2 कोरिन्थि 8 - Dhimal NT

उद्दारको भाअ्सिङ हाउसाइ

¹ खान्धुराइ ओनेगेलाइ, परमेस्वर म्यासिडोनिया प्रदेसको मन्डलिको खान्धुराइगेलाइहेङ पाका आनुग्रहको बारेता केलाइ नेलाइहेङ दोअ्लि खाङन्हाखे।

² जेलाउ इम्बालाइ हेन्जा कस्ट पाहासो जाचता परिहि, इम्बालाइ इस्तुङ आनान्द जेङहि कालाउ इम्बालाइ ओसारापाङ गरिब हिलाउ बुङ इम्बालाइ उद्दार-मनहोइ आरु खान्धुराइगेलाइहेङ साघाइलि दान पिहि।

³ हाइपालिपानु का साक्सि प्याङका, कि इम्बालाइ ताइको पिलि दोका गच्से आन्सार कालाउ पिलि दोका गच्से खाङतेङ हेन्जा बुङ ताइको राजिखुसिसो पिहि।

⁴ कालाउ इम्बालाइ यरुसेलेम सहरता हिका पबित्तरो जनगेलाइको सेवाहेङ साघाइलिको भाअ्सिङ भाग ह्रुका माउका निङन्हाहि दोअ्तेङ केलाइहेङ आनुरोध पातेङ बिन्ति पाहि।

⁵ कालाउ केलाइ सोचिका हिघान्हाहि, कि इम्बालाइ एसापा पिलि दोखे, कालाउ ओबालाइ लाम्फा ताइमिहेङ प्रभुको भाअ्सिङ कालाउ न्हुसो केलाइको भाअ्सिङ सुम्पिपिहि, जेसाङ परमेस्वर इम्बालाइसो पाका भोखे।

⁶ ओदोङ भाअ्सिङ तितस आन्चासोङ नेलाइको माझाता इदोइ दान ल्होपाका काम सुरु पानाङ इङको पुरा बुङ पाको दोअ्तेङ केलाइ तितसहेङ बिन्ति पानाहि।

⁷ कालाउ जेसाङ गोताङ काथाता नेलाइ बाढेतेङ हानेका हिसुना जेसाङ, खाङधुरिता, प्राचार माकुनु धिरपालि, ग्यानता, गोताङ जोसता कालाउ केलाइ दोफा नेलाइको प्रेमता, गरिब खान्धुराइनेलाइहेङ दान पिका कामता बुङ बाढेकाताङ हानेसु।

⁸ का इदोइ आग्याको रुपता दोअ्का माको, भरु आरुगेलाइको जोस दोफा तुलाना पातेङ नेलाइको प्रेम बुङ जातिङको हि दोअ्का प्रमानित पालि का इदोइ दोअ्का हिघा।

⁹ हाइपालिपानु केलाइको प्रभु येसु ख्रिस्टको आनुग्रह नेलाइहेङ थाहा हि, वा धनि हिघाहि, कालाउ बुङ नेलाइको भाअ्सिङ वा गरिब जेङपिहि। कालाउकि वाको गरिबसो नेलाइ धनि जेङलि दोसु।

¹⁰ हानिका बासार नेलाइ दान पिका कामता झाराङ खान्तेङ लाङ खिनिङ माको, भरु इन्सिका पाका इच्छाता बुङ झाराङ खान्तेङ लाम्फा हिघासुखेना। इदोइ बिसोइता नेलाइको भाअ्सिङ काङको उत्तम साल्लाहा इदोइ दोङ हि:

¹¹ एला नेलाइ सुरु पाका कामहेङ पुरा पासु, जेसाङ नेलाइ इदोइ कामहेङ सुरु पालि इच्छा हिका भाइपाङ इङकोहेङ पुरा पालि बुङ इच्छा हिलि गोइखे। कालाउ नेलाइ दोफा जेथे हि इङको आन्सार पिसु।

¹² हाइपालिपानु जेसापा नेलाइ आरु द्‍याङगेलाइहेङ दान पिलि भोसुखेना पानु नेलाइ दोफा हिका गच्से आन्सारको दान दोङ ग्रहन योग्य जेङखे, मान्थुका आन्सारको माको।

