2 कोरिन्थि 1 - Dhimal NT

¹ का, पावल केलाइको खान्धुराइ ओने तिमोथि दोफाङ इदोइ पात्तारा लेखेदोङखा, का परमेस्वरको इच्छा पाहासो येसु ख्रिस्टको छाल्न्हाका चात्या हिघा, का इदोइ पात्तारा कोरिन्थि सहरता हिका परमेस्वरको मन्डलिहेङ, कालाउ गोताङ आखैया प्रदेसता हिका झाराङ पबित्तरो जनगेलाइहेङ लेखेदोङखा।

² परमेस्वर केलाइको आबा कालाउ प्रभु येसु ख्रिस्टसो नेलाइहेङ आनुग्रह कालाउ सान्ति।

परमेस्वरसो सान्त्वाना

³ केलाइको प्रभु येसु ख्रिस्टको आबा परमेस्वरहेङ बाखानाइ ज्याको, जाइ करुनामय आबा, कालाउ केलाइहेङ जेलाउ बुङ सान्तावाना पिका परमेस्वर हि।

⁴ परमेस्वर केलाइको गोताङ खाल्को दुखता सान्तावाना पिखे, कालाउकि केलाइ आरुहेङ सान्तावाना पिलि द्वाको। परमेस्वर केलाइहेङ इङको सान्तावाना पिका कोनिङ, जेसाङ केलाइ बुङ आरुगेलाइहेङ सान्तावाना पिलि द्वाङ।

⁵ हाइपालिपानु जेसाङ ख्रिस्ट कस्ट भोगिहि एसा पासोङ केलाइ बुङ कस्ट भोगिलि गोइखे, कालाउ परमेस्वर ख्रिस्ट पाहासो केलाइहेङ सान्तावाना प्याङ।

⁶ केलाइ दुख निङन्हाहि पानु या नेलाइको सान्तावाना कालाउ मुक्तिको भाअ्सिङ हि, केलाइ सान्तावाना निङलाउ बुङ इङको नेलाइको सान्तावानाको भाअ्सिङ हि, केलाइ भोगिका इङकोङ दुखगेलाइ नेलाइ धर्य दोफाङ सहिलि गोइलाउ नेलाइ बुङ सान्तावानाको आनुभब पास्वाना।

⁷ नेलाइको भाअ्सिङ केलाइको आस बल्लियाका हि, हाइपालिपानु केलाइ गिनाखे कि, जेसाङ नेलाइ केलाइको दुखता झ्वाइनाका हिसुना। एन्साङ दोङ केलाइको सान्तावानाता बुङ नेलाइ जोम्स्वाना।

⁸ खान्धुराइ ओनेगेलाइ, केलाइ एसिया प्रदेसता भोगिका दुखको बिसोइता नेलाइहेङ थाहा जेनाको दोअ्तेङ का इच्छा पाखा। हाइपालिपानु केलाइ ओसारापा हेन्जा ल्हिकाहोइ दुबिका हिघान्हाहि, कि इङको ल्हिका केलाइको सहिलि मादोका सरबुङ खाङतेङ बुङ बाहार हिघाहि, इता थेकापा कि केलाइ बान्चियाङ दोका गोताङ आस बुङ लाअ्का हिघान्हाहि।

⁹ केलाइ पाक्का दोङ सेअ्न्हाङ ला दोअ्का केलाइहेङ लागिका हिघाहि। केलाइ ताइमिङ ह्रुता माको, कालाउ सिकालाइहेङ सिन्चाल पाका परमेस्वर ह्रुता भर परिलि द्वाइने दोअ्तेङ इन्सिका जेङका रोइसो।

¹⁰ वा दोङ केलाइहेङ सिकासो थिलि गोइका जोखिमसो लाअ्पाहि, कालाउ वा दोङ केलाइहेङ बान्चिपाङ, हाइपालिपानु वाको ह्रुता दोङ केलाइ केलाइको भोरोसा ताअ्का हिनाहि, कि वा केलाइहेङ आरोङ बुङ बान्चिपाङ।

¹¹ कालाउ नेलाइ बुङ मिलितेङ प्रार्थाना पाहासो केलाइहेङ साघाइ दोङ सुखेना एसापा प्रार्थाना पालाउ केलाइको भाअ्सिङ चढाइका हेन्जाङ द्‍याङगेलाइको प्रार्थानागेलाइको उत्तरता केलाइहेङ प्राप्ता जेङका आनुग्रहको भाअ्सिङ परमेस्वरहेङ केलाइको भाअ्सिङ धन्यबाद चढाइन्हाखे।

