1पतरुस 1 - Dhimal NT

¹ इदोइ पात्तारा येसु ख्रिस्टको साल्न्हाका चात्या पतरुससो हि। या पात्तारा परमेस्वरको चुनिका द्‍याङगेलाइको भाअ्सिङ लेखेका हि, जाइ परदेसि भाइपाङ जेङतेङ पोनट्स राइजि, गलातिया इलाका, कापाडोकिया, एसिया प्रदेस कालाउ बिथिनिया प्रदेसको भेनेङ-भेनेङ सहरगेलाइता हिखे।

² आबा परमेस्वर लाम्फाङ नेलाइहेङ वाको द्‍याङ जेङलि कालाउ पबित्तरो आत्माको काम पाहासो नेलाइहेङ पबित्तरो बानाइलि चुनिलि निर्नय पाका हिघाहि। वा इसिका पाहि कालाउकि नेलाइ येसु ख्रिस्टको आग्या केम्सु कालाउ वाको हिति पाहासो सुद्द जेङलि दोसु। का प्रार्थाना पाखा कि परमेस्वर नेलाइहेङ नुगामारि थेकापा आनुग्रह कालाउ सान्ति प्याको।

सिन्हुका आस

³ केलाइको प्रभु येसु ख्रिस्टको आबा कालाउ परमेस्वरको बाखानाइ ज्याको। परमेस्वर केलाइ दोफाको माहान क्रिपा होइ वा केलाइहेङ एनोङ नावा जिबन पिका हि। हाइपालिपानु परमेस्वर येसु ख्रिस्टहेङ सिकासो सिन्चाल पाका हि, वा दोङ केलाइहेङ धुक्कसो बान्चिलि दोका बानाइका हि, इङको दोअ्का वा केलाइहेङ प्रतिग्या पाका काथा निङका पुरा आस पाका हि।

⁴ परमेस्वर ताइको द्‍याङगेलाइको भाअ्सिङ ताअ्का नुगामारि आसिस निङका आस पानाखे। वा इम्बालाइको भाअ्सिङ इङको आसिस स्वर्गता ताअ्खे, जेता इङको आसिस नासालि माकुनु बिगिरलि माकुनु राम्लि माद्वाङ।

⁵ कालाउ नेलाइको खाङधुरि पाहासोङ, परमेस्वर ताइको सरबुङ पाहासो नेलाइहेङ बान्चिपाङ, जेलाउ थेकापा नेलाइ साइतानको सरबुङसो पुरा मालान्हास्वाना। कालाउ ख्रिस्ट लोका दिनाता या पुरा जेनावा।

⁶ नेलाइ इदोइ गोताङ काथागेलाइको बारेता लेङचालि गोइखे, जेसाङ एला आतुइसा सोमोइको भाअ्सिङ नेलाइ खाल-खाल्को कस्ट भोगिलि गोइखे।

⁷ इदोइ समस्यागेलाइको उदेस्य इदोइ तिङपालिको भाअ्सिङ हि कि नेलाइ जातिङकोङ परमेस्वरता भोरोसा ताअ्सुखेना कि माताअ्सुखेना। नेलाइको येसु ख्रिस्टता खाङधुरि सोना खाङतेङ हेन्जा दामको हि। जेसाङ नासाका सोनाहेङ मेहोइ जाचिखे कालाउ सुद्द पाखे, जेसापा नेलाइको खाङधुरि मे भाइपा जाचिकासो जाचितेङ बुङ बल्लियाका हितेङ हिखे पानु, इदोइहोइ येसु ख्रिस्ट धुरितेङ लोका दिनाता नेलाइहेङ हेन्जा बाखिन, महिमा कालाउ सम्मान चुमावा।

⁸ नेलाइ येसुहेङ हेलाउ बुङ तिङका मान्थु सुन्हा, कालाउ बुङ नेलाइ वासेहेङ प्रेम पासुखेना, नेलाइ वासेहेङ एला मातिङसुखेना, कालाउ नेलाइ वाकोता खाङधुरि पासुखेना। ओदोङ भाअ्सिङ नेलाइ हेन्जा लेङचा सुखेना। नेलाइ हेथे लेङचा सुखेना दोअ्तेङ ब्याख्या पालि सब्दगेलाइ दोङ मान्थु।

⁹ हाइपालिपानु परमेस्वर नेलाइको आत्माहेङ पुरा रुपता पापको साजाइसो बान्चिपातेङ हि। इदोइ येसु ख्रिस्टता नेलाइको खाङधुरिको इनाम हि।

¹⁰ इदोइ मुक्तिको बारेता परमेस्वरको बक्तागेलाइ आझाइ हेन्जा गिलि भोघाखे। इम्बालाइ आगमबानि पाहि कि परमेस्वर नेलाइहेङ बान्चिपालिको भाअ्सिङ नेलाइको पक्स्यता हेसा दायाका ब्यभार पावा, जाइको नेलाइ योग्यको मान्थु घासुखेना। इम्बालाइ उत्तारा निङलिको भाअ्सिङ ध्यान पितेङ आध्यान पाहि।

¹¹ ख्रिस्टको आत्मा परमेस्वरको बक्तागेलाइ ह्रुता हिघाहि कालाउ इम्बालाहेङ ख्रिस्टको कस्टगेलाइ कालाउ इङको दुखगेलाइ न्हुसो निङका महिमाको बारेता लाम्फाङ दोअ्का हिघाहि। जेदोङ इङको दुख कस्टगेलाइ न्हुसो ल्वाङ, दोअ्काताङ हिघाहि।

