1तिमोथि 6 - Dhimal NT

¹ हिदोइ बुङ खान्धुराइ बान्धाइति हि पानु, वा गोताङ काथाता ताइको गिह्रिको आदार पाको कालाउकि हिदोइ बुङ द्‍याङ परमेस्वरको मिङ कालाउ केलाइको धिरपाका सिक्स्याको निन्दा मापाको।

² जाइको गिह्रि खान्धुराइ हि, वाको बान्धाइतिगेलाइ वासेहेङ ख्रिस्टता खान्धुराइ ओने हिनाङ वासेहेङ आदार पाको। भरु इम्बालाइ ओबालाइको भाअ्सिङ हेन्जा रेम्का काम पाको, हाइपालिपानु इम्बालाइको गिह्रि बुङ बान्धाइति खान्धुराइ हिनाङ वा ताइको बान्धाइतिहेङ ओनेगेलाइ भाइपाङ मायारु पाखे। इदोइ आग्यागेलाइ केम्लि आरु द्‍याङगेलाइहेङ धिरपासु।

ताकाको लोभ

³ जेसापा हासु बुङ धाताइका सिक्स्यागेलाइ धिरपाखे पानु, केलाइको प्रभु येसु ख्रिस्टको सत्ये सिक्स्या कालाउ परमेस्वरहेङ भक्ति पाका सिक्स्या दोफा सहमत माजेङखे।

⁴ उङको द्‍याङ घमन्डहोइ फुलिका हिखे, कालाउ वा हाइ दोङ बुङ बुझिका चाहि मान्थुखे। इन्सिका द्‍याङगेलाइ बेकारको काथागेलाइ कालाउ नाना थरिको सब्दगेलाइको बारेता काथा पोसुखे कालाउ चेरसुलि भोतेङ हिखे। इदोइ काथागेलाइसो डाहा, कलह, बाद्नामि कालाउ मारेम्का साङकागेलाइ उब्जाइपाखे।

⁵ कालाउ इसिका द्‍याङगेलाइको बिबेक साङकाहोइ पोङघाका हिखे, कालाउ आरु दोफा काथा पोसुखे। कालाउ इम्बालाइ सत्ये हाइ हि रो दोअ्तेङ बुझिलि मादोअ्खे, इम्बालाइ सोचिखे, कि परमेस्वरको बारेता धिरपाका एनोङ ताका कामाइका तरिका हि।

⁶ कालाउ केलाइ परमेस्वरहेङ खुसि पाका काम कालाउ वा दोङ केलाइहेङ पिका काथागेलाइता सन्तोक हिलि आसल हि।

⁷ हाइपालिपानु केलाइ इदोइ सुमिङता जोलोमलाउ ना ते हाइ दोङ चुमान्हाहि, ना ते इतासो सितेङ हानिलाउ हाइ दोङ चुम्पुलि दोङ द्वाङ।

⁸ कालाउ चाअ्का-आम्का कालाउ होङका थेकापा हिहे पानु केलाइ इङकोताङ सन्तोक हिलि गोइखे।

⁹ कालाउ धनि जेङलि इच्छा पाका द्‍याङगेलाइ परिक्स्याता परिखे, कालाउ गुपुस लाअ्साता देका भाइपाङ इम्बालाइ लाअ्साता देखे। कालाउ इम्बालाइ इसिका काम पालि भोखे जेदोङ आनाइ कालाउ खतारानाक जेङखे कालाउ इसिका मारेम्का इच्साहोइ वासेहेङ नासाका थामेता थुका पापुखे।

¹⁰ हाइपालिपानु धनसम्पतिको लोभ दोङ गोताङ किसिमको मारेम्का कामको जारि दोङ हि। हेथेते द्‍याङ ताका कामाइका लोभता लागितेङ खाङधुरि पालि लाअ्का हि कालाउ हेन्जा दुख पिडाता परिका हि।

