2 कोरिन्थि 9 - Dhimal NT

¹ यरुसेलेम सहरको खान्धुराइगेलाइको भाअ्सिङ ताकाको बिसोइता नेलाइहेङ लेखेतेङ हिलि कासेहेङ आवस्यक मान्थु।

² हाइपालिपानु का नेलाइको पिका उत्सुकता गिखा, का याको बिसोइता म्यासिडोनिया प्रदेसको खान्धुराइगेलाइको आगाता गर्ब पाकाताङ दोअ्का हिघाखा, कि आनेबारेसो आखैया प्रदेसता द्‍याङगेलाइ तियार पातेङ हि, नेलाइको जोसहोइ इम्बालाइ मध्ये हेन्जाङ जोसोहेङ तोङपाका हि।

³ एला का तितस कालाउ आरु न्हेमि ओनेगेलाइहेङ नेलाइकोता दिङगिल्दोङखा, कालाउकि नेलाइ यरुसेलेम सहरको खान्धुराइगेलाइहेङ ताका पिका बिसोइता केलाइको घमन्ड व्‍यर्थ मान्हाको। कालाउ काङको दोअ्का आन्सार नेलाइ तियार हिसु।

⁴ जेसापा म्यासिडोनिया प्रदेसता आधिमि खान्धुराइगेलाइ काङको दोफा लोहि, कालाउ नेलाइ दोफा ताका तियार हिका मानिङहि पानु केलाइ खाङधुरि योग्यता पाहासो केलाइ लेदेरयाङ, कालाउ नेलाइ बुङ झन हेन्जा लेदेरता परिस्वाना, हाइपालिपानु केलाइ नेलाइ ह्रुता बार्का भोरोसाता ताअ्का हिघान्हाहि।

⁵ ओदोङ भाअ्सिङ नेलाइ प्रतिग्या पाका आदार भाब ताकाको बन्दोबस्त लाम्फाङ सोङ मिलिपालिको भाअ्सिङ का खान्तेङ लाम्फाङ खान्धुराइ ओनेगेलाइहेङ नेलाइकोता दिङगिल्लि का आवस्यक थानिघा, ओदोङ भाअ्सिङ इदोइ ताका करकापहोइ माको, कालाउ राजिखुसिसो लिताको उद्दार मनहोइ पिका ताकाको रुपता तियार जेनाको।

उद्दार-चित्तहोइ बिलि

⁶ कालाउ काङको दोअ्लि खाङका काथा इदोइ दोङ हि, कि आतुइसा बिकालाइ आतुइसा दोङ चेकावा, कालाउ हेन्जाङ बिकालाइ हेन्जाङ चेकावा।

⁷ कालाउ झाराङ द्‍याङगेलाइ ताइको मनता भाकल पाका आन्सार प्याको, कालाउ इच्छा माजेङसिङ माको, ना ते करकापता परितेङ, हाइपालिपानु खुसिसोङ पिकाहेङ परमेस्वर प्रेम पाखे।

⁸ परमेस्वर नेलाइहेङ गोइका गोताङ खाल्को आसिस खान्तेङ हेन्जाङ पिलि द्वाङ, कालाउकि नेलाइ दोफा जेलाउ बुङ गोताङ काथा नुगामारि ह्याको, कालाउ गोताङ रेम्का कामको भाअ्सिङ नेलाइ गेनेगेल्पा पिलि दोसु।

⁹ एसापा पबित्तरो धर्मसास्तरता लेखेका हि, “परमेस्वर खाचोता परिकालाइहेङ उद्दार मनहोइ पिखे, कालाउ वाको धार्मिकता जेलाउलाउ बुङ ह्यावा।”

¹⁰ परमेस्वर जेलाउ बुङ किसानहेङ बिलिको भाअ्सिङ चालाइ कालाउ चालिको भाअ्सिङ उम प्याङ, इसिकाङ परमेस्वर नेलाइ दोफा जेलाउ बुङ नुगामारि ताका जुताइप्याङ, ओदोङ भाअ्सिङ नेलाइको उद्दार मनहोइ खाचोता परिकालाइहेङ हेन्जाङ खान्तेङ हेन्जाङ साघाइलि दोसु।

¹¹ नेलाइ गोताङ पाहासो आसिस जेङस्वाना, हाइपालिपानु नेलाइको मन उद्दारताहोइ पिलि दोका जेङसुहोइना, जेलाउ आवयस्क्ता परिकालाइहेङ केलाइको उद्दार-मनहोइ पिका दानहेङ ग्रहन पासुखेना, कालाउ उङको द्‍याङगेलाइ परमेस्वरता धन्यबाद चढाइयाङ।

¹² इदोइ सेवाको कामसो परमेस्वरको द्‍याङगेलाइको आभाब पुरा ज्यावा, इङको झोको खिनिङ माको, परमेस्वर ह्रुता हेन्जाङ धन्यबादको भावाना खुअ्तेङ लोखे।

¹³ पिका सेवाहोइ नेलाइ सत्ये हिसुना दोअ्तेङ प्रमान पालि हेन्जाङ द्‍याङगेलाइ परमेस्वरको बाखानाइ पाखे, हाइपालिपानु नेलाइ येसु ख्रिस्टको सुसमाचार सत्ये हि दोअ्तेङ खाङधुरि पासुखेना गरिब कालाउ आरु खान्धुराइगेलाइहेङ बुङ उद्दार मनहोइ पितेङ इदोङहेङ केम्सुखेना।

¹⁴ परमेस्वरको आसिम आनुग्रह नेलाइता हिदोङ हि, इम्बालाइ नेलाइहेङ लिताकोङ मनसो मायारु पाखे। ओदोङ भाअ्सिङ इम्बालाइ नेलाइको भाअ्सिङ प्रार्थाना पाखे।

¹⁵ लोसु हासु बुङ पुरा रुपहोइ ब्याख्या पालि मादोका वाको बरदानको भाअ्सिङ परमेस्वरहेङ धन्यबाद प्याइने।