१ युहन्‍ना 1 - Dhimal NT

जिबनको बचन

¹ केलाइ एमि द्‍याङको बारेता लेखेदोङन्हाखे जेदोङ परमेस्वरको बचन हि कालाउ द्‍याङगेलाइहेङ जातिङको जिबन पिखे, वा सुमिङ सिरजाइन्हा खान्तेङ लाम्फासोङ हिघाहि। कालाउ जेदोङ केलाइ एला हिङका हिनाहि कालाउ तिङका हिनाहि, कालाउ केलाइ ताइकोङ खुरहोइ साइका हिनाहि।

² परमेस्वर जाइ जातिङको जिबन पिखे, कालाउ द्‍याङगेलाइहेङ तिङपाहि, ओदोङ भाअ्सिङ केलाइ वाको सत्येताको बारेता दोअ्न्हाखे, कि जिबन पिका द्‍याङ जेलाउलाउको भाअ्सिङ ह्याङ कालाउ हेन्जाङ लाम्फासोङ आबा परमेस्वर दोफा हिघाहि, कालाउ एला परमेस्वर वासेहेङ केलाइकोता तिङपाका हि।

³ ओदोङ भाअ्सिङ जेदोङ येसुको बारेता केलाइ तिङका कालाउ हिङका हिनाहि, इङको केलाइ नेलाइहेङ हिङपाङ, कालाउकि केलाइ दोफा नेलाइको सङगति जेनाको। जेसाङ केलाइको सङगति आबा कालाउ वाको चान येसु ख्रिस्ट दोफा हि।

⁴ केलाइको आनान्द पुरा ज्याको दोअ्तेङ केलाइ इदोइ काथागेलाइ लेखेदोङन्हाखे।

परमेस्वर फाइसालामका हि

⁵ कालाउ जेदोङ सन्‍देस केलाइ येसुसो हिङन्हाहि कालाउ नेलाइहेङ हिङपाङ, इङको इदोइ दोङ हि, कि परमेस्वर आसाल फाइसालामका भाइकाङ सुद्द हि। कालाउ वाकोता हेथे बुङ कितिकितिका भाइका दुस्टता मान्थु।

⁶ जेसापा परमेस्वर दोफा केलाइको सङगति हि, दोअ्तेङ केलाइ दोअ्नाखे, कालाउ आझाइ कितिकितिकाता भाइका दुस्टता जिबन जियाइन्हाखे पानुते केलाइ धाताइन्हाखे कालाउ सत्येको आन्सार जिबन माजियाइन्हाखे।

⁷ कालाउ जेसाङ परमेस्वर ताइको पबित्तरोता आन्सार जेलाउ बुङ आसाल काम पाखे। एन्साङ जेलाउ केलाइ परमेस्वरको फाइसालामकाहोइ तिङपाका आसल काम पाखे कालाउ केलाइको सङगति एमिसो-भेनेङ दोफा हिखे, कालाउ वाको चान येसुको हितिहोइ केलाइ झाराङहेङ पापसो सुद्द पाखे।

⁸ जेसापा केलाइता पाप मान्थु दोअ्तेङ केलाइ दोअ्नाखे पानुते केलाइ ताइमिहेङ धोका पिनाखे, कालाउ परमेस्वर तिङपाका सत्ये काथा मागिन्हाखे।

⁹ जेसापा केलाइ ताइको पाप परमेस्वरको आगाता सुइकार पानाखे पानु वा केलाइको पाप स्यामा पापिखे कालाउ गोताङ मारेम्का कामगेलाइसो केलाइहेङ सुद्द पाङ। हाइपालिपानु वा जेदोङ दोअ्खे ओदोङ पाखे कालाउ जेलाउ बुङ ठिक काम खिनिङ पाखे।

¹⁰ जेसापा केलाइ पाप पाका मान्थुन्हाहि दोअ्तेङ केलाइ दोअ्नाखे पानु केलाइ परमेस्वरहेङ धाताइका बानाइन्हाखे, कालाउ केलाइ वाको बचनहेङ केलाइ सुइकार दोङ पाका मान्थुन्हाहि।