2 कोरिन्थि 5 - Dhimal NT

केलाइको हिका थामे स्वर्ग

¹ हाइपालिपानु केलाइ गिनाखे, कि केलाइको जिउ इदोइ प्रिथिबिता बासा हिका साअ् भाइका हि जेलाउ केलाइ सिनाखे, केलाइको भाअ्सिङ स्वर्गता आनान्तको साअ् ह्यावा। जेदोङ चाहि परमेस्वर धाम्का हि, द्‍याङको खुरहोइ माको।

² जातिङकोङ केलाइ इदोइ जिउता हिलि गोइलाउ दुखि हिनाहि, कालाउ केलाइको स्वर्गिय साअ् कोनिङ जिउ निङलि ओसारापाङ इच्छा पानाखे।

³ हाइपालिपानु जेलाउ केलाइ इङको स्वर्गिय जिउ निनाङ, केलाइ जिउ माकोसिङ माह्याङ।

⁴ हाइपालिपानु इदोइ साअ्ता हिलाउ पिरहोइ ह्रिङका हुसि सिनाखे, हाइपालिपानु केलाइ इङको सुमिङको जिउगेलाइ लाअ्लि माचाहिनाखे भरु परमेस्वर केलाइहेङ स्वर्गिय जिउगेलाइ पिका केलाइ भोनाखे, कालाउकि सिलि तोम्का लोकोबोकोका जिउ केलाइको नावा जिउता भाङघाइन्हाङ जेदोङ जेलाउलाउको भाअ्सिङ हिखे।

⁵ एला केलाइहेङ इदोइ नावा जिउ तियार पापिका परमेस्वर दोङ हि, जाइ केलाइहेङ बाइनाको रुपता पबित्तरो आत्मा पिका हि। कालाउकि केलाइहेङ थाहा जेनाको कि केलाइ इङको गोताङ आमेने निनाङ जेदोङ परमेस्वर केलाइहेङ प्याङका दोअ्तेङ प्रतिग्या पाका हि।

⁶ ओदोङ भाअ्सिङ केलाइहेङ गोताङ भरोसा हि, कि केलाइ जेलाउ थेकापा जिउता ह्याङ, एन्सालाउ थेकापा प्रभुसो दुरे हिनाखे, जाइ स्वर्गता हिका हि।

⁷ वासेहेङ तिङतेङ माको, भरु केलाइ वाकोता खाङधुरि पातेङ बान्चियाङ।

⁸ केलाइता पुर्न भोरोसा हि, कालाउ केलाइ सिकासो इदोइ जिउसो खेङन्हालि भोनाखे कालाउ प्रभु दोफा स्वर्गको साअ्ता हिलि चाहिनाखे।

⁹ ओदोङ भाअ्सिङ चाहे केलाइ वाको दोफा स्वर्गता ह्याइने, चाहे इदोइ प्रिथिबिता ह्याइने वासेहेङ लेङचापालि दोङ केलाइको लक्स्य हिखे।

¹⁰ हाइपालिपानु केलाइ झाराङ ख्रिस्टको न्याय-आसनको आगाता जाअ्लि गोयाङ, एसापा केलाइ जिउता हिलाउ ताइमि पाका रेम्का-मारेम्का काम आन्सारको प्रतिफल निनाङ।

मिलिका सेवा

¹¹ ओदोङ भाअ्सिङ प्रभुहेङ थिका हाइ दोअ्तेङ थाहा गितेङ केलाइ द्‍याङगेलाइहेङ सत्ये खाङधुरि पालि सेउपानाखे, कालाउ केलाइ जातिङकोङ हासु हिन्हाहि दोअ्तेङ परमेस्वर गिखे, कालाउ का आस पाखा कि नेलाइको बिबेकता नेलाइ बुङ केलाइहेङ रेम्फा नाल्सुखेना।

