1पतरुस 4 - Dhimal NT

¹ ओदोङ भाअ्सिङ ख्रिस्ट इदोइ प्रिथिबिता हिलाउ दुख भोगिहि, कालाउ नेलाइ बुङ वा भाइपा बिचार ताअ्तेङ दुख भोगिलि तियार हिलि गोइखे। हाइपालिपानु जेसापा नेलाइ ख्रिस्टको भाअ्सिङ दुख भोगिलि इच्छा पासुखेना पानु, नेलाइ पाप पालि लाअ्लि निर्नय पाका हिसुना।

² परिनाम स्वरुप उङको द्‍याङ इदोइ प्रिथिबिता ताइको बाकि जिबन ताइकोङ पापि मानिमुइ इच्छागेलाइ पुरा पातेङ माबान्चियाङ, कालाउ वा परमेस्वरको गोइका काथा पावा।

³ लाम्फा नेलाइ खाङधुरि मापाकालाइहेङ मन परिका काम पातेङ हेन्जाङ सोमोइ बार्बाद पासुन्हा। नेलाइको जिबन आनैतिक्ता, लान्सा, भोज, मधपान, मजमज्जा, कालाउ मुर्ति पुजाता बितिहि, जाइहेङ परमेस्वर मन्दा माताखे।

⁴ ओदोङ भाअ्सिङ नेलाइको पुर्ना सानाइतिगेलाइ भारबुसाइखे, जेलाउ नेलाइ इम्बालाइको पाका दुस्ट कामगेलाइता माझ्वाइ सुखेना। ओदोङ भाअ्सिङ इम्बालाइ नेलाइको आखेका कामको बारेता मारेम्का काथा दोअ्खे।

⁵ कालाउ इन्सिका सोमोइ ल्वाङ, जेलाउ उङको द्‍याङगेलाइ उङको दुस्ट कामगेलाइको बारेता परमेस्वरको प्रस्न उत्तारा पिलि गोइयाङ। हाइपालिपानु परमेस्वर गोताङ द्‍याङगेलाइको न्याय पालि तियार हि, चाहे जाइ आझाइ सिन्हुका हि माकुनु जाइ सिलि दोका हि।

⁶ ओदोङ भाअ्सिङ सिका द्‍याङगेलाइ बुङ ख्रिस्टको बारेता सुसमाचारको प्राचार हिङहि। इम्बालाइको जिउ आरु झाराङ द्‍याङगेलाइ भाइपाङ सिलि गोइहि, कालाउ एला इम्बालाइ जेलाउलाउ बुङ परमेस्वर दोफा आत्माता बान्चितेङ हि।

⁷ गोताङ काथाको आन्तय भेरपाङ लोका हि। ओदोङ भाअ्सिङ नेलाइ झालाफालापा सोचेसु कालाउ ताइमिहेङ काबुता ताअ्सु, कालाउकि नेलाइ प्रार्थाना पालि दोसु।

⁸ झाराङ खान्तेङ मुलि काथा, एमिसो भेनेङहेङ लिताङसो प्रेम पासु। हाइपालिपानु जेसापा नेलाइ द्‍याङगेलाइहेङ प्रेम पासुन्हा, नेलाइ जेलाउ बुङ इम्बालाइको हिदोइ बुङ पाप पाका काम स्यामा पालि तियार जेङस्वाना।

⁹ द्‍याङगेलाइहेङ नेलाइको साअ्ता स्‍वागत पासु कालाउ हिदोइ बुङ गुनासो मापासिङ इसिका पाका पासु।

¹⁰ झाराङ द्‍याङ परमेस्वरसो बरदान निङका हि कालाउ इम्बालाइ इङको बरदान आरुगेलाइहेङ साघाइलि प्रयोग पालि गोइखे। इम्बालाइ ताइको बरदानगेलाइ परमेस्वरको रेम्का बान्धाइतिगेलाइ जेसाङ रेम्फासो प्रयोग पालि गोइखे।

