1तिमोथि 5 - Dhimal NT

मन्डलिको खान्धुराइगेलाइ दोफा सम्बन्ध

¹ ताइमि खान्तेङ बार्का उमेरको वाबालाइहेङ मानाइ, कालाउ वासेहेङ आबाहेङ भाइपाङ आदार पातेङ सम्झाइ। ताइमि खान्तेङ म्हुइकालाइ दोफा ताइको खान्धुराइ ओने भाइपा ब्यभाहार पाअ्‌।

² ताइमि खान्तेङ बार्का उमेरको बेबालाइहेङ ताइको आमाइ भाइपाङ कालाउ ताइमि खान्तेङ म्हुइका बेजान ओने दोफा चाहि सुद्द मनहोइ ताइकोङ बेजान ओने भाइपाङ ब्यभाहार पासु।

के सिकालाइहेङ साघाइ

³ जाइ जातिङको के सिका बेबाल हि, कालाउ वासेहेङ सामाराइका हासु बुङ मान्थुनु इम्बालाइहेङ आदार सोङ साघाइसु।

⁴ हिदोइ बुङ के सिका बेबालको चान-चामिन्दि वा चुगेलाइ हिहे पानु, इम्बालाइ लाम्फाङ ताइकोङ जाहानहेङ खाअ्नाको कालाउ परमेस्वरहेङ ताइको भक्ति तिङपाको। कालाउ इम्बालाइ ताइको आमाइ-आबाहेङ पोसिलि द्वाको जेसाङ ओबालाइ पाहि। हाइपालिपानु या परमेस्वरको नजरता हेन्जाङ आसल हि।

⁵ कालाउ जाइ जातिङको के सिका बेबाल हि, कालाउ वाको हासु बुङ मान्थुनु, कालाउ वा ताइको भोरोसा परमेस्वरता खिनिङ ताअ्खे, कालाउ झेङपाङ-लिपाङ परमेस्वर दोफा ताइमिहेङ साघाइलिको भाअ्सिङ प्रार्थाना पाखे।

⁶ कालाउ जेसापा के सिका बेबाल सुख बिलासता हिखे पानुते वा सिन्हु पाङ आत्माता सिका हि।

⁷ खान्धुराइगेलाइहेङ इदोइ काथाको साल्लाहा पिसु, कालाउकि हासु बुङ इम्बालाइहेङ दुसिलि माद्वाको।

⁸ जेसापा हासु बुङ ताइकोगेलाइको कालाउ बिसेस पातेङ ताइकोङ जाहानहेङ रेम्फा मापोसिनु वा येसु ख्रिस्टहेङ खाङधुरि मापाखे, कालाउ खाङधुरि मापाकालाइ खान्तेङ बुङ खाराब हिखे।

⁹ सुम कुरि बासार ह्रुताको के सिका बेबाल, जाइको एखे खेनिङ बिहु जेङका हिघाखे, कालाउ ताइको के दोफा खाङधुरि योग्य हिघाहि वासेहेङ खिनिङ के सिका बेबालको सुचिता ताअ्सु।

¹⁰ गोताङ वा आसल काम पाका, चान-चामिन्दिगेलाइहेङ रेम्फा पोसेका, बान्सालाइहेङ ताइको साअ्ता सेवा सात्कार पाका, प्रभुको दासगेलाइको सेवा पाका, दुख परिकालाइहेङ साघाइका, कालाउ इसिकाङ ताइको जिबनता आसल काम पाका हिलि गोइखे।

¹¹ कालाउ म्हुइका उमेरको के सिकालाइको मिङ चाहि के सिका बेबालको सुचिता मालेखेसु, हाइपालिपानु जेलाउ इम्बालाइको जिउको इच्छा ख्रिस्टको सेवा पाका इच्छा खान्तेङ हेन्जा हिखे, इम्बालाइ ख्रिस्टको कामहेङ लाअ्तेङ आरोङ बिहु पालि इच्छा पाखे।

¹² आरोङ बिहु पातेङ इम्बालाइ ताइमिङ न्यायता परियावा हाइपालिपानु इम्बालाइ ताइको लाङ भाकल पुरा पाका मान्थु।

¹³ इङको बाहेक इम्बालाइ कुरिया जेङतेङ साअ्-साअ्ता घुराइगिल्का जेङखे, कालाउ कुरिया खिनिङ माको, भरु आरुको काथा पोका, बोमिको कामता बिथ्थाता दख्ल पिका, धुइलि मासोबाइका काथागेलाइ धुइखे।