¹² केलाइ आरोङ नेलाइको भेरपा ताइको बाखिन मापाङ, कालाउ नेलाइहेङ केलाइता गर्ब पालि माउका पितेङ ह्याङ, कालाउकि नेलाइ ओबालाइहेङ जोबाफ पिलि दोसु, जाइ द्‍याङको ह्रदयको काथाता माको भरु बाहारको काथाता घमन्ड पाखे।

¹³ जेसापा केलाइहेङ हासु बुङ पागाला दोअ्खे पानु इङको परमेस्वरको भाअ्सिङ हि, कालाउ जेसापा केलाइ पागाला मान्थु दोअ्तेङ बो द्‍याङगेलाइ दोअ्खे पानु, इङको नेलाइको भाअ्सिङ दोङ हि।

¹⁴ ख्रिस्टको मायारुहोइ केलाइहेङ बाध्ये बानाइखे, हाइपालिपानु केलाइहेङ इदोइ निसित हि, कि गोताङ द्‍याङगेलाइको भाअ्सिङ एमि द्‍याङ सिकानाङ गोताङ द्‍याङगेलाइ वाकोङ दोफा सिहि।

¹⁵ ख्रिस्ट झाराङको भाअ्सिङ सिहि, कालाउकि बान्चिका द्‍याङगेलाइ एला उसो ताइमिहेङ खुसि पालिको भाअ्सिङ बान्चिलि माको। भरु इम्बालाइ वाको भाअ्सिङ बान्चिलि गोइखे। वा इम्बालाइको भाअ्सिङ सिहि, कालाउ आरोङ परमेस्वर वासेहेङ सिन्हु पातेङ ल्होपाहि।

¹⁶ ओदोङ भाअ्सिङ एलासो हासुहेङ बुङ द्‍याङको नजरसो माखानाङ, केलाइ बुङ लाम्फा ख्रिस्टहेङ द्‍याङको नजरहोइ खाङका हिघान्हाहि, कालाउ एलासो उसो वासेहेङ इन्सिका माखानाङ।

¹⁷ ओदोङ भाअ्सिङ जेसापा हासुकोङ बुङ ख्रिस्ट दोफा सम्बन्ध हि पानु वाको दोफा नावा स्वभाव हि, खाङसु पुर्ना माअ्तेङ हानिहोइ नावा स्वभाव लोका हि।

¹⁸ इदोइ गोताङ परमेस्वरसो जेङका हि। परमेस्वर ख्रिस्टहेङ ताइमि कालाउ केलाइको माझाता मिलि पालि दिङगिल्हि, कालाउ वा केलाइहेङ ताइमि कालाउ द्‍याङगेलाइको माझाता मिलिपाका सेवा पिका हि।

¹⁹ ख्रिस्ट ताइमिङ पाका काथागेलाइ पाहासो परमेस्वर गोताङ द्‍याङगेलाइहेङ मिलिपाकाता चुमालिको भाअ्सिङ एनोङ दामा बानाइदोङघाहि, कालाउ द्‍याङगेलाइको पापको लेखि माह्रुतेङ मिलिपाकाको बारेता वाको सन्‍देस प्राचार पालि परमेस्वर केलाइहेङ सुम्पि पिका हि।

²⁰ ओदोङ भाअ्सिङ केलाइ ख्रिस्टको राजदुतगेलाइ हिनाहि, कालाउ परमेस्वर द्‍याङगेलाइहेङ केलाइ पाहासो आनुरोध पाकाताङ हि। ख्रिस्टकोङ पक्स्यता केलाइ नेलाइहेङ सेउपानाखे, कि नेलाइ परमेस्वर दोफा मिलिलि लोसु।

²¹ ख्रिस्टता पाप दोङ मान्थुघाहि, कालाउ परमेस्वर वासेहेङ पापि भाइपा ब्यभार पाहि, कालाउ बुङ केलाइ वाको नजरता धर्मि जेङलि द्वाको दोअ्तेङ ख्रिस्ट दोङ केलाइको पापको भाअ्सिङ दन्ड ह्रुपिहि।