२ पत्‍रुस 2 - Dhimal NT

धातुवा सिक्स्कगेलाइ कालाउ ओबालाइको नासा पाका

¹ हेन्जाङ सोमोइ लाम्फा इस्राएल सारभिको द्‍याङगेलाइको माझाता धातुवा आगमबक्तागेलाइ बुङ हिघाहि, एन्साङ दोङ नेलाइको माझाता बुङ धातुवा सिक्स्कगेलाइ बुङ ह्याङ। इम्बालाइ सिकापा नेलाइको मन्डलिता दुल्लावा कालाउ नेलाइहेङ परमेस्वरको बारेता बिनासकारि धाताइका सिक्स्यागेलाइ दोअ्तावा। इम्बालाइ ख्रिस्टहेङ ताइको प्रभुको रुपता इन्कार पावा, जाइ नेलाइहेङ पापगेलाइसो स्वतन्तर पाहि। हाइपालिपानु इम्बालाइ एन्सा पाखे, इम्बालाइ ताइमिङता नासाका चुमाखे।

² ताइमि खान्धुराइ हिघा दोअ्का हेन्जाङ इदोङ धाताइका सिक्स्यकगेलाइको आनैतिक्ता काथाको आनुसरन पाखे, ओदोङ भाअ्सिङ खाङधुरि मापाका बो द्‍याङगेलाइ सत्ये दामाको बारेता बिरोध पावा।

³ इदोङ सिक्स्यकगेलाइ चिचाहा जेनावा, कालाउ नेलाइसो ताका निङलिको भाअ्सिङ नेलाइहेङ दन्त्य काथागेलाइ हिङपातेङ इम्बालाइ नेलाइहेङ धोका प्यावा। परमेस्वर इम्बालाइहेङ साजाइ प्याङ दोअ्तेङ हेन्जाङ लाम्फा दोङ निर्नय पालि दोका हि कालाउ वा इङको पालि तियार हि। वा निसित इम्बालाइहेङ नासा पाङ।

⁴ स्वर्गदुतगेलाइ पाप पालाउ परमेस्वर ओबालाइहेङ दन्ड पिलिसो मारोकिहि, कालाउ इङको दुतगेलाइहेङ नरकता थाइगिल्पिहि, जेता न्यायको दिना थेकापा ह्रुम्लिको भाअ्सिङ इम्बालाइहेङ दाकिलकिलकाता झिन्झिरिहोइ धेउतेङ ताअ्खे, कालाउ न्यायको दिनाता इम्बालाइ निङलि गोइका दन्ड निनावा।

⁵ नेलाइहेङ इदोइ बुङ थाहा हि कि जेलाउ हेन्जा सोमोइ लाम्फाको द्‍याङगेलाइ परमेस्वरहेङ माथिहि, वा इम्बालाइको पाका दुस्ट काथागेलाइहेङ बेवास्ता मापाहि। भरु वा इम्बालाइहेङ दन्ड पिलि सारा प्रिथिबि दुबिपालिको भाअ्सिङ बाने पिगिल्हि, कालाउकि इम्बालाइ झाराङ नासाताको। कालाउ वा नुहा सुधाङ येएमि झनाहेङ बान्चिपाहि, नुह परमेस्वर दोफा धर्मि जेङका को बारेता प्राचार पाहि।

⁶ परमेस्वर सोदोम कालाउ गमोरा सहरगेलाइको द्‍याङगेलाइहेङ दुसिहिका हिघाहि, कालाउ इम्बालाइ बुसिरि माजेङपा भरि इम्बालाइहेङ ओपाहि। इङको सदोम कालाउ गमोराको द्‍याङगेलाइहेङ जेदोङ जेङका हिघाहि, इङको चाहि वाको आग्या माकिकालाइको भाअ्सिङ चेताउनि हि।

⁷ कालाउ सदोमहेङ नासा पालि लाम्फा वा लोतहेङ जोगेपाहि, जाइ एमि धर्मि द्‍याङ हिघाहि, लोत सहर लाअ्तेङ हानिहि कालाउ परमेस्वर वासेहेङ बान्चिपाहि। लोत हेन्जा चिन्ताता हिघाहि, हाइपालिपानु सदोम सहरको द्‍याङगेलाइ हिदोइ बुङ व्यवस्था माकेम्हि कालाउ लेदेर लुका कामगेलाइ पाहि।

