२ पत्‍रुस 3 - Dhimal NT

प्रभुको लोलि खाङका दिनाको प्रतिग्या

¹ काङको आनाउ सानाइतिगेलाइ, का इदोइ न्हेनोङ दोङ पात्तारागेलाइ नेलाइहेङ लेखेका हिघा कालाउकि का नेलाइहेङ लाम्फा दोङ धिर्का काथागेलाइको फोम पापालि द्वाको, कालाउ नेलाइको मनता सुद्द बिचारगेलाइ जोगाइलि द्वाको।

² का एसा पाखा, हाइपालिपानु परमेस्वरको पबित्तरो बक्तागेलाइ हेन्जा सोमोइ लाम्फा धुइका बचन कालाउ केलाइको प्रभु येसु ख्रिस्ट, केलाइको मुक्ति दाताको सिक्स्याहेङ नेलाइ फोम पासुना दोअ्का का चाहिखा, जेदोङ नेलाइकोता लोका साल्न्हाका चात्यागेलाइ नेलाइहेङ धिरपाका हिघाहि।

³ झाराङ खान्तेङ महत्य पुर्न काथा या हि कि नेलाइ या बुझिलि गोइखे कि आम्तिम दिना खान्तेङ ठिक लाम्फाको दिनागेलाइता आधिमि द्‍याङगेलाइ देखाल जेनावा, जाइको जिबन ताइकोङ लान्सा पाहासो काबुता हिखे। इम्बालाइ ख्रिस्ट धुरितेङ लोका काथाहेङ खुजालाइतेङ उडाइपावा।

⁴ कालाउ इम्बालाइ द्वा, “वाको लोका प्रतिग्या सत्ये माको! वा माल्वाङ!” हाइपालिपानु केलाइको लाम्फाको आगुवागेलाइ झाराङ सिहि, कालाउ आझाइ बुङ हाइ दोङ परिबर्तन जेङका मान्थु। परमेस्वर सुमिङ सिरजाइन्हाका सोङ चलिका गोताङ काथा जिसिकाङको उसुकाङ चलितेङ हि।

⁵ इम्बालाइ गितेङ-गितेङ बुङ इदोइ सत्येहेङ बेवास्ता पाखे कि सिरजाइन्हाका को सुरुता, परमेस्वर नुइ धुइहि कालाउ आकास सिरजाइन्हाहि। वाको बचन वा प्रिथिबिहेङ प्राचिन चिसो खेङहि कालाउ सेङका भोनोइहेङ चिसो बाहार ओल्लापाहि।

⁶ इङकोङ चि पाहासो वा सुमिङहेङ नासा पाहि, जाइहेङ इङको बेला सिरजाइहि। वा बार्का बाने पिगिल्हि कालाउ इङकोहोइ प्रिथिबिता बाने लोहि कालाउ गोताङ सिन्हुका प्रानिगेलाइ नासा हि।

⁷ जेसाङ परमेस्वर प्रिथिबिहेङ सिरजिलि आग्या पाहि, एन्साङ दोङ वा आकास कालाउ प्रिथिबिहेङ मेता माओपा थेकापा इङकोहेङ हिलि आग्या पाका हिघाहि। वाको आग्या माकिका द्‍याङगेलाइहेङ वा न्याय कालाउ नासा पालिको भाअ्सिङ जोगाइतेङ ताअ्का हि।

⁸ कालाउ काङको आनाउ सानाइतिगेलाइ, बास्ताबता या एनोङ काथा मानिल्सु, परमेस्वरको भाअ्सिङ एनि हाजार बासार भाइकाङ कालाउ हाजार बासार ए दिना भाइकाङ हिखे। वासेहेङ एनि कालाउ ए हाजार बासार गोताङ एनोङ दोङ सामान हिखे।

⁹ आधिमि द्‍याङगेलाइ सोचिखे कि प्रभु ताइको धुरितेङ लोका प्रतिग्या पुरा लेद्रा पादोङखे। कालाउ प्रभु इङको तरिकाहोइ लेद्रा मापाखे। भरु वा नेलाइ दोफा धैर्य जेङतेङ हि। हाइपालिपानु वा हासुहेङ बुङ नासा पालि माचाहिखे। कालाउ झाराङ ताइको मनता बदिलिका कालाउ परमेस्वरता घुरितेङ लोका चाहिखे।

