1पतरुस 5 - Dhimal NT

¹ का नाअ् इन्ताको मन्डलिको आगुवागेलाइहेङ हाइ दोङ दोअ्लि भोखा, हाइपालिपानु का बुङ नेलाइ भाइकाङ एमि आगुवा हिघा। का ताइमिङ ख्रिस्टको हेन्जाङ सोमोइ लाम्फा निङका कस्ट तिङका हिघा। जेलाउ वा आरोङ धुरितेङ ल्वाङ, का बुङ वाको महिमाता साझेदार जेनाङका। एला का नेलाइहेङ आग्राह पाङका।

² जेसाङ लाखुरिया ताइको भेडाहेङ सामाराइखे, नेलाइ बुङ झाराङहेङ सामाराइलि गोइस्वाना, जाइहेङ परमेस्वरको नेलाइको जिम्माता पिका हि। इङको ताइकोङ इच्छाहोइ पासु, हाइपालिपानु इङको दोङ परमेस्वर नेलाइ पाका चाहिखे। इङको कामहेङ करकापहोइ मापासु। इङको काम ताका निङलिको भाअसिङ मापासु, कालाउ परमेस्वर कालाउ द्‍याङगेलाइको सेवा पालि इच्छाहोइ या पासु।

³ कालाउ ताइको द्‍याङगेलाइ ह्रुता हुकुम चालाइका सासक भाइका नेलाइको जिम्माता पिका द्‍याङगेलाइ ह्रुता हुकुम माचालाइसु। भरु इम्बालाइको भाअ्सिङ उधारन जेङसु।

⁴ जेलाउ येसु ख्रिस्ट धुरितेङ ल्वाङ, जाइ केलाइको मुख्य लाखुरिया हिका हि, कालाउ नेलाइहेङ एनोङ कोइनाका मुकुट प्याङ। जाइको चिल्काका हेलाउ बुङ कम माजेनाङ।

⁵ एन्साङ पातेङ धानागेलाइ, कालाउ वाराङ द्‍याङगेलाइको आधिनता हिसु। नेलाइ झाराङ मोमोइसोङ एमिसो भेनेङहेङ साघाइलि गोइखे। हाइपालिपानु धर्मसास्तरता लेखेका हि, “परमेस्वर घमन्डिगेलाइको बिरोध पाखे, कालाउ मोनोइगेलाइहेङ आनुग्रह पाखे।”

⁶ ओदोङ भाअ्सिङ परमेस्वरको आगाता मोनोइ जेङसु, जाइ सरबुङसाइका हि, कालाउकि वा चुनिका दिनाता नेलाइहेङ झाउका थामेता ह्रुता तोल्ह्यावाको।

⁷ परमेस्वर नेलाइको वास्ता पाखे, ओदोङ भाअ्सिङ ताइको गोताङ चिन्ता परमेस्वरहेङ पिसु।

⁸ नेलाइ ताइमिहेङ काबुता ताअ्सु कालाउ जागितेङ हिसु, हाइपालिपानु नेलाइको सतुरु साइतान द्‍याङगेलाइहेङ नासा पालिको भाअ्सिङ द्‍यापाहाङ घुराइगिल्तेङ हि। वा गुन्जिरका खुवाँ भाइका हासुहेङ बुङ दुसुतेङ चाङका दोअ्तेङ दाउता घुराइगिल्तेङ हिगिल्तेङ हि।

⁹ नेलाइको इस्थिर खाङधुरिहोइ नेलाइ इङको को बिरोध पालि गोइखे। फोम पासु कि सुमिङ भरि दोङ हिका खान्धुराइगेलाइ बुङ इन्सिकाङ कस्टको आनुभब पातेङ हि।

¹⁰ परमेस्वर, जाइ पुर्न रुपता आनुग्रहकारि हि केलाइको ख्रिस्ट येसु दोफाको सम्बन्धको कारन ताइको आनान्त महिमाता केलाइहेङ हकदार जेङलि काइका हि। नेलाइ कोम्हा सोमोइ थेकापा कस्ट भोगितेङ परमेस्वर नेलाइहेङ आसल बानाइयाङ कालाउकि नेलाइता हिदोइ बुङ गल्ति माज्याको कालाउ वा नेलाइको ह्रदयहेङ बल्लियाका बानाइयाङ कालाउ इस्थिर जेङलिको भाअ्सिङ वाकोता खाङधुरि पाका बानाइयाङ।

¹¹ वा आदारको योग्य हि, हाइपालिपानु वाको सरबुङको हिदोइ बुङ आन्त माजेनाङ। आमेन।

आम्तिम सेउपाखा

¹² सिलासको साघाइसो का या पोटोका चिट्ठि नेलाइहेङ लेखेतेङ पिगिल्का हिघा। ख्रिस्टता का वासेहेङ खाङधुरि योग्य ओने सम्झिखा। काङको चिट्ठि लेखेलिको उदेस्य नेलाइहेङ हाउसा पिलि कालाउ निसित पालि दोङ हि, कि नेलाइ आनुभब पातेङ हिका नेलाइको भाअ्सिङ परमेस्वरको आनुग्रह हि। इदोइ आनुग्रहता बल्लियाका जेङतेङ हिसु।

¹³ नेलाइ भाइकाङ परमेस्वर पाहासो चुनिका बेबिलोन सहरको खान्धुराइगेलाइ नेलाइहेङ सेउपाखा पिगिल्का हि। मर्कुस बुङ नेलाइहेङ सेउपाखा पिगिल्का हि, जाइ काङको चान भाइका हि।

¹⁴ एमिसो भेनेङहेङ सत्ये प्रेमहोइ सेउपासु। का प्रार्थाना पाखा कि परमेस्वर नेलाइ झाराङहेङ सान्ति प्याको, जाइ ख्रिस्ट हि।