¹³ हाइपालिपानु बो द्‍याङगेलाइको जिबन सजिलो बानाइलि नेलाइको जिबन गाह्रो ज्याको दोअ्का का माभोखा, भरु झाराङ इदोइ बानाबोर रुपता हिलि गोइखे।

¹⁴ कालाउ एला नेलाइ दोफा नुगामारि हिनाङ इम्बालाइहेङ साघाइसु। न्हुसो जेलाउ नेलाइ खाचोता परिस्वाना, इम्बालाइ ताइको नुगामारिसो नेलाइहेङ साघाइयाङ। एसापा दोङ नेलाइ झाराङको आवस्यकता पुरा जेनावा कालाउकि झाराङ दोफा बानाबोर ज्याको।

¹⁵ जेसाङ धर्मसास्तरता लेखेका हि, “हेन्जाङ जोम्पाकालाइको हेन्जाङ मान्थुघाहि, भरु आतुइसा जोम्पाकालाइहेङ हेलाउ बुङ आभाब बुङ माजेङहि।”

तितस कोरिन्थिता

¹⁶ कालाउ का परमेस्वरहेङ धन्यबाद प्याङका, जाइ तितसको ह्रदयता नेलाइको भाअ्सिङ इङकोङ फिक्रि ताअ्पिहि, जिसिका का पाखा।

¹⁷ जेलाउ केलाइ नेलाइकोता तितसहेङ भेतिलि हाने दोअ्न्हाहि, वा एन्सा पालि लेङचाहि, भरु वा ताइमिङ मारेम्फाङ हाउसाइतेङ ताइकोङ इच्छाहोइ नेलाइकोता लोदोङखे।

¹⁸ कालाउ केलाइ नेलाइ दोफा भेनेङ खान्धुराइ ओनेहेङ दिङगिल्दोङन्हाखे, सुसमाचार घोसाना पालि गोताङ मन्डलिको खान्धुराइगेलाइता वा हेन्जा साम्मान निङका द्‍याङ हि।

¹⁹ कालाउ इदोइ झोको खिनिङ माको, कालाउ प्रभुको महिमाको भाअ्सिङ कालाउ यरुसेलेम सहरको खान्धुराइगेलाइहेङ केलाइ साघाइलि उत्सुकता हिनाहि दोअ्तेङ तिङपालि केलाइको पाका आसल कामता केलाइ दोफा भेति ल्होपालि मन्डलि पाहासो वासेहेङ साल्का हि।

²⁰ उद्दार-चित्तहोइ पिका इदोइ दान चालाइलि इङको बारेता हासु बुङ केलाइहेङ दुसियाको दोअ्तेङ केलाइ तितस दोफा उङको खान्धुराइ ओनेहेङ दिङगिल्दोङन्हाखे।

²¹ हाइपालिपानु केलाइ प्रभुको नजरता खिनिङ माको, भरु द्‍याङगेलाइको नजरता बुङ जेदोङ आदारनिय हि इङको काम पालि ताइको ध्यान प्याङ।

²² कालाउ तितस दोफा केलाइ एमि भेनेङ खान्धुराइ ओनेहेङ दिङगिल्दोङन्हाखे, जाइहेङ केलाइ हेन्जाङखे जाचितेङ हेन्जाङ काथाता पारापुरुका निङका हिनाहि, नेलाइ दोफा जेङका वाको बारका भरोसाहोइ वा आझाइ हेन्जाङ पारापुरुका जेङतेङ हि।

²³ तितस चाहि काङको दोफा झ्वाइनाका कालाउ नेलाइको सेवाता काङको साघाइका सानाइति जेङका हि, कालाउ खान्धुराइ ओनेगेलाइ चाहि मन्डलिगेलाइको दुतगेलाइ दोङ हि, कालाउ इम्बालाइको जिबन ख्रिस्टको आदारको भाअ्सिङ हि।

²⁴ ओदोङ भाअ्सिङ नेलाइ इम्बालाइहेङ ताइको प्रेम तिङपासु, कालाउकि मन्डलिगेलाइको गोताङ खान्धुराइगेलाइ इदोइ बारेता निसित जेङलि द्वाको कालाउ थाहा निङलि द्वाको कि केलाइ नेलाइको बारेता घमन्ड पालि ठिक हि।