१ युहन्‍ना 2 - Dhimal NT

ख्रिस्ट केलाइहेङ साघाइका

¹ नेलाइ जाइ काङको आनाउ जामाललाइ भाइका हिसुन्हा, नेलाइ पाप मापासु दोअ्तेङ का इदोइ काथा नेलाइहेङ लेखेतेङ हिघा। कालाउ हिदोइ बुङ द्‍याङ पाप पाखे पानु बुङ आबा परमेस्वर दोफा केलाइको पक्स्यता धुइपिका एमि हि, जाइ केलाइको पाप स्यामाको भाअ्सिङ परमेस्वर दोफा बिन्ति पापिखे। उङको द्‍याङ दोङ येसु ख्रिस्ट हि, जाइ परमेस्वरको आगाता पुरा रुपता ठिक हि।

² कालाउ केलाइको पापको भाअ्सिङ ख्रिस्ट बलि जेङपिहि, कालाउ केलाइको भाअ्सिङ खिनिङ माको, कालाउ सारा सुमिङको द्‍याङगेलाइको पापको भाअ्सिङ बुङ।

³ जेसापा केलाइ परमेस्वरको आग्यागेलाइ केम्न्हाहि पानु एसा पासोङ केलाइ थाहा गिलि द्वाङ, कि केलाइ वासेहेङ नाल्नाखे।

⁴ जाइ का परमेस्वरहेङ नाल्खा दोअ्खे, कालाउ वाको आग्यागेलाइ उलङगन पाखे, उङको धाताइका हि, उङकोता सत्ये मान्थु।

⁵ कालाउ जाइ परमेस्वरको बचन केम्खे, वाकोता परमेस्वरको प्रेम जातिङकोङ सिद्द जेङका हिखे। केलाइ परमेस्वर दोफा ए जेङतेङ हिनाहि दोअ्का काथा इदोइसोङ निस्चित जेङन्हाखे।

⁶ परमेस्वर दोफा ए हिनाहि दोअ्का द्‍याङ ताइमिङ बुङ येसुको भाइपा जिबन जियाइलि गोइखे।

नावा आग्या

⁷ ओइ आनाउ खान्धुराइ ओनेगेलाइ, का नेलाइहेङ हिदोइ बुङ नावा आग्या लेखेका माको, कालाउ ओदोङ पुरना आग्या लेखेदोङखा जेदोङ सुरुसोङ नेलाइ दोफा हिघाहि। पुरना आग्या नेलाइ हिङका बचन हि, जेलाउसो नेलाइ ख्रिस्टता खाङधुरि पासुन्हा।

⁸ कालाउ बुङ एनोङ नावा आग्या का नेलाइहेङ लेखेदोङखा, हाइपालिपानु इदोइ आग्याको सत्येता ख्रिस्टता तिङचाहि कालाउ नेलाइकोता बुङ तिङचाल्हाहि। हाइपालिपानु कितिकितिका भाइकाङ दुस्टता बितितेङ हि कालाउ परमेस्वरको सत्ये फाइसालामका भाइकाङ आन्चासोङ जोल्तेङ हि।

⁹ जाइ फाइसालामका भाइकाङ आसाल जिबन जियाइका हिघा दोअ्तेङ दोअ्खे कालाउ ताइको खान्धुराइ ओनेगेलाइहेङ मन्दा माताखे, वा एला थेकापा बुङ कितिकितिका भाइका दुस्टता जिबन जियाइतेङ हिखे।

¹⁰ जाइ ताइको खान्धुराइ ओनेगेलाइहेङ प्रेम पाखे, वा फाइसालामकाता आसल जिबन जियाइका हिखे, कालाउ ओदोङ भाअ्सिङ वाकोता इसिका हिदोइ बुङ काथा मान्थुखे जाइ आरु द्‍याङको भाअ्सिङ पापको कारन ज्याको।

