1तिमोथि 4 - Dhimal NT

धाताइका सिक्स्याको बिरोधता चेताउनि

¹ पबित्तरो आत्मा झालाफालापा दोअ्हि, कि या आखिरि दिनागेलाइता आधिमि द्‍याङगेलाइ ख्रिस्टको सिक्स्याहेङ खाङधुरि पालि लाअ्तावा। इम्बालाइ साइतानसो लोका सिक्स्याहेङ सुइकार पावा कालाउ जाइ इम्बालाइहेङ छलियावा कालाउ साइतानसो लोका धाताइका सिक्स्यागेलाइहेङ खाङधुरि पालि लागाइयावा।

² इसिका धाताइता सिक्स्यागेलाइ कपटि पाका द्‍याङगेलाइसो लोखे। इम्बालाइको बिबेकहोइ थाहा मागिखे कि इम्बालाइ ठिक पाखे कि गलत पाखे, एन्साङ पातेङ जेलाउ हिदोइ बुङ द्‍याङको जिउ धाङका फालामहोइ ओअ्का हि पानु, धालेहोइ हाइ दोङ थाहा मागिखे।

³ इन्सिका द्‍याङगेलाइ धिरपाखे कि बिहु पालि माएल, कालाउ हेथेते आमेनेगेलाइ चाअ्लि माएल। कालाउ खाङधुरि पाकालाइ कालाउ सत्ये काथा गिकालाइ धन्यबाद पितेङ चाअ्लि एल, हाइपालिपानु परमेस्वर दोङ इङको गोताङ चाअ्का आमेने सिरजाइहि।

⁴ हाइपालिपानु परमेस्वर सिरजाइका गोताङ काथा आसल हि, कालाउ परमेस्वरहेङ धन्यबाद दोफाङ ग्रहन पातेङ केलाइ हिदोइ बुङ आमेने चाअ्लि इन्कार पातेङ हिलि मागोयाङ।

⁵ हाइपालिपानु चाअ्लि खान्तेङ लाम्फा इङको परमेस्वरको बचन कालाउ प्रार्थाना पाहासो सुद्द जेङका हिखे।

ख्रिस्टको आसल सेवक

⁶ जेसापा नाअ् का एलाङ दोअ्का काथागेलाइ खान्धुराइ ओनेगेलाइहेङ धिरपान्हा पानु, नाअ् येसु ख्रिस्टको खाङधुरि योग्य सेवक जेनाना, जेदोङ खाङधुरिको सन्देसता बल्लियाका जेङका हिखे कालाउ आसल सिक्स्याहेङ पिताइकाताङ लोका हिखे।

⁷ कालाउ दन्ते काथागेलाइता कालाउ आर्था मान्थुका काथागेलाइसो एकदम फारापा हिसु, भरु ताइमिहेङ लागातार परमेस्वरहेङ मन परिका जिबन जियाइलि तालिम पाअ्‌।

⁸ हाइपालिपानु जिउको कसरतहोइ जिउहेङ खिनिङ फाइदा जेङखे। कालाउ परमेस्वरको भक्तिचाहि गोताङ काथाता फाइदा हिखे, हाइपालिपानु इदोइहोइ एलाको जिबनता कालाउ न्हुसोको जिबनता फाइदा जेङखे।

⁹ इदोइ भनाइ सत्ये हि, कालाउ यासेहेङ खाङधुरि पालि द्वाङ,

¹⁰ हाइपालिपानु केलाइ ताइको खाङधुरिको भाअ्सिङ थाङका परिस्रोम कालाउ सङघरस पान्हाखे, हाइपालिपानु केलाइको आस सिन्हुका परमेस्वरता ताअ्का हिनाहि, जाइ गोताङ द्‍याङको बिसेस पातेङ वाको ह्रुता खाङधुरि पाकागेलाइको मुक्ति दाता हि।

¹¹ इदोइ दोङ काथागेलाइ खान्धुराइगेलाइहेङ धिरपा कालाउ इम्बालाइ इङको काथागेलाइहेङ आग्या केम्लि दोअ्सु।

¹² इसिका ब्याभार पाअ्‌ कि, हासु बुङ नाअ् धाना हिना दोअ्तेङ हेला मापाको कालाउ नाङको आदार पाअ्को। कालाउ खान्धुराइगेलाइको आगाता बोलिचालि, बानिबेहुरा कालाउ प्रेमता कालाउ ख्रिस्टको खाङधुरिता, कालाउ सुद्दता जिबन जियाइतेङ नाअ् एनोङ नमुना जेङ।

¹³ का इन्ता मालोका थेकापा नाअ् खान्धुराइगेलाइहेङ धर्मसास्तर बार्का गालाहोइ पढेतेङ हिङपा, हाउसाइपा कालाउ धर्मसास्तरको आर्था खोलिपि।

¹⁴ नाङको दोफा हिका बरदानको हेलचेक्राइ मापा, जेदोङ बरदान मन्डलिको आगुवागेलाइ ताइको खुर नाङको ह्रुता ताअ्लाउ आगमबानिसो नासेहेङ मिलिका हिघाखे।

¹⁵ इदोइ काथागेलाइहेङ ध्यान पितेङ काम पासु कालाउ ताइमिहेङ इङकोङ कामता पुरा समर्पित पाअ्‌, कालाउकि झाराङ तिनाको कि नाअ् ताइको खाङधुरिता आगा बारादोङखेना।

¹⁶ नाअ् हिसिका जिबन जियाइतेङ हिना कालाउ हाइ धिरपातेङ हिना इङको काथागेलाइता चङख हिसु। कालाउ इदोइ काथाता लागितेङ हिसु। एन्सा पाहे पानु परमेस्वर नासेहेङ कालाउ नाङको काथा हिङकागेलाइहेङ न्यायको दन्डसो बान्चि पावा।