1पतरुस 3 - Dhimal NT

के कालाउ बे

^1-2 बे गेलाइ, नेलाइ बुङ ताइको के को आधिनता हिसु, कालाउकि जेसापा इम्बालाइ मध्ये हासु बुङ परमेस्वरको बचनता खाङधुरि पालिसो इन्कार पाखे पानु, नेलाइको ब्यभारहोइ इम्बालाइहेङ हाइ दोङ मादोअ्सिङ बुङ खान्धुराइ बानाइलि इम्बालाइ ख्रिस्टता खाङधुरि पावा, जेलाउ इम्बालाइ नेलाइहेङ सुद्द कालाउ भक्ति ब्यभार तिनावा।

³ एसाङ पातेङ का चाहिखा, कि खान्धुराइ बेबालाइ सोबाइका कालाउ रेम्का लोखन धाबा बोअ्ताको। पुसुङहेङ हेन्जा साजाइतेङ, सोना, मोति कालाउ हेन्जा जाङका लोखोन धाबागेलाइ लागाइतेङ माको।

⁴ नेलाइ ताइमिहेङ रेम्का गुनगेलाइहोइ कोइनाका बानाइलि गोइखे जेदोङ राम्खे, इङको मोनोइ कालाउ सान्ति ब्यभार दोङ हि, जेदोङ परमेस्वरको भाअ्सिङ ओसारापाङ जाङका हि।

⁵ हेन्जाङ सोमोइ लाम्फा हिका बेबालाइ जाइ परमेस्वरता खाङधुरि पाघाखे कालाउ वाकोता ताइको आस ताअ्का हिघाहि, इम्बालाइ ताइको के गेलाइको आग्या केम्तेङ ताइमिहेङ कोइनाका बानाइघाखे।

⁶ सारा भाइकाङ, जाइ आब्राहामहेङ ताइको गिह्रि दोअ्तेङ वाको आग्या पालान पाघाखे, इङको दोअ्का जेसापा नेलाइ आरु द्‍याङगेलाइहेङ रेम्का पासुना कालाउ चिन्ता जेङतेङ थिका मान्थुनु, कालाउ नेलाइ साराको चामिन्दिगेलाइ भाइकाङ जेङस्वाना।

⁷ एसापा दोङ नाअ् के गेलाइ ताइको बे गेलाइदोफा बिचारसिल जेङतेङ ब्यभार पासु। कालाउ नेलाइ इदोइ फोम ताअ्लि गोइखे कि इम्बालाइ नेलाइ खान्तेङ हुइका हि, ओदोङ भाअ्सिङ नेलाइ इम्बालाइको साम्मान पालि गोइखे। हाइपालिपानु नेलाइ न्हेमि दोङ परमेस्वरको आनुग्रह दोफाङ पिका बरदानता साझे होकदार हिसुना, जेदोङ आनान्त जिबन दोङ। एसा पासु कालाउकि जेलाउ नेलाइ वासेहेङ प्रार्थाना पास्वाना परमेस्वर हिङ प्याको।

आसल काम पालाउ लोका दुख

⁸ आन्ताता, का नेलाइहेङ या दोअ्लि चाहिखा, कि ए जेङतेङ हिसु, एमिसो भेनेङहेङ सामाराइसु, एनोङ दोङ जाहानको सदस्यगेलाइ भाइपाङ झाराङ एमिसो भेनेङहेङ प्रेम पासु। एमिसो-भेनेङ दोफा दायाका जेङसु, कालाउ एमिसो भेनेङ दोफा मोनोइ जेङसु।

⁹ खाराबिको बदला खाराबि मापालि माकुनु आपामानको बदला आपामान मापालि, भरु इङको को सातोता आसिस पिका जेङसु, नेलाइ इम्बालाइको भाअ्सिङ आसिस ह्रेलि गोइखे हाइपालिपानु नेलाइ परमेस्वर पाहासो आसिस पिलिको भाअ्सिङ काइन्हाका हिसुना, कालाउकि नेलाइ परमेस्वरसो आसिस निङलि दोसु।

¹⁰ हाइपालिपानु धर्मसास्तरता लेखेका हि, “जेसापा एमि द्‍याङ ताइको जिबनको आनान्द ह्रुलि भोखे, कालाउ रेम्का दिनागेलाइ तिङलि इच्छा पाखे पानु, वा खाराका काथा पालिसो चङख हिलि गोइखे। कालाउ वा इङको काथा धुइलि लाअ्लि गोइखे जेदोङ सत्ये मान्थु।

¹¹ वा खाराका काम पालि लाअ्लि गोयाङ। भरु वा जेदोङ आसल हि इङको काम पालि गोइखे। आरु दोफा सान्तिता हिलिको भाअ्सिङ थाङका परिस्रोम पासु।