तिमोथिहेङ पावलको आम्तिम आदेस

¹¹ कालाउ तिमोथि नाअ् परमेस्वरको जन इदोइ गोताङ मारेम्का काथागेलाइसो फारापा हिसु, कालाउ आसल कामता, भक्तिता, खाङधुरिता, प्रेम धर्यता कालाउ मोनोइ जेङका काथाता ताइको मन लागाइ।

¹² परमेस्वरता खाङधुरि पालि मालाअ्सु कालाउ वाको आग्या केम्सु जेसाङ एमि आसल आर्मि धुम पालि हार मामानिखे। कालाउ इङको आनान्त जिबनहेङ चातेङ ताअ्सु, हाइपालिपानु याकोङ भाअ्सिङ परमेस्वर नासेहेङ काइका हि। कालाउ नाअ् बुङ हेन्जा द्‍याङगेलाइको आगाता नाङको खाङधुरिको रेम्का साक्सि पिका हिघाखेना।

¹³ का झाराङहेङ जिबन पिका परमेस्वर कालाउ पन्तियास पिलातसको आगाता साक्सि पिका येसु ख्रिस्टको आगाता का नासेहेङ आग्या प्याङका।

¹⁴ का नासेहेङ या आदेस पिदोङखा, कि प्रभु येसु ख्रिस्ट आरोङ मालोपा धाउ नाअ् परमेस्वरसो निङका आग्याहेङ रेम्फा माने कालाउकि हासु बुङ नासेहेङ दुसिलि मानिनाको।

¹⁵ आरोङ परमेस्वर ख्रिस्टहेङ ठिक सोमोइता दिङगिल्लाङ। जेदोङ परमेस्वर बाखानाइ योग्य हि, थुमा प्रभुगेलाइको प्रभु कालाउ राजागेलाइको राजा हि।

¹⁶ वा खिनिङ एमि हि जाइ जेलाउ बुङ बान्चिका हि, कालाउ वा ओथे फाइसालामकाता हि कि, हासु बुङ वाको भेरपा हानिलि मादोखे। वासेहेङ हिदोइ बुङ द्‍याङ हेलाउ बुङ तिङका मान्थु ना ते तिङलि दोखे। वासेहेङ दोङ आदार कालाउ सरबुङ जेलाउलाउ बुङ ह्याको। आमेन।

¹⁷ इदोइ सुमिङको धनिगेलाइहेङ घमन्ड माजेङलि आदेस पिसु, कालाउ इम्बालाइ ताइको आसथाइ सम्पतिता भोरोसा माताताको, कालाउ केलाइको सुखको भाअ्सिङ गेनेगेल्पा पिका परमेस्वर ह्रुता इम्बालाइ आस पाको, कालाउकि केलाइ आनान्द पालि द्वाको

¹⁸ कालाउ इम्बालाइहेङ आसल काम पासु दोअ्सु, कालाउ हेन्जा रेम्का कामगेलाइ पाको, कालाउ आवस्यक परिकालाइहेङ खुल्ला मनहोइ साघाइलि तियार जेङसु दोसु।

¹⁹ एसा पातेङ इम्बालाइ स्वर्गता ताइको भबिस्यको भाअ्सिङ रेम्का कामगेलाइ खाजाना भाइपा जोम्पावा, जेदोङ इम्बालाइको भाअ्सिङ भबिस्यता बल्लियाका जोग भाइका जेनावा, कालाउकि इम्बालाइ पाक्का ह्याको इम्बालाइ जेलाउ बुङ सत्ये जिबन निनावा।

²⁰ तिमोथि, परमेस्वर नासेहेङ जेदोङ सुम्पिका हि, इङको रेम्फासो पाअ्‌। कालाउ हेथेते द्‍याङगेलाइ सुमिङको ब्यर्थको काथा जाइहेङ इम्बालाइ “ग्यान” दोअ्खे, इन्सिका धाताइका काथागेलाइसो फारापा हिसु।

²¹ या धाताइका ग्यानहेङ पिताइतेङ हेथे द्‍याङगेलाइ ख्रिस्ट ह्रुता खाङधुरि पालि लाअ्का हि। का प्रार्थाना पाखा कि परमेस्वरको आनुग्रह नेलाइ झाराङ दोफा ह्याको।