¹¹ उधारनको भाअ्सिङ, जेसापा नेलाइ दोफा प्राचार पाका बरदान हि पानु, नेलाइ परमेस्वरको बचन प्राचार पालि गोइखे। जेसापा नेलाइ दोफा आरु द्‍याङगेलाइहेङ साघाइका बरदान हि पानु, इङकोहेङ परमेस्वर नेलाइहेङ पिका तागतहोइ पासु। कालाउ येसु ख्रिस्ट पाहासो नेलाइहेङ परमेस्वर महिमाता चुमावा। गोताङ महिमा कालाउ सरबुङ जेलाउलाउ बुङ वाको दोङ हि! आमेन।

ख्रिस्टियन जेङकाता दुख-कस्ट

¹² आनाउ सोना, नेलाइ भोगितेङ हिका दुख लागिका काथागेलाइको बारेता माभारभुसाइसु, हाइपालिपानु नेलाइ ख्रिस्टको हिसुना। कालाउ इदोइ काथागेलाइ या तिङपालिको भाअ्सिङ जेङतेङ हि, कि नेलाइ बास्ताबता परमेस्वरता खाङधुरि पासुखेना कि मापा सुखेना। ओदोङ भाअ्सिङ, या मासोचिसु कि नेलाइ दोफा हाइ दोङ आनौठो जेङतेङ हि।

¹³ याको बारेता लेङचासु, कालाउकि नेलाइ ख्रिस्ट भोगिका क्रुस्टता झ्वाइनाका हिसुना। ओदोङ भाअ्सिङ जेलाउ ख्रिस्ट गोताङ द्‍याङगेलाइहेङ ताइको महिमाता देखाल पिलि आरोङ ल्वाङ, कालाउ नेलाइको आनान्द जातिङकोङ बार्का जेनाङ।

¹⁴ जेसापा ख्रिस्टको मिङता नेलाइ निन्दित जेङसुन्हा पानु नेलाइ धन्यको हिसुना। हाइपालिपानु महिमित परमेस्वरको आत्मा नेलाइ दोफा बासा हिका हि।

¹⁵ कालाउ नेलाइ मध्येसो हासु बुङ मारा पाका, माकुनु खुर ह्रिङपाका माकुनु खाराबि पाका, माकुनु बोमिको काथाता खुर ह्वाका भाइपाङ दुख माभोगेसु।

¹⁶ कालाउ हासु बुङ ख्रिस्टतियन जेङका को कारन दुख भोगिखे पानुते वा मालेदेराको, भरु ख्रिस्टियान जेङका कारन वा परमेस्वरहेङ धन्यबाद प्याको।

¹⁷ हाइपालिपानु परमेस्वरको ताइकोङ जाहान दोफा न्याय सुरु जेङका सोमोइ लोलि दोका हि। जेसापा परमेस्वर लाम्फा केलाइ खाङधुरि पाकालाइको न्याय पाङ, कालाउ वाकोसो लोका सुसमाचार माकिकालाइहेङ हिसिका हि वाला इङको काथाको बारेता सोचेसु।

¹⁸ जेसाङ धर्मसास्तरता लेखेका हि, “जेसापा परमेस्वरको ताइकोङ द्‍याङको न्याय लाम्फाङ जेनाङ। जेसापा या केलाइसो सुरु जेङहे पानु, परमेस्वरको सुसमाचारता खाङधुरि मापाका को आन्तय हिसिका वाला?”

¹⁹ ओदोङ भाअ्सिङ जाइ परमेस्वर गोइका आन्सार दुख भोगिखे, वा इम्बालाइहेङ बानाइका परमेस्वरता भोरोसा ताअ्तेङ हिलि गोइखे। परमेस्वर जेलाउ बुङ ताइमि प्रतिग्या पाका काथा पुरा पालि गोइखे, ओदोङ भाअ्सिङ रेम्का काम पातेङ हिसु।