1पतरुस 2 - Dhimal NT

सिन्हुका उन्ठुइ कालाउ पबित्तरो जाति

¹ ओदोङ भाअ्सिङ गोताङ खाल्को मारेम्का ब्यभार पालि इन्कार पासु। आरुहेङ धोका मापि, कपटि माजेङसु। आरुको डाहा मापासु। बो द्‍याङको बिरुद्द मारेम्का काथा मापासु।

² जेसाङ भरखङ जोलोम जेङका जामाललाइ ताइको आमाइको सुद्द दुधे भोखे, नेलाइ परमेस्वरको बचन धिरलि भोलि गोइखे, कालाउकि नेलाइ आत्मिक रुपता परिपक्क जेङलि दोसु। कालाउ आम्तिमता परमेस्वर नेलाइहेङ इदोइ सुमिङको खाराका आमेनेगेलाइसो पुरा रुपता बान्चि पावा।

³ हाइपालिपानु धर्मसास्तरता लेखेका हि, “नाअ् आनुभब पाका हिना कि नेलाइको प्रभु भोलो हि।”

^4-5 नेलाइ प्रभु येसुकोता लोका हिसुना। वा एनोङ साअ्को खाम्बा योम्पाका मुलि उन्ठुइ भाइका हि, कालाउ वा सिन्हुका उन्ठुइ हि। वासेहेङ हेन्जाङ द्‍याङगेलाइ सुइकार मापाहि, कालाउ परमेस्वर वासेहेङ चुनिहि कालाउ वासेहेङ मेनाङ जाङका थानिहि। कालाउ जेसाङ द्‍याङगेलाइ साअ् उन्ठुइहोइ धाम्खे, एन्साङ दोङ परमेस्वर बुङ नेलाइहेङ एनोङ समुहता जोम्पाका हि, जाइता परमेस्वरको आत्मा बासा हिखे, कालाउकि नेलाइ येसु ख्रिस्ट केलाइको भाअ्सिङ जेदोङ पाहि, इन्सिका पुजारिगेलाइ भोग चढाइका भाइका काम पालि दोअ्सु, जाइ परमेस्वरहेङ लेङचापालि दोखे।

⁶ इदोइ धर्मसास्तरता परमेस्वर दोअ्का भाइकाङ हि, खाङसु! का सियोन सहरता कुन्हाको उन्ठुइ भाइकाङ हासुहेङ बुङ ताअ्दोङखा। वा खाम्बा योम्पालिको भाअ्सिङ चुनिका एमि मेनाङ जाङका उन्ठुइ भाइकाङ हि। जाइ वाको ह्रुता भोरोसा पाखे वा लेदेरलि मागोइयाङ।

⁷ नेलाइ येसु ख्रिस्टता खाङधुरि पाकालाइको भाअ्सिङ या उन्ठुइ मेनाङ हेन्जा दामको हि। कालाउ धर्मसास्तर वाको ह्रुता खाङधुरि मापाका द्‍याङगेलाइको बारेता दोअ्खे कि, “जेदोङ उन्ठुइहेङ साअ् धामकालाइ साअ् धाम्लि इन्कार पाहि इङको साअ् धाम्लिको भाअ्सिङ मेनाङ जाङका उन्ठुइ जेङहि।”

⁸ कालाउ आरोङ धर्मसास्तरता लेखेका हि, इदोइ उन्ठुइ द्‍याङगेलाइहेङ भोनोइता थुन्हा पावा, इदोइ एनोङ उन्ठुइ हि, “जाइ नेलाइहेङ थुन्हा पावा।” इम्बालाइ एन्सा थुन्हावा, हाइपालिपानु इम्बालाइ परमेस्वरको बचन केम्लिसो इन्कार पाखे। इदोइ दोङ परमेस्वर इम्बालाइको भाअ्सिङ परमेस्वरको योजाना पाका हि।

⁹ कालाउ नेलाइ इन्सिका माको, हाइपालिपानु नेलाइ परमेस्वरको साल्न्हाका द्‍याङगेलाइ हिसुना, नेलाइ परमेस्वरको पुजारिगेलाइ हिसुना, जाइ राजा हि। नेलाइ परमेस्वरको सेवा पालि समरपित जेङका द्‍याङगेलाइ निजि प्रजा हिसुना। वा नेलाइहेङ कालाउ कितिकितिकासो ताइको आधभुत फाइसालामकाता चुमाका हि, कालाउकि नेलाइ परमेस्वरको भारभुसाइका कामगेलाइसो घोसाना पालि दोसु।

¹⁰ एखे नेलाइ परमेस्वरको प्रजा मान्थु घासुखेना, कालाउ एला नेलाइ परमेस्वरको प्रजा जेङका हिसुना। एखे नेलाइ परमेस्वरको क्रिपा निङका मान्थु घासुखेना, कालाउ एला नेलाइ यासेहेङ गिसुखेना, हाइपालिपानु वा लाम्फाङ नेलाइहेङ ताइको क्रिपा तिङपाका हि।

परमेस्वरको आल्ते

¹¹ आनाउ सानाइतिगेलाइ, नेलाइ इदोइ सुमिङता बिदेसिगेलाइ कालाउ प्रबासिगेलाइ भाइपाङ हिसुना। का नेलाइहेङ बिन्ति पाखा कि इङको गोताङ दुस्ट जिउको इच्छागेलाइसो दुरे हिसु, हाइपालिपानु इसिका लान्सागेलाइ जेलाउ बुङ नेलाइको आत्मा दोफा जुधेखे।