¹⁴ ओदोङ भाअ्सिङ का साल्लाहा पिखा, कि म्हुइका उमेरको के सिकालाइ बिहु पाको, चान-चामिन्दिगेलाइ जोलोम पाको, ताइको साअ् सामाराइयाको, कालाउ बिरोधिगेलाइ इम्बालाइको बादनाम पाका मौका मानिनाङ।

¹⁵ का या दोअ्दोङखा, हाइपालिपानु आधिमि के सिकालाइ परमेस्वरको आग्या केम्लि लाअ्तेङ साइतान जेदोङ पालि भोखे इम्बालाइ इन्सिकाङ पातेङ हि।

¹⁶ जेसापा हिदोइ बुङ खान्धुराइ बेबालको जाहानता के सिका हि पानु वा इम्बालाइहेङ साघाइयाको। कालाउ वा खान्धुराइगेलाइहेङ कालाउ के सिकालाइहेङ साघाइयाङ कि दोअ्तेङ आस मापाको। कालाउकि मन्डलिको खान्धुराइगेलाइ आरु के सिकालाइहेङ साघाइयाको जाइहेङ साघाइका हासु बुङ मान्थु।

बचन धिरपाकालाइहेङ आदार

¹⁷ मन्डलि रेम्फासो सामाराइलि दोका आगुवागेलाइ दोब्बल आदार हिलि गोइखे, बिसेस पातेङ जाइ परमेस्वरको बचनको प्राचार कालाउ धिरपालि परिस्रोम पाखे।

¹⁸ हाइपालिपानु धर्मसास्तरता लेखेका हि, “दाउनि पाका पियाको नुइता मुखाउरि माटुसु” कालाउ आरोङ भेनेङ थामेता धर्मसास्तर एसापा बुङ लेखेका हि, “काम पाका द्‍याङगेलाइहेङ ताइको ज्याला निङका खाबारा हि।”

¹⁹ जेलाउ थेकापा न्हेमि माकुनु सुमि साक्सि एनोङ दोङ काथाता मन्डलिको आगुवाको बिरोधता आरोप मालागाइखे एन्सालाउ थेकापा इम्बालाइको काथा हिङतेङ माहाङ।

²⁰ जाइ मन्डलिको आगुवागेलाइ पाप पातेङ हिखे इम्बालाइहेङ खान्धुराइगेलाइको आगाता हाप्काइ, कालाउकि बो मन्डलिको आगुवागेलाइ बुङ थियाको।

²¹ परमेस्वर कालाउ ख्रिस्ट येसुको आगाता कालाउ साल्का स्वर्गदुतगेलाइको आगाता का नेलाइहेङ थाङका आदेस पिखा, हिदोइ बुङ काथाता भेदभाव माकुनु लेता-ह्रुता मापासिङ इदोइ नियमगेलाइ नाअ् माने।

²² हासुहेङ बुङ ताइको खुर ताअ्तेङ मन्डलिको आगुवाको रुपता मासाल जेलाउ थेकापा वा ख्रिस्टको भाअ्सिङ खाङधुरि योग्य साबित माजेङखे। माकुनुते नाअ् बुङ वाको पापको जिम्माबारि जेनाना। निसित पाअ्‌, कि नाअ् ताइमिङ पाप मापाखेना।

²³ ना चि खिनिङ आम्तेङ माहि, भरु नाङको हामुको भाअ्सिङ कालाउ जेलाउ-सेलाउ मासाधितेङ हिलाउ आतुइसा दाखरस आम्सु।

²⁴ हाइपालिपानु आधिमि द्‍याङगेलाइ पाप पाखे जाइ नेलाइ इम्बालाइको ब्यभारसो थाहा गिलि दोस्वाना। कालाउ बो द्‍याङगेलाइको पाप चाहि हेन्जा सोमोइ न्हुसो खिनिङ थाहा निङखे।

²⁵ एसापाङ पातेङ जेलाउ हिदोइ बुङ द्‍याङ रेम्का काम पाखे, इङको बो खन्धुराइगेलाइ झालाफालापा तिङखे। कालाउ जेसापा द्‍याङलाइ इङको रेम्का कामगेलाइ तिङलि मादोलाउ बुङ न्हुसो इम्बालाइ इङको कामगेलाइ तिनावा।