⁸ लोत एमि धर्मि द्‍याङ हिघाहि, कालाउ हाइपालिपानु वा दिनाङ दुस्ट द्‍याङगेलाइ दोफाङ हिघाहि, वा तिङका कालाउ हिङका मारेम्का काथागेलाइहोइ वाको आसल ह्रदयहेङ दोखोल थुकापाहि।

⁹ प्रभु इदोइ गोताङ कामगेलाइ पाकानाङ, या होइ इदोइ तिङपाखे कि वा धर्मि द्‍याङगेलाइहेङ ओबालाइको कस्टसो जोगाइलि कालाउ न्यायको दिना थेकापा दुस्ट द्‍याङगेलाइहेङ लागातार साजाइ पिलि गिखे।

¹⁰ वा पाक्का दोङ उङको धातुवा सिक्स्यकगेलाइहेङ दन्ड प्याङ, जाइ ताइको दुस्ट, लेदेर लुका इच्छा आन्सार काम पाखे, कालाउ इम्बालाइ ह्रुता परमेस्वरको खाबाराता हिका इन्कार पाखे। इम्बालाइ जिद्दि कालाउ आहङकारि हिखे, इम्बालाइ स्वर्गता हिका महिमित प्रानिगेलाइको बारेता आपामान पालि माथिखे।

¹¹ स्वर्गदुतगेलाइहेङ बिचार पासु। इम्बालाइ धाताइका सिक्स्यकगेलाइ खान्तेङ हेन्जा सरबुङसाइका हि। कालाउ बुङ स्वर्गदुतगेलाइ आपामानजनक भाअ्सा प्रयोग मापाखे, जेलाउ इम्बालाइ इदोइ सिक्स्यकगेलाइहेङ परमेस्वरको आगाता दुसिखे।

¹² कालाउ इदोइ धाताइका सिक्स्यकगेलाइ झारभारिको गुपुसगेलाइ भाइका हि। इदोइ गपुसगेलाइ हेसा सोचिखे मागिखे कालाउ इम्बालाइहेङ खिनिङ रिम्तेङ सेअ्न्हालि उदेस्यहोइ खिनिङ बनेका हिखे। उङको द्‍याङगेलाइ जेदोङ इम्बालाइको पुङदिङता लोखे इङको पाखे, कालाउ इम्बालाइ माबुझिका काथाको बुङ आपामान पाखे। इम्बालाइ आबस्य बुङ नासातावा।

¹³ हाइपालिपानु इम्बालाइ ताइको कपटि पुर्न दामागेलाइता आनान्दित हिखे, इम्बालाइ दिनाको फाइसालामकाता आखेका सैलिता चाका-आम्कासो आनान्द प्राप्ता पाखे। इङको दाग कालाउ पेचारागेलाइ भाइका हि जाइ नेलाइहेङ नेलाइ दोफाङ उम चातेङ बुङ छलिखे।

¹⁴ इम्बालाइ ताइमि खाङका गोताङ बेजान दोफा कासिबिरि पालि भोखे। इम्बालाइ पाप पालि दाउ भोलि हेलाउ बुङ मालाखे। इम्बालाइ उङको द्‍याङगेलाइहेङ धोका पिखे, जाइ ख्रिस्टहेङ पुरा रुपहोइ खाङधुरि मापाखे कालाउ इम्बालाइहेङ पापता थोङखे। हाइपालिपानु इम्बालाइको हेन्जा काथागेलाइको बाढेका इच्छाको कारन, परमेस्वर इम्बालाइहेङ साजाइ प्याङ।

¹⁵ इम्बालाइ आसल पालि ओता पाका हि, कालाउ इम्बालाइ इङकोङ मारेम्का काम पालि सुरु पाका हि, जाइ बओरको चान बालाम हेन्जा सोमोइ लाम्फा पाका हिघाहि। वा मारेम्का काम पातेङ ताका कामाइलि मन्दा ताअ्हि।