¹² परमेस्वरता खाङधुरि मापाका द्‍याङगेलाइ नेलाइको द्‍यापाहाङ हिखे कालाउ नेलाइ गलत पातेङ हिसुना दोअ्लि द्वावा। इसिका रेम्का जिबन बितिपासु कि इम्बालाइ नेलाइहेङ पाका आसल कामगेलाइ तिनावा कालाउ ख्रिस्ट घुरितेङ लोका दिना परमेस्वरहेङ महिमा प्यावा।

¹³ केलाइ गोताङ सासकको आधिनता हिलि गोइखे, जाइहेङ द्‍याङगेलाइ नियुक्त पाका हिखे, हाइपालिपानु इङको प्रभुको इच्छा दोङ। राजाको आधिनता हिसु जाइ झाराङ ह्रुता सासन पाखे।

¹⁴ हाकिमगेलाइको बुङ आधिनता हिसु, हाइपालिपानु गलत काम पाका द्‍याङगेलाइहेङ साजाइ पिलि कालाउ सहि काम पाकालाइहेङ बाखानाइ पाका काम राजाको हाकिमहेङ पिहि।

¹⁵ हाइपालिपानु इदोइ परमेस्वरको इच्छा दोङ हि, कि ब्यभारहोइ परमेस्वरहेङ मानाल्का द्‍याङगेलाइ एला केलाइहेङ धाताइका आरोप लागाइलि हिम्मत मापाङ, हाइपालिपानु इदोइ झालाझालापा हि कि इम्बालाइको धाताइका आरोप सत्ये मान्थु।

¹⁶ नेलाइहेङ दोअ्हि, हासु बुङ मान्थु जाइ नेलाइहेङ काम पालिसो रोकिलि द्वावा, हाइपालिपानु नेलाइ केलाइको प्रभु येसु ख्रिस्टसो लाम्फाङ स्वतन्तर जेङलि दोका हिसुना। कालाउ खाराका काम पालिको भाअ्सिङ यासेहेङ बाहाना माबानाइसु। भरु नेलाइ ताइको कामगेलाइता या तिङपालि गोइखे कि नेलाइ जातिङकोङ परमेस्वरको सेवकगेलाइ हिसुना।

¹⁷ झाराङ द्‍याङगेलाइहेङ आदार पासु। खान्धुराइ दादा-ओनेगेलाइ कालाउ बाइ-ओनेगेलाइहेङ प्रेम पासु, परमेस्वरसो थिसु राजाको आदार पासु।

दुख भोगिलि ख्रिस्ट नामुना

¹⁸ नेलाइ बान्धाइतिगेलाइ, जाइ साअ्गेलाइता काम पासुखेना कालाउ जाइ खान्धुराइगेलाइ हिसुना नेलाइ ताइको गिह्रिको आग्या केम्लि गोइस्वाना कालाउ दिनाङ इम्बालाइको आदार पालि गोइस्वाना। इन्सिका नेलाइ गोताङ खाल्को गिह्रिहेङ पासु, इम्बालाइ दयालु कालाउ ब्याभारिक हिलाउ बुङ माकुनु निर्दय हिलाउ बुङ।

¹⁹ हाइपालिपानु जेसापा केलाइको गल्ति मान्थुलाउ बुङ केलाइ एन्साङ दुख सहिनाखे, कालाउ परमेस्वर गोताङ काथा गिखे दोअ्तेङ सोचिन्हाखे पानु, परमेस्वर केलाइ दोफा लेङचाखे।

²⁰ कालाउ जेसापा नेलाइ गलत काम पातेङ दानाइ निन्चास्वाना पानु, नेलाइको साजाइता धैर्य हिलि हिदोइ बुङ बाखानाइको कारन मान्थु। नेलाइ रेम्का कामको भाअ्सिङ दुख भोगिस्वाना पानु, कालाउ नेलाइ धैर्य जेङस्वाना पानु कालाउ परमेस्वर लेङचाखे।

²¹ परमेस्वर नेलाइहेङ काइका को कारन एनोङ कारन इदोइ हि कि नेलाइ वाको भाअ्सिङ कस्ट भोगिलि गोइस्वाना। ख्रिस्ट, जाइ नेलाइको भाअ्सिङ कस्ट भोगिहि। वा नेलाइको उधारन हि। ओदोङ भाअ्सिङ नेलाइ वाको पाका काम आनुकरन पालि गोइखे।

²² धर्मसास्तरता लेखेका हि, “वा हेलाउ बुङ पाप मापाहि। वा हेलाउ बुङ हिदोइ बुङ धाताइका माधुइहि।”

²³ जेलाउ द्‍याङगेलाइ येसुहेङ आपामान पाहि, वा ओबालाइको आपामान मापाहि। जेलाउ द्‍याङगेलाइ वासेहेङ कस्ट पिहि, वा इङको बदलाता इम्बालाइहेङ चोट थुका पापाका कोसिस हेलाउ बुङ मापाहि। भरु वा साघाइलिको भाअ्सिङ परमेस्वरता भोरोसा ताअ्हि। वासेहेङ थाहा हिघाहि कि परमेस्वर जेलाउ बुङ द्‍याङगेलाइको न्याय उचित तरिकाहोइ पाखे।

²⁴ जेलाउ ख्रिस्ट सिहि, वा क्रुस्टता केलाइको पापको भाअ्सिङ ताइको जिउता दन्ड भोगिहि। वा इसिका पाहि कालाउकि केलाइ पाप पालि लाअ्तेङ धर्मि जेङजेङ जिबन जियाइलि तेङलि द्वाइने। कालाउ वा सहिका चोटगेलाइ पाहासो केलाइ एल्का हिनाहि।

²⁵ लाम्फा, नेलाइ दामा आवाइतेङ भेडा मेसा कोनिङ हिघासुखेना कालाउ एला नेलाइ ताइको आत्माको लाखुरिया कालाउ रक्स्या पाकाता ख्रिस्टकोता घुरितेङ लोका हिसुना।