2 कोरिन्थि 12 - Dhimal NT

पावलको दर्सन कालाउ इङको चुइ

¹ का गर्ब पालिङ गोयाङ, कालाउ इदोइ पाहासो हाइ दोङ फाइदा मान्थुलाउ बुङ, प्रभुसो निङका दर्सनगेलाइ कालाउ प्रकासगेलाइको काथा का पाअ्तेङ हिघा।

² ख्रिस्टता का एमि द्‍याङहेङ नाल्खा, जाइहेङ तेद्‍या बासार लाम्फा स्वर्ग थेकापा तोल्लेतेङ चुम्पुहि, इदोइ घाटाना घाटिपालाउ वा आझाइ जिउताङ हिघाहि कि मान्थुघाहि इङको का माग्याङका, कालाउ परमेस्वर चाहि पाक्का गिखे।

³ का आरोङ दोअ्खा का गिखा कि इदोइ द्‍याङहेङ स्वर्गता चुम्पुका हिघाहि। कालाउ या जातिङकोङ जेङका हि माकुनु दर्सनता जेङका हि का मागिखा, परमेस्वर दोङ गिखे।

⁴ कालाउ इन्ता दोअ्लि माएल्का काथागेलाइ वा हिङहि, जाइको बारेता चाहि आरु द्‍याङगेलाइहेङ दोअ्लि आनुमति मान्थु।

⁵ इदोइ द्‍याङको पक्स्यता का गर्ब पाङका, कालाउ ताइकोङ पक्स्यता चाहि काङको कमजोरिगेलाइ बाहेक आरु काथाता का गर्ब पालि माचाहिखा।

⁶ जेसापा का गर्ब पालि इच्छा दोङ पालाउ बुङ आनाइ भाइपा माधुइयाङका, हाइपालिपानु का सत्ये धुइतेङ ह्याङका, कालाउ द्‍याङ काङकोता तिङका कालाउ काङकोसो हिङका खान्तेङ हेन्जा हासु बुङ कासेहेङ माथ्यान्याको दोअ्तेङ का गर्ब पालिसो थामियाङका।

⁷ कालाउ परमेस्वरको तिङपाका भारभुसाइका काथागेलाइको बारेता घमन्डहोइ का हेन्जाङ माफुल्याङका दोअ्तेङ कासेहेङ साताइलि कालाउ घमण्डसो रोकिलि साइतानको दुत हेन्जाङ आपथ्यारो समस्या माकुनु एनोङ चुइ काङको जिउता पिहि।

⁸ इदोइ काङकोसो लाअ्न्हाको दोअ्तेङ का सुमखे प्रभु दोफा सेउपाघा।

⁹ कालाउ वा कासेहेङ दोअ्हि, “काङको आनुग्रह नाङको भाअ्सिङ गेनेगेल्पा जेङका हि, हाइपालिपानु काङको सरबुङ कोमजोरताबुङ सिद्द जेङखे।” ओदोङ भाअ्सिङ ख्रिस्टको सरबुङ का ह्रुता बासा ह्याको दोअ्तेङ का भरु काङको कोमजोरता हेन्जाङ लेङचातेङसाङ गर्ब पाङका।

¹⁰ ओदोङ भाअ्सिङ ख्रिस्टको भाअ्सिङ, कमजोरिगेलाइता, बादनामिगेलाइता, आपथ्यारोगेलाइता, साताइन्हाकागेलाइता, आपदगेलाइता का सन्तुस्ति ह्याङका, हाइपालिपानु जेलाउ का कमजोरि हिखा कालाउ वा कासेहेङ बल्लियाका बानाइखे।

कोरिन्थिगेलाइको भाअ्सिङ पावलको चिन्ता

¹¹ का आनाइ जेङका हिघा, नेलाइ कासेहेङ एन्सा पालि कर लागाइसुन्हा, हाइपालिपानु नेलाइसो तेका काङको बाखिन जेङलि गोइका हिघाहि। हाइपालिपानु का हाइ दोङ माकुलाउ बुङ इङको धाताइका चात्यागेलाइ खान्तेङ का कम मान्थुघा।

