1 थेस्लोनिकि 5 - Dhimal NT

प्रभुको दामा खाङतेङ हिसु

¹ कालाउ ओइ खान्धुराइ ओनेगेलाइ, प्रभु येसु ख्रिस्ट आरोङ हेलाउ ल्वाङ इङको काथागेलाइ नेलाइहेङ लेखेलि आवस्यकता मान्थु।

² हाइपालिपानु नेलाइ झाराङ गिसुखेना, कि जेदोङ दिना प्रभु येसु आरोङ ल्वावा इङको दिना न्हिसिनता आचानाक चोर लोका भाइपा ल्वावा।

³ जेलाउ द्‍याङगेलाइ दोअ्तावा, केलाइहेङ सान्ति कालाउ सुरसित हि। ओदोङ बेला एक्कासि बार्का आपति ल्वाङ, या एक्कासि गान्धितेका बेबालहेङ तुनिङचाका भाइका जेनावा कालाउ इम्बालाइ इदोइ बार्का आपतिसो खाअ्लि मौका बुङ मानिनावा।

⁴ कालाउ खान्धुराइ ओनेगेलाइ, नेलाइ इदोइ दुस्ट सुमिङको माको, ओदोङ भाअ्सिङ प्रभु लोका दिना नेलाइकोता चोर लोका भाइपा आचानाक ल्वाङ।

⁵ का इसिका दोअ्खा, हाइपालिपानु नेलाइ झाराङ द्‍याङ फाइसालामका कालाउ दिनाको द्‍याङ कोनिङ रेम्फा ब्यभार पासु कालाउ आसल काम पासु। हाइपालिपानु केलाइ खान्धुराइगेलाइ इङको कितिकितिकाता हिका कालाउ दुस्ट सुमिङको द्‍याङगेलाइ भाइपा माको, जाइ पाप पाखे कालाउ मारेम्का ब्यभार पाखे।

⁶ ओदोङ भाअ्सिङ केलाइ आरु द्‍याङगेलाइ भाइपा माजिमाइने, जाइहेङ प्रभु लोका दिनाको बारेता थाहा मान्थु, भरु जागितेङ ह्याइने कालाउ चङख ह्याइने कालाउ आत्मा काबुता हिलि गोइखे।

⁷ हाइपालिपानु जिम्कालाइ बेल्हालाउ थेकापा जिम्खे, कालाउ गोरा आम्तेङ म्हाकालाइ बुङ बेल्हालाउ म्हाखे, कालाउ इम्बालाइहेङ थाहा मान्थु कि हाइ जेनाङ वाला।

⁸ कालाउ केलाइ चाहि दिनाको हिनाङ खाङधुरि कालाउ प्रेमको तुम्ताको पाता लागाइने जेदोङहोइ केलाइहेङ बान्चिपाखे, जेसाङ तुम्ताको पाताहोइ सिपालाइहेङ जोगे पाखे। कालाउ आस पाइने, कि केलाइ आनान्त साजाइसो बान्चिका हिनाहि, जेसाङ टोपहोइ सिपाइहेङ बान्चिपाखे।

⁹ हाइपालिपानु परमेस्वर केलाइहेङ वाको चेरसो दन्ड पिलि छाल्का माको, भरु प्रभु येसु ख्रिस्टसो मुक्ति निङलिको भाअ्सिङ छाल्का हि।

¹⁰ येसु ख्रिस्ट केलाइको भाअ्सिङ सिहि, कालाउकि केलाइ बान्चिलाउ बुङ माकुनु सिलाउ बुङ केलाइ वा दोफाङ जेलालाउको भाअ्सिङ बान्चिलि द्वाको, जेलाउ वा आरोङ ल्वाङ।

¹¹ ओदोङ भाअ्सिङ एमिसो-भेनेङहेङ हाउसाइ पिसु कालाउ एमिसो-भेनेङहेङ येसुको खाङधुरिता आझाइ बल्लियाका बानाइलि साघाइसु जेसाङ नेलाइ पातेङ हिसुना।

आम्तिम सिक्स्या

¹² ओइ खान्धुराइ ओनेगेलाइ, केलाइ नेलाइहेङ निबेदन पानाखे, कि प्रभुता नेलाइको आगुवागेलाइहेङ आदार पासु, जाइ नेलाइको भाअ्सिङ परिस्रोम पाखे, कालाउ नेलाइहेङ आत्मिक काथाता आगुवाइ पाखे।

¹³ इम्बालाइ नाङको भाअ्सिङ पाका कामको भाअ्सिङ इम्बालाइहेङ हेन्जा आदार कालाउ प्रेम पासु। कालाउ नेलाइ ता-ताइमिता मिलितेङ सान्तिसो हिसु।

¹⁴ कालाउ खान्धुराइ ओनेगेलाइ, केलाइ नेलाइहेङ आर्ति पिनाखे, कि कुरियागेलाइहेङ चेताउनि पिसु, थिकालाइहेङ हाउसाइ पिसु, हुइका हिकालाइहेङ मद्दत पासु, कालाउ झाराङ दोफा धैर्य जेङतेङ तिङपासु।

¹⁵ फोम पाअ्‌, हासु बुङ मारेम्का पाहि दोअ्काता वासेहेङ मारेम्का मापासु, कालाउ एमिसो-भेनेङ दोफा कालाउ झाराङ द्‍याङगेलाइ दोफा रेम्का पालि कोसिस पासु।

¹⁶ जेलाउ बुङ आनान्द जेङतेङ हि।

¹⁷ जेलाउ बुङ प्रार्थाना पातेङ हिसु।

¹⁸ गोताङ आबास्थाता परमेस्वरहेङ धन्यबाद पिसु। हाइपालिपानु ख्रिस्ट येसुता नेलाइ पालि गोइका परमेस्वरको इच्छा इदोइ दोङ हि।

¹⁹ पबित्तरो आत्माको कामहेङ द्‍याङगेलाइको जिबनता काम पालिसो मारोकिसु।

²⁰ परमेस्वर द्‍याङगेलाइहेङ पिका आगमबानिगेलाइहेङ हेला मापासु।

²¹ गोताङ सन्‍देस जाचे कि इङको परमेस्वरसो लोका हि कि माको, कालाउ रेम्का सन्देसगेलाइहेङ सुइकार पातेङ केम्सु।

²² गोताङ खालको मारेम्का काथागेलाइ इन्कार पासु।

²³ परमेस्वर जाइ सान्ति पिखे ताइमिङ दोङ नेलाइहेङ गोताङ खाल्होइ पबित्तरो बानाइयाको, कालाउ नेलाइको गोताङ आत्मा, प्रान कालाउ जिउ केलाइको प्रभु येसु ख्रिस्ट आरोङ मालोपा धाउ पुरा रुपसो दुसिका माह्यावा।

²⁴ नेलाइहेङ काइका परमेस्वर खाङधुरि योग्य हि। वा दोङ नेलाइहेङ पबित्तरो बानाइलि योग्य हि।

²⁵ गोताङ खान्धुराइ ओनेगेलाइ केलाइको भाअ्सिङ बुङ प्रार्थाना पापिसु।

²⁶ गोताङ खान्धुराइ ओनेगेलाइहेङ सत्ये प्रेमहोइ सेउपासु।

²⁷ का नेलाइहेङ प्रभुता आदेस प्याङका कि गोताङ खान्धुराइ ओनेगेलाइहेङ इदोइ पात्तारा पढेतेङ हिङपापि।

²⁸ केलाइको प्रभु येसु ख्रिस्टको आनुग्रह नेलाइ झाराङ दोफा हितेङ ह्याको।