2 कोरिन्थि 4 - Dhimal NT

भोनोइको भान्डाता धन

¹ ओदोङ भाअ्सिङ परमेस्वरको क्रिपा पाहासो केलाइ दोफा परमेस्वरको बचन प्राचार पाका सेवा हिनाङ केलाइ हारेस माचाङ।

² केलाइ लेदेर लुका कालाउ सिका-सिकापा म्होतेङ कामगेलाइ मापानाखे, केलाइ धाताइका माकुनु परमेस्वरको बचनहेङ सारफेर पाका काम बुङ मापानाखे। भरु केलाइ परमेस्वरको आगाता सत्ये खिनिङ धिरपानाखे कालाउ गोताङ द्‍याङगेलाइ परमेस्वरको साक्सि पितेङ हि कि या सत्ये हि।

³ जेसापा केलाइको प्राचार पाका सुसमाचार द्‍याङगेलाइ बुझिलि मादोहे पानु, इदोइ नासाकालाइको भाअ्सिङ म्होन्हाका हि।

⁴ कालाउ इदोइ सुमिङको दिर साइतान उङको खाङधुरि मापाकालाइको बिद्दिहेङ कान्हाँ बानाइ पिका हि, ओदोङ भाअ्सिङ इम्बालाइ ख्रिस्टको बारेता सुसमाचार कालाउ वाको महिमाको बारेता बुझिलि मादोखे, हाइपालिपानु ख्रिस्ट परमेस्वरको स्वरुप हि।

⁵ हाइपालिपानु केलाइ ताइकोङ प्राचार मापानाखे, कालाउ येसु ख्रिस्ट दोङ प्रभु हि दोअ्का काथा प्राचार पानाखे, कालाउ केलाइ चाहि येसुको भाअ्सिङ नेलाइको बान्धाइति हिनाहि।

⁶ हाइपालिपानु परमेस्वर दोअ्हि, “कितिकितिकासो फाइसालामका चिल्काताको।” कालाउ ओदोङ परमेस्वर केलाइको ह्रदयता फाइसालामकाता भाइका केलाइहेङ फोम पाहि, कालाउकि केलाइ परमेस्वरको महिमाहोइ येसु ख्रिस्टता देखाल जेङका तिङलि द्वाको।

⁷ कालाउ एला केलाइको हृदयता केलाइ दोफा जेङका इङको फाइसालामका चिल्कातेङ हि, कालाउ केलाइ चाहि इङको भोनोइको हान्डिता हिका मेनाङ जाङका धन भाइका हिनाहि, इसिका तिङपाखे कि या चाहि परमेस्वरको सरबुङसो हि, केलाइसो माको।

⁸ केलाइ झाराङ पाहासो कस्ट निन्चाका हिनाहि, कालाउ बुङ निरास जेङका मान्थुन्हाहि। कालाउ केलाइ हाइ पालि गोइका हि केलाइहेङ थाहा मान्थु, कालाउ बुङ केलाइ हार माचान्हाखे।

⁹ साताइन्हाका हिनाहि कालाउ बुङ त्यागिका मान्थुन्हाहि। दानाइ निन्चातेङ लोङका हिनाहि, कालाउ बुङ हान्ति जेङका मान्थुन्हाहि।

¹⁰ केलाइ जेलाउ बुङ येसुको भाइपा सिकाको लागातार खाताराता बान्चितेङ हिनाहि, कालाउकि द्‍याङगेलाइ येसुको जिबनहेङ केलाइको पाका कामता तिङलि द्वाको।

¹¹ हाइपालिपानु केलाइ सिन्हु पाङ हिलाउ बुङ येसुको भाअ्सिङ जेलाउ बुङ सिकाको खाताराता परिका हिनाहि, कालाउकि येसुको जिबन केलाइको सिलि तोम्का जिउता देखाल जेनाको।

¹² ओदोङ भाअ्सिङ केलाइ सिकाको खाताराता बान्चितेङ हिनाहि, कालाउ इदोइहोइ नेलाइको भाअ्सिङ आनान्त जिबन चुमाका हि।

¹³ कालाउ केलाइ प्राचार पाकाताङ ह्याङ, हाइपालिपानु केलाइ बुङ भजन लेखेका भाइकाङ खाङधुरि ताअ्का हिनाहि। भजन लेखेका द्‍याङ दोअ्का हि, “का परमेस्वरता खाङधुरि पाङका, ओदोङ भाअ्सिङ का नुइ धुइघा।”

¹⁴ हाइपालिपानु केलाइ गिनाखे, कि प्रभु येसुहेङ सिकासो सिन्हु पाका परमेस्वर केलाइहेङ बुङ येसु दोफा सिन्हु पाङ, कालाउ परमेस्वर दोङ केलाइहेङ नेलाइ दोफा वाको लोकाता चुमावा।

¹⁵ हाइपालिपानु केलाइ सहिका इदोइ गोताङ कस्टगेलाइ नेलाइको भलाइको भाअ्सिङ जेङका हि, हेन्जाङ खान्तेङ हेन्जा द्‍याङगेलाइ थाहा निङलि द्वाको कि परमेस्वर हेथे दायालु हि, एन्साङ दोङ परमेस्वरको महिमाको भाअ्सिङ हेन्जा द्‍याङगेलाइ वासेहेङ धन्यबाद चढाइयाको।

खान्धुराइगेलाइको जिबन

¹⁶ ओदोङ भाअ्सिङ केलाइ हारेस माचानाखे। केलाइको बाहारको मारेम्का जिउ नास जेङतेङ हानिलाउ बुङ केलाइको लिताको जिउ चाहि दिनाङ-दिनाङ नावा जेङतेङ हानिखे।

¹⁷ केलाइको दुखगेलाइ एला आतुइसा हि कालाउ ह्रिङका सोमोइ थेकापा माहियाङ, हाइपालिपानु इङको दुखगेलाइहोइ केलाइहेङ आनान्त महिमा पिखे, जेदोङ केलाइ कल्पाना पालि दोका खान्तेङ हेन्जा हि।

¹⁸ केलाइ तिङका काथाता माको, मातिङका काथाहेङ खाङनाखे, हाइपालिपानु तिङका काथा एघुरिङ खिनिङ हिखे, कालाउ मातिङका काथा चाहि जेलाउलाउ बुङ थेकापा हिखे।