¹⁶ कालाउ जेदोङ मारेम्का काम बालाम पाहि इङको को भाअ्सिङ परमेस्वर वासेहेङ हाकाराइहि। वाको गधा मानिमुइको भाअ्सा प्रयोग पातेङ नुइ धुइका हिघाहि कालाउ उङको परमेस्वरको बक्ता बालामहेङ मारेम्का काम पालिसो रोकिका हिघाहि।

¹⁷ इदोङ धातुवा सिक्स्कगेलाइ सेङलि दोका चिको मुहानगेलाइ भाइका दोङ हि। इम्बालाइ कुकुवा तुका कोनिङ बिना कामको हि, जाइहेङ वाइ लोलि खान्तेङ लाङखे सरबुङसाइका भेरमाहोइ उराइपातेङ चुम्पुखे। परमेस्वर इम्बालाइको भाअ्सिङ एनोङ थामे तियार पाका हि, इङको पुराङ कितिकितिका हि।

¹⁸ इम्बालाइ उङको द्‍याङगेलाइहेङ लोभ्याइपाखे जाइ भरखङ खान्धुराइ जेङका हि कालाउ दुस्ट द्‍याङगेलाइको पाका काम पालि लाअ्का हि। इम्बालाइ इम्बालाइको पापि मानिमुइ स्वभाबहोइ खाराब कामगेलाइ पालि तोङपातेङ इम्बालाइहेङ पापको लोभता फासाइपाखे।

¹⁹ धातुवा सिक्स्यकगेलाइ द्‍याङगेलाइहेङ दोअ्खे कि इम्बालाइ ताइमि गोइका जेदोङलाउ बुङ काम पालि स्वतन्तर हि, जेसाङ इम्बालाइ ताइमिङ बुङ बान्धाइति भाइका हि, हाइपालिपानु इम्बालाइको ताइकोङ पापि स्वभाबहोइ पापको काम पालि बाध्ये पाखे। जेदोङ काथाहोइ हिदोइ बुङ द्‍याङहेङ जितिखे इङकोङ काथाहोइ वासेहेङ बान्धाइति बानाइखे।

²⁰ जेलाउ द्‍याङगेलाइ येसु ख्रिस्टहेङ ताइको प्रभु कालाउ मुक्ति दाता दोअ्तेङ नाल्तेङ सुमिङको दुस्टसो खाअ्खे। कालाउ एला इम्बालाइ आरोङ मारेम्का काम पालि झ्वाइन्हाका हि कालाउ इङको मारेम्का काथागेलाइहोइ एला इम्बालाइ ख्रिस्टहेङ आसुइकार पाका इम्बालाइको न्हुसोको आबास्था खान्धुराइ जेङलि लाम्फाको खान्तेङ आझाइ झन खाराब जेङखे।

²¹ काङको दोअ्लि खाङका माने या हि कि, ख्रिस्टहेङ हेलाउ बुङ सुइकार मापाका द्‍याङगेलाइ खान्तेङ ख्रिस्टहेङ लाअ्का द्‍याङगेलाइहेङ परमेस्वर थाङका दन्ड पिखे। जेसापा इम्बालाइहेङ धर्मि जिबन बिताइलिको माने हाइ हि दोअ्तेङ हेलाउ बुङ थाहा मान्थुका नु आसल जेङधाङ। एला इम्बालाइहेङ थाहा हि कि हाइ आसल हि, कालाउ साल्न्हाका चात्यागेलाइ इम्बालाइहेङ धिर्पाका परमेस्वरको बचन इन्कार पाका हि।

²² इम्बालाइ दोफा जेदोङ जेङहि इङको न्हे उखानहोइ सत्ये हि दोअ्तेङ तिङपाखे: इम्बालाइ इङको खियागेलाइ भाइका हि जाइ ताइको ओका चालि घुरितेङ लोखे, कालाउ इम्बालाइ पायागेलाइ भाइका हि, जाइहेङ चिउपालाउ बुङ आरोङ खेचाता आल उखे।”