1तिमोथि 2 - Dhimal NT

मन्डलिको भाअ्सिङ प्रार्थाना

¹ झाराङ खान्तेङ लाम्फा का आनुरोध पाङका, कि गोताङ द्‍याङको भाअ्सिङ परमेस्वर दोफा मोनोइ निबेदन, प्रार्थाना, बिन्ति कालाउ धन्यबाद पासु।

² राजागेलाइ कालाउ गोताङ आधिकारिगेलाइको भाअ्सिङ बुङ प्रार्थाना पासु। कालाउकि केलाइ सान्ति कालाउ सुरुक्स्याता जियाइतेङ परमेस्वरको आराधाना पालि दोवाइने कालाउ वा जेदोङ पालि भोखे इङको केलाइ पालि दोवाइने।

³ इसिका प्रार्थाना ठिक हि, कालाउ केलाइको मुक्ति दाता परमेस्वर बुङ इदोइ दोङ काथा मन्दा ताअ्खे।

⁴ गोताङ द्‍याङगेलाइ मुक्ति निनाको कालाउ इम्बालाइ सत्येको ग्यानता ल्वाको दोअ्का इच्छा वा पाखे।

⁵ हाइपालिपानु परमेस्वर एमि खिनिङ हि, परमेस्वर कालाउ द्‍याङगेलाइको माझाता सान्ति चुमाका बुङ एमि खिनिङ मध्यस्थ हि, कालाउ उङको द्‍याङ चाहि येसु ख्रिस्ट हि।

⁶ ख्रिस्ट गोताङ द्‍याङगेलाहेङ पाप कालाउ सिकाको सरबुङसो लाअ्पालि मोल तिरितेङ ताइमिहेङ बलिदान पिहि। कालाउ वाको सिकासो परमेस्वर झाराङ द्‍याङ बान्च्याको दोअ्तेङ ठिक सोमोइता प्रमान पिहि।

⁷ याकोङ भाअ्सिङ परमेस्वर कासेहेङ सुसमाचारको प्राचार पालि कालाउ साल्न्हाका चात्याको रुपता नियुक्ति पाहि। कालाउ वा कासेहेङ खाङधुरि कालाउ सत्येको सिक्स्या गैर-यहुदिगेलाइहेङ धिरपालि साल्हि। कालाउ का धाताइतेङ दोअ्का माको, भरु का सत्ये धुइखा।

⁸ का चाहिखा, कि जेलाउ बुङ नेलाइ परमेस्वरहेङ आराधाना पालि जोम्सुखेना, परमेस्वरहेङ ग्रहन योग्य जिबन जियाइका वाबालाइ ताइको पबित्तरो खुर तोल्हेतेङ बिना क्रोड कालाउ बिना माचेरसुसिङ प्रार्थाना पाको।

⁹ एसाङ पातेङ का चाहिखा, कि खान्धुराइ बेबालाइ सोबाइका सुइकार योग्य कालाउ आदार योग्य लोखोन धाबा लागाइयाको। पुसुङहेङ हेन्जा साजाइतेङ, सोना, मोति कालाउ हेन्जा जाङका लोखोन धाबागेलाइ लागाइतेङ माको,

¹⁰ कालाउ रेम्का कामगेलाइ पातेङ ताइमिहेङ सोबाइका बानाइलि, जाइ परमेस्वरको भक्ति पाका बेबालाइहेङ सोबाइखे।

¹¹ जेलाउ हिदोइ बुङ द्‍याङ खान्धुराइगेलाइहेङ धिरपातेङ हिखे, झाराङ बेबालाइ सान्त रुपहोइ कालाउ हेन्जा आदार पातेङ हिङलि गोइखे कालाउ धिरलि गोइखे।

¹² कालाउ बेबालाइ वाबालहेङ धिर्पाका कालाउ वाबालाइ ह्रुता खाबारा पाका कामता का आनुमति माप्याङका, कालाउ बेबालाइ चाहि हासु बुङ धिरपाका सोमोइता सिकापा हिलि गोइखे।

¹³ का या काथा दोअ्खा हाइपालिपानु परमेस्वर लाम्फा वाबाल आदमहेङ कालाउ न्हुसो बेजान हब्बाहेङ सिरजाइहि।

¹⁴ कालाउ भेनेङ कारन चाहि बेजानहेङ पुह्याँ धाताइहि कालाउ आदमहेङ माको, कालाउ एसापा हब्बा परमेस्वरको आग्याहेङ माकेम्हि।

¹⁵ कालाउ जेलाउ थेकापा इम्बालाइ ख्रिस्टता खाङधुरि पातेङ हिहे पानु, आरुहेङ बुङ प्रेम पावा, कालाउ सुद्द कालाउ मोनोइ तरिकासो ब्याभार पाहे पानु परमेस्वर बेबालाइहेङ जामालको जोलोम पिकासो बान्चि पावा।