¹⁰ कालाउ ख्रिस्ट निसित दोङ धुरितेङ ल्वाङ। वा चोर लोका भाइपा आचानाक मासोचेका बेला धुरितेङ ल्वाङ। इङको सोमोइ आकासता बार्का गाला जेनावा, कालाउ आकास रामावा। कालाउ आकासता हिका बेला, तालि कालाउ फुरुगेलाइ मेता पुरा रुपता नासातावा। इङको दिना, द्‍याङगेलाइ प्रिथिबिता पाका गोताङ काम इम्बालाइहेङ न्याय पालिको भाअ्सिङ परमेस्वर देखाल पाङ।

¹¹ इदोइ निसित हि कि परमेस्वर एसापा गोताङ काथा नासा पाङ, नेलाइहेङ निसित थाहा हि कि नेलाइ हेसा जिबन जियाइलि गोइखे। नेलाइको ब्यभार कालाउ नेलाइको पाका गोताङ कामगेलाइसो परमेस्वरहेङ लेङचापाका बानाइका हिलि गोइखे।

¹² नेलाइ इङको दिनाको आस पालाउ, जेलाउ परमेस्वर सुमिङको न्याय पालि ल्वाङ, इङको दिना धेमाङ लोलिको भाअ्सिङ मार्फा कोसिस पासु। इङको दिना मे जोलाइन्हाङ कालाउ आकासहेङ नासा पाङ, कालाउ मेको दाल्दालाइकाहोइ आकासता हिका गोताङ आनेमानेगेलाइ गालिपापियावा।

¹³ कालाउ केलाइ परमेस्वरको प्रतिग्या पाका आन्सार वा नावा आकास कालाउ नावा प्रिथिबि बानाइका आस पानाखे। इन्ता धर्मि द्‍याङगेलाइ खिनिङ ह्याङ।

¹⁴ ओदोङ भाअ्सिङ आनाउगेलाइ, नेलाइ इदोङ काथागेलाइ जेङका आस पाकाताङ पाका कारन परमेस्वरहेङ लेङचापालि, पबित्तरो कालाउ मादुसिका जिबन जियाइसु कालाउ एमिसो-भेनेङ दोफा सान्तिसो हिसु।

¹⁵ इदोइ बारेता सोचिसु, केलाइको प्रभु धर्य हि, हाइपालिपानु वा नेलाइहेङ लोका न्यायसो बान्चिलि कालाउ खाअ्लि माउका पिदोङखे। केलाइको आनाउ खान्धुराइ ओने पावलहेङ बुङ परमेस्वरसो पिका बुद्दिहेङ प्रयोग पातेङ इदोइ काथा नेलाइहेङ एनोङ पात्ताराता लेखेका हिघाहि।

¹⁶ वा खान्धुराइगेलाइहेङ लेखेका ताइको गोताङ पात्तारागेलाइता, वा ओदोङ काथागेलाइ लेखेहि जेदोङ वा नेलाइहेङ लेखेहि। कालाउ वा ताइको पात्तारागेलाइता लेखेका आधे-आधे काथागेलाइ बुझिलि आप्थायारो हि। जाइ आधिमि द्‍याङगेलाइ रेम्फासो धिरका मान्थु कालाउ जाइ खाङधुरिता इस्थिर मान्थु, इम्बालाइ धर्मसास्तरता हिका आरु भागहेङ गलत तरिकाहोइ बाख्या पाका भाइपा इम्बालाइ इदोङ कथिन काथागेलाइको ब्याख्या गलत तरिकाहोइ पाखे। एन्सा पातेङ इम्बालाइ ताइमिङ परमेस्वरहेङ नासा पालि लागाइखे।

¹⁷ ओदोङ भाअ्सिङ काङको आनाउ सानाइतिगेलाइ, नेलाइहेङ लाम्फा दोङ थाहा हि कि इदोङ काथागेलाइ जेनाङ। ओदोङ भाअसिङ चङख हिसु नियम मामानिका द्‍याङगेलाइ नेलाइहेङ धाताइतेङ माआवाइ तुपाको। जेसापा नेलाइ इम्बालाइको आनुसरन पासुना पानु, नेलाइ सत्ये काथाता खाङधुरि पालि लाअ्स्वाना।

¹⁸ कालाउ नेलाइ लागातार केलाइको प्रभु कालाउ मुक्ति दाता येसु ख्रिस्टको आनुग्रह हेन्जा खान्तेङ हेन्जा आनुभब पातेङ हिलि गोइखे, कालाउ वाको बारेता नेलाइको बुझिकाता बाराकाताङ हानिलि गोइखे। वासेहेङ एला कालाउ जेलाउलाउ बुङ बाखिन ह्याको। आमेन।