¹² कालाउ परमेस्वर इङको बक्तागेलाइहेङ दोअ्हि कि इम्बालाइको सन्देसगेलाइ ताइको भाअ्सिङ माको भरु नेलाइको भाअ्सिङ दोङ हि। इङको सन्‍देस येसु ख्रिस्टको बारेता सुसमाचार दोङ जेदोङ नेलाइ एला हिङका हिसुना। परमेस्वर स्वर्गसो ताइको पबित्तरो आत्मा पाहासो द्‍याङगेलाइहेङ नेलाइको भाअ्सिङ सुसमाचार प्राचार पालि साघाइलि दिङगिल्हि। या गोताङ इदोइ झोको आचाम्माको हि कि स्वर्गदुतगेलाइ बुङ उत्सुकता दोफाङ इङको काथागेलाइ जेङका खाङतेङ हि।

पबित्तरो जेङसु

¹³ ओदोङ भाअ्सिङ, नेलाइ हाइ पादोङ सुखेना दोअ्का बारे रेम्फा सोचिसु कालाउ आत्माहेङ तहता ताअ्सु मुक्ति निङका आस पासु, जेदोङ आनुग्रहसो लोखे, जाइ नेलाइहेङ येसु ख्रिस्ट इदोइ सुमिङता धुरितेङ लोका दिनाता प्यावा।

¹⁴ ताइको आबाको आग्या केम्का केलाइको जामाललाइ भाइपा परमेस्वरको आग्या केम्सु, नेलाइ परमेस्वरको सत्येताहेङ मागिका बेला कोनिङ इच्छा जेङका मारेम्का काम मापासु।

¹⁵ नेलाइको पाका गोताङ काथाता ताइमिहेङ मारेम्का काथासो खेङसु, हाइपालिपानु परमेस्वर जाइ नेलाइहेङ चुनिहि वा पबित्तरो हि।

¹⁶ हाइपालिपानु धर्मसास्तरता लेखेका हि, “नेलाइ पबित्तरो हिलि गोइखे हाइपालिपानु का पबित्तरो हिघा।”

¹⁷ जेलाउ नेलाइ प्रार्थाना पासुखेना, नेलाइ परमेस्वरहेङ ताइको आबाको रुपता सम्बोधन पासुखेना। कालाउ या फोम ताअ्सु कि वा झाराङ द्‍याङको झाराङको पाका काम आन्सार पक्स्य पात मापासिङ न्याय पाखे। ओदोङ भाअ्सिङ नेलाइ प्रिथिबिता परदेसिगेलाइको रुपता हिलाउ नेलाइ वाको भाअ्सिङ बारका साम्मानको दोफाङ बान्चिलि गोइखे।

¹⁸ नेलाइहेङ थाहा दोङ हि हानिका दिनागेलाइता नेलाइ ब्यर्थ तरिकाहोइ ताइको पुर्खागेलाइ कोनिङ जिबन बितिपातेङ हिघासुखेना, जेदोङ तरिकाहोइ नेलाइको पुर्खागेलाइ जिबन जियाइ घाखे। कालाउ नेलाइ इन्सिका बेक्कारको जिबनसो बान्चिपाका हिसुना। नेलाइ सोना माकुनु चान्दि भाइपा नासाका आमेनेसो चोल्न्हाका माको।

¹⁹ कालाउ ख्रिस्टको मेनाङ जाङका हितिहोइ, जाइ सुद्द भेडाको भाइका हिघाहि।

²⁰ इदोइ सुमिङ सिरजाइन्हाका खान्तेङ लाम्फाङ, येसु ख्रिस्ट मुक्ति दाता हिका ह्याङ दोअ्तेङ परमेस्वर सोमोइ खान्तेङ लाम्फाङ दोङ पाक्का पाका हिघाहि। कालाउ वा इदोइ आम्तिम दिनागेलाइता इदोइ सुमिङता नेलाइको फाइदाको भाअ्सिङ लोहि।

²¹ हाइपालिपानु ख्रिस्टको पाका कामको कारनहोइ, नेलाइ एला परमेस्वरता खाङधुरि पासुखेना। कालाउ नेलाइ ताइको खाङधुरि कालाउ आस परमेस्वरता ताअ्का हिसुना, हाइपालिपानु वा ख्रिस्टहेङ सिकासो सिन्चाल पाहि कालाउ वासेहेङ बारका महिमा पिहि।

²² हाइपालिपानु नेलाइ सत्ये पालन पातेङ सुद्द जेङका हिसुना, एला नेलाइ ताइको दोफाङको खान्धुराइगेलाइहेङ चोखो प्रेम पासु। कालाउ एमिसो भेनेङहेङ ताइको ह्रदयको लिता सोङ प्रेम पातेङ हिसु।

²³ हाइपालिपानु नेलाइ परमेस्वरसो नावा जिबन निङका हिसुन्हा। कालाउ या जिबन नासाका काथासो निङका मान्थु सुन्हा कालाउ जेलाउलाउको भाअ्सिङ हिका काथासो निङका हिसुन्हा। केलाइ या नावा जिबन सिन्हुका कालाउ आनान्त परमेस्वरको बचनसो निङका हिनाहि।

²⁴ धर्मसास्तर एसा दोअ्खे, “गोताङ द्‍याङगेलाइ घासि भाइका दोङ हि कालाउ वाको गोताङ सोबाइका घासिको ल्हे भाइका हि, घासि चुटावा, कालाउ ल्हे भोनोइता हुल्लावा।

²⁵ कालाउ प्रभुको बचन जेलाउलाउ बुङ हितेङ हिखे।” कालाउ नेलाइहेङ प्राचार पाका सुसमाचारको बचन इदोइ दोङ हि।