1तिमोथि 3 - Dhimal NT

मन्डलिको आगुवागेलाइ

¹ इदोइ भनाइ सत्ये हि, जेसापा हिदोइ बुङ द्‍याङ खान्धुराइगेलाइको आगुवा जेङका काम पालि चाहिखे पानु, वा रेम्काङ कामको इच्छा पाखे।

² ओदोङ भाअ्सिङ इदोइ आव्यस्यक हि, कि आगुवागेलाइ चाहि दुसिका मान्थुका हिलि गोइखे। वाको एमि खिनिङ बे ह्याको। ताइमिहेङ काबुता ताअ्लि दोका, साम्मान निङका, समझदार, कालाउ ताइको साअ्ता लोकालाइहेङ सेवा सात्कार पाका कालाउ परमेस्वरको बचन रेम्फासो धिरपाका द्‍याङ हिलि गोइखे।

³ वाको हेन्जा गोरा चि माआम्का बानि माह्याको, कालाउ हेन्जा चेरचुङ माहिका, कालाउ वा मोनोइ कालाउ सान्त स्वभाबको, माफेसुका, कालाउ ताकाको लोभ पाका माह्याको।

⁴ वा ताइको जाहान रेम्फासो चालाइलि दोका कालाउ ताइको चान-चामिन्दिगेलाइहेङ गोताङ काथाता आदार दोफा आग्या केम्लि धिरपालि गोइखे।

⁵ जेसापा हिदोइ बुङ द्‍याङ ताइकोङ जाहानगेलाइहेङ रेम्फा चालाइलि मागिखे पानु, वा निसित दोङ परमेस्वरको मन्डलिको खान्धुराइगेलाइहेङ सामाराइलि माद्वावा।

⁶ वा नावा खान्धुराइ माह्याको, माकुनुते वा घमन्डि जेनावा कालाउ साइतान निङका भाइकाङ साजाइ निनावा।

⁷ कालाउ मन्डलि बाहारको द्‍याङगेलाइ बुङ वा एमि आसल द्‍याङ हि दोअ्लि गोइयावा। कालाउकि द्‍याङगेलाइ वाको बारेता मारेम्का काथागेलाइ मापाङ। कालाउ वा साइतानको जाल्ता मापरियाङ।

मन्डलिहेङ साघाइकालाइ

⁸ एन्सा पातेङ मन्डिलिहेङ साघाइकालाइ बुङ भलादमि हिलि गोइखे, इमान्दार, हेन्जा गोरा चि-माआम्का कालाउ ताकाको लोभ मापाका ह्याको।

⁹ कालाउ इम्बालाइ सुद्द बिबेकता परमेस्वर तिङपाका सत्ये सन्देसता खाङधुरि पातेङ हितेङ हिलि गोइखे।

¹⁰ जेलाउ मन्डलि साघाइकालाइहेङ छाल्न्हाखे, इम्बालाइ ताइमि दोफा आसल गुन हि दोअ्तेङ प्रमानित पाको। कालाउ जेसापा हासु बुङ इम्बालाइता दुसिका मानिङहि पानु इम्बालाइ मन्डिलिहेङ साघाइलि द्वाको।

¹¹ मन्डलि साघाइकालाइको बे गेलाइ बुङ आदार पालिको योग्य हिलि गोइखे, बोमिको बिसोइता आखेका काथा मापोका हिलि गोइखे। कालाउ ताइमिहेङ काबुता ताअ्तेङ गोताङ काथाता खाङधुरि योग्य हिलि गोइखे।

¹² मन्डलिहेङ साघाइकालाइ ताइको बे दोफा खाङधुरि योग्य हिलि गोइखे। कालाउ ताइको चान-चामिन्दिगेलाइ कालाउ जाहानगेलाइहेङ रेम्फासो सामाराइलि दोका हिलि गोइखे।

¹³ मन्डलि साघाइकालाइ रेम्का तरिकासो काम पाखे पानु द्‍याङगेलाइ इम्बालाइको मानसाम्मान पावा, कालाउ इम्बालाइ येसु ख्रिस्ट ह्रुता ताइको खाङधुरिको बारेता द्‍याङगेलाइहेङ साहाससोङ दोअ्लि द्वावा।

जिबन रहस्यको

¹⁴ नाङकोता धेमाङ लोलि आस ताअ्लाउ बुङ का नेलाइहेङ इदोइ सुझाब लेखेदोङखा,

¹⁵ कालाउकि हिसो बुङ का न्हुलाउ बुङ, नेलाइ गिसु कि केलाइ हेसा परमेस्वरको जाहानको रुपता जिबन जियाइलि गोइखे, जेदोङ चाहि परमेस्वरको मन्डलि बुङ हि। इदोइ खान्धुराइगेलाइ सत्ये सिक्स्याहेङ जोगाइतेङ ताअ्खे। जेसाङ जोग कालाउ खाम्बाहोइ साअ्हेङ आड् पिखे।

¹⁶ हिदोइ बुङ साङखा माकोसिङ केलाइ मानिन्हाखे, कि केलाइको खाङधुरिको रहस्य हेन्जाङ माहान हि: ख्रिस्ट एमि द्‍याङको रुपता देखाल जेङहि, वा पबित्तरो आत्मासो परमेस्वरको चान साबित जेङहि, स्वर्गदुतगेलाइ वासेहेङ तिङहि, गोताङ सारभिगेलाइता वाको बारेता सुसमाचार हिङपाहि, सुमिङको गोताङ द्‍याङगेलाइ वाको ह्रुता खाङधुरि पाहि, कालाउ परमेस्वर वासेहेङ महिमाको स्वर्गता चुम्पुहि।