2 कोरिन्थि 11 - Dhimal NT

पावल कालाउ धातुवा चात्यागेलाइ

¹ नेलाइ इम्बालाइहेङ सुइकार पासुखेना जाइ ताइको बाखिन ताइमिङ पाखे, कालाउ का आस पाखा, कि जेसापा का आतुइसा मुर्खता भाइपा काम पाखा पानु नेलाइ कासेहेङ सहिस्वाना।

² परमेस्वर नेलाइको बारेता चिन्ता पाका कोनिङ का बुङ चिन्ता पाका हिघा, का बाचा पाखा कि नेलाइको एमि खिनिङ के ख्रिस्टहेङ प्याङका, जेसाङ बिहु जेङखे कालाउ एमि आबा ताइको धानि चामिन्दिहेङ वाको के हेङ पिका भाइका हि।

³ कालाउ जेसाङ साइतान पुय्याँको रुपता ताइको चातुराइको काथासो लाङ बेबाल हब्बाहेङ धाताइहि, एन्साङ दोङ ख्रिस्ट दोफा नेलाइको धाताइका मान्थुका कालाउ ख्रिस्टको सेवासो नेलाइको बिचारगेलाइ आवाइ तुगिल्स्वाना कि दोअ्तेङ का थितेङ हिघा।

⁴ केलाइ येसुको बारेता दोअ्न्हाहि कालाउ नेलाइ केलाइको सन्देसहेङ ग्रहन पातेङ पबित्तरो आत्मा निङसुन्हा, कालाउ नेलाइ भेनेङ येसुको बारेता आधिमि द्‍याङगेलाइहेङ दोअ्लि पिसुन्हा। एला नेलाइ भेनेङ आत्मा माकुनु सुसमाचार ग्रहन पालि तियार हिसुना, जेदोङ चाहि केलाइको पिका सिक्स्या खान्तेङ भेनेङ हि। कालाउ गोल्तिहोइ नेलाइ इङको सुसमाचार ग्रहन पासुना।

⁵ जेसापा इम्बालाइ ताइमिहेङ गोताङ छाल्न्हाका चात्यागेलाइ खान्तेङ माहान जेङका भाइपा काम पाखे पानु, का बुङ इम्बालाइ कोनिङ ताइमिहेङ खिनिङ रेम्का सोचिखा।

⁶ का एकदम सिल्लि बक्ता माकोलाउ बुङ काङकोता ख्रिस्टको कालाउ सुसमाचारको बारेता ग्यान हि, काङको धिरपाका ग्यान जेसालाउ बुङ नेलाइहेङ तिङपाका हि।

⁷ ताइमिहेङ म्हुइका पातेङ नेलाइहेङ बार्का बानाइलि दोअ्तेङ परमेस्वरको सुसमाचार का नेलाइहेङ एन्साङ प्राचार पाकाता हाइ का पाप पाघा रो?

⁸ का आरु मन्डलिगेलाइसो निङका साघाइकाहोइ नेलाइको सेवा पादोङखा, नेलाइ एन्सा पालि गलत मादोअ्सु।

⁹ नेलाइ दोफा हिलाउ जेलाउ कासेहेङ ताकाको समस्या परिका हिघाहि कालाउ बुङ का हासु बुङ ह्रुता ल्हिका माजेङघा, हाइपालिपानु म्यासिडोनिया प्रदेससो लोका खान्धुराइ ओनेगेलाइ काङको मान्थुकाता पुरा पापिहि। ओदोङ भाअ्सिङ हिदोइ बुङ किसिमको नेलाइ ह्रुता भार जेनाङबे दोअ्तेङ का ताइमिहेङ रोकिघा, कालाउ आरोङ न्हुसो लोका दिनागेलाइता बुङ रोकियाङका।

¹⁰ का पाक्का हिघा कि ख्रिस्टको सत्येता काङको दोफा हि, कालाउ आखैया प्रदेसको मौजागेलाइता हासुको बुङ का ताका चुम्पुका मान्थुघा, इदोइ काङको घमन्डहेङ हासु बुङ रोकिलि माद्वाङ।

¹¹ हाइ पालि का नेलाइको ताका माचुम्पुघा? हाइ का नेलाइहेङ माया मापानाङ एसा पाघा रो? परमेस्वर गिखे कि का नेलाइहेङ हेथे मायारु पाखा।

¹² का नेलाइ दोफा साघाइ ह्रुलि मादाङका कालाउकि का इम्बालाइहेङ रोकिलि द्वाको जेदोङ केलाइ परमेस्वरको काम पाका भाइकाङ केलाइ बुङ पानाखे दोअ्तेङ घमन्ड पाका मौका भोखे।

¹³ हाइपालिपानु इन्सिका द्‍याङगेलाइ जातिङको छाल्न्हाका चात्यागेलाइ माको कालाउ छलिका काम पाकालाइ दोङ, कालाउ ख्रिस्टको छाल्न्हाका चात्यागेलाइको भेस गुअ्तेङ हिगिल्कागेलाइ खिनिङ हि।

¹⁴ कालाउ इङको हिदोइ बुङ भारभुसाइका काथा माको, हाइपालिपानु साइतान बुङ महिमित स्वर्गदुतको भेस भाङगाइतेङ धोका पिखे।

¹⁵ ओदोङ भाअ्सिङ इदोइ हिदोइ बुङ भारभुसाइका काथा माको, कि वाको बान्धाइतिगेलाइ बुङ धार्मिकताको बान्धाइतिगेलाइको भेस ताइको भेस भाङगाइखे। इम्बालाइको आन्तय इम्बालाइको काम आन्सारको जेनावा।

