइपालिपानु, नेलाइ दोङ हेसा केलाइको भाइपाङ जियाइलि गोइखे इङको गोताङ नेलाइ ताइमिङ गिसुखेना, हाइपालिपानु जेलाउ केलाइ नेलाइ दोफा हिलाउ कुरिया मान्थु घानाहि भरु काम पातेङ हिन्हाहि।

⁸ कालाउ केलाइ हासुको बुङ तोले एन्साङ माचान्हाहि। कालाउ केलाइ नेलाइता भर मापरियाङ दोअ्तेङ केलाइ न्हिसिन-नितिमा परिस्रोम पातेङ काम पान्हाहि।

⁹ साघाइ निङलि केलाइको होक मानिङका दोअ्तेङ माको, कालाउ केलाइ नेलाइको भाअ्सिङ नामुना जेनाइने दोअ्तेङ केलाइ थाङका परिस्रोम पान्हाहि।

¹⁰ जेलाउ नेलाइ दोफा हिलाउ केलाइ नेलाइहेङ प्राय दोअ्घान्हाखे, “हासु बुङ काम मापानु वा उम बुङ माचाको।”

¹¹ हाइपालिपानु केलाइ हिङनाखे, कि नेलाइ मध्येता हेथेते कुरिया जिबन बितिपातेङ हिसुना। नेलाइ ताइमि चाहि हाइ दोङ काम मापा सुखेना कालाउ बोमिको कामता बेकारता दक्खल पासुखेना।

¹² प्रभु येसु ख्रिस्ट पिका खाबारासो केलाइ इसिका द्‍याङगेलाइहेङ आर्ति कालाउ आग्या प्याङ, कि इम्बालाइ सिकापा ताइको काम पाको कालाउ ताइकोङ मेहेनेतहोइ कामाइतेङ जिबन चालाइयाको।

¹³ खान्धुराइ ओनेगेलाइ, नेलाइ रेम्का काम पालि मामाइसु।

¹⁴ इदोङ पात्ताराता केलाइको दोअ्का सन्‍देस जेसापा हासु बुङ किलि माकिखे पानु उङको द्‍याङहेङ झाराङ नाल्तेङ ताअ्सु, कालाउ वा दोफा हाइ दोङ सङगत मापासु, कालाउ उङको ताइमिङ लेदेरयावा।

¹⁵ कालाउ बुङ वासेहेङ ताइकोङ सतुरु भाइपा ब्याभार मापासु, कालाउ ताइकोङ ओनेहेङ सम्झाइका भाइपा वासेहेङ सम्झाइ।

आखिरि सेउपाखा

¹⁶ का प्रार्थाना पाङका, कि प्रभु जाइ सान्तिको मुलि हि, वा नेलाइहेङ जेलाउ बुङ सान्ति प्याको कालाउ का आरोङ बुङ प्रार्थाना पाङका, कि प्रभु नेलाइ झाराङ दोफा जेलाउ बुङ ह्याको।

¹⁷ का पावल, ताइकोङ खुरसो इदोइ सेउपाखा लेखेदोङखा। एसापा दोङ का काङको गोताङ पात्ताराको भाग ओतापाखा, कालाउकि झाराङ थाहा निनाको कि इदोइ पात्तारा काङकोसो लेखेका हि।

¹⁸ का प्रार्थाना पाखा, कि केलाइको प्रभु येसु ख्रिस्टको आनुग्रह नेलाइ झाराङ दोफा हितेङ ह्याको।