¹¹ कालाउ जाइ ताइको खान्धुराइ ओनेगेलाइहेङ मन्दा माताखे, उङको कितिकितिकाता भाइकाङ दुस्टताको जिबन जियाइखे, कालाउ कितिकितिका भाइकाङ दुस्टता ता तेगिल्खे, कालाउ उङको हिसो हानितेङ हि, इङको थाहा मानिङखे, हाइपालिपानु कितिकितिका भाइकाङ दुस्टताहोइ वासेहेङ कान्हाँ बानाइका हिखे।

¹² नेलाइ जाइ काङको आनाउ जामाललाइ भाइकाङ हिसुन्हा, का नेलाइको भाअ्सिङ लेखेदोङखा, हाइपालिपानु येसु ख्रिस्ट नाङको भाअ्सिङ पाका काम पाहासो परमेस्वर नेलाइको पाप स्यामा पापिका हि।

¹³ नेलाइ जाइ नावा खान्धुराइगेलाइ भाइकाङ हिसुन्हा, का नेलाइको भाअ्सिङ लेखेदोङखा, हाइपालिपानु लाम्फासोङ दोङ हिका येसु ख्रिस्टहेङ नेलाइ नाल्सुखेना। नावा खान्धुराइगेलाइ, का नेलाइको भाअ्सिङ लेखेदोङखा, हाइपालिपानु नेलाइ इङको साइतानहेङ जितिका हिसुन्हा। काङको म्हुइका जामाललाइ भाइकाङ का नेलाइको भाअ्सिङ लेखेदोङखा, हाइपालिपानु नेलाइ आबा परमेस्वरहेङ नाल्का हिसुन्हा।

¹⁴ नेलाइ जाइ नावा खान्धुराइगेलाइ भाइकाङ हिसुन्हा, का नेलाइको भाअ्सिङ लेखेदोङखा, हाइपालिपानु लाम्फासो दोङ हिका येसु ख्रिस्टहेङ नेलाइ नाल्सुखेना। नावा खान्धुराइगेलाइ, का नेलाइको भाअ्सिङ लेखेदोङखा, हाइपालिपानु नेलाइ खाङधुरिता बल्लियाका हिसुन्हा, कालाउ परमेस्वरको बचन नेलाइकोता हिखे, कालाउ नेलाइ इङको साइतानहेङ जितिका हिसुन्हा।

सुमिङको बिसोइता चेताउनि

¹⁵ सुमिङहेङ माकुनु सुमिङता हिका हिदोइ बुङ आमेनेहेङ प्रेम मापासु, जेसापा हिदोइ बुङ द्‍याङ सुमिङहेङ प्रेम पाखे पानु आबा परमेस्वरको प्रेम वाकोता माहिखे।

¹⁶ हाइपालिपानु सुमिङता हिका गोताङ आनेमाने जिसिकाङ जिउको लान्छा, मिसियाँको लान्छा, जिबनको घमन्डि आबा परमेस्वरसो लोका माको, भरु सुमिङसो लोका हि।

¹⁷ सुमिङ कालाउ इङकोता हिका द्‍याङगेलाइहेङ गोइका गोताङ काथा मोतेङ हानावा, कालाउ परमेस्वरको आग्या केम्का द्‍याङ चाहि जेलाउको भाअ्सिङ ह्यावा।

ख्रिस्टको सतुरु

¹⁸ नेलाइ जाइ काङको भाअ्सिङ जामाललाइ भाइकाङ हिसुना, का नेलाइहेङ दोअ्खा कि, इदोइ सुमिङको आम्तिम दिनागेलाइ हि। ख्रिस्ट बिरोधि लोतेङ हि दोअ्का नेलाइ हिङकाङ हिसुना। एला हेन्जाङ ख्रिस्ट बिरोधि लोका हि। ओदोङ भाअ्सिङ केलाइ गिनाखे, कि सुमिङको आम्तिम दिनागेलाइ इदोइ दोङ हि।

