2 कोरिन्थि 3 - Dhimal NT

¹ हाइ आरोङ केलाइ ताइकोङ बाखिन पालि लागिका हिनाहि रो? हाइ आधिमि-आधिमिहेङ गोइका कोनिङ केलाइ नेलाइहेङ माकुनु नेलाइसो बो गेलाइहेङ सिफारिस पात्तारा तिङपालि गोइखे रो?

² नेलाइ केलाइको परमेस्वरको भाअ्सिङ काङको पाका कामको सिफारिस पात्तारा भाइका दोङ हिसुना, जेदोङ केलाइको ह्रदयता लेखेका हि, जेदोङ केलाइ नेलाइको माझाता पाका आसल काम दोङ गोताङ द्‍याङगेलाइ नाल्लि कालाउ पढेलि दोखे।

³ नेलाइ दोङ तिङपासुखेना, कि नेलाइको बद्लिका जिबन ख्रिस्टको लेखेका पात्तारा भाइका हि, या पात्तारा वा केलाइको सेवाको माध्यामसो लेखेका हिघाहि। जेदोङ मसिहोइ लेखेका माको, भरु बान्चिका परमेस्वरको आत्माहोइ लेखेका हि, उन्ठुइको पाटिता माको, कालाउ द्‍याङको ह्रदयको पाटिता लेखेका हि।

⁴ ख्रिस्ट पाहासो परमेस्वरता केलाइको खाङधुरि हिका कारन केलाइ इदोइ गोताङ काथाको बारेता खाङधुरि पानाखे।

⁵ हिदोइ बुङ काम पालि दोका खुबि केलाइता हि पानु केलाइ मादोअ्न्हाखे, कालाउ परमेस्वर केलाइहेङ या खुबि पिखे।

⁶ नावा कारारको सेवकगेलाइ जेङलि वा केलाइहेङ खुबि पिहि, इदोइ चाहि पबित्तरो आत्माको कारार हि, व्यवस्थाहोइ तेअ्पाका कारार माको, हाइपालिपानु मोसा लेखेका व्यवस्था माकिलिको परिनाम सिलि दोङ, भरु पबित्तरो आत्माते आनान्त जिबन पिखे।

नावा कारारको महिमा

⁷ जेलाउ मोसाको व्यवस्था उन्ठुइको पाटिगेलाइता लेखेका हिघाहि, इङको बेला परमेस्वरको महिमा तिङहि, इस्राएल सारभिको द्‍याङगेलाइ हेन्जा सोमोइ थेकापा मोसाको ह्राइ खाङलि मादोहि, हाइपालिपानु इङको चिल्कातेङ हिघाहि जेलाउ कि इङको चिल्काका ह्रिङका सोमोइ थेकापा माहिहि, ओदोङ भाअ्सिङ जेसापा मोसाको व्यवस्थाको आधारित सेवाहोइ सिका चुमाखे, जेदोङता इन्सिका महिमा हिघाहि पानु,

⁸ कालाउ पबित्तरो आत्माको सेवाको काम आझाइ हेन्जा महिमामय जेनावा।

⁹ हाइपालिपानु दुसिका चुमाका व्यवस्था महिमामय हिघाहि पानु, द्‍याङगेलाइहेङ परमेस्वरको आगाता धर्मि बानाइका नावा कारार इस्तुङ महिमामय जेङखे।

¹⁰ हाइपालिपानु नावा कारारको तुलानाता मोसाको व्यवस्थाता एला इन्सिका महिमा मान्थु।

¹¹ हाइपालिपानु जेसापा व्यवस्थाता आले सोमोइको भाअ्सिङ महिमा लोका हिघाहि पानु जेलाउलाउको भाअ्सिङ हितेङ हिका नावा कारारता चाहि झन हेथे बार्का महिमा जेनावा।

¹² ओदोङ भाअ्सिङ केलाइको इसिका आस हिनाङ केलाइ एकदम साहासि जेङका हिनाहि।

¹³ केलाइ मोसा भाइकाङ माको, जाइ ताइको ह्राइसो राम्लि निसित जेङका महिमा इस्राएल सारभिको द्‍याङगेलाइ मातिनाको दोअ्तेङ ताइको ह्राइता नोसोइ थुम्का हिघाहि।

¹⁴ कालाउ ओबालाइको मन राङका जेङका हिघाहि, हाइपालिपानु नानिको दिना थेकापासोङ पुर्ना कारार पढेलाउ इङको नोसोइ हितेङ हिखे, जेदोङ नोसोइ ख्रिस्टता खाङधुरि पाकालाइको भाअ्सिङ खिनिङ लाअ्पाखे।

¹⁵ एइ, नानि थेकापा बुङ मोसाको व्यवस्थाको किताप पढेलाउ नेलाइको ह्रदयता नोसोइ गुका हिखे, ओदोङ भाअ्सिङ इम्बालाइ इङको गोताङ रुपसो बुझिलि मादोखे।

¹⁶ कालाउ जेलाउ हिदोइ बुङ द्‍याङगेलाइ प्रभु येसुता खाङधुरि पाखे, कालाउ खिनिङ इङको नोसोइ लाअ्पाखे।

¹⁷ एला प्रभुते आत्मा हिका हि, कालाउ जेता प्रभुको आत्मा ह्यावा इन्ता व्यवस्थासो स्वतन्तरो जेङखे।

¹⁸ केलाइ झाराङ आइना कोनिङ नोसोइ मान्थुका ह्राइगेलाइता प्रभुको महिमा तिङपान्हाखे, कालाउ केलाइ वाको भाइपाङ परिबरतन जेङन्हाखे कालाउ केलाइको महिमा झन-झन हेन्जा बाढेका महिमाता वा भाइपाङ बानाइदोङखे, इदोइ प्रभुको काम दोङ, जेदोङ पबित्तरो आत्मा हि।