2 कोरिन्थि 7 - Dhimal NT

¹ ओदोङ भाअ्सिङ ओइ आनाउ सानाइतिगेलाइ, केलाइ दोफा इदोइ प्रतिग्यागेलाइ हिनाङ केलाइको जिउ कालाउ आत्माहेङ आसुद्द पाका गोताङ खाल्को मारेम्का कामगेलाइ पालि लाअ्सु, कालाउ परमेस्वरको आदार पातेङ केलाइ गोताङ रुपता पबित्तरो जिबन बितिपाका कोसिस पालि गोइखे।

पावलको आनान्द

² केलाइहेङ नेलाइको पुरा ह्रदयहोइ प्रेम पासु, केलाइ हासुको बुङ मारेम्का ब्यभार पाका मान्थुन्हाहि, केलाइ हासुहेङ बुङ भ्रस्ट पाका मान्थुन्हाहि, केलाइ हिदोइ बुङ द्‍याङसो फाइदा ल्होपाका मान्थुन्हाहि।

³ नेलाइहेङ दुसिका थोहोराइलि का इदोइ दोअ्का माको, हाइपालिपानु का लाम्फाङ दोअ्पिका हिघा, केलाइ पुरा ह्रदयहोइ नेलाइहेङ इदोइ झोको प्रेम पानाखे, कि केलाइ सिलाउ बुङ बान्चिलाउ बुङ केलाइ माखेङन्हाङ।

⁴ नेलाइता काङको बार्का भरोसा हि, नेलाइ ह्रुता का हेन्जा गर्ब पाखा। का नेलाइको सान्तावानाहोइ पोङघातेङ हिघा, कालाउ केलाइको गोताङ कस्टता का ओसारापाङ आनान्द हिघा।

⁵ हाइपालिपानु केलाइ त्रोआस सहर लाअ्तेङ इता म्यासिडोनिया प्रदेसता लोतेङ न्हुसो बुङ केलाइहेङ हाइ दोङ आराम मामिलिहि, भरु गोताङ थामेगेलाइ पाहासो केलाइहेङ आपति आइ लागिका हिघाहि, द्‍यापाहाङ फेसुका, कालाउ केलाइको ह्रदय लिता चाहि थिकाङ-थिकाङ हिघाहि।

⁶ कालाउ मनता मुइतेङ हिकालाइहेङ सान्तावाना पिका परमेस्वर तितसको लोकासो केलाइहेङ सान्तावाना पिहि।

⁷ वाको लोकासो खिनिङ माको, कालाउ इङको सान्तावानाहोइ बुङ, जेदोङ सान्तावाना तितिस नेलाइसो निङका हिघाहि। कासेहेङ भेतिलि नेलाइको बार्का इच्छाको बारेता वा केलाइहेङ दोअ्पिहि। काङको भाअ्सिङ नेलाइको सोक बिसोइता कालाउ काङको दोफा नेलाइको वाङखाराका चिन्ताको बारेता बुङ वा दोअ्हि, कालाउ एसापा का झन हेन्जाङ आनान्द जेङघा।

⁸ का नेलाइहेङ इङको गम्भिर पात्तारा पिगिल्काता कासेहेङ हिदोइ बुङ भुल भाइका माजेङखे, लाङखे कासेहेङ दुखि लागिलाउ बुङ, कासेहेङ थाहा हि कि इदोइहोइ नेलाइहेङ आतुइसा सोमोइको भाअ्सिङ खिनिङ दुखि बानाइयाङ।

⁹ एला नेलाइ दुखि जेङसुन्हा दोअ्तेङ का खुसि जेङका माको, भरु नेलाइको दुख नेलाइहेङ पाप पालि लाअ्तेङ परमेस्वर भारि घुरिपाहि दोअ्तेङ हि, हाइपालिपानु इदोइ परमेस्वर ताइको द्‍याङगेलाइ पाहासो गोइका दुख हिघाहि, कालाउकि केलाइसो नेलाइहेङ हाइ दोङ हान्ति सहिलि मागोइहि।

¹⁰ हाइपालिपानु जेसापा एमि द्‍याङ परमेस्वरको इच्छा आन्सार दुख पाखे पानु, वा पाप पालि लाअ्तेङ परमेस्वर भारि घुरियावा कालाउ वासेहेङ बान्चि पावा, इदोइ एनोङ दुख लागिका काथा माको, भरु सुमिङको द्‍याङगेलाइको दुखहोइ ते आनान्त सिका भारि चुम्पुखे।

¹¹ खाङसु, इदोइ परमेस्वरको इच्छा आन्सारको दुखहोइ नेलाइता हिसिका-हिसिका बदलाब लोका हि: इसिका हाउसाहोइ पोङघातेङ उसुक्ता, कालाउ ताइमिहेङ निरदुसि बानाइलि इदोइ झोको बार्का इच्छा, आन्याय ह्रुता इसिका चेर, समस्या ह्रुता इसिका चङख, कासेहेङ भेतिलि इसिका बार्का इच्छा, सेवा प्रति इसिका हाउसा, कालाउ मारेम्का काम पाकालाइहेङ दन्ड पिलि। इसिका पातेङ नेलाइ इदोइ साबित पाका हिसुना कि गोताङ काथा रेम्फासो पालि हाइ दोङ कमि लाअ्का मान्थु सुन्हा।

¹² का इङको गम्भिर पात्तारा आन्याय पाका द्‍याङको कारनसो लेखेका माको, ना ते आन्याय परिका द्‍याङकोङ कारनहोइ दोङ, कालाउ परमेस्वरको नजरता, केलाइ ह्रुता नेलाइको हाउसा हिसिका हि, इङको नेलाइहेङ थाहा ज्याको दोअ्तेङ का लेखेघा।

¹³ ओदोङ भाअ्सिङ केलाइहेङ हाउसाइ मिलिका हि, केलाइ तितसको आनान्द तिङलाउ हेन्जाङ लेङचाका हिनाहि, हाइपालिपानु नेलाइसो वा हाउसाइहि।

¹⁴ हाइपालिपानु तितसको आगाता नेलाइको बारेता का हाइ दोङ घमन्ड पाका हिघाखा पानु, नेलाइ कासेहेङ निरास पाका मान्थु सुन्हा, भरु जेसाङ केलाइ नेलाइहेङ दोअ्का गोताङ सत्ये हिघाहि, एन्साङ दोङ तितसको आगाता केलाइको पाका घमन्ड सत्ये थोहोरिका हि।

¹⁵ कालाउ जेलाउ तितस नेलाइ आग्याकारि जेङका काथाको बारेता आरोङ सोचिखे, कि नेलाइ हेसा वासेहेङ आधिनता कालाउ बारका साम्मान दोफा स्‍वागत पाका हिघाहि, कालाउ वा नेलाइहेङ झन हेन्जा मायारु पाखे।

¹⁶ का रामाइचाखा, हाइपालिपानु नेलाइ ह्रुता काङको पुरा भरोसा हि।