पावलको योजाना फेरिका

¹² हाइपालिपानु केलाइ गर्ब पानाखे कि केलाइको बिबेक झालाफालापा हि, सुमिङता कालाउ बिसेस पातेङ नेलाइ दोफाको केलाइको सम्बन्ध नेलाइ दोफा कालाउ सुमिङको द्‍याङगेलाइ दोफा पबित्तरो कालाउ सत्ये हि, जेदोङ चाहि परमेस्वरसो लोखे, इदोइ चाहि मानिमुइ बुद्दिहोइ माको, भरु परमेस्वरको आनुग्रह पाहासो हि।

¹³ केलाइ नेलाइहेङ पढेतेङ बुझिका काथागेलाइ खिनिङ लेख्याङ,

¹⁴ कालाउ नेलाइ एला केलाइहेङ आतुइसा खिनिङ बुझिका हिसुना, कालाउ का आस पाखा कि केलाइको प्रभु येसु ख्रिस्ट घुरितेङ लोलाउ नेलाइ बुङ केलाइहेङ पुर्न रुपसो बुझिस्वाना, कालाउ केलाइ नेलाइको बारेता घमन्ड पाका कोनिङ नेलाइ बुङ केलाइको बारेता घमन्ड पालि दोअ्स्वाना।

¹⁵ केलाइ नेलाइकोता लाम्फा दोङ भेतिलि लोलि इच्छा पाका काथा नेलाइ बुझिका हिसुना दोअ्का काथाता का निसित जेङनाङ, का नेलाइहेङ भेतिलि भोघाखा, कालाउकि नेलाइहेङ न्हेखे भेतिलि लोकाता नेलाइहेङ आसिस जेङलि द्वाको।

¹⁶ काङको योजाना इदोइ हिघाहि कि का म्यासिडोनिया प्रदेसता हानिलाउ नेलाइहेङ भेतितेङ हानाङका कालाउ धुरिलाउ बुङ नेलाइहेङ भेतियाङका, इन्तासो यहुदि जिल्लाता हानिलाउ खाचोता नेलाइ कासेहेङ साघाइसु।

¹⁷ एसा पालि भोलाउ का आस्‍थिरता तिङपाघा रो? हाइ का ताइको योजाना बानाइलाउ सुमिङको द्‍याङगेलाइ भाइपा “एइ” कालाउ न्हुसो “माको” दोअ्ताङका रो?

¹⁸ परमेस्वर खाङधुरि योग्य हिका कोनिङ केलाइ “नेलाइहेङ दोअ्का काथा जेलाउ बुङ सत्ये हि।”

¹⁹ हाइपालिपानु सिलास, तिमोथि कालाउ का नेलाइको माझाता प्राचार पाका परमेस्वरको चान येसु ख्रिस्ट धातुवा मान्थुघाहि, भरु वाकोता जेलाउ बुङ सत्ये खिनिङ हि।

²⁰ हाइपालिपानु परमेस्वरको गोताङ प्रतिग्यागेलाइ ख्रिस्टता पुरा जेङखे। ओदोङ भाअ्सिङ परमेस्वरको महिमाको भाअ्सिङ केलाइ ख्रिस्ट पाहासो “आमेन” दोअ्नाखे।

²¹ परमेस्वर केलाइहेङ नेलाइ दोफा ख्रिस्टता बल्लियाका बानाइका हि, कालाउ केलाइहेङ ताइको भाअ्सिङ खेङका हि।

²² कालाउ वा केलाइ ह्रुता ताइको लाहासाप लागाइका हि, कालाउ केलाइको ह्रदयता लाङ बाइनाको रुपता पबित्तरो आत्मा पिका हि।

²³ परमेस्वर काङको इदोइ सत्ये काथाको साक्सि हि, कि का आरोङ धुरितेङ कोरिन्थि सहरता मालोघा, हाइपालिपानु का नेलाइहेङ हाकाराइलि माभोघाखा।

²⁴ नेलाइको खाङधुरि ह्रुता केलाइ खाबारा जामाइलि माचाहिनाखे, भरु नेलाइको आनान्दको भाअ्सिङ नेलाइ दोफा मिलितेङ काम पाङ। हाइपालिपानु नेलाइ ताइको खाङधुरिता सिकापा हिसुखेना।