¹⁹ ख्रिस्ट बिरोधिगेलाइ केलाइको मन्डलिसो ओल्लेतेङ हानिहि, हाइपालिपानु इम्बालाइ केलाइको मान्थुघाहि। जेसापा इम्बालाइ केलाइ भाइपाङ जातिङको खान्धुराइ जेङका मान्थुघाहि माकुनु इम्बालाइ केलाइ दोफा हिधावा कालाउ इम्बालाइ झाराङ केलाइको माको रोइस दोअ्का काथा देखाल पापालि इम्बालाइ केलाइको मन्डलिसो ओल्लेतेङ हानिका हि।

²⁰ कालाउ नेलाइहेङ पबित्तरो आत्मा ख्रिस्ट पाहासो पिका हि, कालाउ नेलाइ झाराङ परमेस्वर देखाल पापिका सत्ये गिसुखेना।

²¹ नेलाइ सत्येहेङ मागिसुखेना दोअ्तेङ का लेखेका माको, कालाउ हिदोइ बुङ धाताइका सिक्स्या परमेस्वर देखाल पापिका सत्येसो मालोखे दोअ्तेङ नेलाइ गिका हिनाङ का नेलाइको भाअ्सिङ लेखेदोङखा।

²² धातुवा हासु? वा दोङ, जाइ येसु दोङ ख्रिस्ट हि दोअ्का काथा मन्दा माताखे। आबा परमेस्वर कालाउ चानहेङ जाइ मन्दा माताखे, ख्रिस्ट बिरोधि इङको दोङ हि।

²³ परमेस्वरको चानहेङ मन्दा माताका हिदोइ बुङ द्‍याङ आबा परमेस्वर दोफा ए जेङतेङ माहिखे। जाइ चानहेङ सुइकार पाखे वा आबा परमेस्वर दोफा ए जेङतेङ हिखे।

²⁴ जेदोङ सत्ये सन्‍देस नेलाइ येसुहेङ खाङधुरि पाका सोमोइसोङ हिङका हिसुना, इङको काथा नेलाइकोता हिनु नेलाइ चान कालाउ आबा परमेस्वर दोफा ए दोफाङ हिस्वाना।

²⁵ परमेस्वर केलाइहेङ प्रतिग्या पाका हि, कि वा केलाइहेङ आनान्त जिबन प्याङ।

²⁶ कालाउ का नेलाइहेङ इङको मन्डलिहेङ लाअ्तेङ हानेका द्‍याङगेलाइको बिसोइता चेताउनि पिदोङखा, जाइ नेलाइहेङ धाताइका सिक्स्या पाहासो धोका पिलि कोसिस पादोङखे।

²⁷ नेलाइ जाइ पबित्तरो आत्मा ख्रिस्टसो निङका हिसुन्हा, वा नेलाइकोता ह्यावा। ओदोङ भाअ्सिङ हासु बुङ नेलाइहेङ सत्येको बारेता धिरपालि आवस्यक मान्थु। याको सातोता पबित्तरो आत्मा नेलाइहेङ ओदोङ काथागेलाइको बिसोइता सत्ये थाहा गिलि साघाइयाङ। कालाउ जेदोङ पबित्तरो आत्मा नेलाइहेङ धिरपाङ इङको पुर्न रितहोइ सत्ये हि, इङको हिदोइ बुङ धाताइका मान्थु। ओदोङ भाअ्सिङ ख्रिस्ट दोफा ए जेङतेङ हिसु जेसाङ पबित्तरो आत्मा नेलाइहेङ दोअ्का हि।

परमेस्वरको जामालाइ

²⁸ नेलाइ जाइ काङको आनाउ जामाललाइ भाइकाङ हिसुना, लागातार ख्रिस्टता हितेङ हिसु, कालाउकि ख्रिस्ट आरोङ लोलाउ केलाइता हिम्मत ह्याको, कालाउ वाको आगमनता वाको आगाता केलाइ लेदेरलि मागोइयाको।

²⁹ ख्रिस्ट परमेस्वरको आगाता जेदोङ आसल हि ओदोङ काम पाखे दोअ्का काथा जेसापा नेलाइ गिस्वाना पानु या काथाता नेलाइता निस्चित ज्याको, कि आसल काम पाका हासुलाउ बुङ परमेस्वरको सान्तानगेलाइ दोङ।