¹² हाइपालिपानु प्रभु ठिक काम पाका द्‍याङगेलाइहेङ खाङखे, कालाउ वा इम्बालाइको प्रार्थाना हिङलिको भाअ्सिङ जेलाउ बुङ तियार हिखे। कालाउ परमेस्वर मारेम्का काम पाका द्‍याङगेलाइको बिरोधता काम पाखे।”

¹³ जेसापा नेलाइ दिनाङ रेम्का काम पालिको भाअ्सिङ कोसिस पासुखेना पानु, कालाउ पाक्कै बुङ हासु बुङ नेलाइहेङ चोट पापालि माद्वावा।

¹⁴ कालाउ जेसापा केलाइको धर्मि ब्यभारहोइ केलाइ दुख निङन्हाखे पानु, केलाइ बास्ताबता आसिस जेङन्हाखे। ओदोङ भाअ्सिङ, जेसापा केलाइहेङ धम्कि पिका द्‍याङगेलाइ हि पानु, इम्बालाइ दोफा माथिसु कालाउ मापिरसु।

¹⁵ भरु नेलाइ ख्रिस्टहेङ नेलाइको जिबनको प्रभुको रुपता आराधाना पासु। कालाउ जेसापा केलाइ झाराङ खान्धुराइगेलाइ साझेदार जेङका आसको बारेता हासुहेङ बुङ हिअ्हि पानु, उङकोहेङ ब्याख्या पालि जेलाउ बुङ तियार हिसु।

¹⁶ कालाउ इदोइ मोनोइ कालाउ आदार पुर्न तरिकाहोइ पासु। जेलाउ बुङ जेदोङ ठिक हि इङकोङ पासु। कालाउ जेसापा द्‍याङगेलाइ नेलाइको बिरोधता खाराका काथा पाखे पानु, इम्बालाइ लेदेरता परियावा जेलाउ इम्बालाइ नेलाइको ख्रिस्ट दोफाको सम्बन्धको कारन नेलाइको आसल ब्यभार तिनावा।

¹⁷ जेसापा केलाइको आसल कामको कारनहोइ केलाइ कस्ट भोगिनाखे कालाउ या केलाइको भाअ्सिङ परमेस्वरको इच्छा हि पानु, या आसल हि। इङको केलाइको मारेम्का कामको कारन कस्ट निङलि खान्तेङ उत्तम हि।

¹⁸ का एसा दोअ्खा हाइपालिपानु केलाइको पापको कारन ख्रिस्ट बुङ कस्ट भोगिहि। कालाउ सिहि। वा एखे खिनिङ सिहि कालाउ यासेहेङ आरोङ घुरितेङ सिलि मागोइयाङ। वा एमि धर्मि द्‍याङ हिघाहि, जाइ पापि द्‍याङगेलाइको भाअ्सिङ सिहि कालाउकि वा केलाइहेङ परमेस्वरको भेरपा चुमालि दोका हि। इम्बालाइ वाको जिउ ते सेअ्हि कालाउ वाको आत्मा सिन्हुका हि।

¹⁹ कालाउ वा आत्माता हानिहि कालाउ परमेस्वर पाहासो कैदिता परिका आत्मागेलाइहेङ सुसमाचार प्राचार पाहि जेता सिका द्‍याङगेलाइको आत्मा हि।

²⁰ इदोइ ते इङको आत्मागेलाइ हिघाहि, जाइ हेन्जाङ सोमोइ लाम्फा परमेस्वरको आग्या माकेम्हि। जेलाउ नुहा ताइको जाहाज बानाइदोङघाहि, कालाउ द्‍याङगेलाइ पक्स्य पात पाङ कि दोअ्तेङ परमेस्वर धर्य पातेङ ह्रुतेङ हिघाहि। कालाउ येए झनाहेङ खिनिङ थिलि गोइका बानेसो बान्चिपाहि।

²¹ पुर्ना सोमोइता इम्बालाइको मुक्ति एला केलाइको मुक्तिको रुप दोङ, जेलाउ केलाइ बप्तिस्ता ह्रुन्हाखे। केलाइ बप्तिस्ता ह्रुका चिहोइ केलाइको जिउसो मिधि माझानाखे, भरु इङको सङकेत हि कि केलाइ परमेस्वरसो माफ ह्रेका हिनाहि, कालाउकि केलाइको मन एला माआउलियाको। केलाइ स्यामा निङलि द्वाङ, हाइपालिपानु येसु ख्रिस्ट ताइको सिकासो आरोङ बान्चिका हि,

²² कालाउ वा स्वर्गता हानिका हि। वा एला परमेस्वरको दाम्पाहा खुर भारि झाराङ खान्तेङ महत्वय पुर्न थामेता हि, कालाउ वा स्वर्गदुतगेलाइ कालाउ गोताङ आधिकारिगेलाइ कालाउ सरबुङगेलाइ ह्रुता सासन चालाइखे।