पावलको कस्टगेलाइ

¹⁶ का आरोङ दोअ्ताङका, हिदोइ बुङ द्‍याङ कासेहेङ आनाइ दोअ्तेङ मासोच्याको, कालाउ नेलाइ इन्सिका सम्झिसुखेना पानु बुङ आनाइ भाइपा भाइपाङ कासेहेङ ग्रहन पासु, कालाउकि का बुङ हाइ दोङ घमन्ड पालि द्वाको।

¹⁷ जेसाङ येसु कासेहेङ नुइ धुइका चाहिखे, का एन्साङ पातेङ नुइ धुइका मान्थुघा कालाउ मुर्ख भाइपा धुइतेङ हिघा।

¹⁸ हेन्जाङ इदोइ सुमिङको द्‍याङगेलाइ भाइपा, कालाउ सासु बुङ हिदोइ बुङ काथाको घमन्ड पाखे पानु, का बुङ इङको काथागेलाइता घमन्ड पाङका।

¹⁹ नेलाइ ताइमिङ इदोइ झोको बुद्दिमान जेङका हिसुना, कि लेङचातेङ आनाइगेलाइहेङ सहिपिसुखेना।

²⁰ हाइपालिपानु जेसापा हिदोइ बुङ द्‍याङ नेलाइहेङ बान्धाइति बानाइखे, माकुनु नेलाइहेङ धोका पिखे, माकुनु नेलाइको हिका गोताङ आमेने लुतिखे, माकुनु नेलाइसो फाइदा ल्होपाखे, माकुनु धोका पिखे, माकुनु नेलाइको ह्राइताङ चाउरेखे पानु बुङ नेलाइ खान्तेङ ह्रुता ताइमिहेङ ताअ्खे कालाउ इम्बालाइ सोचिखे कि नेलाइ इम्बालाइहेङ सहिसुखेना कालाउ नेलाइ खान्तेङ केलाइ आसाल हिनाहि।

²¹ हाइ नेलाइ सोचिसुखेना कि इन्सिका मापाकानाङ का लेदेरका हिघा? कालाउ हासु बुङ हिदोइ बुङ काथाता घमन्ड पाहे पानु, का बुङ इङको काथाता घमन्ड पाङका, एइ का बुङ आनाइ कोनिङ नुइ धुइखा।

²² हाइ इम्बालाइ हिब्रुगेलाइ दोङ हि, का बुङ हिब्रु दोङ हिघा, इम्बालाइ इस्राएललिगेलाइ दोङ हि, का बुङ हिघा, हाइ इम्बालाइ आब्राहामको सान्तानगेलाइ दोङ हि? का बुङ हिघा।

²³ हाइ इम्बालाइ ख्रिस्टको सेवकगेलाइ दोङ हि? का बुङ झन आसल सेवक हिघा, का पागाला भाइपाङ नुइ धुइतेङ हिघा, का इम्बालाइ खान्तेङ हेन्जाङ परिस्रोम पाघा इम्बालाइ खान्तेङ कासेहेङ हेन्जाङखे झ्यालखानाता ताअ्हि, कासेहेङ गान्दिलि मादोपाङ द्वालिहोइ म्हेहि, एसापा काङको प्रान घुरि-घुरि सङकटता परिहि।

²⁴ नाखे का यहुदि सासकगेलाइको खुरसो एकम न्हे कुरि द्वालिहोइ म्हेनाघा।

²⁵ सुमखे कासेहेङ लाठिहोइ दानाइहि, एखे उन्ठुइहोइ तोहि, सुमखे का धोल्का जाहाज भापाहि। ए दिना नितिम कालाउ ए दिना न्हिसिन थेकापा का समुन्द्रताङ हिघा,

²⁶ काङको बाराम्बारको पाक पाकाता झोरागेलाइको जोखिमता परेघा, डाकागेलाइको जोखिमता, ताइकोङ जातिको जोखिमता, कालाउ गैर-यहुदिगेलाइको जोखिमता, सहरको जोखिमता, चाका-मान्दाको जोखिमता, समुन्द्रको जोखिमता, धाताइका खान्धुराइगेलाइको जोखिमता।

²⁷ हेन्जा परिस्रोम पाघा कालाउ कस्ट सहिघा, हेथे-हेथे न्हिसिन्ता माजिम्सिङ हिघा, म्हितुपाङ कालाउ चि आम्लि किलाउ, बारम्बार लालाइलाउ, चुङकाता आतुइसा लोखोन धाबाता हिलि गोइघा।

²⁸ कालाउ भेनेङ काथागेलाइ बाहेक गोताङ मन्डलिगेलाइको चिन्ता फिक्रि काङकोता हि।

²⁹ जेलाउ हासु बुङ कमजोर हि, कालाउ का बुङ कमजोर महसुस पाखा, जेलाउ हासु बुङ पापता थोङन्हाखे पानु कालाउ का बुङ हेन्जा दुखि जेनाङका।

³⁰ का गर्ब पालि दोङ गोइका नु, का ताइको कमजोर तिङपाका काथागेलाइता गर्ब पाङका।

³¹ परमेस्वर, केलाइको प्रभु येसुको आबा हि, जाइ जेलाउलाउको बुङ धन्यको हि, वा गिखे, कि का माधाताइखा।

³² दमस्कस सहरता आरतिस राजाको हाकिम कासेहेङ रिम्लि सहरको फिनुता पाले ताअ्का हिघाहि।

³³ कालाउ बेरेमको एनोङ खुल्ला थामेसो डालोता ह्वातेङ कासेहेङ लेता खुअ्पानाङ का हाकिमको खुरसो खाअ्घा।