¹² जातिङको छाल्न्हाका चात्यागेलाइको लक्स्यनगेलाइ चाहि पुराङ ह्रुम्लि दोका चिन्हागेलाइ, भारबुसाइकागेलाइ, कालाउ सरबुङको कामगेलाइ पाहासो नेलाइको माझाता देखाल पाका हिघाहि।

¹³ एनोङ काथा का नेलाइको मन्डलिता मापाघा जेदोङ आरु मन्डलिता पाघा, इङको इदोइ हि कि का हेलाउ बुङ नेलाइको भाअ्सिङ आर्थिक रुपता ल्हिका माजेङघा, इन्सिका गोल्ति पाका हिघा पानु कासेहेङ स्यामा पासु।

¹⁴ एला सुम्तेङ नेलाइकोता लोलि का तियार हिघा, कालाउ आरोङ का नेलाइको भाअ्सिङ आर्थिक साघाइ ग्रहन मापाङका, हाइपालिपानु का नेलाइको सम्पति माको, कालाउ बुङ नेलाइहेङ दोङ भोखा। हाइपालिपानु आबा-आमाइको भाअ्सिङ चान-चामिन्दि माको, भरु चान-चामिन्दिको भाअ्सिङ कि आबा-आमाइ धन जोम्पा पिलि गोइखे।

¹⁵ का नेलाइहेङ खुसिसोङ काङको दोफा जेदोङ हि कालाउ ताइको जिबन बुङ पिलि तियार हिघा, कालाउकि नेलाइहेङ परमेस्वरको आनुसरन पालि साघाइयाङका, का नेलाइहेङ हेन्जाङ प्रेम पाङका, भरु इन्सिका लागिखे नेलाइ कासेहेङ आतुइसा प्रेम पासुखेना!

¹⁶ नेलाइ गिसुखेना कि, का नेलाइ दोफा आर्थिक साघाइ माह्रेघा, इङको ठिक हि, कालाउ आरुगेलाइ सोचिखे का चालाख पातेङ नेलाइहेङ धोका पिघा, इङको चाहि धाताइका हि।

¹⁷ का तितस माकुनु आरु हासुहेङ बुङ नेलाइ दोफा ताइको भाअ्सिङ ताका निङलि प्रयोग मापाघा।

¹⁸ का तितसहेङ हानेलि दोअ्तेङ आनुरोध पाघा, कालाउ उङको खान्धुराइ ओनेहेङ वाको दोफा दिङगिल्घा। हाइ तितस नेलाइसो हाइ दोङ आर्थिक साघाइ निङहि? माको, नेलाइ गिसुखेना कि तितस कालाउ काङको एनोङ दोङ मन कालाउ एनोङ ब्यभार हिघाहि।

¹⁹ हाइ नेलाइ इदोइ सोचितेङ हिसुना, कि एला थेकापा नेलाइको आगाता नेलाइ ताइकोङ बारेता रेम्फा सफाइ पितेङ हिसुना? आनाउ सानाइतिगेलाइ, केलाइ परमेस्वरको आगाता जेलाउ बुङ सत्येसो ख्रिस्ट पाहासो बचन प्राचार पानाखे कालाउ इदोइ गोताङ नेलाइहेङ बल्लियाका बानाइलिको भाअ्सिङ दोङ हि।

²⁰ हाइपालिपानु का लोलाउ काङको इच्छा पाका आन्सार नेलाइहेङ मानिनाङका वाला, कालाउ नेलाइ बुङ कासेहेङ ताइमि इच्छा पाका बोमजिम माभेतेस्वाना कि दोअ्का का थितेङ हिघा। सायद इन्ता फेसुका, मि तुपाका, चेरताङका, दिका, स्वार्थ, काथा भानाइका, बोमिको आखेका काथा दोअ्का, आदार मापाका कालाउ गोलमाल जेनाङ वाला।

²¹ का थिका, कि का आरोङ लोलाउ काङको परमेस्वर कासेहेङ नेलाइको आगाता थुचु पाप्यावा, कालाउ हेन्जाङ झनाको भाअ्सिङ का सोक पालि गोयाङका, जाइगेलाइ लाम्फा पाप पाका हिघाहि, कालाउ ताइमि पाका आसुद्ता, कासिबिरि, कालाउ छाडा कामसो पासताइ पाका मान्थु वाला।